അഥ ത്രിഷഷ്ടിതമഃ സർഗഃ
തതോ മൂർധ്നാ നിപതിതം വാനരം വാനരർഷഭഃ।
ദൃഷ്ട്വൈവോദ്വിഗ്നഹൃദയോ വാക്യമേതദുവാച ഹ ॥1॥
ഉത്തിഷ്ഠോത്തിഷ്ഠ കസ്മാത്ത്വം പാദയോഃ പതിതോ മമ ।
അഭയം തേ പ്രദാസ്യാമി സത്യമേവാഭിധീയതാം ॥2॥
കിം സംഭ്രമാദ്ധിതം കൃത്സ്രം ബ്രൂഹി യദ് ബക്തുമർഹസി ।
കച്ചിന്മധുവനേ സ്വസ്തി ശ്രോതുമിച്ഛാമി വാനര ॥3॥
സ സമാശ്വാസിതസ്തേന സുഗ്രീവേണ മഹാത്മനാ ।
ഉത്ഥായ സ മഹാപ്രാജ്ഞോ വാക്യം ദധിമുഖോഽബ്രവീത് ॥4॥
നൈവർക്ഷരജസാ രാജന്ന ത്വയാ ന ച വാലിനാ ।
വനം നിസൃഷ്ടപൂർവം തേ നാശിതം തത്തു വാനരൈഃ॥5॥
ന്യവാരയമഹം സർവാൻ സഹൈഭിർവനചാരിഭിഃ।
അചിന്തയിത്വാ മാം ഹൃഷ്ടാ ഭക്ഷയന്തി പിബന്തി ച ॥6॥
ഏഭിഃ പ്രധർഷണായാം ച വാരിതം വനപാലകൈഃ।
മാമപ്യചിന്തയൻ ദേവ ഭക്ഷയന്തി വനൗകസഃ॥7॥
ശിഷ്ടമത്രാപവിധ്യന്തി ഭക്ഷയന്തി തഥാപരേ ।
നിവാര്യമാണാസ്തേ സർവേ ഭ്രുകുടിം ദർശയന്തി ഹി ॥8॥
ഇമേ ഹി സംരബ്ധതരാസ്തദാ തൈഃ സമ്പ്രധർഷിതാഃ।
നിവാര്യന്തേ വനാത്തസ്മാത്ക്രുദ്ധൈർവാനരപുംഗവൈഃ॥9॥
തതസ്തൈർബഹുഭിർവീരൈർവാനരൈർവാനരർഷഭാഃ।
സംരക്തനയനൈഃ ക്രോധാദ്ധരയഃ സമ്പ്രധർഷിതാഃ॥10॥
പാണിഭിർനിഹതാഃ കേചിത്കേചിജ്ജാനുഭിരാഹതാഃ।
പ്രകൃഷ്ടാശ്ച തദാ കാമം ദേവമാർഗം ച ദർശിതാഃ॥11॥
ഏവമേതേ ഹതാഃ ശൂരാസ്ത്വയി തിഷ്ഠതി ഭർതരി ।
കൃത്സ്നം മധുവനം ചൈവ പ്രകാമം തൈശ്ച ഭക്ഷ്യതേ ॥12॥
ഏവം വിജ്ഞാപ്യമാനം തം സുഗ്രീവം വാനരർഷഭം ।
അപൃച്ഛത്തം മഹാപ്രാജ്ഞോ ലക്ഷ്മണഃ പരവീരഹാ ॥13॥
കിമയം വാനരോ രാജന്വനപഃ പ്രത്യുപസ്ഥിതഃ।
കിം ചാർഥമഭിനിർദിശ്യ ദുഃഖിതോ വാക്യമബ്രവീത് ॥14॥
ഏവമുക്തസ്തു സുഗ്രീവോ ലക്ഷ്മണേന മഹാത്മനാ ।
ലക്ഷ്മണം പ്രത്യുവാചേദം വാക്യം വാക്യവിശാരദഃ॥15॥
ആര്യ ലക്ഷ്മണ സമ്പ്രാഹ വീരോ ദധിമുഖഃ കപിഃ।
അംഗദപ്രമുഖൈർവീരൈർഭക്ഷിതം മധു വാനരൈഃ॥16॥
നൈഷാമകൃതകാര്യാണാമീദൃശഃ സ്യാദ് വ്യതിക്രമഃ।
വനം യദഭിപന്നാസ്തേ സാധിതം കർമ തദ് ധ്രുവം ॥17॥
വാരയന്തോ ഭൃശം പ്രാപ്താഃ പാലാ ജാനുഭിരാഹതാഃ।
തഥാ ന ഗണിതശ്ചായം കപിർദധിമുഖോ ബലീ ॥18॥
പതിർമമ വനസ്യായമസ്മാഭിഃ സ്ഥാപിതഃ സ്വയം ।
ദൃഷ്ടാ ദേവീ ന സന്ദേഹോ ന ചാന്യേന ഹനൂമതാ ॥19॥
ന ഹ്യന്യഃ സാധനേ ഹേതുഃ കർമണോഽസ്യ ഹനൂമതഃ।
കാര്യസിദ്ധിർഹനുമതി മതിശ്ച ഹരിപുംഗവേ ॥20॥
വ്യവസായശ്ച വീര്യം ച ശ്രുതം ചാപി പ്രതിഷ്ഠിതം ।
ജാംബവാന്യത്ര നേതാ സ്യാദംഗദശ്ച മഹാബലഃ॥21॥
ഹനൂമാംശ്ചാപ്യധിഷ്ഠാതാ ന തത്ര ഗതിരന്യഥാ ।
അംഗദപ്രമുഖൈർവീരൈർഹതം മധുവനം കില ॥22॥
വിചിത്യ ദക്ഷിണാമാശാമാഗതൈർഹരിപുംഗവൈഃ।
ആഗതൈശ്ചാപ്രധൃഷ്യം തദ്ധതം മധുവനം ഹി തൈഃ॥23॥
ധർഷിതം ച വനം കൃത്സ്നമുപയുക്തം തു വാനരൈഃ।
പാതിതാ വനപാലാസ്തേ തദാ ജാനുഭിരാഹതാഃ॥24॥
ഏതദർഥമയം പ്രാപ്തോ വക്തും മധുരവാഗിഹ ।
നാമ്നാ ദധിമുഖോ നാമ ഹരിഃ പ്രഖ്യാതവിക്രമഃ॥25॥
ദൃഷ്ടാ സീതാ മഹാബാഹോ സൗമിത്രേ പശ്യ തത്ത്വതഃ।
അഭിഗമ്യ യഥാ സർവേ പിബന്തി മധു വാനരാഃ॥26॥
ന ചാപ്യദൃഷ്ട്വാ വൈദേഹീം വിശ്രുതാഃ പുരുഷർഷഭ ।
വനം ദത്തവരം ദിവ്യം ധർഷയേയുർവനൗകസഃ॥27॥
തതഃ പ്രഹൃഷ്ടോ ധർമാത്മാ ലക്ഷ്മണഃ സഹരാഘവഃ।
ശ്രുത്വാ കർണസുഖാം വാണീം സുഗ്രീവവദനാച്ച്യുതാം ॥28॥
പ്രാഹൃഷ്യത ഭൃശം രാമോ ലക്ഷ്മണശ്ച മഹായശാഃ।
ശ്രുത്വാ ദധിമുഖസ്യൈവം സുഗ്രീവസ്തു പ്രഹൃഷ്യ ച ॥29॥
വനപാലം പുനർവാക്യം സുഗ്രീവഃ പ്രത്യഭാഷത ।
പ്രീതോഽസ്മി സോഽഹം യദ്ഭുക്തം വനം തൈഃ കൃതകർമഭിഃ॥30॥
ധർഷിതം മർഷണീയം ച ചേഷ്ടിതം കൃതകർമണാം ।
ഗച്ഛ ശീഘ്രം മധുവനം സംരക്ഷസ്വ ത്വമേവ ഹി ।
ശീഘ്രം പ്രേഷയ സർവാംസ്താൻ ഹനൂമത്പ്രമുഖാൻ കപീൻ ॥31॥
ഇച്ഛാമി ശീഘ്രം ഹനുമത്പ്രധാനാ
	ന്ശാഖാമൃഗാംസ്താന്മൃഗരാജദർപാൻ ।
പ്രഷ്ടും കൃതാർഥാൻസഹ രാഘവാഭ്യാം
	ശ്രോതും ച സീതാധിഗമേ പ്രയത്നം ॥32॥
പ്രീതിസ്ഫീതാക്ഷൗ സമ്പ്രഹൃഷ്ടൗ കുമാരൗ
	ദൃഷ്ട്വാ സിദ്ധാർഥൗ വാനരാണാം ച രാജാ ।
അംഗൈഃ പ്രഹൃഷ്ടൈഃ കാര്യസിദ്ധിം വിദിത്വാ
	ബാഹ്വോരാസന്നാമതിമാത്രം നനന്ദ ॥33॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ ത്രിഷഷ്ടിതമഃ സർഗഃ