അഥ സപ്തപഞ്ചാശഃ സർഗഃ
ആപ്ലുത്യ ച മഹാവേഗഃ പക്ഷവാനിവ പർവതഃ।
ഭുജംഗയക്ഷഗന്ധർവപ്രബുദ്ധകമലോത്പലം ॥1॥
സ ചന്ദ്രകുമുദം രമ്യം സാർകകാരണ്ഡവം ശുഭം ।
തിഷ്യശ്രവണകാദംബമഭ്രശൈവലശാദ്വലം ॥2॥
പുനർവസുമഹാമീനം ലോഹിതാംഗമഹാഗ്രഹം ।
ഐരാവതമഹാദ്വീപം സ്വാതീഹംസവിലാസിതം ॥3॥
വാതസംഘാതജാലോർമിചന്ദ്രാംശുശിശിരാംബുമത് ।
ഹനൂമാനപരിശ്രാന്തഃ പുപ്ലുവേ ഗഗനാർണവം ॥4॥
ഗ്രസമാന ഇവാകാശം താരാധിപമിവോല്ലിഖൻ ।
ഹരന്നിവ സനക്ഷത്രം ഗഗനം സാർകമണ്ഡലം ॥5॥
അപാരമപരിശ്രാന്തശ്ചാംബുധിം സമഗാഹത ।
ഹനൂമാന്മേഘജാലാനി വികർഷന്നിവ ഗച്ഛതി ॥6॥
പാണ്ഡുരാരുണവർണാനി നീലമാഞ്ജിഷ്ഠകാനി ച ।
ഹരിതാരുണവർണാനി മഹാഭ്രാണി ചകാശിരേ ॥7॥
പ്രവിശന്നഭ്രജാലാനി നിഷ്ക്രമംശ്ച പുനഃ പുനഃ।
പ്രചന്നശ്ച പ്രകാശശ്ച ചന്ദ്രമാ ഇവ ദൃശ്യതേ ॥8॥
വിവിധാഭ്രഘനാപന്നഗോചരോ ധവലാംബരഃ।
ദൃശ്യാദൃശ്യതനുർവീരസ്തഥാ ചന്ദ്രായതേഽമ്ബരേ ॥9॥
താർക്ഷ്യായമാണോ ഗഗനേ സ ബഭൗ വായുനന്ദനഃ।
ദാരയന്മേഘബൃന്ദാനി നിഷ്പതംശ്ച പുനഃ പുനഃ॥10॥
നദന്നാദേന മഹതാ മേഘസ്വനമഹാസ്വനഃ।
പ്രവരാന്രാക്ഷസാൻ ഹത്വാ നാമ വിശ്രാവ്യ ചാത്മനഃ॥11॥
ആകുലാം നഗരീം കൃത്വാ വ്യഥയിത്വാ ച രാവണം ।
അർദയിത്വാ മഹാവീരാൻ വൈദേഹീമഭിവാദ്യ ച ॥12॥
ആജഗാമ മഹാതേജാഃ പുനർമധ്യേന സാഗരം ।
പർവതേന്ദ്രം സുനാഭം ച സമുപസ്പൃശ്യ വീര്യവാൻ ॥13॥
ജ്യാമുക്ത ഇവ നാരാചോ മഹാവേഗോഽഭ്യുപാഗമത് ।
സ കിഞ്ചിദാരാത് സമ്പ്രാപ്തഃ സമാലോക്യ മഹാഗിരിം ॥14॥
മഹേന്ദ്രം മേഘസങ്കാശം നനാദ സ മഹാകപിഃ।
സ പൂരയാമാസ കപിർദിശോ ദശ സമന്തതഃ॥15॥
നദന്നാദേന മഹതാ മേഘസ്വനമഹാസ്വനഃ।
സ തം ദേശമനുപ്രാപ്തഃ സുഹൃദ്ധർശനലാലസഃ॥16॥
നനാദ സുമഹാനാദം ലാംഗൂലം ചാപ്യകമ്പയത് ।
തസ്യ നാനദ്യമാനസ്യ സുപർണാചരിതേ പഥി ॥17॥
ഫലതീവാസ്യ ഘോഷേണ ഗഗനം സാർകമണ്ഡലം ।
യേ തു തത്രോത്തരേ കൂലേ സമുദ്രസ്യ മഹാബലാഃ॥18॥
പൂർവം സംവിഷ്ഠിതാശ്ശൂരാ വായുപുത്രദിദൃക്ഷവഃ।
മഹതോ വായുനുന്നസ്യ തോയദസ്യേവ നിഃസ്വനം ।
ശുശ്രുവുസ്തേ തദാ ഘോഷമൂരുവേഗം ഹനൂമതഃ॥19॥
തേ ദീനമനസഃ സർവേ ശുശ്രുവുഃ കാനനൗകസഃ।
വാനരേന്ദ്രസ്യ നിർഘോഷം പർജന്യനിനദോപമം ॥20॥
നിശമ്യ നദതോ നാദം വാനരാസ്തേ സമന്തതഃ।
ബഭൂവുരുത്സുകാഃ സർവേ സുഹൃദ്ദർശനകാങ്ക്ഷിണഃ॥21॥
ജാംബവാൻ സ ഹരിശ്രേഷ്ഠഃ പ്രീതിസംഹൃഷ്ടമാനസഃ।
ഉപാമന്ത്ര്യ ഹരീൻസർവാനിദം വചനമബ്രവീത് ॥22॥
സർവഥാ കൃതകാര്യോഽസൗ ഹനൂമാന്നാത്ര സംശയഃ।
ന ഹ്യസ്യാകൃതകാര്യസ്യ നാദ ഏവംവിധോ ഭവേത് ॥23॥
തസ്യ ബാഹൂരുവേഗം ച നിനാദം ച മഹാത്മനഃ।
നിശമ്യ ഹരയോ ഹൃഷ്ടാഃ സമുത്പേതുര്യതസ്തതഃ॥24॥
തേ നഗാഗ്രാന്നഗാഗ്രാണി ശിഖരാച്ഛിഖരാണി ച ।
പ്രഹൃഷ്ടാഃ സമപദ്യന്ത ഹനൂമന്തം ദിദൃക്ഷവഃ॥25॥
തേ പ്രീതാഃ പാദപാഗ്രേഷു ഗൃഹ്യ ശാഖാമവസ്ഥിതാഃ।
വാസാംസി ച പ്രകാശാനി സമാവിധ്യന്ത വാനരാഃ॥26॥
ഗിരിഗഹ്വരസംലീനോ യഥാ ഗർജതി മാരുതഃ।
ഏവം ജഗർജ ബലവാൻ ഹനുമാന്മാരുതാത്മജഃ॥27॥
തമഭ്രഘനസങ്കാശമാപതന്തം മഹാകപിം ।
ദൃഷ്ട്വാ തേ വാനരാഃ സർവേ തസ്ഥുഃ പ്രാഞ്ജലയസ്തദാ ॥28॥
തതസ്തു വേഗവാൻ വീരോ ഗിരേർഗിരിനിഭഃ കപിഃ।
നിപപാത ഗിരേസ്തസ്യ ശിഖരേ പാദപാകുലേ ॥29॥
ഹർഷേണാപൂര്യമാണോഽസൗ രമ്യേ പർവതനിർഝരേ ।
ഛിന്നപക്ഷ ഇവാഽകാശാത്പപാത ധരണീധരഃ॥30॥
തതസ്തേ പ്രീതമനസഃ സർവേ വാനരപുംഗവാഃ।
ഹനൂമന്തം മഹാത്മാനം പരിവാര്യോപതസ്ഥിരേ ॥31॥
പരിവാര്യ ച തേ സർവേ പരാം പ്രീതിമുപാഗതാഃ।
പ്രഹൃഷ്ടവദനാഃ സർവേ തമാഗതമുപാഗമൻ ॥32॥
ഉപായനാനി ചാദായ മൂലാനി ച ഫലാനി ച ।
പ്രത്യർചയൻഹരിശ്രേഷ്ഠം ഹരയോ മാരുതാത്മജം ॥33॥
വിനേദുർമുദിതാഃ കേചിത് കേചിത് കിലകിലാം തഥാ ।
ഹൃഷ്ടാഃ പാദപശാഖാശ്ച ആനിന്യുർവാനരർഷഭാഃ॥34॥
ഹനൂമാംസ്തു ഗുരൂന്വൃദ്ധാഞ്ജാംബവത്പ്രമുഖാംസ്തദാ ।
കുമാരമംഗദം ചൈവ സോഽവന്ദത മഹാകപിഃ॥35॥
സ താഭ്യാം പൂജിതഃ പൂജ്യഃ കപിഭിശ്ച പ്രസാദിതഃ।
ദൃഷ്ടാ ദേവീതി വിക്രാന്തഃ സങ്ക്ഷേപേണ ന്യവേദയത് ॥36॥
നിഷസാദ ച ഹസ്തേന ഗൃഹീത്വാ വാലിനഃ സുതം ।
രമണീയേ വനോദ്ദേശേ മഹേന്ദ്രസ്യ ഗിരേസ്തദാ ॥37॥
ഹനൂമാനബ്രവീത് പൃഷ്ടസ്തദാ താന്വാനരർഷഭാൻ ।
അശോകവനികാസംസ്ഥാ ദൃഷ്ടാ സാ ജനകാത്മജാ ॥38॥
രക്ഷ്യമാണാ സുഘോരാഭീ രാക്ഷസീഭിരനിന്ദിതാ ।
ഏകവേണീധരാ ബാലാ രാമദർശനലാലസാ ॥39॥
ഉപവാസപരിശ്രാന്താ മലിനാ ജടിലാ കൃശാ ।
തതോ ദൃഷ്ടേതി വചനം മഹാർഥമമൃതോപമം ॥40॥
നിശമ്യ മാരുതേഃ സർവേ മുദിതാ വാനരാ ഭവൻ ।
ക്ഷ്വേഡന്ത്യന്യേ നദന്ത്യന്യേ ഗർജന്ത്യന്യേ മഹാബലാഃ॥41॥
ചക്രുഃ കിലകിലാമന്യേ പ്രതിഗർജന്തി ചാപരേ ।
കേചിദുച്ഛ്രിതലാംഗൂലാഃ പ്രഹൃഷ്ടാഃ കപികുഞ്ജരാഃ॥42॥
ആയതാഞ്ചിതദീർഘാണി ലാംഗൂലാനി പ്രവിവ്യധുഃ।
അപരേ തു ഹനൂമന്തം ശ്രീമന്തം വാനരോത്തമം ॥43॥
ആപ്ലുത്യ ഗിരിശൃംഗേഷു സംസ്പൃശന്തി സ്മ ഹർഷിതാഃ।
ഉക്തവാക്യം ഹനൂമന്തമംഗദസ്തു തദാബ്രവീത് ॥44॥
സർവേഷാം ഹരിവീരാണാം മധ്യേ വാചമനുത്തമാം ।
സത്ത്വേ വീര്യേ ന തേ കശ്ചിത്സമോ വാനര വിദ്യതേ ॥45॥
യദവപ്ലുത്യ വിസ്തീർണം സാഗരം പുനരാഗതഃ।
ജീവിതസ്യ പ്രദാതാ നസ്ത്വമേകോ വാനരോത്തമ ॥46॥
ത്വത്പ്രസാദാത് സമേഷ്യാമഃ സിദ്ധാർഥാ രാഘവേണ ഹ ।
അഹോ സ്വാമിനി തേ ഭക്തിരഹോ വീര്യമഹോ ധൃതിഃ॥47॥
ദിഷ്ട്യാ ദൃഷ്ടാ ത്വയാ ദേവീ രാമപത്നീ യശസ്വിനീ ।
ദിഷ്ട്യാ ത്യക്ഷ്യതി കാകുത്സ്ഥഃ ശോകം സീതാ വിയോഗജം ॥48॥
തതോഽങ്ഗദം ഹനൂമന്തം ജാംബവന്തം ച വാനരാഃ।
പരിവാര്യ പ്രമുദിതാ ഭേജിരേ വിപുലാഃ ശിലാഃ॥49॥
ഉപവിഷ്ടാ ഗിരേസ്തസ്യ ശിലാസു വിപുലാസു തേ ।
ശ്രോതുകാമാഃ സമുദ്രസ്യ ലംഘനം വാനരോത്തമാഃ॥50॥
ദർശനം ചാപി ലങ്കായാഃ സീതായാ രാവണസ്യ ച ।
തസ്ഥുഃ പ്രാഞ്ജലയഃ സർവേ ഹനൂമദ്വദനോന്മുഖാഃ॥51॥
തസ്ഥൗ തത്രാംഗദഃ ശ്രീമാന്വാനരൈർബഹുഭിർവൃതഃ।
ഉപാസ്യമാനോ വിബുധൈർദിവി ദേവപതിര്യഥാ ॥52॥
ഹനൂമതാ കീർതിമതാ യശസ്വിനാ
	തഥാംഗദേനാംഗദനദ്ധബാഹുനാ ।
മുദാ തദാധ്യാസിതമുന്നതം മഹൻ
	മഹീധരാഗ്രം ജ്വലിതം ശ്രിയാഭവത് ॥53॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ സപ്തപഞ്ചാശഃ സർഗഃ