അഥ അഷ്ടഷഷ്ടിതമഃ സർഗഃ
അഥാഹമുത്തരം ദേവ്യാ പുനരുക്തഃ സസംഭ്രമം ।
തവ സ്നേഹാന്നരവ്യാഘ്ര സൗഹാർദാദനുമാന്യ ച ॥1॥
ഏവം ബഹുവിധം വാച്യോ രാമോ ദാശരഥിസ്ത്വയാ ।
യഥാ മാമാപ്നുയാച്ഛീഘ്രം ഹത്വാ രാവണമാഹവേ ॥2॥
യദി വാ മന്യസേ വീര വസൈകാഹമരിന്ദമ ।
കസ്മിംശ്ചിത്സംവൃതേ ദേശേ വിശ്രാന്തഃ ശ്വോ ഗമിഷ്യസി ॥3॥
മമ ചാപ്യല്പഭാഗ്യായാഃ സാംനിധ്യാത്തവ വാനര ।
അസ്യ ശോകവിപാകസ്യ മുഹൂർതം സ്യാദ്വിമോക്ഷണം ॥4॥
ഗതേ ഹി ത്വയി വിക്രാന്തേ പുനരാഗമനായ വൈ ।
പ്രാണാനാമപി സന്ദേഹോ മമ സ്യാന്നാത്ര സംശയഃ॥5॥
തവാദർശനജഃ ശോകോ ഭൂയോ മാം പരിതാപയേത് ।
ദുഃഖാദ്ദുഃഖപരാഭൂതാം ദുർഗതാം ദുഃഖഭാഗിനീം ॥6॥
അയം ച വീര സന്ദേഹസ്തിഷ്ഠതീവ മമാഗ്രതഃ।
സുമഹാംസ്ത്വത്സഹായേഷു ഹര്യൃക്ഷേഷു ഹരീശ്വര ॥7॥
കഥം നു ഖലു ദുഷ്പാരം തരിഷ്യന്തി മഹോദധിം ।
താനി ഹര്യൃക്ഷസൈന്യാനി തൗ വാ നരവരാത്മജൗ ॥8॥
ത്രയാണാമേവ ഭൂതാനാം സാഗരസ്യാസ്യ ലംഘനേ ।
ശക്തിഃ സ്യാദ്വൈനതേയസ്യ വായോർവാ തവ ചാനഘ ॥9॥
തദസ്മിൻകാര്യനിര്യോഗേ വീരൈവം ദുരതിക്രമേ ।
കിം പശ്യസി സമാധാനം ബ്രൂഹി കാര്യവിദാം വര ॥10॥
കാമമസ്യ ത്വമേവൈകഃ കാര്യസ്യ പരിസാധനേ ।
പര്യാപ്തഃ പരവീരഘ്ന യശസ്യസ്തേ ബലോദയഃ॥11॥
ബലൈഃ സമഗ്രൈര്യദി മാം ഹത്വാ രാവണമാഹവേ ।
വിജയീ സ്വപുരീം രാമോ നയേത്തത്സ്യാദ്യശസ്കരം ॥12॥
യഥാഹം തസ്യ വീരസ്യ വനാദുപധിനാ ഹൃതാ ।
രക്ഷസാ തദ്ഭയാദേവ തഥാ നാർഹതി രാഘവഃ॥13॥
ബലൈസ്തു സങ്കുലാം കൃത്വാ ലങ്കാം പരബലാർദനഃ।
മാം നയേദ്യദി കാകുത്സ്ഥസ്തത്തസ്യ സദൃശം ഭവേത് ॥14॥
തദ്യഥാ തസ്യ വിക്രാന്തമനുരൂപം മഹാത്മനഃ।
ഭവത്യാഹവശൂരസ്യ തഥാ ത്വമുപപാദയ ॥15॥
തദർഥോപഹിതം വാക്യം പ്രശ്രിതം ഹേതുസംഹിതം ।
നിശമ്യാഹം തതഃ ശേഷം വാക്യമുത്തരമബ്രുവം ॥16॥
ദേവി ഹര്യൃക്ഷസൈന്യാനാമീശ്വരഃ പ്ലവതാം വരഃ।
സുഗ്രീവഃ സത്ത്വസമ്പന്നസ്ത്വദർഥേ കൃതനിശ്ചയഃ॥17॥
തസ്യ വിക്രമസമ്പന്നാഃ സത്ത്വവന്തോ മഹാബലാഃ।
മനഃസങ്കല്പസദൃശാ നിദേശേ ഹരയഃ സ്ഥിതാഃ॥18॥
യേഷാം നോപരി നാധസ്താന്ന തിര്യക്സജ്ജതേ ഗതിഃ।
ന ച കർമസു സീദന്തി മഹത്സ്വമിതതേജസഃ॥19॥
അസകൃത്തൈർമഹാഭാഗൈർവാനരൈർബലസംയുതൈഃ।
പ്രദക്ഷിണീകൃതാ ഭൂമിർവായുമാർഗാനുസാരിഭിഃ॥20॥
മദ്വിശിഷ്ടാശ്ച തുല്യാശ്ച സന്തി തത്ര വനൗകസഃ।
മത്തഃ പ്രത്യവരഃ കശ്ചിന്നാസ്തി സുഗ്രീവസംനിധൗ ॥21॥
അഹം താവദിഹ പ്രാപ്തഃ കിം പുനസ്തേ മഹാബലാഃ।
നഹി പ്രകൃഷ്ടാഃ പ്രേഷ്യന്തേ പ്രേഷ്യന്തേ ഹീതരേ ജനാഃ॥22॥
തദലം പരിതാപേന ദേവി മന്യുരപൈതു തേ ।
ഏകോത്പാതേന തേ ലങ്കാമേഷ്യന്തി ഹരിയൂഥപാഃ॥23॥
മമ പൃഷ്ഠഗതൗ തൗ ച ചന്ദ്രസൂര്യാവിവോദിതൗ ।
ത്വത്സകാശം മഹാഭാഗേ നൃസിംഹാവാഗമിഷ്യതഃ॥24॥
അരിഘ്നം സിംഹസങ്കാശം ക്ഷിപ്രം ദ്രക്ഷ്യസി രാഘവം ।
ലക്ഷ്മണം ച ധനുഷ്മന്തം ലങ്കാദ്വാരമുപാഗതം ॥25॥
നഖദംഷ്ട്രായുധാന്വീരാൻ സിംഹശാർദൂലവിക്രമാൻ ।
വാനരാൻ വാരണേന്ദ്രാഭാൻ ക്ഷിപ്രം ദ്രക്ഷ്യസി സംഗതാൻ ॥26॥
ശൈലാംബുദനികാശാനാം ലങ്കാമലയസാനുഷു ।
നർദതാം കപിമുഖ്യാനാം നചിരാച്ഛ്രോഷ്യസേ സ്വനം ॥27॥
നിവൃത്തവനവാസം ച ത്വയാ സാർധമരിന്ദമം ।
അഭിഷിക്തമയോധ്യായാം ക്ഷിപ്രം ദ്രക്ഷ്യസി രാഘവം ॥28॥
തതോ മയാ വാഗ്ഭിരദീനഭാഷിണാ
	ശിവാഭിരിഷ്ടാഭിരഭിപ്രസാദിതാ ।
ഉവാഹ ശാന്തിം മമ മൈഥിലാത്മജാ
	തവാതിശോകേന തഥാതിപീഡിതാ ॥29॥
ഇത്യാർഷേ ശ്രീമദ്്രാമായണേ വാല്മീകീയേ ആദികാവ്യേ സുന്ദരകാണ്ഡേ അഷ്ടഷഷ്ടിതമഃ സർഗഃ