അഥ ഏകോനഷഷ്ടിതമഃ സർഗഃ
ഏതദാഖ്യായ തത്സർവം ഹനൂമാന്മാരുതാത്മജഃ।
ഭൂയഃ സമുപചക്രാമ വചനം വക്തുമുത്തരം ॥1॥
സഫലോ രാഘവോദ്യോഗഃ സുഗ്രീവസ്യ ച സംഭ്രമഃ।
ശീലമാസാദ്യ സീതായാ മമ ച പ്രീണിതം മനഃ॥2॥
ആര്യായാഃ സദൃശം ശീലം സീതായാഃ പ്ലവഗർഷഭാഃ।
തപസാ ധാരയേല്ലോകാൻക്രുദ്ധാ വാ നിർദഹേദപി ॥3॥
സർവഥാതിപ്രകൃഷ്ടോഽസൗ രാവണോ രാക്ഷസേശ്വരഃ।
യസ്യ താം സ്പൃശതോ ഗാത്രം തപസാ ന വിനാശിതം ॥4॥
ന തദഗ്നിശിഖാ കുര്യാത്സംസ്പൃഷ്ടാ പാണിനാ സതീ ।
ജനകസ്യ സുതാ കുര്യാദ് യത് ക്രോധകലുഷീകൃതാ ॥5॥
ജാംബവത്പ്രമുഖാൻ സർവാനനുജ്ഞാപ്യ മഹാകപീൻ ।
അസ്മിന്നേവംഗതേ കാര്യേ ഭവതാം ച നിവേദിതേ ।
ന്യായ്യം സ്മ സഹ വൈദേഹ്യാ ദ്രഷ്ടും തൗ പാർഥിവാത്മജൗ ॥6॥
അഹമേകോഽപി പര്യാപ്തഃ സരാക്ഷസഗണാം പുരീം ।
താം ലങ്കാം തരസാ ഹന്തും രാവണം ച മഹാബലം ॥7॥
കിം പുനഃ സഹിതോ വീരൈർബലവദ്ഭിഃ കൃതാത്മഭിഃ।
കൃതാസ്ത്രൈഃ പ്ലവഗൈഃ ശക്തൈർഭവർദ്ഭിവിജയൈഷിഭിഃ॥8॥
അഹം തു രാവണം യുദ്ധേ സസൈന്യം സപുരഃസരം ।
സഹപുത്രം വധിഷ്യാമി സഹോദരയുതം യുധി ॥9॥
ബ്രാഹ്മമസ്ത്രം ച രൗദ്രം ച വായവ്യം വാരുണം തഥാ ।
യദി ശക്രജിതോഽസ്ത്രാണി ദുർനിരീക്ഷ്യാണി സംയുഗേ ।
താന്യഹം നിഹനിഷ്യാമി വിധമിഷ്യാമി രാക്ഷസാൻ ॥10॥
ഭവതാമഭ്യനുജ്ഞാതോ വിക്രമോ മേ രുണദ്ധി തം ।
മയാതുലാ വിസൃഷ്ടാ ഹി ശൈലവൃഷ്ടിർനിരന്തരാ ॥11॥
ദേവാനപി രണേ ഹന്യാത്കിം പുനസ്താന്നിശാചരാൻ ।
ഭവതാമനനുജ്ഞാതോ വിക്രമോ മേ രുണദ്ധി മാം ॥12॥
സാഗരോഽപ്യതിയാദ്വേലാം മന്ദരഃ പ്രചലേദപി ।
ന ജാംബവന്തം സമരേ കമ്പയേദരിവാഹിനീ ॥13॥
സർവരാക്ഷസസംഘാനാം രാക്ഷസാ യേ ച പൂർവജാഃ।
അലമേകോഽപി നാശായ വീരോ വാലിസുതഃ കപിഃ॥14॥
പ്ലവഗസ്യോരുവേഗേന നീലസ്യ ച മഹാത്മനഃ।
മന്ദരോഽപ്യവശീര്യേത കിം പുനര്യുധി രാക്ഷസാഃ॥15॥
സദേവാസുരയക്ഷേഷു ഗന്ധർവോരഗപക്ഷിഷു ।
മൈന്ദസ്യ പ്രതിയോദ്ധാരം ശംസത ദ്വിവിദസ്യ വാ ॥16॥
അശ്വിപുത്രൗ മഹാവേഗാവേതൗ പ്ലവഗസത്തമൗ ।
ഏതയോഃ പ്രതിയോദ്ധാരം ന പശ്യാമി രണാജിരേ ॥17॥
മയൈവ നിഹതാ ലങ്കാ ദഗ്ധാ ഭസ്മീകൃതാ പുരീ ।
രാജമാർഗേഷു സർവേഷു നാമ വിശ്രാവിതം മയാ ॥18॥
ജയത്യതിബലോ രാമോ ലക്ഷ്മണശ്ച മഹാബലഃ।
രാജാ ജയതി സുഗ്രീവോ രാഘവേണാഭിപാലിതഃ॥19॥
അഹം കോസലരാജസ്യ ദാസഃ പവനസംഭവഃ।
ഹനുമാനിതി സർവത്ര നാമ വിശ്രാവിതം മയാ ॥20॥
അശോകവനികാമധ്യേ രാവണസ്യ ദുരാത്മനഃ।
അധസ്താച്ഛിംശപാമൂലേ സാധ്വീ കരുണമാസ്ഥിതാ ॥21॥
രാക്ഷസീഭിഃ പരിവൃതാ ശോകസന്താപകർശിതാ ।
മേഘരേഖാപരിവൃതാ ചന്ദ്രരേഖേവ നിഷ്പ്രഭാ ॥22॥
അചിന്തയന്തീ വൈദേഹീ രാവണം ബലദർപിതം ।
പതിവ്രതാ ച സുശ്രോണീ അവഷ്ടബ്ധാ ച ജാനകീ ॥23॥
അനുരക്താ ഹി വൈദേഹീ രാമേ സർവാത്മനാ ശുഭാ ।
അനന്യചിത്താ രാമേണ പൗലോമീവ പുരന്ദരേ ॥24॥
തദേകവാസഃസംവീതാ രജോധ്വസ്താ തഥൈവ ച ।
സാ മയാ രാക്ഷസീമധ്യേ തർജ്യമാനാ മുഹുർമുഹുഃ॥25॥
രാക്ഷസീഭിർവിരൂപാഭിർദൃഷ്ടാ ഹി പ്രമദാവനേ ।
ഏകവേണീധരാ ദീനാ ഭർതൃചിന്താപരായണാ ॥26॥
അധഃശയ്യാ വിവർണാംഗീ പദ്മിനീവ ഹിമോദയേ ।
രാവണാദ്വിനിവൃത്താർഥാ മർതവ്യകൃതനിശ്ചയാ ॥27॥
കഥഞ്ചിന്മൃഗശാവാക്ഷീ വിശ്വാസമുപപാദിതാ ।
തതഃ സംഭാഷിതാ ചൈവ സർവമർഥം പ്രകാശിതാ ॥28॥
രാമസുഗ്രീവസഖ്യം ച ശ്രുത്വാ പ്രീതിമുപാഗതാ ।
നിയതഃ സമുദാചാരോ ഭക്തിർഭർതരി ചോത്തമാ ॥29॥
യന്ന ഹന്തി ദശഗ്രീവം സ മഹാത്മാ ദശാനനഃ।
നിമിത്തമാത്രം രാമസ്തു വധേ തസ്യ ഭവിഷ്യതി ॥30॥
സാ പ്രകൃത്യൈവ തന്വംഗീ തദ്വിയോഗാച്ച കർശിതാ ।
പ്രതിപത്പാഠശീലസ്യ വിദ്യേവ തനുതാം ഗതാ ॥31॥
ഏവമാസ്തേ മഹാഭാഗാ സീതാ ശോകപരായണാ ।
യദത്ര പ്രതികർതവ്യം തത്സർവമുപകല്പ്യതാം ॥32॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഏകോനഷഷ്ടിതമഃ സർഗഃ