അഥ പഞ്ചഷഷ്ടിതമഃ സർഗഃ
തതഃ പ്രസ്രവണം ശൈലം തേ ഗത്വാ ചിത്രകാനനം ।
പ്രണമ്യ ശിരസാ രാമം ലക്ഷ്മണം ച മഹാബലം ॥1॥
യുവരാജം പുരസ്കൃത്യ സുഗ്രീവമഭിവാദ്യ ച ।
പ്രവൃത്തിമഥ സീതായാഃ പ്രവക്തുമുപചക്രമുഃ॥2॥
രാവണാന്തഃപുരേ രോധം രാക്ഷസീഭിശ്ച തർജനം ।
രാമേ സമനുരാഗം ച യഥാ ച നിയമഃ കൃതഃ॥3॥
ഏതദാഖ്യായ തേ സർവം ഹരയോ രാമസംനിധൗ ।
വൈദേഹീമക്ഷതാം ശ്രുത്വാ രാമസ്തൂത്തരമബ്രവീത് ॥4॥
ക്വ സീതാ വർതതേ ദേവീ കഥം ച മയി വർതതേ ।
ഏതന്മേ സർവമാഖ്യാത വൈദേഹീം പ്രതി വാനരാഃ॥5॥
രാമസ്യ ഗദിതം ശ്രുത്വാ ഹരയോ രാമസംനിധൗ ।
ചോദയന്തി ഹനൂമന്തം സീതാവൃത്താന്തകോവിദം ॥6॥
ശ്രുത്വാ തു വചനം തേഷാം ഹനൂമാന്മാരുതാത്മജഃ।
പ്രണമ്യ ശിരസാ ദേവ്യൈ സീതായൈ താം ദിശം പ്രതി ॥7॥
ഉവാച വാക്യം വാക്യജ്ഞഃ സീതായാ ദർശനം യഥാ ।
തം മണിം കാഞ്ചനം ദിവ്യം ദീപ്യമാനം സ്വതേജസാ ॥8॥
ദത്വാ രാമായ ഹനുമാംസ്തതഃ പ്രാഞ്ജലിരബ്രവീത് ।
സമുദ്രം ലംഘയിത്വാഹം ശതയോജനമായതം ॥9॥
അഗച്ഛം ജാനകീം സീതാം മാർഗമാണോ ദിദൃക്ഷയാ ।
തത്ര ലങ്കേതി നഗരീ രാവണസ്യ ദുരാത്മനഃ॥10॥
ദക്ഷിണസ്യ സമുദ്രസ്യ തീരേ വസതി ദക്ഷിണേ ।
തത്ര സീതാ മയാ ദൃഷ്ടാ രാവണാന്തഃപുരേ സതീ ॥11॥
ത്വയി സംന്യസ്യ ജീവന്തീ രാമാ രാമ മനോരഥം ।
ദൃഷ്ട്വാ മേ രാക്ഷസീമധ്യേ തർജ്യമാനാ മുഹുർമുഹുഃ॥12॥
രാക്ഷസീഭിർവിരൂപാഭീ രക്ഷിതാ പ്രമദാവനേ ।
ദുഃഖമാപദ്യതേ ദേവീ ത്വയാ വീര സുഖോചിതാ ॥13॥
രാവണാന്തഃപുരേ രുദ്ധാ രാക്ഷസീഭിഃ സുരക്ഷിതാ ।
ഏകവേണീധരാ ദീനാ ത്വയി ചിന്താപരായണാ ॥14॥
അധഃശയ്യാ വിവർണാംഗീ പദ്മിനീവ ഹിമാഗമേ ।
രാവണാദ്വിനിവൃത്താർഥാ മർതവ്യകൃതനിശ്ചയാ ॥15॥
ദേവീ കഥഞ്ചിത്കാകുത്സ്ഥ ത്വന്മനാ മാർഗിതാ മയാ ।
ഇക്ഷ്വാകുവംശവിഖ്യാതിം ശനൈഃ കീർതയതാനഘ ॥16॥
സാ മയാ നരശാർദൂല ശനൈർവിശ്വാസിതാ തദാ ।
തതഃ സംഭാഷിതാ ദേവീ സർവമർഥം ച ദർശിതാ ॥17॥
രാമസുഗ്രീവസഖ്യം ച ശ്രുത്വാ ഹർഷമുപാഗതാ ।
നിയതഃ സമുദാചാരോ ഭക്തിശ്ചാസ്യാഃ സദാ ത്വയി ॥18॥
ഏവം മയാ മഹാഭാഗ ദൃഷ്ടാ ജനകനന്ദിനീ ।
ഉഗ്രേണ തപസാ യുക്താ ത്വദ്ഭക്ത്യാ പുരുഷർഷഭ ॥19॥
അഭിജ്ഞാനം ച മേ ദത്തം യഥാവൃത്തം തവാന്തികേ ।
ചിത്രകൂടേ മഹാപ്രാജ്ഞ വായസം പ്രതി രാഘവ ॥20॥
വിജ്ഞാപ്യഃ പുനരപ്യേഷ രാമോ വായുസുത ത്വയാ ।
അഖിലേന യഥാ ദ്ദൃഷ്ടമിതി മാമാഹ ജാനകീ ॥21॥
അയം ചാസ്മൈ പ്രദാതവ്യോ യത്നാത്സുപരിരക്ഷിതഃ।
ബ്രുവതാ വചനാന്യേവം സുഗ്രീവസ്യോപശൃണ്വതഃ॥22॥
ഏഷ ചൂഡാമണിഃ ശ്രീമാന്മയാ തേ യത്നരക്ഷിതഃ।
മനഃശിലായാസ്തിലകം തത് സ്മരസ്വേതി ചാബ്രവീത് ॥23॥
ഏഷ നിര്യാതിതഃ ശ്രീമാന്മയാ തേ വാരിസംഭവഃ।
ഏനം ദൃഷ്ട്വാ പ്രമോദിഷ്യേ വ്യസനേ ത്വാമിവാനഘ ॥24॥
ജീവിതം ധാരയിഷ്യാമി മാസം ദശരഥാത്മജ ।
ഊർധ്വം മാസാന്ന ജീവേയം രക്ഷസാം വശമാഗതാ ॥25॥
ഇതി മാമബ്രവീത്സീതാ കൃശാംഗീ ധർമചാരിണീ ।
രാവണാന്തഃപുരേ രുദ്ധാ മൃഗീവോത്ഫുല്ലലോചനാ ॥26॥
ഏതദേവ മയാഽഽഖ്യാതം സർവം രാഘവ യദ്യഥാ ।
സർവഥാ സാഗരജലേ സന്താരഃ പ്രവിധീയതാം ॥27॥
തൗ ജാതാശ്വാസൗ രാജപുത്രൗ വിദിത്വാ
	തച്ചാഭിജ്ഞാനം രാഘവായ പ്രദായ ।
ദേവ്യാ ചാഖ്യാതം സർവമേവാനുപൂർവ്യാദ്
	വാചാ സമ്പൂർണം വായുപുത്രഃ ശശംസ ॥28॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ പഞ്ചഷഷ്ടിതമഃ സർഗഃ