அத² ப்ரத²ம꞉ ஸர்க³꞉
ததோ ராவணனீதாயா꞉
	ஸீதாயா꞉ ஶத்ருகர்ஷண꞉।
இயேஷ பத³மன்வேஷ்டும்
	சாரணாசரிதே பதி² ॥1॥
து³ஷ்கரம் நிஷ்ப்ரதித்³வந்த்³வம்
	சிகீர்ஷன் கர்ம வானர꞉।
ஸமுத³க்³ரஶிரோக்³ரீவோ
	க³வாம் பதிரிவாப³பௌ⁴ ॥2॥
அத² வைதூ³ர்யவர்ணேஷு
	ஶாத்³வலேஷு மஹாப³ல꞉।
தீ⁴ர꞉ ஸலிலகல்பேஷு
	விசசார யதா²ஸுக²ம் ॥3॥
த்³விஜான் வித்ராஸயன் தீ⁴மான்
	உரஸா பாத³பான் ஹரன் ।
ம்ருகா³ம்ஶ்ச ஸுப³ஹூன் நிக்⁴னன்
	ப்ரவ்ருத்³த⁴ இவ கேஸரீ ॥4॥
நீலலோஹிதமாஞ்ஜிஷ்ட²-
	பத்³மவர்ணை꞉ ஸிதாஸிதை꞉।
ஸ்வபா⁴வஸித்³தை⁴ர்விமலை꞉
	தா⁴துபி⁴꞉ ஸமலங்க்ருதம் ॥5॥
காமரூபிபி⁴ராவிஷ்டம்
	அபீ⁴க்ஷ்ணம் ஸபரிச்ச²தை³꞉।
யக்ஷகிந்நரக³ந்த⁴ர்வை꞉
	தே³வகல்பை꞉ ஸபன்னகை³꞉॥6॥
ஸ தஸ்ய கி³ரிவர்யஸ்ய
	தலே நாக³வராயுதே ।
திஷ்ட²ன் கபிவரஸ்தத்ர
	ஹ்ரதே³ நாக³ இவாப³பௌ⁴ ॥7॥
ஸ ஸூர்யாய மஹேந்த்³ராய
	பவனாய ஸ்வயம்பு⁴வே ।
பூ⁴தேப்⁴யஶ்சாஞ்ஜலிம் க்ருத்வா
	சகார க³மனே மதிம் ॥8॥
அஞ்ஜலிம் ப்ராங்முக²ம் குர்வன்
	பவனாயாத்மயோனயே ।
ததோ ஹி வவ்ருதே⁴ க³ந்தும்
	த³க்ஷிணோ த³க்ஷிணாம் தி³ஶம் ॥9॥
ப்லவக³ப்ரவரைர்த்³ருஷ்ட꞉
	ப்லவனே க்ருதநிஶ்சய꞉।
வவ்ருதே⁴ ராமவ்ருத்³த்⁴யர்த²ம்
	ஸமுத்³ர இவ பர்வஸு ॥10॥
நிஷ்ப்ரமாணஶரீர꞉ ஸன்
	லிலங்க⁴யிஷுரர்ணவம் ।
பா³ஹுப்⁴யாம் பீட³யாமாஸ
	சரணாப்⁴யாம் ச பர்வதம் ॥11॥
ஸ சசாலாசலஶ்சாஶு
	முஹூர்தம் கபிபீடி³த꞉।
தரூணாம் புஷ்பிதாக்³ராணாம்
	ஸர்வம் புஷ்பமஶாதயத் ॥12॥
தேன பாத³பமுக்தேன
	புஷ்பௌகே⁴ண ஸுக³ந்தி⁴னா ।
ஸர்வத꞉ ஸம்வ்ருத꞉ ஶைலோ
	ப³பௌ⁴ புஷ்பமயோ யதா² ॥13॥
தேன சோத்தமவீர்யேண
	பீட்³யமான꞉ ஸ பர்வத꞉।
ஸலிலம் ஸம்ப்ரஸுஸ்ராவ
	மத³மத்த இவ த்³விப꞉॥14॥
பீட்³யமானஸ்து ப³லினா
	மஹேந்த்³ரஸ்தேன பர்வத꞉।
ரீதீர்நிர்வர்தயாமாஸ
	காஞ்சனாஞ்ஜனராஜதீ꞉॥15॥
முமோச ச ஶிலா꞉ ஶைலோ
	விஶாலா꞉ ஸமன꞉ஶிலா꞉।
மத்⁴யமேனார்சிஷா ஜுஷ்டோ
	தூ⁴மராஜீரிவானல꞉॥16॥
ஹரிணா பீட்³யமானேன
	பீட்³யமானானி ஸர்வத꞉।
கு³ஹாவிஷ்டானி ஸத்த்வானி
	வினேது³ர்விக்ருதை꞉ ஸ்வரை꞉॥17॥
ஸ மஹான் ஸத்த்வஸந்நாத³꞉
	ஶைலபீடா³நிமித்தஜ꞉।
ப்ருதி²வீம் பூரயாமாஸ
	தி³ஶஶ்சோபவனானி ச ॥18॥
ஶிரோபி⁴꞉ ப்ருது²பி⁴ர்நாகா³
	வ்யக்தஸ்வஸ்திகலக்ஷணை꞉।
வமந்த꞉ பாவகம் கோ⁴ரம்
	த³த³ம்ஶுர்த³ஶனை꞉ ஶிலா꞉॥19॥
தாஸ்ததா³ ஸவிஷைர்த³ஷ்டா꞉
	குபிதைஸ்தைர்மஹாஶிலா꞉।
ஜஜ்வலு꞉ பாவகோத்³தீ³ப்தா
	பி³பி⁴து³ஶ்ச ஸஹஸ்ரதா⁴ ॥20॥
யானி த்வௌஷத⁴ஜாலானி
	தஸ்மிஞ்ஜாதானி பர்வதே ।
விஷக்⁴னான்யபி நாகா³னாம்
	ந ஶேகு꞉ ஶமிதும் விஷம் ॥21॥
பி⁴த்³யதேऽயம் கி³ரிர்பூ⁴தை꞉
	இதி மத்வா தபஸ்வின꞉।
த்ரஸ்தா வித்³யாத⁴ராஸ்தஸ்மாத்
	உத்பேது꞉ ஸ்த்ரீக³ணை꞉ ஸஹ ॥22॥
பானபூ⁴மிக³தம் ஹித்வா
	ஹைமமாஸவபா⁴ஜனம் ।
பாத்ராணி ச மஹார்ஹாணி
	கரகாம்ஶ்ச ஹிரண்மயான் ॥23॥
லேஹ்யானுச்சாவசான் ப⁴க்ஷ்யான்
	மாம்ஸானி விவிதா⁴னி ச ।
ஆர்ஷபா⁴ணி ச சர்மாணி
	க²ட்³ங்கா³ம்ஶ்ச கனகத்ஸரூன் ॥24॥
க்ருதகண்ட²கு³ணா꞉ க்ஷீபா³
	ரக்தமால்யானுலேபனா꞉।
ரக்தாக்ஷா꞉ புஷ்கராக்ஷாஶ்ச
	க³க³னம் ப்ரதிபேதி³ரே ॥25॥
ஹாரநூபுரகேயூர-
	பாரிஹார்யத⁴ரா꞉ ஸ்த்ரிய꞉।
விஸ்மிதா꞉ ஸஸ்மிதாஸ்தஸ்து²꞉
	ஆகாஶே ரமணை꞉ ஸஹ ॥26॥
த³ர்ஶயந்தோ மஹாவித்³யாம்
	வித்³யாத⁴ரமஹர்ஷய꞉।
ஸஹிதாஸ்தஸ்து²ராகாஶே
	வீக்ஷாஞ்சக்ருஶ்ச பர்வதம் ॥27॥
ஶுஶ்ருவுஶ்ச ததா³ ஶப்³த³ம்
	ருஷீணாம் பா⁴விதாத்மனாம் ।
சாரணானாம் ச ஸித்³தா⁴னாம்
	ஸ்தி²தானாம் விமலேऽம்ப³ரே ॥28॥
ஏஷ பர்வதஸங்காஶோ
	ஹனுமான் மாருதாத்மஜ꞉।
திதீர்ஷதி மஹாவேக³꞉
	ஸமுத்³ரம் வருணாலயம் ॥29॥
ராமார்த²ம் வானரார்த²ம் ச
	சிகீர்ஷன் கர்ம து³ஷ்கரம் ।
ஸமுத்³ரஸ்ய பரம் பாரம்
	து³ஷ்ப்ராபம் ப்ராப்துமிச்ச²தி ॥30॥
இதி வித்³யாத⁴ரா வாச꞉
	ஶ்ருத்வா தேஷாம் தபஸ்வினாம் ।
தமப்ரமேயம் த³த்³ருஶு꞉
	பர்வதே வானரர்ஷப⁴ம் ॥31॥
து³து⁴வே ச ஸ ரோமாணி
	சகம்பே சானலோபம꞉।
நநாத³ ச மஹாநாத³ம்
	ஸுமஹானிவ தோயத³꞉॥32॥
ஆனுபூர்வ்யா ச வ்ருத்தம் தத்
	லாங்கூ³லம் ரோமபி⁴ஶ்சிதம் ।
உத்பதிஷ்யன் விசிக்ஷேப
	பக்ஷிராஜ இவோரக³ம் ॥33॥
தஸ்ய லாங்கூ³லமாவித்³த⁴ம்
	அதிவேக³ஸ்ய ப்ருஷ்ட²த꞉।
த³த்³ருஶே க³ருடே³னேவ
	ஹ்ரியமாணோ மஹோரக³꞉॥34॥
பா³ஹூ ஸம்ஸ்தம்ப⁴யாமாஸ
	மஹாபரிக⁴ஸம்நிபௌ⁴ ।
ஆஸஸாத³ கபி꞉ கட்யாம்
	சரணௌ ஸஞ்சுகோச ச ॥35॥
ஸம்ஹ்ருத்ய ச பு⁴ஜௌ ஸ்ரீமான்
	ததை²வ ச ஶிரோத⁴ராம் ।
தேஜ꞉ ஸத்த்வம் ததா² வீர்யம்
	ஆவிவேஶ ஸ வீர்யவான் ॥36॥
மார்க³மாலோகயன் தூ³ராத்
	ஊர்த்⁴வப்ரணிஹிதேக்ஷண꞉।
ருரோத⁴ ஹ்ருத³யே ப்ராணான்
	ஆகாஶமவலோகயன் ॥37॥
பத்³ப்⁴யாம் த்³ருட⁴மவஸ்தா²னம்
	க்ருத்வா ஸ கபிகுஞ்ஜர꞉।
நிகுச்ய கர்ணௌ ஹனுமான்
	உத்பதிஷ்யன் மஹாப³ல꞉॥38॥
வானரான் வானரஶ்ரேஷ்ட²
	இத³ம் வசனமப்³ரவீத் ।
யதா² ராக⁴வநிர்முக்த꞉
	ஶர꞉ ஶ்வஸனவிக்ரம꞉॥39॥
க³ச்சே²த் தத்³வத் க³மிஷ்யாமி
	லங்காம் ராவணபாலிதாம் ।
நஹி த்³ரக்ஷ்யாமி யதி³ தாம்
	லங்காயாம் ஜனகாத்மஜாம் ॥40॥
அனேனைவ ஹி வேகே³ன
	க³மிஷ்யாமி ஸுராலயம் ।
யதி³ வா த்ரிதி³வே ஸீதாம்
	ந த்³ரக்ஷ்யாமி க்ருதஶ்ரம꞉॥41॥
ப³த்³த்⁴வா ராக்ஷஸராஜானம்
	ஆனயிஷ்யாமி ராவணம் ।
ஸர்வதா² க்ருதகார்யோऽஹம்
	ஏஷ்யாமி ஸஹ ஸீதயா ॥42॥
ஆனயிஷ்யாமி வா லங்காம்
	ஸமுத்பாட்ய ஸராவணாம் ।
ஏவமுக்த்வா து ஹனுமான்
	வானரோ வானரோத்தம꞉॥43॥
உத்பபாதாத² வேகே³ன
	வேக³வானவிசாரயன் ।
ஸுபர்ணமிவ சாத்மானம்
	மேனே ஸ கபிகுஞ்ஜர꞉॥44॥
ஸமுத்பததி வேகா³த் து
	வேகா³த் தே நக³ரோஹிண꞉।
ஸம்ஹ்ருத்ய விடபான் ஸர்வான்
	ஸமுத்பேது꞉ ஸமந்தத꞉॥45॥
ஸ மத்தகோயஷ்டிப⁴கான்
	பாத³பான் புஷ்பஶாலின꞉।
உத்³வஹன்னுருவேகே³ன
	ஜகா³ம விமலேऽம்ப³ரே ॥46॥
ஊருவேகோ³த்தி²தா வ்ருக்ஷா
	முஹூர்தம் கபிமன்வயு꞉।
ப்ரஸ்தி²தம் தீ³ர்க⁴மத்⁴வானம்
	ஸ்வப³ந்து⁴மிவ பா³ந்த⁴வா꞉॥47॥
தமூருவேகோ³ன்மதி²தா꞉
	ஸாலாஶ்சான்யே நகோ³த்தமா꞉।
அனுஜக்³முர்ஹனூமந்தம்
	ஸைன்யா இவ மஹீபதிம் ॥48॥
ஸுபுஷ்பிதாக்³ரைர்ப³ஹுபி⁴꞉
	பாத³பைரன்வித꞉ கபி꞉।
ஹனூமான் பர்வதாகாரோ
	ப³பூ⁴வாத்³பு⁴தத³ர்ஶன꞉॥49॥
ஸாரவந்தோऽத² யே வ்ருக்ஷா
	ந்யமஜ்ஜன் லவணாம்ப⁴ஸி ।
ப⁴யாதி³வ மஹேந்த்³ரஸ்ய
	பர்வதா வருணாலயே ॥50॥
ஸ நாநாகுஸுமை꞉ கீர்ண꞉
	கபி꞉ ஸாங்குரகோரகை꞉।
ஶுஶுபே⁴ மேக⁴ஸங்காஶ꞉
	க²த்³யோதைரிவ பர்வத꞉॥51॥
விமுக்தாஸ்தஸ்ய வேகே³ன
	முக்த்வா புஷ்பாணி தே த்³ருமா꞉।
வ்யவஶீர்யந்த ஸலிலே
	நிவ்ருத்தா꞉ ஸுஹ்ருதோ³ யதா² ॥52॥
லகு⁴த்வேனோபபன்னம் தத்³
	விசித்ரம் ஸாக³ரேऽபதத் ।
த்³ருமாணாம் விவித⁴ம் புஷ்பம் கபிவாயுஸமீரிதம் ।
தாராசிதமிவாகாஶம்
	ப்ரப³பௌ⁴ ஸ மஹார்ணவ꞉॥53॥
புஷ்பௌகே⁴ண ஸுக³ந்தே⁴ன
	நாநாவர்ணேன வானர꞉।
ப³பௌ⁴ மேக⁴ இவோத்³யன் வை
	வித்³யுத்³க³ணவிபூ⁴ஷித꞉॥54॥
தஸ்ய வேக³ஸமுத்³பூ⁴தை꞉
	புஷ்பைஸ்தோயமத்³ருஶ்யத ।
தாராபி⁴ரிவ ராமாபி⁴꞉
	உதி³தாபி⁴ரிவாம்ப³ரம் ॥55॥
தஸ்யாம்ப³ரக³தௌ பா³ஹூ
	த³த்³ருஶாதே ப்ரஸாரிதௌ ।
பர்வதாக்³ராத்³ விநிஷ்க்ராந்தௌ
	பஞ்சாஸ்யாவிவ பன்னகௌ³ ॥56॥
பிப³ன்னிவ ப³பௌ⁴ சாபி
	ஸோர்மிஜாலம் மஹார்ணவம் ।
பிபாஸுரிவ சாகாஶம்
	த³த்³ருஶே ஸ மஹாகபி꞉॥57॥
தஸ்ய வித்³யுத்ப்ரபா⁴காரே
	வாயுமார்கா³னுஸாரிண꞉।
நயனே விப்ரகாஶேதே
	பர்வதஸ்தா²விவானலௌ ॥58॥
பிங்கே³ பிங்கா³க்ஷமுக்²யஸ்ய
	ப்³ருஹதீ பரிமண்ட³லே ।
சக்ஷுஷீ ஸம்ப்ரகாஶேதே
	சந்த்³ரஸூர்யாவிவ ஸ்தி²தௌ ॥59॥
முக²ம் நாஸிகயா தஸ்ய
	தாம்ரயா தாம்ரமாப³பௌ⁴ ।
ஸந்த்⁴யயா ஸமபி⁴ஸ்ப்ருஷ்டம்
	யதா² ஸ்யாத் ஸூர்யமண்ட³லம் ॥60॥
லாங்கூ³லம் ச ஸமாவித்³த⁴ம்
	ப்லவமானஸ்ய ஶோப⁴தே ।
அம்ப³ரே வாயுபுத்ரஸ்ய
	ஶக்ரத்⁴வஜ இவோச்ச்²ரிதம் ॥61 ॥
லாங்கூ³லசக்ரோ ஹனுமான்
	ஶுக்லத³ம்ஷ்ட்ரோऽனிலாத்மஜ꞉।
வ்யரோசத மஹாப்ராஜ்ஞ꞉
	பரிவேஷீவ பா⁴ஸ்கர꞉॥62॥
ஸ்பி²க்³தே³ஶேனாதிதாம்ரேண
	ரராஜ ஸ மஹாகபி꞉।
மஹதா தா³ரிதேனேவ
	கி³ரிர்கை³ரிகதா⁴துனா ॥63॥
தஸ்ய வானரஸிம்ஹஸ்ய
	ப்லவமானஸ்ய ஸாக³ரம் ।
கக்ஷாந்தரக³தோ வாயு꞉
	ஜீமூத இவ க³ர்ஜதி ॥64॥
கே² யதா² நிபதத்யுல்கா
	உத்தராந்தாத்³ விநி꞉ஸ்ருதா ।
த்³ருஶ்யதே ஸானுப³ந்தா⁴ ச
	ததா² ஸ கபிகுஞ்ஜர꞉॥65॥
பதத்பதங்க³ஸங்காஶோ
	வ்யாயத꞉ ஶுஶுபே⁴ கபி꞉।
ப்ரவ்ருத்³த⁴ இவ மாதங்க³꞉
	கக்ஷ்யயா ப³த்⁴யமானயா ॥66॥
உபரிஷ்டாச்ச²ரீரேண
	ச்சா²யயா சாவகா³ட⁴யா ।
ஸாக³ரே மாருதாவிஷ்டா
	நௌரிவாஸீத் ததா³ கபி꞉॥67॥
யம் யம் தே³ஶம் ஸமுத்³ரஸ்ய
	ஜகா³ம ஸ மஹாகபி꞉।
ஸ து தஸ்யாங்க³வேகே³ன
	ஸோன்மாத³ இவ லக்ஷ்யதே ॥68॥
ஸாக³ரஸ்யோர்மிஜாலானாம்
	உரஸா ஶைலவர்ஷ்மணாம் ।
அபி⁴க்⁴னம்ஸ்து மஹாவேக³꞉
	புப்லுவே ஸ மஹாகபி꞉॥69॥
கபிவாதஶ்ச ப³லவான்
	மேக⁴வாதஶ்ச நிர்க³த꞉।
ஸாக³ரம் பீ⁴மநிர்ஹ்ராத³ம்
	கம்பயாமாஸதுர்ப்⁴ருஶம் ॥70॥
விகர்ஷன்னூர்மிஜாலானி
	ப்³ருஹந்தி லவணாம்ப⁴ஸி ।
புப்லுவே கபிஶார்தூ³லோ
	விகிரன்னிவ ரோத³ஸீ ॥71॥
மேருமந்த³ரஸங்காஶான்
	உத்³க³தான் ஸுமஹார்ணவே ।
அத்யக்ராமன்மஹாவேக³꞉
	தரங்கா³ன் க³ணயன்னிவ ॥72॥
தஸ்ய வேக³ஸமுத்³கு⁴ஷ்டம்
	ஜலம் ஸஜலத³ம் ததா³ ।
அம்ப³ரஸ்த²ம் விப³ப்⁴ராஜே
	ஶரத³ப்⁴ரமிவாததம் ॥73॥
திமினக்ரஜ²ஷா꞉ கூர்மா
	த்³ருஶ்யந்தே விவ்ருதாஸ்ததா³ ।
வஸ்த்ராபகர்ஷணேனேவ
	ஶரீராணி ஶரீரிணாம் ॥74॥
க்ரமமாணம் ஸமீக்ஷ்யாத²
	பு⁴ஜகா³꞉ ஸாக³ரங்க³மா꞉।
வ்யோம்னி தம் கபிஶார்தூ³லம்
	ஸுபர்ணமிவ மேநிரே ॥75॥
த³ஶயோஜனவிஸ்தீர்ணா
	த்ரிம்ஶத்³யோஜனமாயதா ।
சா²யா வானரஸிம்ஹஸ்ய
	ஜவே சாருதராப⁴வத் ॥76॥
ஶ்வேதாப்⁴ரக⁴னராஜீவ
	வாயுபுத்ரானுகா³மினீ ।
தஸ்ய ஸா ஶுஶுபே⁴ சா²யா
	பதிதா லவணாம்ப⁴ஸி ॥77॥
ஶுஶுபே⁴ ஸ மஹாதேஜா
	மஹாகாயோ மஹாகபி꞉।
வாயுமார்கே³ நிராலம்பே³
	பக்ஷவானிவ பர்வத꞉॥78॥
யேனாஸௌ யாதி ப³லவான்
	வேகே³ன கபிகுஞ்ஜர꞉।
தேன மார்கே³ண ஸஹஸா
	த்³ரோணீக்ருத இவார்ணவ꞉॥79॥
ஆபாதே பக்ஷிஸங்கா⁴னாம்
	பக்ஷிராஜ இவ வ்ரஜன் ।
ஹனுமான் மேக⁴ஜாலானி
	ப்ரகர்ஷன் மாருதோ யதா² ॥80॥
பாண்டு³ராருணவர்ணானி
	நீலமஞ்ஜிஷ்ட²கானி ச ।
கபினாऽऽக்ருஷ்யமாணானி
	மஹாப்⁴ராணி சகாஶிரே ॥81॥
ப்ரவிஶன்னப்⁴ரஜாலானி
	நிஷ்பதம்ஶ்ச புன꞉ புன꞉।
ப்ரச்ச²ன்னஶ்ச ப்ரகாஶஶ்ச
	சந்த்³ரமா இவ த்³ருஶ்யதே ॥82॥
ப்லவமானம் து தம் த்³ருஷ்ட்வா
	ப்லவக³ம் த்வரிதம் ததா³ ।
வவ்ருஷுஸ்தத்ர புஷ்பாணி
	தே³வக³ந்த⁴ர்வசாரணா꞉॥83॥
ததாப நஹி தம் ஸூர்ய꞉
	ப்லவந்தம் வானரேஶ்வரம் ।
ஸிஷேவே ச ததா³ வாயூ
	ராமகார்யார்த²ஸித்³த⁴யே ॥84॥
ருஷயஸ்துஷ்டுவுஶ்சைனம்
	ப்லவமானம் விஹாயஸா ।
ஜகு³ஶ்ச தே³வக³ந்த⁴ர்வா꞉
	ப்ரஶம்ஸந்தோ வனௌகஸம் ॥85॥
நாகா³ஶ்ச துஷ்டுவுர்யக்ஷா
	ரக்ஷாம்ஸி விவிதா⁴னி ச ।
ப்ரேக்ஷ்ய ஸர்வே கபிவரம்
	ஸஹஸா விக³தக்லமம் ॥86॥
தஸ்மின் ப்லவக³ஶார்தூ³லே
	ப்லவமானே ஹனூமதி ।
இக்ஷ்வாகுகுலமானார்தீ²
	சிந்தயாமாஸ ஸாக³ர꞉॥87॥
ஸாஹாய்யம் வானரேந்த்³ரஸ்ய
	யதி³ நாஹம் ஹனூமத꞉।
கரிஷ்யாமி ப⁴விஷ்யாமி
	ஸர்வவாச்யோ விவக்ஷதாம் ॥88॥
அஹமிக்ஷ்வாகுநாதே²ன
	ஸக³ரேண விவர்தி⁴த꞉।
இக்ஷ்வாகுஸசிவஶ்சாயம்
	தன்னார்ஹத்யவஸாதி³தும் ॥89॥
ததா² மயா விதா⁴தவ்யம்
	விஶ்ரமேத யதா² கபி꞉।
ஶேஷம் ச மயி விஶ்ராந்த꞉
	ஸுகீ² ஸோऽதிதரிஷ்யதி ॥90॥
இதி க்ருத்வா மதிம் ஸாத்⁴வீம்
	ஸமுத்³ரஶ்ச²ன்னமம்ப⁴ஸி ।
ஹிரண்யநாப⁴ம் மைனாகம்
	உவாச கி³ரிஸத்தமம் ॥91॥
த்வமிஹாஸுரஸங்கா⁴னாம்
	தே³வராஜ்ஞா மஹாத்மனா ।
பாதாலநிலயானாம் ஹி
	பரிக⁴꞉ ஸம்நிவேஶித꞉॥92॥
த்வமேஷாம் ஜ்ஞாதவீர்யாணாம்
	புனரேவோத்பதிஷ்யதாம் ।
பாதாலஸ்யாப்ரமேயஸ்ய
	த்³வாரமாவ்ருத்ய திஷ்ட²ஸி ॥93॥
திர்யகூ³ர்த்⁴வமத⁴ஶ்சைவ
	ஶக்திஸ்தே ஶைல வர்தி⁴தும் ।
தஸ்மாத் ஸஞ்சோத³யாமி த்வாம்
	உத்திஷ்ட² கி³ரிஸத்தம ॥94॥
ஸ ஏஷ கபிஶார்தூ³ல꞉
	த்வாமுபர்யேதி வீர்யவான் ।
ஹனூமான் ராமகார்யார்தீ²
	பீ⁴மகர்மா க²மாப்லுத꞉॥95॥
அஸ்ய ஸாஹ்யம் மயா கார்யம்
	இக்ஷ்வாகுகுலவர்தின꞉।
மம ஹீக்ஷ்வாகவ꞉ பூஜ்யா꞉
	பரம் பூஜ்யதமாஸ்தவ ॥96॥
குரு ஸாசிவ்யமஸ்மாகம்
	ந ந꞉ கார்யமதிக்ரமேத் ।
கர்தவ்யமக்ருதம் கார்யம்
	ஸதாம் மன்யுமுதீ³ரயேத் ॥97॥
ஸலிலாதூ³ர்த்⁴வமுத்திஷ்ட²
	திஷ்ட²த்வேஷ கபிஸ்த்வயி ।
அஸ்மாகமதிதி²ஶ்சைவ
	பூஜ்யஶ்ச ப்லவதாம் வர꞉॥98॥
சாமீகரமஹாநாப⁴
	தே³வக³ந்த⁴ர்வஸேவித ।
ஹனூமாம்ஸ்த்வயி விஶ்ராந்த꞉
	தத꞉ ஶேஷம் க³மிஷ்யதி ॥99॥
காகுத்ஸ்த²ஸ்யாந்ருஶம்ஸ்யம் ச
	மைதி²ல்யாஶ்ச விவாஸனம் ।
ஶ்ரமம் ச ப்லவகே³ந்த்³ரஸ்ய
	ஸமீக்ஷ்யோத்தா²துமர்ஹஸி ॥100॥
ஹிரண்யக³ர்போ⁴ மைனாகோ
	நிஶம்ய லவணாம்ப⁴ஸ꞉ ।
உத்பபாத ஜலாத் தூர்ணம்
	மஹாத்³ருமலதாவ்ருத꞉॥101॥
ஸ ஸாக³ரஜலம் பி⁴த்த்வா
	ப³பூ⁴வாத்யுச்ச்²ரிதஸ்ததா³ ।
யதா² ஜலத⁴ரம் பி⁴த்த்வா
	தீ³ப்தரஶ்மிர்தி³வாகர꞉॥102॥
ஸ மஹாத்மா முஹூர்தேன
	பர்வத꞉ ஸலிலாவ்ருத꞉।
த³ர்ஶயாமாஸ ஶ்ருங்கா³ணி
	ஸாக³ரேண நியோஜித꞉॥103॥
ஶாதகும்ப⁴மயை꞉ ஶ்ருங்கை³꞉
	ஸகின்னரமஹோரகை³꞉।
ஆதி³த்யோத³யஸங்காஶை꞉
	உல்லிக²த்³பி⁴ரிவாம்ப³ரம் ॥104॥
தஸ்ய ஜாம்பூ³னதை³꞉ ஶ்ருங்கை³꞉
	பர்வதஸ்ய ஸமுத்தி²தை꞉ ।
ஆகாஶம் ஶஸ்த்ரஸங்காஶம்
	அப⁴வத் காஞ்சனப்ரப⁴ம் ॥105॥
ஜாதரூபமயை꞉ ஶ்ருங்கை³꞉
	ப்⁴ராஜமானைர்மஹாப்ரபை⁴꞉।
ஆதி³த்யஶதஸங்காஶ꞉
	ஸோऽப⁴வத் கி³ரிஸத்தம꞉॥106॥
ஸமுத்தி²தமஸங்கே³ன
	ஹனூமானக்³ரத꞉ ஸ்தி²தம் ।
மத்⁴யே லவணதோயஸ்ய
	விக்⁴னோऽயமிதி நிஶ்சித꞉॥107॥
ஸ தமுச்ச்²ரிதமத்யர்த²ம்
	மஹாவேகோ³ மஹாகபி꞉।
உரஸா பாதயாமாஸ
	ஜீமூதமிவ மாருத꞉॥108॥
ஸ ததா³ஸாதி³தஸ்தேன
	கபினா பர்வதோத்தம꞉।
பு³த்³த்⁴வா தஸ்ய ஹரேர்வேக³ம்
	ஜஹர்ஷ ச நநாத³ ச ॥109॥
தமாகாஶக³தம் வீரம்
	ஆகாஶே ஸமுபஸ்தி²த꞉।
ப்ரீதோ ஹ்ருஷ்டமனா வாக்யம்
	அப்³ரவீத் பர்வத꞉ கபிம் ॥110॥
மானுஷம் தா⁴ரயன் ரூபம்
	ஆத்மன꞉ ஶிக²ரே ஸ்தி²த꞉।
து³ஷ்கரம் க்ருதவான் கர்ம
	த்வமித³ம் வானரோத்தம ॥111॥
நிபத்ய மம ஶ்ருங்கே³ஷு
	ஸுக²ம் விஶ்ரம்ய க³ம்யதாம் ।
ராக⁴வஸ்ய குலே ஜாதை꞉
	உத³தி⁴꞉ பரிவர்தி⁴த꞉॥112॥
ஸ த்வாம் ராமஹிதே யுக்தம்
	ப்ரத்யர்சயதி ஸாக³ர꞉।
க்ருதே ச ப்ரதிகர்தவ்யம்
	ஏஷ த⁴ர்ம꞉ ஸனாதன꞉॥113॥
ஸோऽயம் தத்ப்ரதிகாரார்தீ²
	த்வத்த꞉ ஸம்மானமர்ஹதி ।
த்வந்நிமித்தமனேனாஹம்
	ப³ஹுமானாத் ப்ரசோதி³த꞉॥114॥
யோஜனானாம் ஶதம் சாபி
	கபிரேஷ க²மாப்லுத꞉।
தவ ஸானுஷு விஶ்ராந்த꞉
	ஶேஷம் ப்ரக்ரமதாமிதி ॥115॥
திஷ்ட² த்வம் ஹரிஶார்தூ³ல
	மயி விஶ்ரம்ய க³ம்யதாம் ।
ததி³த³ம் க³ந்த⁴வத் ஸ்வாது³
	கந்த³மூலப²லம் ப³ஹு ॥116॥
ததா³ஸ்வாத்³ய ஹரிஶ்ரேஷ்ட²
	விஶ்ராந்தோऽத² க³மிஷ்யஸி ।
அஸ்மாகமபி ஸம்ப³ந்த⁴꞉
	கபிமுக்²ய த்வயாஸ்தி வை ।
ப்ரக்²யாதஸ்த்ரிஷு லோகேஷு
	மஹாகு³ணபரிக்³ரஹ꞉॥117॥
வேக³வந்த꞉ ப்லவந்தோ யே
	ப்லவகா³ மாருதாத்மஜ ।
தேஷாம் முக்²யதமம் மன்யே
	த்வாமஹம் கபிகுஞ்ஜர ॥118॥
அதிதி²꞉ கில பூஜார்ஹ꞉
	ப்ராக்ருதோऽபி விஜானதா ।
த⁴ர்மம் ஜிஜ்ஞாஸமானேன
	கிம் புனர்யாத்³ருஶோ ப⁴வான் ॥119॥
த்வம் ஹி தே³வவரிஷ்ட²ஸ்ய
	மாருதஸ்ய மஹாத்மன꞉।
புத்ரஸ்தஸ்யைவ வேகே³ன
	ஸத்³ருஶ꞉ கபிகுஞ்ஜர ॥120॥
பூஜிதே த்வயி த⁴ர்மஜ்ஞே
	பூஜாம் ப்ராப்னோதி மாருத꞉।
தஸ்மாத் த்வம் பூஜனீயோ மே
	ஶ்ருணு சாப்யத்ர காரணம் ॥121
பூர்வம் க்ருதயுகே³ தாத
	பர்வதா꞉ பக்ஷிணோऽப⁴வன் ।
தேऽபி ஜக்³முர்தி³ஶ꞉ ஸர்வா
	க³ருடா³ இவ வேகி³ன꞉॥122॥
ததஸ்தேஷு ப்ரயாதேஷு
	தே³வஸங்கா⁴꞉ ஸஹர்ஷிபி⁴꞉।
பூ⁴தானி ச ப⁴யம் ஜக்³மு꞉
	தேஷாம் பதனஶங்கயா ॥123॥
தத꞉ க்ருத்³த⁴꞉ ஸஹஸ்ராக்ஷ꞉
	பர்வதானாம் ஶதக்ரது꞉।
பக்ஷாம்ஶ்சிச்சே²த³ வஜ்ரேண
	தத꞉ ஶதஸஹஸ்ரஶ꞉॥124॥
ஸ மாமுபக³த꞉ க்ருத்³தோ⁴
	வஜ்ரமுத்³யம்ய தே³வராட் ।
ததோऽஹம் ஸஹஸா க்ஷிப்த꞉
	ஶ்வஸனேன மஹாத்மனா ॥125॥
அஸ்மின் லவணதோயே ச
	ப்ரக்ஷிப்த꞉ ப்லவகோ³த்தம ।
கு³ப்தபக்ஷ꞉ ஸமக்³ரஶ்ச
	தவ பித்ராபி⁴ரக்ஷித꞉॥126॥
ததோऽஹம் மானயாமி த்வாம்
	மான்யோऽஸி மம மாருதே ।
த்வயா மமைஷ ஸம்ப³ந்த⁴꞉
	கபிமுக்²ய மஹாகு³ண꞉॥127॥
அஸ்மின்னேவங்க³தே கார்யே
	ஸாக³ரஸ்ய மமைவ ச ।
ப்ரீதிம் ப்ரீதமனா꞉ கர்தும்
	த்வமர்ஹஸி மஹாமதே ॥128॥
ஶ்ரமம் மோக்ஷய பூஜாம் ச
	க்³ருஹாண ஹரிஸத்தம ।
ப்ரீதிம் ச மம மான்யஸ்ய
	ப்ரீதோऽஸ்மி தவ த³ர்ஶனாத் ॥129॥
ஏவமுக்த꞉ கபிஶ்ரேஷ்ட²꞉
	தம் நகோ³த்தமமப்³ரவீத் ।
ப்ரீதோऽஸ்மி க்ருதமாதித்²யம்
	மன்யுரேஷோऽபனீயதாம் ॥130॥
த்வரதே கார்யகாலோ மே
	அஹஶ்சாப்யதிவர்ததே ।
ப்ரதிஜ்ஞா ச மயா த³த்தா
	ந ஸ்தா²தவ்யமிஹாந்தரா ॥131॥
இத்யுக்த்வா பாணினா ஶைலம்
	ஆலப்⁴ய ஹரிபுங்க³வ꞉।
ஜகா³மாகாஶமாவிஶ்ய
	வீர்யவான் ப்ரஹஸன்னிவ ॥132॥
ஸ பர்வதஸமுத்³ராப்⁴யாம்
	ப³ஹுமாநாத³வேக்ஷித꞉।
பூஜிதஶ்சோபபந்நாபி⁴꞉
	ஆஶீர்பி⁴ரபி⁴னந்தி³த꞉॥133॥
அதோ²ர்த்⁴வம் தூ³ரமாக³த்ய
	ஹித்வா ஶைலமஹார்ணவௌ ।
பிது꞉ பந்தா²னமாஸாத்³ய
	ஜகா³ம விமலேऽம்ப³ரே ॥134॥
பூ⁴யஶ்சோர்த்⁴வம் க³திம் ப்ராப்ய
	கி³ரிம் தமவலோகயன் ।
வாயுஸூனுர்நிராலம்போ³
	ஜகா³ம கபிகுஞ்ஜர꞉॥135॥
தத்³ த்³விதீயம் ஹனுமதோ
	த்³ருஷ்ட்வா கர்ம ஸுது³ஷ்கரம் ।
ப்ரஶஶம்ஸு꞉ ஸுரா꞉ ஸர்வே
	ஸித்³தா⁴ஶ்ச பரமர்ஷய꞉॥136॥
தே³வதாஶ்சாப⁴வன் ஹ்ருஷ்டா꞉
	தத்ரஸ்தா²ஸ்தஸ்ய கர்மணா ।
காஞ்சனஸ்ய ஸுநாப⁴ஸ்ய
	ஸஹஸ்ராக்ஷஶ்ச வாஸவ꞉॥137॥
உவாச வசனம் தீ⁴மான்
	பரிதோஷாத் ஸக³த்³க³த³ம் ।
ஸுநாப⁴ம் பர்வதஶ்ரேஷ்ட²ம்
	ஸ்வயமேவ ஶசீபதி꞉॥138॥
ஹிரண்யநாப⁴ ஶைலேந்த்³ர
	பரிதுஷ்டோऽஸ்மி தே ப்⁴ருஶம் ।
அப⁴யம் தே ப்ரயச்சா²மி
	க³ச்ச² ஸௌம்ய யதா²ஸுக²ம் ॥139॥
ஸாஹ்யம் க்ருதம் தே ஸுமஹத்³
	விஶ்ராந்தஸ்ய ஹனூமத꞉।
க்ரமதோ யோஜனஶதம்
	நிர்ப⁴யஸ்ய ப⁴யே ஸதி ॥140॥
ராமஸ்யைஷ ஹிதாயைவ
	யாதி தா³ஶரதே²꞉ கபி꞉।
ஸத்க்ரியாம் குர்வதா ஶக்த்யா
	தோஷிதோऽஸ்மி த்³ருட⁴ம் த்வயா ॥141॥
ஸ தத் ப்ரஹர்ஷமலப⁴த்³
	விபுலம் பர்வதோத்தம꞉।
தே³வதானாம் பதிம் த்³ருஷ்ட்வா
	பரிதுஷ்டம் ஶதக்ரதும் ॥142॥
ஸ வை த³த்தவர꞉ ஶைலோ
	ப³பூ⁴வாவஸ்தி²தஸ்ததா³ ।
ஹனூமாம்ஶ்ச முஹூர்தேன
	வ்யதிசக்ராம ஸாக³ரம் ॥143॥
ததோ தே³வா꞉ ஸக³ந்த⁴ர்வா꞉
	ஸித்³தா⁴ஶ்ச பரமர்ஷய꞉।
அப்³ருவன் ஸூர்யஸங்காஶாம்
	ஸுரஸாம் நாக³மாதரம் ॥144॥
அயம் வாதாத்மஜ꞉ ஸ்ரீமான்
	ப்லவதே ஸாக³ரோபரி ।
ஹனூமான் நாம தஸ்ய த்வம்
	முஹூர்தம் விக்⁴னமாசர ॥145॥
ராக்ஷஸம் ரூபமாஸ்தா²ய
	ஸுகோ⁴ரம் பர்வதோபமம் ।
த³ம்ஷ்ட்ராகராலம் பிங்கா³க்ஷம்
	வக்த்ரம் க்ருத்வா நப⁴꞉ஸ்ப்ருஶம் ॥146॥
ப³லமிச்சா²மஹே ஜ்ஞாதும்
	பூ⁴யஶ்சாஸ்ய பராக்ரமம் ।
த்வாம் விஜேஷ்யத்யுபாயேன
	விஷாத³ம் வா க³மிஷ்யதி ॥147॥
ஏவமுக்தா து ஸா தே³வீ
	தை³வதைரபி⁴ஸத்க்ருதா ।
ஸமுத்³ரமத்⁴யே ஸுரஸா
	பி³ப்⁴ரதீ ராக்ஷஸம் வபு꞉॥148॥
விக்ருதம் ச விரூபம் ச
	ஸர்வஸ்ய ச ப⁴யாவஹம் ।
ப்லவமானம் ஹனூமந்தம்
	ஆவ்ருத்யேத³முவாச ஹ॥149॥
மம ப⁴க்ஷ்ய꞉ ப்ரதி³ஷ்டஸ்த்வம்
	ஈஶ்வரைர்வானரர்ஷப⁴ ।
அஹம் த்வாம் ப⁴க்ஷயிஷ்யாமி
	ப்ரவிஶேத³ம் மமானனம் ॥150॥
வர ஏஷ புரா த³த்தோ
	மம தா⁴த்ரேதி ஸத்வரா ।
வ்யாதா³ய வக்த்ரம் விபுலம்
	ஸ்தி²தா ஸா மாருதே꞉ புர꞉॥151॥
ஏவமுக்த꞉ ஸுரஸயா
	ப்ரஹ்ருஷ்டவத³னோऽப்³ரவீத் ।
ராமோ தா³ஶரதி²ர்நாம
	ப்ரவிஷ்டோ த³ண்ட³காவனம் ।
லக்ஷ்மணேன ஸஹ ப்⁴ராத்ரா
	வைதே³ஹ்யா சாபி பா⁴ர்யயா ॥152॥
அன்யகார்யவிஷக்தஸ்ய
	ப³த்³த⁴வைரஸ்ய ராக்ஷஸை꞉।
தஸ்ய ஸீதா ஹ்ருதா பா⁴ர்யா
	ராவணேன யஶஸ்வினீ॥153॥
தஸ்யா꞉ ஸகாஶம் தூ³தோऽஹம்
	க³மிஷ்யே ராமஶாஸனாத் ।
கர்துமர்ஹஸி ராமஸ்ய
	ஸாஹ்யம் விஷயவாஸினி ॥154॥
அத²வா மைதி²லீம் த்³ருஷ்ட்வா
	ராமம் சாக்லிஷ்டகாரிணம் ।
ஆக³மிஷ்யாமி தே வக்த்ரம்
	ஸத்யம் ப்ரதிஶ்ருணோமி தே ॥155॥
ஏவமுக்தா ஹனுமதா
	ஸுரஸா காமரூபிணீ ।
அப்³ரவீன்னாதிவர்தேன்மாம்
	கஶ்சிதே³ஷ வரோ மம ॥156॥
தம் ப்ரயாந்தம் ஸமுத்³வீக்ஷ்ய
	ஸுரஸா வாக்யமப்³ரவீத் ।
ப³லம் ஜிஜ்ஞாஸமானா ஸா
	நாக³மாதா ஹனூமத꞉॥157॥
நிவிஶ்ய வத³னம் மேऽத்³ய
	க³ந்தவ்யம் வானரோத்தம ।
வர ஏஷ புரா த³த்தோ
	மம தா⁴த்ரேதி ஸத்வரா ॥158॥
வ்யாதா³ய விபுலம் வக்த்ரம்
	ஸ்தி²தா ஸா மாருதே꞉ புர꞉ ।
ஏவமுக்த꞉ ஸுரஸயா
	க்ருத்³தோ⁴ வானரபுங்க³வ꞉॥159॥
அப்³ரவீத் குரு வை வக்த்ரம்
	யேன மாம் விஷஹிஷ்யஸி ।
இத்யுக்த்வா ஸுரஸாம் க்ருத்³தோ⁴
	த³ஶயோஜனமாயதாம் ॥160॥
த³ஶயோஜனவிஸ்தாரோ
	ஹனூமானப⁴வத் ததா³ ।
தம் த்³ருஷ்ட்வா மேக⁴ஸங்காஶம்
	த³ஶயோஜனமாயதம் ।
சகார ஸுரஸாப்யாஸ்யம்
	விம்ஶத³ யோஜனமாயதம் ॥161॥
ஹனூமாம்ஸ்து தத꞉ க்ருத்³த⁴꞉
	த்ரிம்ஶத்³ யோஜனமாயத꞉।
சகார ஸுரஸா வக்த்ரம்
	சத்வாரிம்ஶத் ததோ²ச்ச்²ரிதம் ॥162॥
ப³பூ⁴வ ஹனுமான் வீர꞉
	பஞ்சாஶத்³ யோஜனோச்ச்²ரித꞉।
சகார ஸுரஸா வக்த்ரம்
	ஷஷ்டிம் யோஜனமுச்ச்²ரிதம் ॥163॥
ததை³வ ஹனுமான் வீர꞉
	ஸப்ததிம் யோஜனோச்ச்²ரித꞉।
சகார ஸுரஸா வக்த்ரம்
	அஶீதிம் யோஜனோச்ச்²ரிதம் ॥164॥
ஹனூமானனலப்ரக்²யோ
	நவதிம் யோஜனோச்ச்²ரித꞉ ।
சகார ஸுரஸா வக்த்ரம்
	ஶதயோஜனமாயதம் ॥165॥
தத்³ த்³ருஷ்ட்வா வ்யாதி³தம் த்வாஸ்யம்
	வாயுபுத்ர꞉ ஸ பு³த்³தி⁴மான் ।
தீ³ர்க⁴ஜிஹ்வம் ஸுரஸயா
	ஸுபீ⁴மம் நரகோபமம் ॥166॥
ஸ ஸங்க்ஷிப்யாத்மன꞉ காயம்
	ஜீமூத இவ மாருதி꞉।
தஸ்மின் முஹூர்தே ஹனுமான்
	ப³பூ⁴வாங்கு³ஷ்ட²மாத்ரக꞉॥167॥
ஸோऽபி⁴பத்³யாத² தத்³வக்த்ரம்
	நிஷ்பத்ய ச மஹாப³ல꞉।
அந்தரிக்ஷே ஸ்தி²த꞉ ஸ்ரீமான்
	இத³ம் வசனமப்³ரவீத் ॥168॥
ப்ரவிஷ்டோऽஸ்மி ஹி தே வக்த்ரம்
	தா³க்ஷாயணி நமோऽஸ்து தே ।
க³மிஷ்யே யத்ர வைதே³ஹீ
	ஸத்யஶ்சாஸீத்³ வரஸ்தவ ॥169॥
தம் த்³ருஷ்ட்வா வத³னான்முக்தம்
	சந்த்³ரம் ராஹுமுகா²தி³வ ।
அப்³ரவீத் ஸுரஸா தே³வீ
	ஸ்வேன ரூபேண வானரம் ॥170॥
அர்த²ஸித்³த்⁴யை ஹரிஶ்ரேஷ்ட²
	க³ச்ச² ஸௌம்ய யதா²ஸுக²ம் ।
ஸமானய ச வைதே³ஹீம்
	ராக⁴வேண மஹாத்மனா ॥171॥
தத் த்ருதீயம் ஹனுமதோ
	த்³ருஷ்ட்வா கர்ம ஸுது³ஷ்கரம் ।
ஸாது⁴ஸாத்⁴விதி பூ⁴தானி
	ப்ரஶஶம்ஸுஸ்ததா³ ஹரிம் ॥172॥
ஸ ஸாக³ரமனாத்⁴ருஷ்யம்
	அப்⁴யேத்ய வருணாலயம் ।
ஜகா³மாகாஶமாவிஶ்ய
	வேகே³ன க³ருடோ³பம꞉॥173॥
ஸேவிதே வாரிதா⁴ராபி⁴꞉
	பதகை³ஶ்ச நிஷேவிதே ।
சரிதே கைஶிகாசார்யை꞉
	ஐராவதநிஷேவிதே ॥174॥
ஸிம்ஹகுஞ்ஜரஶார்தூ³ல-
	பதகோ³ரக³வாஹனை꞉।
விமானை꞉ ஸம்பதத்³பி⁴ஶ்ச
	விமலை꞉ ஸமலங்க்ருதே ॥175॥
வஜ்ராஶநிஸமஸ்பர்ஶை꞉
	பாவகைரிவ ஶோபி⁴தே ।
க்ருதபுண்யைர்மஹாபா⁴கை³꞉
	ஸ்வர்க³ஜித்³பி⁴ரதி⁴ஷ்டி²தே ॥176॥
வஹதா ஹவ்யமத்யந்தம்
	ஸேவிதே சித்ரபா⁴னுனா ।
க்³ரஹநக்ஷத்ரசந்த்³ரார்க-
	தாராக³ணவிபூ⁴ஷிதே ॥177॥
மஹர்ஷிக³ணக³ந்த⁴ர்வ-
	நாக³யக்ஷஸமாகுலே ।
விவிக்தே விமலே விஶ்வே
	விஶ்வாவஸுநிஷேவிதே ॥178॥
தே³வராஜக³ஜாக்ராந்தே
	சந்த்³ரஸூர்யபதே² ஶிவே ।
விதானே ஜீவலோகஸ்ய
	விததே ப்³ரஹ்மநிர்மிதே ॥179॥
ப³ஹுஶ꞉ ஸேவிதே வீரை꞉
	வித்³யாத⁴ரக³ணைர்வ்ருதே ।
ஜகா³ம வாயுமார்கே³ ச
	க³ருத்மானிவ மாருதி꞉॥180॥
ஹனுமான் மேக⁴ஜாலானி
	ப்ராகர்ஷன் மாருதோ யதா² ।
காலாகு³ருஸவர்ணானி
	ரக்தபீதஸிதானி ச ॥181॥
கபினா க்ருஷ்யமாணானி
	மஹாப்⁴ராணி சகாஶிரே ।
ப்ரவிஶன்னப்⁴ரஜாலானி
	நிஷ்பதம்ஶ்ச புன꞉ புன꞉॥182॥
ப்ராவ்ருஷீந்து³ரிவாபா⁴தி
	நிஷ்பதன் ப்ரவிஶம்ஸ்ததா³ ।
ப்ரத்³ருஶ்யமான꞉ ஸர்வத்ர
	ஹனூமான் மாருதாத்மஜ꞉॥183॥
பே⁴ஜேऽம்ப³ரம் நிராலம்ப³ம்
	பக்ஷயுக்த இவாத்³ரிராட் ।
ப்லவமானம் து தம் த்³ருஷ்ட்வா
	ஸிம்ஹிகா நாம ராக்ஷஸீ ॥184॥
மனஸா சிந்தயாமாஸ
	ப்ரவ்ருத்³தா⁴ காமரூபிணீ ।
அத்³ய தீ³ர்க⁴ஸ்ய காலஸ்ய
	ப⁴விஷ்யாம்யஹமாஶிதா ॥185॥
இத³ம் மம மஹாஸத்த்வம்
	சிரஸ்ய வஶமாக³தம் ।
இதி ஸஞ்சிந்த்ய மனஸா
	ச்சா²யாமஸ்ய ஸமாக்ஷிபத் ॥186॥
சா²யாயாம் க்³ருஹ்யமாணாயாம்
	சிந்தயாமாஸ வானர꞉।
ஸமாக்ஷிப்தோऽஸ்மி ஸஹஸா
	பங்கூக்ருதபராக்ரம꞉॥187॥
ப்ரதிலோமேன வாதேன
	மஹானௌரிவ ஸாக³ரே ।
திர்யகூ³ர்த்⁴வமத⁴ஶ்சைவ
	வீக்ஷமாணஸ்ததா³ கபி꞉॥188॥
த³த³ர்ஶ ஸ மஹாஸத்த்வம்
	உத்தி²தம் லவணாம்ப⁴ஸி ।
தத்³ த்³ருஷ்ட்வா சிந்தயாமாஸ
	மாருதிர்விக்ருதானனாம் ॥189॥
கபிராஜ்ஞா யதா²க்²யாதம்
	ஸத்த்வமத்³பு⁴தத³ர்ஶனம் ।
சா²யாக்³ராஹி மஹாவீர்யம்
	ததி³த³ம் நாத்ர ஸம்ஶய꞉॥190॥
ஸ தாம் பு³த்³த்⁴வார்த²தத்த்வேன
	ஸிம்ஹிகாம் மதிமான் கபி꞉।
வ்யவர்த⁴த மஹாகாய꞉
	ப்ராவ்ருஷீவ ப³லாஹக꞉॥191॥
தஸ்ய ஸா காயமுத்³வீக்ஷ்ய
	வர்த⁴மானம் மஹாகபே꞉।
வக்த்ரம் ப்ரஸாரயாமாஸ
	பாதாலாம்ப³ரஸம்நிப⁴ம் ॥192॥
க⁴னராஜீவ க³ர்ஜந்தீ
	வானரம் ஸமபி⁴த்³ரவத் ।
ஸ த³த³ர்ஶ ததஸ்தஸ்யா
	விக்ருதம் ஸுமஹன்முக²ம் ॥193॥
காயமாத்ரம் ச மேதா⁴வீ
	மர்மாணி ச மஹாகபி꞉।
ஸ தஸ்யா விக்ருதே வக்த்ரே
	வஜ்ரஸம்ஹனன꞉ கபி꞉॥194॥
ஸங்க்ஷிப்ய முஹுராத்மானம்
	நிபபாத மஹாகபி꞉।
ஆஸ்யே தஸ்யா நிமஜ்ஜந்தம்
	த³த்³ருஶு꞉ ஸித்³த⁴சாரணா꞉॥195॥
க்³ரஸ்யமானம் யதா² சந்த்³ரம்
	பூர்ணம் பர்வணி ராஹுணா ।
ததஸ்தஸ்யா நகை²ஸ்தீக்ஷ்ணை꞉
	மர்மாண்யுத்க்ருத்ய வானர꞉॥196॥
உத்பபாதாத² வேகே³ன
	மன꞉ஸம்பாதவிக்ரம꞉।
தாம் து தி³ஷ்ட்யா ச த்⁴ருத்யா ச
	தா³க்ஷிண்யேன நிபாத்ய ஸ꞉॥197॥
கபிப்ரவீரோ வேகே³ன வவ்ருதே⁴ புனராத்மவான் ।
ஹ்ருதஹ்ருத்ஸா ஹனுமதா
	பபாத விது⁴ராம்ப⁴ஸி ।
ஸ்வயம்பு⁴வைவ ஹனுமான்
	ஸ்ருஷ்டஸ்தஸ்யா நிபாதனே ॥198॥
தாம் ஹதாம் வானரேணாஶு
	பதிதாம் வீக்ஷ்ய ஸிம்ஹிகாம் ।
பூ⁴தான்யாகாஶசாரீணி
	தமூசு꞉ ப்லவகோ³த்தமம் ॥199॥
பீ⁴மமத்³ய க்ருதம் கர்ம
	மஹத்ஸத்த்வம் த்வயா ஹதம் ।
ஸாத⁴யார்த²மபி⁴ப்ரேதம்
	அரிஷ்டம் ப்லவதாம் வர ॥200॥
யஸ்ய த்வேதானி சத்வாரி
	வானரேந்த்³ர யதா² தவ ।
த்⁴ருதிர்த்³ருஷ்டிர்மதிர்தா³க்ஷ்யம்
	ஸ கர்மஸு ந ஸீத³தி ॥201॥
ஸ தை꞉ ஸம்பூஜித꞉ பூஜ்ய꞉
	ப்ரதிபன்னப்ரயோஜனை꞉।
ஜகா³மாகாஶமாவிஶ்ய
	பன்னகா³ஶனவத் கபி꞉॥202॥
ப்ராப்தபூ⁴யிஷ்ட²பாரஸ்து
	ஸர்வத꞉ பரிலோகயன் ।
யோஜனானாம் ஶதஸ்யாந்தே
	வனராஜீம் த³த³ர்ஶ ஸ꞉॥203॥
த³த³ர்ஶ ச பதன்னேவ
	விவித⁴த்³ருமபூ⁴ஷிதம் ।
த்³வீபம் ஶாகா²ம்ருக³ ஶ்ரேஷ்டோ²
	மலயோபவனானி ச ॥204॥
ஸாக³ரம் ஸாக³ரானூபான்
	ஸாக³ரானூபஜான் த்³ருமான் ।
ஸாக³ரஸ்ய ச பத்னீனாம்
	முகா²ன்யபி விலோகயத் ॥205॥
ஸ மஹாமேக⁴ஸங்காஶம்
	ஸமீக்ஷ்யாத்மானமாத்மவான் ।
நிருந்த⁴ந்தமிவாகாஶம்
	சகார மதிமான் மதிம் ॥206॥
காயவ்ருத்³தி⁴ம் ப்ரவேக³ம் ச
	மம த்³ருஷ்ட்வைவ ராக்ஷஸா꞉।
மயி கௌதூஹலம் குர்யு꞉
	இதி மேனே மஹாமதி꞉॥207॥
தத꞉ ஶரீரம் ஸங்க்ஷிப்ய
	தன்மஹீத⁴ரஸம்நிப⁴ம் ।
புன꞉ ப்ரக்ருதிமாபேதே³
	வீதமோஹ இவாத்மவான் ॥208॥
தத்³ரூபமதிஸங்க்ஷிப்ய
	ஹனூமான் ப்ரக்ருதௌ ஸ்தி²த꞉।
த்ரீன் க்ரமானிவ விக்ரம்ய
	ப³லிவீர்யஹரோ ஹரி꞉॥209॥
ஸ சாருனானாவித⁴ரூபதா⁴ரீ
	பரம் ஸமாஸாத்³ய ஸமுத்³ரதீரம் ।
பரைரஶக்யம் ப்ரதிபன்னரூப꞉
	ஸமீக்ஷிதாத்மா ஸமவேக்ஷிதார்த²꞉॥210॥
தத꞉ ஸ லம்ப³ஸ்ய கி³ரே꞉ ஸம்ருத்³தே⁴
	விசித்ரகூடே நிபபாத கூடே ।
ஸகேதகோத்³தா³லகநாரிகேலே
	மஹாப்⁴ரகூடப்ரதிமோ மஹாத்மா ॥211॥
ததஸ்து ஸம்ப்ராப்ய ஸமுத்³ரதீரம்
	ஸமீக்ஷ்ய லங்காம் கி³ரிவர்யமூர்த்⁴னி ।
கபிஸ்து தஸ்மின் நிபபாத பர்வதே
	விதூ⁴ய ரூபம் வ்யத²யன்ம்ருக³த்³விஜான் ॥212॥
ஸ ஸாக³ரம் தா³னவபன்னகா³யுதம்
	ப³லேன விக்ரம்ய மஹோர்மிமாலினம் ।
நிபத்ய தீரே ச மஹோத³தே⁴ஸ்ததா³
	த³த³ர்ஶ லங்காமமராவதீமிவ ॥213॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ப்ரத²ம꞉ ஸர்க³꞉