അഥ സപ്തഷഷ്ടിതമഃ സർഗഃ
ഏവമുക്തസ്തു ഹനുമാന്രാഘവേണ മഹാത്മനാ ।
സീതായാ ഭാഷിതം സർവം ന്യവേദയത രാഘവേ ॥1॥
ഇദമുക്തവതീ ദേവീ ജാനകീ പുരുഷർഷഭ ।
പൂർവവൃത്തമഭിജ്ഞാനം ചിത്രകൂടേ യഥാതഥം ॥2॥
സുഖസുപ്താ ത്വയാ സാർധം ജാനകീ പൂർവമുത്ഥിതാ ।
വായസഃ സഹസോത്പത്യ വിദദാര സ്തനാന്തരം ॥3॥
പര്യായേണ ച സുപ്തസ്ത്വം ദേവ്യങ്കേ ഭരതാഗ്രജ ।
പുനശ്ച കില പക്ഷീ സ ദേവ്യാ ജനയതി വ്യഥാ ॥4॥
തതഃ പുനരുപാഗമ്യ വിദദാര ഭൃശം കില ।
തതസ്ത്വം ബോധിതസ്തസ്യാഃ ശോണിതേന സമുക്ഷിതഃ॥5॥
വായസേന ച തേനൈവം സതതം ബാധ്യമാനയാ ।
ബോധിതഃ കില ദേവ്യാ ത്വം സുഖസുപ്തഃ പരന്തപ ॥6॥
താം ച ദൃഷ്ട്വാ മഹാബാഹോ ദാരിതാം ച സ്തനാന്തരേ ।
ആശീവിഷ ഇവ ക്രുദ്ധസ്തതോ വാക്യം ത്വമൂചിവാൻ ॥7॥
നഖാഗ്രൈഃ കേന തേ ഭീരു ദാരിതം വൈ സ്തനാന്തരം ।
കഃ ക്രീഡതി സരോഷേണ പഞ്ചവക്ത്രേണ ഭോഗിനാ ॥8॥
നിരീക്ഷമാണഃ സഹസാ വായസം സമുദൈക്ഷഥാഃ।
നഖൈഃ സരുധിരൈസ്തീക്ഷ്ണൈസ്താമേവാഭിമുഖം സ്ഥിതം ॥9॥
സുതഃ കില സ ശക്രസ്യ വായസഃ പതതാം വരഃ।
ധരാന്തരഗതഃ ശീഘ്രം പവനസ്യ ഗതൗ സമഃ॥10॥
തതസ്തസ്മിന്മഹാബാഹോ കോപസംവർതിതേക്ഷണഃ।
വായസേ ത്വം വ്യധാഃ ക്രൂരാം മതിം മതിമതാം വര ॥11॥
സ ദർഭസംസ്തരാദ്ഗൃഹ്യ ബ്രഹ്മാസ്ത്രേണന്യയോജയഃ।
സ ദീപ്ത ഇവ കാലാഗ്നിർജജ്വാലാഭിമുഖം ഖഗം ॥12॥
സ ത്വം പ്രദീപ്തം ചിക്ഷേപ ദർഭം തം വായസം പ്രതി ।
തതസ്തു വായസം ദീപ്തഃ സ ദർഭോഽനുജഗാമ ഹ ॥13॥
ഭീതൈശ്ച സമ്പരിത്യക്തഃ സുരൈഃ സർവൈശ്ച വായസഃ।
ത്രീഁല്ലോകാൻസമ്പരിക്രമ്യ ത്രാതാരം നാധിഗച്ഛതി ॥14॥
പുനരപ്യാഗതസ്തത്ര ത്വത്സകാശമരിന്ദമ ।
ത്വം തം നിപതിതം ഭൂമൗ ശരണ്യഃ ശരണാഗതം ॥15॥
വധാർഹമപി കാകുത്സ്ഥ കൃപയാ പരിപാലയഃ।
മോഘമസ്ത്രം ന ശക്യം തു കർതുമിത്യേവ രാഘവ ॥16॥
ഭവാംസ്തസ്യാക്ഷി കാകസ്യ ഹിനസ്തി സ്മ സ ദക്ഷിണം ।
രാമ ത്വാം സ നമസ്കൃത്യ രാജ്ഞോ ദശരഥസ്യ ച ॥17॥
വിസൃഷ്ടസ്തു തദാ കാകഃ പ്രതിപേദേ സ്വമാലയം ।
ഏവമസ്ത്രവിദാം ശ്രേഷ്ഠഃ സത്ത്വവാഞ്ഛീലവാനപി ॥18॥
കിമർഥമസ്ത്രം രക്ഷഃസു ന യോജയസി രാഘവ ।
ന ദാനവാ ന ഗന്ധർവാ നാസുരാ ന മരുദ്ഗണാഃ॥19॥
തവ രാമ രണേ ശക്താസ്തഥാ  പ്രതിസമാസിതും ।
തവ വീര്യവതഃ കച്ചിന്മയി യദ്യസ്തി സംഭ്രമഃ॥20॥
ക്ഷിപ്രം സുനിശിതൈർബാർണൈഹന്യതാം യുധി രാവണഃ।
ഭ്രാതുരാദേശമാജ്ഞായ ലക്ഷ്മണോ വാ പരന്തപഃ॥21॥
സ കിമർഥം നരവരോ ന മാം രക്ഷതി രാഘവഃ।
ശക്തൗ തൗ പുരുഷവ്യാഘ്രൗ വായ്വഗ്നിസമതേജസൗ ॥22॥
സുരാണാമപി ദുർധർഷൗ കിമർഥം മാമുപേക്ഷതഃ।
മമൈവ ദുഷ്കൃതം കിഞ്ചിന്മഹദസ്തി ന സംശയഃ॥23॥
സമർഥൗ സഹിതൗ യന്മാം ന രക്ഷേതേ പരന്തപൗ ।
വൈദേഹ്യാ വചനം ശ്രുത്വാ കരുണം സാധുഭാഷിതം ॥24॥
പുനരപ്യഹമാര്യാം താമിദം വചനമബ്രുവം ।
ത്വച്ഛോകവിമുഖോ രാമോ ദേവി സത്യേന തേ ശപേ ॥25॥
രാമേ ദുഃഖാഭിഭൂതേ ച ലക്ഷ്മണഃ പരിതപ്യതേ ।
കഥഞ്ചിദ്ഭവതീ ദൃഷ്ടാ ന കാലഃ പരിശോചിതും ॥26॥
അസ്മിൻ മുഹൂർതേ ദുഃഖാനാമന്തം ദ്രക്ഷ്യസി ഭാമിനി ।
താവുഭൗ നരശാർദൂലൗ രാജപുത്രൗ പരന്തപൗ ॥27॥
ത്വദ്ദർശനകൃതോത്സാഹൗ ലങ്കാം ഭസ്മീകരിഷ്യതഃ।
ഹത്വാ ച സമരേ രൗദ്രം രാവണം സഹബാന്ധവം ॥28॥
രാഘവസ്ത്വാം വരാരോഹേ സ്വപുരീം നയിതാ ധ്രുവം ।
യത്തു രാമോ വിജാനീയാദഭിജ്ഞാനമനിന്ദിതേ ॥29॥
പ്രീതിസഞ്ജനനം തസ്യ പ്രദാതും തത്ത്വമർഹസി ।
സാഭിവീക്ഷ്യ ദിശഃ സർവാ വേണ്യുദ്ഗ്രഥനമുത്തമം ॥30॥
മുക്ത്വാ വസ്ത്രാദ്ദദൗ മഹ്യം മണിമേതം മഹാബല ।
പ്രതിഗൃഹ്യ മണിം ദോർഭ്യാം തവ ഹേതോ രഘുപ്രിയ ॥31॥
ശിരസാ സമ്പ്രണമ്യൈനാമഹമാഗമനേ ത്വരേ ।
ഗമനേ ച കൃതോത്സാഹമവേക്ഷ്യ വരവർണിനീ ॥32॥
വിവർധമാനം ച ഹി മാമുവാച ജനകാത്മജാ ।
അശ്രുപൂർണമുഖീ ദീനാ ബാഷ്പഗദ്ഗദഭാഷിണീ ॥33॥
മമോത്പതനസംഭ്രാന്താ ശോകവേഗസമാഹതാ ।
മാമുവാച തതഃ സീതാ സഭാഗ്യോഽസി മഹാകപേ ॥34॥
യദ് ദ്രക്ഷ്യസി മഹാബാഹും രാമം കമലലോചനം ।
ലക്ഷ്മണം ച മഹാബാഹും ദേവരം മേ യശസ്വിനം ॥35॥
സീതയാപ്യേവമുക്തോഽഹമബ്രുവം മൈഥിലീം തഥാ ।
പൃഷ്ടമാരോഹ മേ ദേവി ക്ഷിപ്രം ജനകനന്ദിനി ॥36॥
യാവത്തേ ദർശയാമ്യദ്യ സസുഗ്രീവം സലക്ഷ്മണം ।
രാഘവം ച മഹാഭാഗേ ഭർതാരമസിതേക്ഷണേ ॥37॥
സാബ്രവീന്മാം തതോ ദേവീ നൈഷ ധർമോ മഹാകപേ ।
യത്തേ പൃഷ്ടം സിഷേവേഽഹം സ്വവശാ ഹരിപുംഗവ ॥38॥
പുരാ ച യദഹം വീര സ്പൃഷ്ടാ ഗാത്രേഷു രക്ഷസാ ।
തത്രാഹം കിം കരിഷ്യാമി കാലേനോപനിപീഡിതാ ॥39॥
ഗച്ഛ ത്വം കപിശാർദൂല യത്ര തൗ നൃപതേഃ സുതൗ ।
ഇത്യേവം സാ സമാഭാഷ്യ ഭൂയഃ സന്ദേഷ്ടുമാസ്ഥിതാ ॥40॥
ഹനുമൻസിംഹസങ്കാശൗ താവുഭൗ രാമലക്ഷ്മണൗ ।
സുഗ്രീവം ച സഹാമാത്യം സർവാൻബ്രൂയാ അനാമയം ॥41॥
യഥാ ച സ മഹാബാഹുർമാം താരയതി രാഘവഃ।
അസ്മാദ്ദുഃഖാംബുസംരോധാത് തത് ത്വമാഖ്യാതുമർഹസി ॥42॥
ഇമം ച തീവ്രം മമ ശോകവേഗം
	രക്ഷോഭിരേഭിഃ പരിഭർത്സനം ച ।
ബ്രൂയാസ്തു രാമസ്യ ഗതഃ സമീപം
	ശിവശ്ച തേഽധ്വാസ്തു ഹരിപ്രവീര ॥43॥
ഏതത്തവാര്യാ നൃപ സംയതാ സാ
	സീതാ വചഃ പ്രാഹ വിഷാദപൂർവം ।
ഏതച്ച ബുദ്ധ്വാ ഗദിതം യഥാ ത്വം
	ശ്രദ്ധത്സ്വ സീതാം കുശലാം സമഗ്രാം ॥44॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ സപ്തഷഷ്ടിതമഃ സർഗഃ