அத² த்ருதீய꞉ ஸர்க³꞉
ஸ லம்ப³ஶிக²ரே லம்பே³
	லம்ப³தோயத³ஸன்னிபே⁴ ।
ஸத்த்வமாஸ்தா²ய மேதா⁴வீ
	ஹனுமான் மாருதாத்மஜ꞉॥1॥
நிஶி லங்காம் மஹாஸத்த்வோ
	விவேஶ கபிகுஞ்ஜர꞉।
ரம்யகானனதோயாட்⁴யாம்
	புரீம் ராவணபாலிதாம் ॥2॥
ஶாரதா³ம்பு³த⁴ரப்ரக்²யை꞉
	ப⁴வனைருபஶோபி⁴தாம் ।
ஸாக³ரோபமநிர்கோ⁴ஷாம்
	ஸாக³ரானிலஸேவிதாம் ॥3॥
ஸுபுஷ்டப³லஸம்புஷ்டாம்
	யதை²வ விடபாவதீம் ।
சாருதோரணநிர்யூஹாம்
	பாண்டு³ரத்³வாரதோரணாம் ॥4॥
பு⁴ஜகா³சரிதாம் கு³ப்தாம்
	ஶுபா⁴ம் போ⁴க³வதீமிவ ।
தாம் ஸவித்³யுத்³க⁴னாகீர்ணாம்
	ஜ்யோதிர்க³ணநிஷேவிதாம் ॥5॥
சண்ட³மாருதநிர்ஹ்ராதா³ம்
	யதா² சாப்யமராவதீம் ।
ஶாதகும்பே⁴ன மஹதா
	ப்ராகாரேணாபி⁴ஸம்வ்ருதாம் ॥6॥
கிங்கிணீஜாலகோ⁴ஷாபி⁴꞉
	பதாகாபி⁴ரலங்க்ருதாம் ।
ஆஸாத்³ய ஸஹஸா ஹ்ருஷ்ட꞉
	ப்ராகாரமபி⁴பேதி³வான் ॥7॥
விஸ்மயாவிஷ்டஹ்ருத³ய꞉
	புரீமாலோக்ய ஸர்வத꞉।
ஜாம்பூ³னத³மயைர்த்³வாரை꞉
	வைதூ³ர்யக்ருதவேதி³கை꞉॥8॥
வஜ்ரஸ்ப²டிகமுக்தாபி⁴꞉
	மணிகுட்டிமபூ⁴ஷிதை꞉।
தப்தஹாடகநிர்யூஹை
	ராஜதாமலபாண்டு³ரை꞉॥9॥
வைதூ³ர்யக்ருதஸோபானை꞉
	ஸ்பா²டிகாந்தரபாம்ஸுபி⁴꞉।
சாருஸஞ்ஜவனோபேதை꞉
	க²மிவோத்பதிதை꞉ ஶுபை⁴꞉॥10॥
க்ரௌஞ்சப³ர்ஹிணஸங்கு⁴ஷ்டை
	ராஜஹம்ஸநிஷேவிதை꞉।
தூர்யாப⁴ரணநிர்கோ⁴ஷை꞉
	ஸர்வத꞉ பரிநாதி³தாம் ॥11॥
வஸ்வோகஸாரப்ரதிமாம்
	ஸமீக்ஷ்ய நக³ரீம் தத꞉।
க²மிவோத்பதிதாம் லங்காம்
	ஜஹர்ஷ ஹனுமான் கபி꞉॥12॥
தாம் ஸமீக்ஷ்ய புரீம் லங்காம்
	ராக்ஷஸாதி⁴பதே꞉ ஶுபா⁴ம் ।
அனுத்தமாம்ருத்³தி⁴மதீம்
	சிந்தயாமாஸ வீர்யவான் ॥13॥
நேயமன்யேன நக³ரீ
	ஶக்யா த⁴ர்ஷயிதும் ப³லாத் ।
ரக்ஷிதா ராவணப³லை꞉
	உத்³யதாயுத⁴பாணிபி⁴꞉॥14॥
குமுதா³ங்க³த³யோர்வாபி
	ஸுஷேணஸ்ய மஹாகபே꞉।
ப்ரஸித்³தே⁴யம் ப⁴வேத்³ பூ⁴மி꞉
	மைந்த³த்³விவித³யோரபி ॥15॥
விவஸ்வதஸ்தனூஜஸ்ய
	ஹரேஶ்ச குஶபர்வண꞉।
ருக்ஷஸ்ய கபிமுக்²யஸ்ய
	மம சைவ க³திர்ப⁴வேத் ॥16॥
ஸமீக்ஷ்ய ச மஹாபா³ஹோ
	ராக⁴வஸ்ய பராக்ரமம் ।
லக்ஷ்மணஸ்ய ச விக்ராந்தம்
	அப⁴வத் ப்ரீதிமான் கபி꞉॥17॥
தாம் ரத்னவஸனோபேதாம்
	கோ³ஷ்டா²கா³ராவதம்ஸிகாம் ।
யந்த்ராகா³ரஸ்தனீம்ருத்³தா⁴ம்
	ப்ரமதா³மிவ பூ⁴ஷிதாம் ॥18॥
தாம் நஷ்டதிமிராம் தீ³பை꞉
	பா⁴ஸ்வரைஶ்ச மஹாக்³ரஹை꞉।
நக³ரீம் ராக்ஷஸேந்த்³ரஸ்ய
	ஸ த³த³ர்ஶ மஹாகபி꞉॥19॥
அத² ஸா ஹரிஶார்தூ³லம்
	ப்ரவிஶந்தம் மஹாகபிம் ।
நக³ரீ ஸ்வேன ரூபேண
	த³த³ர்ஶ பவனாத்மஜம் ॥20॥
ஸா தம் ஹரிவரம் த்³ருஷ்ட்வா
	லங்கா ராவணபாலிதா ।
ஸ்வயமேவோத்தி²தா தத்ர
	விக்ருதானனத³ர்ஶனா ॥21॥
புரஸ்தாத் தஸ்ய வீரஸ்ய
	வாயுஸூனோரதிஷ்ட²த ।
முஞ்சமானா மஹாநாத³ம்
	அப்³ரவீத் பவனாத்மஜம் ॥22॥
கஸ்த்வம் கேன ச கார்யேண
	இஹ ப்ராப்தோ வனாலய ।
கத²யஸ்வேஹ யத் தத்த்வம்
	யாவத் ப்ராணா த⁴ரந்தி தே ॥23॥
ந ஶக்யம் க²ல்வியம் லங்கா
	ப்ரவேஷ்டும் வானர த்வயா ।
ரக்ஷிதா ராவணப³லை꞉
	அபி⁴கு³ப்தா ஸமந்தத꞉॥24॥
அத² தாமப்³ரவீத்³ வீரோ
	ஹனுமானக்³ரத꞉ ஸ்தி²தாம் ।
கத²யிஷ்யாமி தத் தத்த்வம்
	யன்மாம் த்வம் பரிப்ருச்ச²ஸே ॥25॥
கா த்வம் விரூபநயனா
	புரத்³வாரேऽவதிஷ்ட²ஸே ।
கிமர்த²ம் சாபி மாம் க்ரோதா⁴ன்
	நிர்ப⁴ர்த்ஸயஸி தா³ருணே ॥26॥
ஹனுமத்³வசனம் ஶ்ருத்வா
	லங்கா ஸா காமரூபிணீ ।
உவாச வசனம் க்ருத்³தா⁴
	பருஷம் பவனாத்மஜம் ॥27॥
அஹம் ராக்ஷஸராஜஸ்ய
	ராவணஸ்ய மஹாத்மன꞉।
ஆஜ்ஞாப்ரதீக்ஷா து³ர்த⁴ர்ஷா
	ரக்ஷாமி நக³ரீமிமாம் ॥28॥
ந ஶக்யம் மாமவஜ்ஞாய
	ப்ரவேஷ்டும் நக³ரீமிமாம் ।
அத்³ய ப்ராணை꞉ பரித்யக்த꞉
	ஸ்வப்ஸ்யஸே நிஹதோ மயா ॥29॥
அஹம் ஹி நக³ரீ லங்கா
	ஸ்வயமேவ ப்லவங்க³ம ।
ஸர்வத꞉ பரிரக்ஷாமி
	அதஸ்தே கதி²தம் மயா ॥30॥
லங்காயா வசனம் ஶ்ருத்வா
	ஹனூமான் மாருதாத்மஜ꞉।
யத்னவான் ஸ ஹரிஶ்ரேஷ்ட²꞉
	ஸ்தி²த꞉ ஶைல இவாபர꞉॥31॥
ஸ தாம் ஸ்த்ரீரூபவிக்ருதாம்
	த்³ருஷ்ட்வா வானரபுங்க³வ꞉।
ஆப³பா⁴ஷேऽத² மேதா⁴வீ
	ஸத்த்வவான் ப்லவக³ர்ஷப⁴꞉॥32॥
த்³ரக்ஷ்யாமி நக³ரீம் லங்காம்
	ஸாட்டப்ராகாரதோரணாம் ।
இத்யர்த²மிஹ ஸம்ப்ராப்த꞉
	பரம் கௌதூஹலம் ஹி மே ॥33॥
வனான்யுபவனானீஹ
	லங்காயா꞉ கானனானி ச ।
ஸர்வதோ க்³ருஹமுக்²யானி
	த்³ரஷ்டுமாக³மனம் ஹி மே ॥34॥
தஸ்ய தத்³ வசனம் ஶ்ருத்வா
	லங்கா ஸா காமரூபிணீ ।
பூ⁴ய ஏவ புனர்வாக்யம்
	ப³பா⁴ஷே பருஷாக்ஷரம் ॥35॥
மாமநிர்ஜித்ய து³ர்பு³த்³தே⁴
	ராக்ஷஸேஶ்வரபாலிதாம் ।
ந ஶக்யம் ஹ்யத்³ய தே த்³ரஷ்டும்
	புரீயம் வானராத⁴ம ॥36॥
தத꞉ ஸ ஹரிஶார்தூ³ல꞉
	தாமுவாச நிஶாசரீம் ।
த்³ருஷ்ட்வா புரீமிமாம் ப⁴த்³ரே
	புனர்யாஸ்யே யதா²க³தம் ॥37॥
தத꞉ க்ருத்வா மஹாநாத³ம்
	ஸா வை லங்கா ப⁴யங்கரம் ।
தலேன வானரஶ்ரேஷ்ட²ம்
	தாட³யாமாஸ வேகி³தா ॥38॥
தத꞉ ஸ ஹரிஶார்தூ³லோ
	லங்கயா தாடி³தோ ப்⁴ருஶம் ।
நநாத³ ஸுமஹாநாத³ம்
	வீர்யவான் மாருதாத்மஜ꞉॥39॥
தத꞉ ஸம்வர்தயாமாஸ
	வாமஹஸ்தஸ்ய ஸோऽங்கு³லீ꞉।
முஷ்டிநாபி⁴ஜகா⁴னைனாம்
	ஹனுமான் க்ரோத⁴மூர்ச்சி²த꞉॥40॥
ஸ்த்ரீ சேதி மன்யமானேன
	நாதிக்ரோத⁴꞉ ஸ்வயம் க்ருத꞉।
ஸா து தேன ப்ரஹாரேண
	விஹ்வலாங்கீ³ நிஶாசரீ ।
பபாத ஸஹஸா பூ⁴மௌ
	விக்ருதானனத³ர்ஶனா ॥41॥
ததஸ்து ஹனுமான் வீர꞉
	தாம் த்³ருஷ்ட்வா விநிபாதிதாம் ।
க்ருபாம் சகார தேஜஸ்வீ
	மன்யமான꞉ ஸ்த்ரியம் ச தாம் ॥42॥
ததோ வை ப்⁴ருஶமுத்³விக்³னா
	லங்கா ஸா க³த்³க³தா³க்ஷரம் ।
உவாசாக³ர்விதம் வாக்யம்
	ஹனுமந்தம் ப்லவங்க³மம் ॥43॥
ப்ரஸீத³ ஸுமஹாபா³ஹோ
	த்ராயஸ்வ ஹரிஸத்தம ।
ஸமயே ஸௌம்ய திஷ்ட²ந்தி
	ஸத்த்வவந்தோ மஹாப³லா꞉॥44॥
அஹம் து நக³ரீ லங்கா
	ஸ்வயமேவ ப்லவங்க³ம ।
நிர்ஜிதாஹம் த்வயா வீர
	விக்ரமேண மஹாப³ல ॥45॥
இத³ம் ச தத்²யம் ஶ்ருணு மே
	ப்³ருவந்த்யா வை ஹரீஶ்வர ।
ஸ்வயம் ஸ்வயம்பு⁴வா த³த்தம்
	வரதா³னம் யதா² மம ॥46॥
யதா³ த்வாம் வானர꞉ கஶ்சித்³
	விக்ரமாத்³ வஶமானயேத் ।
ததா³ த்வயா ஹி விஜ்ஞேயம்
	ரக்ஷஸாம் ப⁴யமாக³தம் ॥47॥
ஸ ஹி மே ஸமய꞉ ஸௌம்ய
	ப்ராப்தோऽத்³ய தவ த³ர்ஶனாத் ।
ஸ்வயம்பூ⁴விஹித꞉ ஸத்யோ
	ந தஸ்யாஸ்தி வ்யதிக்ரம꞉॥48॥
ஸீதாநிமித்தம் ராஜ்ஞஸ்து
	ராவணஸ்ய து³ராத்மன꞉।
ரக்ஷஸாம் சைவ ஸர்வேஷாம்
	விநாஶ꞉ ஸமுபாக³த꞉॥49॥
தத் ப்ரவிஶ்ய ஹரிஶ்ரேஷ்ட²
	புரீம் ராவணபாலிதாம் ।
வித⁴த்ஸ்வ ஸர்வகார்யாணி
	யானி யானீஹ வாஞ்ச²ஸி ॥50॥
ப்ரவிஶ்ய ஶாபோபஹதாம் ஹரீஶ்வர
	புரீம் ஶுபா⁴ம் ராக்ஷஸமுக்²யபாலிதாம் ।
யத்³ருச்ச²யா த்வம் ஜனகாத்மஜாம் ஸதீம்
	விமார்க³ ஸர்வத்ர க³தோ யதா²ஸுக²ம் ॥51॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ த்ருதீய꞉ ஸர்க³꞉