അഥ ഏകോനപഞ്ചാശഃ സർഗഃ
തതഃ സ കർമണാ തസ്യ വിസ്മിതോ ഭീമവിക്രമഃ।
ഹനുമാൻ ക്രോധതാമ്രാക്ഷോ രക്ഷോഽധിപമവൈക്ഷത ॥1॥
ഭ്രാജമാനം മഹാർഹേണ കാഞ്ചനേന വിരാജതാ ।
മുക്താജാലവൃതേനാഥ മുകുടേന മഹാദ്യുതിം ॥2॥
വജ്രസംയോഗസംയുക്തൈർമഹാർഹമണിവിഗ്രഹൈഃ।
ഹൈമൈരാഭരണൈശ്ചിത്രൈർമനസേവ പ്രകല്പിതൈഃ॥3॥
മഹാർഹക്ഷൗമസംവീതം രക്തചന്ദനരൂഷിതം ।
സ്വനുലിപ്തം വിചിത്രാഭിർവിവിധാഭിശ്ച ഭക്തിഭിഃ॥4॥
വിചിത്രം ദർശനീയൈശ്ച രക്താക്ഷൈർഭീമദർശനൈഃ।
ദീപ്തതീക്ഷ്ണമഹാദംഷ്ട്രം പ്രലംബം ദശനച്ഛദൈഃ॥5॥
ശിരോഭിർദശഭിർവീരോ ഭ്രാജമാനം മഹൗജസം ।
നാനാവ്യാലസമാകീർണൈഃ ശിഖരൈരിവ മന്ദരം ॥6॥
നീലാഞ്ജനചയപ്രഖ്യം ഹാരേണോരസി രാജതാ ।
പൂർണചന്ദ്രാഭവക്ത്രേണ സബാലാർകമിവാംബുദം ॥7॥
ബാഹുഭിർബദ്ധകേയൂരൈശ്ചന്ദനോത്തമരൂഷിതൈഃ।
ഭ്രാജമാനാംഗദൈർഭീമൈഃ പഞ്ചശീർഷൈരിവോരഗൈഃ॥8॥
മഹതി സ്ഫാടികേ ചിത്രേ രത്നസംയോഗചിത്രിതേ ।
ഉത്തമാസ്തരണാസ്തീർണേ സൂപവിഷ്ടം വരാസനേ ॥9॥
അലങ്കൃതാഭിരത്യർഥം പ്രമദാഭിഃ സമന്തതഃ।
വാലവ്യജനഹസ്താഭിരാരാത്സമുപസേവിതം ॥10॥
ദുർധരേണ പ്രഹസ്തേന മഹാപാർശ്വേന രക്ഷസാ ।
മന്ത്രിഭിർമന്ത്രതത്ത്വജ്ഞൈർനികുംഭേന ച മന്ത്രിണാ ॥11॥
ഉപോപവിഷ്ടം രക്ഷോഭിശ്ചതുർഭിർബലദർപിതം ।
കൃത്സ്നം പരിവൃതം ലോകം ചതുർഭിരിവ സാഗരൈഃ॥12॥
മന്ത്രിഭിർമന്ത്രതത്ത്വജ്ഞൈരന്യൈശ്ച ശുഭദർശിഭിഃ।
ആശ്വാസ്യമാനം സചിവൈഃ സുരൈരിവ സുരേശ്വരം ॥13॥
അപശ്യദ്രാക്ഷസപതിം ഹനൂമാനതിതേജസം ।
വേഷ്ഠിതം മേരുശിഖരേ സതോയമിവ തോയദം ॥14॥
സ തൈഃ സമ്പീഡ്യമാനോഽപി രക്ഷോഭിർഭീമവിക്രമൈഃ।
വിസ്മയം പരമം ഗത്വാ രക്ഷോഽധിപമവൈക്ഷത ॥15॥
ഭ്രാജമാനം തതോ ദൃഷ്ട്വാ ഹനുമാന്രാക്ഷസേശ്വരം ।
മനസാ ചിന്തയാമാസ തേജസാ തസ്യ മോഹിതഃ॥16॥
അഹോ രൂപമഹോ ധൈര്യമഹോ സത്ത്വമഹോ ദ്യുതിഃ।
അഹോ രാക്ഷസരാജസ്യ സർവലക്ഷണയുക്തതാ ॥17॥
യദ്യധർമോ ന ബലവാൻസ്യാദയം രാക്ഷസേശ്വരഃ।
സ്യാദയം സുരലോകസ്യ സശക്രസ്യാപി രക്ഷിതാ ॥18॥
അസ്യ ക്രൂരൈർനൃശംസൈശ്ച കർമഭിർലോകകുത്സിതൈഃ।
സർവേ ബിഭ്യതി ഖല്വസ്മാല്ലോകാഃ സാമരദാനവാഃ॥19॥
അയം ഹ്യുത്സഹതേ ക്രുദ്ധഃ കർതുമേകാർണവം ജഗത് ।
ഇതി ചിന്താം ബഹുവിധാമകരോന്മതിമാൻകപിഃ।
ദൃഷ്ട്വാ രാക്ഷസരാജസ്യ പ്രഭാവമമിതൗജസഃ॥20॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഏകോനപഞ്ചാശഃ സർഗഃ