അഥ ഏകഷഷ്ടിതമഃ സർഗഃ
തതോ ജാംബവതോ വാക്യമഗൃഹ്ണന്ത വനൗകസഃ।
അംഗദപ്രമുഖാ വീരാ ഹനൂമാംശ്ച മഹാകപിഃ॥1॥
പ്രീതിമന്തസ്തതഃ സർവേ വായുപുത്രപുരഃസരാഃ।
മഹേന്ദ്രാഗ്രാത് സമുത്പത്യ പുപ്ലുവുഃ പ്ലവഗർഷഭാഃ॥2॥
മേരുമന്ദരസങ്കാശാ മത്താ ഇവ മഹാഗജാഃ।
ഛാദയന്ത ഇവാകാശം മഹാകായാ മഹാബലാഃ॥3॥
സഭാജ്യമാനം ഭൂതൈസ്തമാത്മവന്തം മഹാബലം ।
ഹനൂമന്തം മഹാവേഗം വഹന്ത ഇവ ദൃഷ്ടിഭിഃ॥4॥
രാഘവേ ചാർഥനിർവൃത്തിം കർതും ച പരമം യശഃ।
സമാധായ സമൃദ്ധാർഥാഃ കർമസിദ്ധിഭിരുന്നതാഃ॥5॥
പ്രിയാഖ്യാനോന്മുഖാഃ സർവേ സർവേ യുദ്ധാഭിനന്ദിനഃ।
സർവേ രാമപ്രതീകാരേ നിശ്ചിതാർഥാ മനസ്വിനഃ॥6॥
പ്ലവമാനാഃ ഖമാപ്ലുത്യ തതസ്തേ കാനനൗകസഃ।
നന്ദനോപമമാസേദുർവനം ദ്രുമശതായുതം ॥7॥
യത്തന്മധുവനം നാമ സുഗ്രീവസ്യാഭിരക്ഷിതം ।
അധൃഷ്യം സർവഭൂതാനാം സർവഭൂതമനോഹരം ॥8॥
യദ്രക്ഷതി മഹാവീരഃ സദാ ദധിമുഖഃ കപിഃ।
മാതുലഃ കപിമുഖ്യസ്യ സുഗ്രീവസ്യ മഹാത്മനഃ॥9॥
തേ തദ്വനമുപാഗമ്യ ബഭൂവുഃ പരമോത്കടാഃ।
വാനരാ വാനരേന്ദ്രസ്യ മനഃകാന്തം മഹാവനം ॥10॥
തതസ്തേ വാനരാ ഹൃഷ്ടാ ദൃഷ്ട്വാ മധുവനം മഹത് ।
കുമാരമഭ്യയാചന്ത മധൂനി മധുപിംഗലാഃ॥11॥
തതഃ കുമാരസ്താന്വൃദ്ധാഞ്ജാംബവത്പ്രമുഖാൻകപീൻ ।
അനുമാന്യ ദദൗ തേഷാം നിസർഗം മധുഭക്ഷണേ ॥12॥
തേ നിസൃഷ്ടാഃ കുമാരേണ ധീമതാ വാലിസൂനുനാ ।
ഹരയഃ സമപദ്യന്ത ദ്രുമാൻ മധുകരാകുലാൻ ॥13॥
ഭക്ഷയന്തഃ സുഗന്ധീനി മൂലാനി ച ഫലാനി ച ।
ജഗ്മുഃ പ്രഹർഷം തേ സർവേ ബഭൂവുശ്ച മദോത്കടാഃ॥14॥
തതശ്ചാനുമതാഃ സർവേ സുസംഹൃഷ്ടാ വനൗകസഃ।
മുദിതാശ്ച തതസ്തേ ച പ്രനൃത്യന്തി തതസ്തതഃ॥15॥
ഗായന്തി കേചിത് പ്രഹസന്തി കേചി-
	ന്നൃത്യന്തി കേചിത് പ്രണമന്തി കേചിത് ।
പതന്തി കേചിത് പ്രചരന്തി കേചിത്
	പ്ലവന്തി കേചിത് പ്രലപന്തി കേചിത് ॥16॥
പരസ്പരം കേചിദുപാശ്രയന്തി
	പരസ്പരം കേചിദതിബ്രുവന്തി ।
ദ്രുമാദ്ദ്രുമം കേചിദഭിദ്രവന്തി
	ക്ഷിതൗ നഗാഗ്രാന്നിപതന്തി കേചിത് ॥17॥
മഹീതലാത്കേചിദുദീർണവേഗാ
	മഹാദ്രുമാഗ്രാണ്യഭിസമ്പതന്തി ।
ഗായന്തമന്യഃ പ്രഹസന്നുപൈതി
	ഹസന്തമന്യഃ പ്രരുദന്നുപൈതി ॥18॥
തുദന്തമന്യഃ പ്രണദന്നുപൈതി
	സമാകുലം തത് കപിസൈന്യമാസീത് ।
ന ചാത്ര കശ്ചിന്ന ബഭൂവ മത്തോ
	ന ചാത്ര കശ്ചിന്ന ബഭൂവ ദൃപ്തഃ॥19॥
തതോ വനം തത്പരിഭക്ഷ്യമാണം
	ദ്രുമാംശ്ച വിധ്വംസിതപത്രപുഷ്പാൻ ।
സമീക്ഷ്യ കോപാദ്ദധിവക്ത്രനാമാ
	നിവാരയാമാസ കപിഃ കപീംസ്താൻ ॥20॥
സ തൈഃ പ്രവൃദ്ധൈഃ പരിഭർത്സ്യമാനോ
	വനസ്യ ഗോപ്താ ഹരിവൃദ്ധവീരഃ।
ചകാര ഭൂയോ മതിമുഗ്രതേജാ
	വനസ്യ രക്ഷാം പ്രതി വാനരേഭ്യഃ॥21॥
ഉവാച കാംശ്ചിത് പരുഷാണ്യഭീത-
	മസക്തമന്യാംശ്ച തലൈർജഘാന ।
സമേത്യ കൈശ്ചിത് കലഹം ചകാര
	തഥൈവ സാമ്നോപജഗാമ കാംശ്ചിത് ॥22॥
സ തൈർമദാദപ്രതിവാര്യവേഗൈ-
	ര്ബലാച്ച തേന പ്രതിവാര്യമാണൈഃ।
പ്രധർഷണേ ത്യക്തഭയൈഃ സമേത്യ
	പ്രകൃഷ്യതേ ചാപ്യനവേക്ഷ്യ ദോഷം ॥23॥
നഖൈസ്തുദന്തോ ദശനൈർദശന്ത-
	സ്തലൈശ്ച പാദൈശ്ച സമാപയന്തഃ।
മദാത്കപിം തേ കപയഃ സമന്താ-
	ന്മഹാവനം നിർവിഷയം ച ചക്രുഃ॥24॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ഏകഷഷ്ടിതമഃ സർഗഃ