അഥ സപ്തചത്വാരിംശഃ സർഗഃ
സേനാപതീൻപഞ്ച സ തു പ്രമാപിതാൻ
	ഹനൂമതാ സാനുചരാൻസവാഹനാൻ ।
നിശമ്യ രാജാ സമരോദ്ധതോന്മുഖം
	കുമാരമക്ഷം പ്രസമൈക്ഷതാക്ഷം ॥1॥
സ തസ്യ ദൃഷ്ട്യർപണസമ്പ്രചോദിതഃ
	പ്രതാപവാൻകാഞ്ചനചിത്രകാർമുകഃ।
സമുത്പപാതാഥ സദസ്യുദീരിതോ
	ദ്വിജാതിമുഖ്യൈർഹവിഷേവ പാവകഃ॥2॥
തതോ മഹാൻ ബാലദിവാകരപ്രഭം
	പ്രതപ്തജാംബൂനദജാലസന്തതം ।
രഥാം സമാസ്ഥായ യയൗ സ വീര്യവാൻ
	മഹാഹരിം തം പ്രതി നൈരൃതർഷഭഃ॥3॥
തതസ്തപഃസംഗ്രഹസഞ്ചയാർജിതം
	പ്രതപ്തജാംബൂനദജാലചിത്രിതം ।
പതാകിനം രത്നവിഭൂഷിതധ്വജം
	മനോജവാഷ്ടാശ്വവരൈഃ സുയോജിതം ॥4॥
സുരാസുരാധൃഷ്യമസംഗചാരിണം
	തഡിത്പ്രഭം വ്യോമചരം സമാഹിതം ।
സതൂണമഷ്ടാസിനിബദ്ധബന്ധുരം
	യഥാക്രമാവേശിതശക്തിതോമരം ॥5॥
വിരാജമാനം പ്രതിപൂർണവസ്തുനാ
	സഹേമദാമ്നാ ശശിസൂര്യവർചസാ ।
ദിവാകരാഭം രഥമാസ്ഥിതസ്തതഃ
	സ നിർജഗാമാമരതുല്യവിക്രമഃ॥6॥
സ പൂരയൻഖം ച മഹീം ച സാചലാം
	തുരംഗമതംഗമഹാരഥസ്വനൈഃ।
ബലൈഃ സമേതൈഃ സഹതോരണസ്ഥിതം
	സമർഥമാസീനമുപാഗമത്കപിം ॥7॥
സ തം സമാസാദ്യ ഹരിം ഹരീക്ഷണോ
	യുഗാന്തകാലാഗ്നിമിവ പ്രജാക്ഷയേ ।
അവസ്ഥിതം വിസ്മിതജാതസംഭ്രമം
	സമൈക്ഷതാക്ഷോ ബഹുമാനചക്ഷുഷാ ॥8॥
സ തസ്യ വേഗം ച കപേർമഹാത്മനഃ
	പരാക്രമം ചാരിഷു രാവണാത്മജഃ।
വിചാരയൻ സ്വം ച ബലം മഹാബലോ
	യുഗക്ഷയേ സൂര്യ ഇവാഭിവർധത ॥9॥
സ ജാതമന്യുഃ പ്രസമീക്ഷ്യ വിക്രമം
	സ്ഥിതഃ സ്ഥിരഃ സംയതി ദുർനിവാരണം ।
സമാഹിതാത്മാ ഹനുമന്തമാഹവേ
	പ്രചോദയാമാസ ശിതൈഃ ശരൈസ്ത്രിഭിഃ॥10॥
തതഃ കപിം തം പ്രസമീക്ഷ്യ ഗർവിതം
	ജിതശ്രമം ശത്രുപരാജയോചിതം ।
അവൈക്ഷതാക്ഷഃ സമുദീർണമാനസം
	സബാണപാണിഃ പ്രഗൃഹീതകാർമുകഃ॥11॥
സ ഹേമനിഷ്കാംഗദചാരുകുണ്ഡലഃ
	സമാസസാദാശു പരാക്രമഃ കപിം ।
തയോർബഭൂവാപ്രതിമഃ സമാഗമഃ
	സുരാസുരാണാമപി സംഭ്രമപ്രദഃ॥12॥
രരാസ ഭൂമിർന തതാപ ഭാനുമാൻ
	വവൗ ന വായുഃ പ്രചചാല ചാചലഃ।
കപേഃ കുമാരസ്യ ച വീര്യസംയുഗം
	നനാദ ച ദ്യൗരുദധിശ്ച ചുക്ഷുഭേ ॥13॥
സ തസ്യ വീരഃ സുമുഖാൻപതത്രിണഃ
	സുവർണപുംഖാൻസവിഷാനിവോരഗാൻ ।
സമാധിസംയോഗവിമോക്ഷതത്ത്വവി-
	ച്ഛരാനഥ ത്രീൻകപിമൂർധ്ന്യതാഡയത് ॥14॥
സ തൈഃ ശരൈർമൂർധ്നി സമം നിപാതിതൈഃ
	ക്ഷരന്നസൃഗ്ദിഗ്ധവിവൃത്തനേത്രഃ।
നവോദിതാദിത്യനിഭഃ ശരാംശുമാൻ
	വ്യരാജതാദിത്യ ഇവാംശുമാലികഃ॥15॥
തതഃ പ്ലവംഗാധിപമന്ത്രിസത്തമഃ
	സമീക്ഷ്യ തം രാജവരാത്മജം രണേ ।
ഉദഗ്രചിത്രായുധചിത്രകാർമുകം
	ജഹർഷ ചാപൂര്യത ചാഹവോന്മുഖഃ॥16॥
സ മന്ദരാഗ്രസ്ഥ ഇവാംശുമാലീ
	വിവൃദ്ധകോപോ ബലവീര്യസംവൃതഃ।
കുമാരമക്ഷം സബലം സവാഹനം
	ദദാഹ നേത്രാഗ്നിമരീചിഭിസ്തദാ ॥17॥
തതഃ സ ബാണാസനശക്രകാർമുകഃ
	ശരപ്രവർഷോ യുധി രാക്ഷസാംബുദഃ।
ശരാന്മുമോചാശു ഹരീശ്വരാചലേ
	ബലാഹകോ വൃഷ്ടിമിവാചലോത്തമേ ॥18॥
കപിസ്തതസ്തം രണചണ്ഡവിക്രമം
	പ്രവൃദ്ധതേജോബലവീര്യസായകം ।
കുമാരമക്ഷം പ്രസമീക്ഷ്യ സംയുഗേ
	നനാദ ഹർഷാദ് ഘനതുല്യനിഃസ്വനഃ॥19॥
സ ബാലഭാവാദ്യുധി വീര്യദർപിതഃ
	പ്രവൃദ്ധമന്യുഃ ക്ഷതജോപമേക്ഷണഃ।
സമാസസാദാപ്രതിമം രണേ കപിം
	ഗജോ മഹാകൂപമിവാവൃതം തൃണൈഃ॥20॥
സ തേന ബാണൈഃ പ്രസഭം നിപാതിതൈ-
	ശ്ചകാര നാദം ഘനനാദനിഃസ്വനഃ।
സമുത്സഹേനാശു നഭഃ സമാരുജൻ
	ഭുജോരുവിക്ഷേപണഘോരദർശനഃ॥21॥
തമുത്പതന്തം സമഭിദ്രവദ്ബലീ
	സ രാക്ഷസാനാം പ്രവരഃ പ്രതാപവാൻ ।
രഥീ രഥശ്രേഷ്ഠതരഃ കിരഞ്ഛരൈഃ
	പയോധരഃ ശൈലമിവാശ്മവൃഷ്ടിഭിഃ॥22॥
സ താഞ്ഛരാംസ്തസ്യ ഹരിർവിമോക്ഷയം-
	ശ്ചചാര വീരഃ പഥി വായുസേവിതേ ।
ശരാന്തരേ മാരുതവദ്വിനിഷ്പതൻ
	മനോജവഃ സംയതി ഭീമവിക്രമഃ॥23॥
തമാത്തബാണാസനമാഹവോന്മുഖം
	ഖമാസ്തൃണന്തം വിവിധൈഃ ശരോത്തമൈഃ।
അവൈക്ഷതാക്ഷം ബഹുമാനചക്ഷുഷാ
	ജഗാമ ചിന്താം സ ച മാരുതാത്മജഃ॥24॥
തതഃ ശരൈർഭിന്നഭുജാന്തരഃ കപിഃ
	കുമാരവര്യേണ മഹാത്മനാ നദൻ ।
മഹാഭുജഃ കർമവിശേഷതത്ത്വവിദ്
	വിചിന്തയാമാസ രണേ പരാക്രമം ॥25॥
അബാലവദ്ബാലദിവാകരപ്രഭഃ
	കരോത്യയം കർമ മഹന്മഹാബലഃ।
ന ചാസ്യ സർവാഹവകർമശാലിനഃ
	പ്രമാപണേ മേ മതിരത്ര ജായതേ ॥26॥
അയം മഹാത്മാ ച മഹാംശ്ച വീര്യതഃ
	സമാഹിതശ്ചാതിസഹശ്ച സംയുഗേ ।
അസംശയം കർമഗുണോദയാദയം
	സനാഗയക്ഷൈർമുനിഭിശ്ച പൂജിതഃ॥27॥
പരാക്രമോത്സാഹവിവൃദ്ധമാനസഃ
	സമീക്ഷതേ മാം പ്രമുഖോഽഗ്രതഃ സ്ഥിതഃ।
പരാക്രമോ ഹ്യസ്യ മനാംസി കമ്പയേത്
	സുരാസുരാണാമപി ശീഘ്രകാരിണഃ॥28॥
ന ഖല്വയം നാഭിഭവേദുപേക്ഷിതഃ
	പരാക്രമോ ഹ്യസ്യ രണേ വിവർധതേ ।
പ്രമാപണം ഹ്യസ്യ മമാദ്യ രോചതേ
	ന വർധമാനോഽഗ്നിരുപേക്ഷിതും ക്ഷമഃ॥29॥
ഇതി പ്രവേഗം തു പരസ്യ തർകയൻ
	സ്വകർമയോഗം ച വിധായ വീര്യവാൻ ।
ചകാര വേഗം തു മഹാബലസ്തദാ
	മതിം ച ചക്രേഽസ്യ വധേ തദാനീം ॥30॥
സ തസ്യ താനഷ്ട വരാൻ മഹാഹയാൻ
	സമാഹിതാൻഭാരസഹാന്വിവർതനേ ।
ജഘാന വീരഃ പഥി വായുസേവിതേ
	തലപ്രഹാരൈഃ പവനാത്മജഃ കപിഃ॥31॥
തതസ്തലേനാഭിഹതോ മഹാരഥഃ
	സ തസ്യ പിംഗാധിപമന്ത്രിനിർജിതഃ।
സ ഭഗ്നനീഡഃ പരിവൃത്തകൂബരഃ
	പപാത ഭൂമൗ ഹതവാജിരംബരാത് ॥32॥
സ തം പരിത്യജ്യ മഹാരഥോ രഥം
	സകാർമുകഃ ഖഡ്ഗധരഃ ഖമുത്പതൻ ।
തതോഽഭിയോഗാദൃഷിരുഗ്രവീര്യവാൻ
	വിഹായ ദേഹം മരുതാമിവാലയം ॥33॥
കപിസ്തതസ്തം വിചരന്തമംബരേ
	പതത്രിരാജാനിലസിദ്ധസേവിതേ ।
സമേത്യ തം മാരുതവേഗവിക്രമഃ
	ക്രമേണ ജഗ്രാഹ ച പാദയോർദൃഢം ॥34॥
സ തം സമാവിധ്യ സഹസ്രശഃ കപി-
	ര്മഹോരഗം ഗൃഹ്യ ഇവാണ്ഡജേശ്വരഃ।
മുമോച വേഗാത്പിതൃതുല്യവിക്രമോ
	മഹീതലേ സംയതി വാനരോത്തമഃ॥35॥
സ ഭഗ്നബാഹൂരുകടീപയോധരഃ
	ക്ഷരന്നസൃങിനർമഥിതാസ്ഥിലോചനഃ।
സംഭിന്നസന്ധിഃ പ്രവികീർണബന്ധനോ
	ഹതഃ ക്ഷിതൗ വായുസുതേന രാക്ഷസഃ॥36॥
മഹാകപിർഭൂമിതലേ നിപീഡ്യ തം
	ചകാര രക്ഷോഽധിപതേർമഹദ്ഭയം ।
മഹർഷിഭിശ്ചക്രചരൈഃ സമാഗതൈഃ
	സമേത്യ ഭൂതൈശ്ച സയക്ഷപന്നഗൈഃ।
സുരൈശ്ച സേന്ദ്രൈർഭൃശജാതവിസ്മയൈ-
	ര്ഹതേ കുമാരേ സ കപിർനിരീക്ഷിതഃ॥37॥
നിഹത്യ തം വജ്രിസുതോപമം രണേ
	കുമാരമക്ഷം ക്ഷതജോപമേക്ഷണം ।
തദേവ വീരോഽഭിജഗാമ തോരണം
	കൃതക്ഷണഃ കാല ഇവ പ്രജാക്ഷയേ ॥38॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ സപ്തചത്വാരിംശഃ സർഗഃ