അഥ ഷഷ്ടിതമഃ സർഗഃ
തസ്യ തദ്വചനം ശ്രുത്വാ വാലിസൂനുരഭാഷത ।
അശ്വിപുത്രൗ മഹാവേഗൗ ബലവന്തൗ പ്ലവംഗമൗ ॥1॥
പിതാമഹവരോത്സേകാത് പരമം ദർപമാസ്ഥിതൗ ।
അശ്വിനോർമാനനാർഥം ഹി സർവലോകപിതാമഹഃ॥2॥
സർവാവധ്യത്വമതുലമനയോർദത്തവാൻപുരാ ।
വരോത്സേകേന മത്തൗ ച പ്രമഥ്യ മഹതീം ചമൂം ॥3॥
സുരാണാമമൃതം വീരൗ പീതവന്തൗ മഹാബലൗ ।
ഏതാവേവ ഹി സങ്ക്രുദ്ധൗ സവാജിരഥകുഞ്ജരാം ॥4॥
ലങ്കാം നാശയിതും ശക്തൗ സർവേ തിഷ്ഠന്തു വാനരാഃ।
അഹമേകോഽപി പര്യാപ്തഃ സരാക്ഷസഗണാം പുരീം ॥5॥
താം ലങ്കാം തരസാ ഹന്തും രാവണം ച മഹാബലം ।
കിം പുനഃ സഹിതോ വീരൈർബലവദ്ഭിഃ കൃതാത്മഭിഃ॥6॥
കൃതാസ്ത്രൈഃ പ്ലവഗൈഃ ശക്തൈർഭവദ്ഭിർവിജയൈഷിഭിഃ।
വായുസൂനോർബലേനൈവ ദഗ്ധാ ലങ്കേതി നഃ ശ്രുതം ॥7॥
ദൃഷ്ട്വാ ദേവീ ന ചാനീതാ ഇതി തത്ര നിവേദിതും ।
ന യുക്തമിവ പശ്യാമി ഭവദ്ഭിഃ ഖ്യാതപൗരുഷൈഃ॥8॥
നഹി വഃ പ്ലവനേ കശ്ചിന്നാപി കശ്ചിത് പരാക്രമേ ।
തുല്യഃ സാമരദൈത്യേഷു ലോകേഷു ഹരിസത്തമാഃ॥9॥
ജിത്വാ ലങ്കാം സരക്ഷൗഘാം ഹത്വാ തം രാവണം രണേ ।
സീതാമാദായ ഗച്ഛാമഃ സിദ്ധാർഥാ ഹൃഷ്ടമാനസാഃ॥10॥
തേഷ്വേവം ഹതവീരേഷു രാക്ഷസേഷു ഹനൂമതാ ।
കിമന്യദത്ര കർതവ്യം ഗൃഹീത്വാ യാമ ജാനകീം ॥11॥
രാമലക്ഷ്മണയോർമധ്യേ ന്യസ്യാമ ജനകാത്മജാം ।
കിം വ്യലീകൈസ്തു താൻ സർവാൻ വാനരാൻ വാനരർഷഭാൻ ॥12॥
വയമേവ ഹി ഗത്വാ താൻ ഹത്വാ രാക്ഷസപുംഗവാൻ ।
രാഘവം ദ്രഷ്ടുമർഹാമഃ സുഗ്രീവം സഹലക്ഷ്മണം ॥13॥
തമേവം കൃതസങ്കല്പം ജാംബവാൻഹരിസത്തമഃ।
ഉവാച പരമപ്രീതോ വാക്യമർഥവദർഥവിത് ॥14॥
നൈഷാ ബുദ്ധിർമഹാബുദ്ധേ യദ് ബ്രവീഷി മഹാകപേ ।
വിചേതും വയമാജ്ഞപ്താ ദക്ഷിണാം ദിശമുത്തമാം ॥15॥
നാനേതും കപിരാജേന നൈവ രാമേണ ധീമതാ ।
കഥഞ്ചിന്നിർജിതാം സീതാമസ്മാഭിർനാഭിരോചയേത് ॥16॥
രാഘവോ നൃപശാർദൂലഃ കുലം വ്യപദിശൻ സ്വകം ।
പ്രതിജ്ഞായ സ്വയം രാജാ സീതാവിജയമഗ്രതഃ॥17॥
സർവേഷാം കപിമുഖ്യാനാം കഥം മിഥ്യാ കരിഷ്യതി ।
വിഫലം കർമ ച കൃതം ഭവേത് തുഷ്ടിർന തസ്യ ച ॥18॥
വൃഥാ ച ദർശിതം വീര്യം ഭവേദ് വാനരപുംഗവാഃ।
തസ്മാദ് ഗച്ഛാമ വൈ സർവേ യത്ര രാമഃ സലക്ഷ്മണഃ।
സുഗ്രീവശ്ച മഹാതേജാഃ കാര്യസ്യാസ്യ നിവേദനേ ॥19॥
ന താവദേഷാ മതിരക്ഷമാ നോ
	യഥാ ഭവാൻപശ്യതി രാജപുത്ര ।
യഥാ തു രാമസ്യ മതിർനിവിഷ്ടാ
	തഥാ ഭവാൻപശ്യതു കാര്യസിദ്ധിം ॥20॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഷഷ്ടിതമഃ സർഗഃ