அத² சதுர்த²꞉ ஸர்க³꞉
ஸ நிர்ஜித்ய புரீம் லங்காம்
	ஶ்ரேஷ்டா²ம் தாம் காமரூபிணீம் ।
விக்ரமேண மஹாதேஜா
	ஹனுமான் கபிஸத்தம꞉॥1॥
அத்³வாரேண மஹாவீர்ய꞉
	ப்ராகாரமவபுப்லுவே ।
நிஶி லங்காம் மஹாஸத்த்வோ
	விவேஶ கபிகுஞ்ஜர꞉॥2॥
ப்ரவிஶ்ய நக³ரீம் லங்காம்
	கபிராஜஹிதங்கர꞉।
சக்ரேऽத² பாத³ம் ஸவ்யம் ச
	ஶத்ரூணாம் ஸ து மூர்த⁴னி ॥3॥
ப்ரவிஷ்ட꞉ ஸத்த்வஸம்பன்னோ
	நிஶாயாம் மாருதாத்மஜ꞉।
ஸ மஹாபத²மாஸ்தா²ய
	முக்தபுஷ்பவிராஜிதம் ॥4॥
ததஸ்து தாம் புரீம் லங்காம்
	ரம்யாமபி⁴யயௌ கபி꞉।
ஹஸிதோத்க்ருஷ்டனினதை³꞉
	தூர்யகோ⁴ஷபுரஸ்க்ருதை꞉॥5॥
வஜ்ராங்குஶனிகாஶைஶ்ச
	வஜ்ரஜாலவிபூ⁴ஷிதை꞉।
க்³ருஹமேதை⁴꞉ புரீ ரம்யா
	ப³பா⁴ஸே த்³யௌரிவாம்பு³தை³꞉॥6॥
ப்ரஜஜ்வால ததா³ லங்கா
	ரக்ஷோக³ணக்³ருஹை꞉ ஶுபை⁴꞉।
ஸிதாப்⁴ரஸத்³ருஶைஶ்சித்ரை꞉
	பத்³மஸ்வஸ்திகஸம்ஸ்தி²தை꞉॥7॥
வர்த⁴மானக்³ருஹைஶ்சாபி
	ஸர்வத꞉ ஸுவிபூ⁴ஷிதை꞉।
தாம் சித்ரமால்யாப⁴ரணாம்
	கபிராஜஹிதங்கர꞉॥8॥
ராக⁴வார்தே² சரன் ஸ்ரீமான்
	த³த³ர்ஶ ச நனந்த³ ச ।
ப⁴வநாத்³ப⁴வனம் க³ச்ச²ன்
	த³த³ர்ஶ கபிகுஞ்ஜர꞉॥9॥
விவிதா⁴க்ருதிரூபாணி
	ப⁴வனானி ததஸ்தத꞉।
ஶுஶ்ராவ ருசிரம் கீ³தம்
	த்ரிஸ்தா²னஸ்வரபூ⁴ஷிதம் ॥10॥
ஸ்த்ரீணாம் மத³னவித்³தா⁴னாம்
	தி³வி சாப்ஸரஸாமிவ ।
ஶுஶ்ராவ காஞ்சீனினத³ம்
	நூபுராணாம் ச நி꞉ஸ்வனம் ॥11॥
ஸோபானனினதா³ம்ஶ்சாபி
	ப⁴வனேஷு மஹாத்மனாம் ।
ஆஸ்போ²டிதனிநாதா³ம்ஶ்ச
	க்ஷ்வேடி³தாம்ஶ்ச ததஸ்தத꞉॥12॥
ஶுஶ்ராவ ஜபதாம் தத்ர
	மந்த்ரான் ரக்ஷோக்³ருஹேஷு வை ।
ஸ்வாத்⁴யாய நிரதாம்ஶ்சைவ
	யாதுதா⁴னாந்த³த³ர்ஶ ஸ꞉॥13॥
ராவணஸ்தவஸம்யுக்தான்
	க³ர்ஜதோ ராக்ஷஸானபி ।
ராஜமார்க³ம் ஸமாவ்ருத்ய
	ஸ்தி²தம் ரக்ஷோக³ணம் மஹத் ॥14॥
த³த³ர்ஶ மத்⁴யமே கு³ல்மே
	ராக்ஷஸஸ்ய சரான் ப³ஹூன் ।
தீ³க்ஷிதான் ஜடிலான் முண்டா³ன்
	கோ³ஜினாம்ப³ரவாஸஸ꞉॥15॥
த³ர்ப⁴முஷ்டிப்ரஹரணான்
	அக்³னிகுண்டா³யுதா⁴ம்ஸ்ததா² ।
கூடமுத்³க³ரபாணீம்ஶ்ச
	த³ண்டா³யுத⁴த⁴ரானபி ॥16॥
ஏகாக்ஷானேகவர்ணாம்ஶ்ச
	லம்போ³த³ரபயோத⁴ரான் ।
கராலான்பு⁴க்³னவக்த்ராம்ஶ்ச
	விகடான்வாமனாம்ஸ்ததா² ॥17॥
த⁴ன்வின꞉ க²ட்³கி³னஶ்சைவ
	ஶதக்⁴னீ முஸலாயுதா⁴ன் ।
பரிகோ⁴த்தமஹஸ்தாம்ஶ்ச
	விசித்ரகவசோஜ்ஜ்வலான் ॥18॥
நாதிஸ்தூலான் நாதிக்ருஶான்
	நாதிதீ³ர்கா⁴திஹ்ரஸ்வகான் ।
நாதிகௌ³ரான் நாதிக்ருஷ்ணான்
	நாதிகுப்³ஜான் ந வாமனான் ॥19॥
விரூபான்ப³ஹுரூபாம்ஶ்ச
	ஸுரூபாம்ஶ்ச ஸுவர்சஸ꞉।
பதாகினஶ்சத்⁴வஜினோ
	த³த³ர்ஶ விவிதா⁴யுதா⁴ன் ॥20॥
ஶக்திவ்ருக்ஷாயுதா⁴ம்ஶ்சைவ
	பட்டிஶாஶநிதா⁴ரிண꞉।
க்ஷேபணீபாஶஹஸ்தாம்ஶ்ச
	த³த³ர்ஶ ஸ மஹாகபி꞉॥21॥
ஸ்ரக்³விணஸ்த்வனுலிப்தாம்ஶ்ச
	வராப⁴ரணபூ⁴ஷிதான் ।
நானவேஷஸமாயுக்தான்
	யதா²ஸ்வைரசரான் ப³ஹூன் ॥22॥
தீக்ஷ்ணஶூலத⁴ராம்ஶ்சைவ
	வஜ்ரிணஶ்ச மஹாப³லான் ।
ஶதஸாஹஸ்ரமவ்யக்³ரம்
	ஆரக்ஷம் மத்⁴யமம் கபி꞉॥23॥
ரக்ஷோऽதி⁴பதிநிர்தி³ஷ்டம்
	த³த³ர்ஶாந்த꞉ புராக்³ரத꞉।
ஸ ததா³ தத்³ க்³ருஹம் த்³ருஷ்ட்வா
	மஹாஹாடகதோரணம் ॥24॥
ராக்ஷஸேந்த்³ரஸ்ய விக்²யாதம்
	அத்³ரிமூர்த்⁴னி ப்ரதிஷ்டி²தம் ।
புண்ட³ரீகாவதம்ஸாபி⁴꞉
	பரிகா²பி⁴꞉ ஸமாவ்ருதம் ॥25॥
ப்ராகாராவ்ருதமத்யந்தம்
	த³த³ர்ஶ ஸ மஹாகபி꞉।
த்ரிவிஷ்டபனிப⁴ம் தி³வ்யம்
	தி³வ்யநாத³விநாதி³தம் ॥26॥
வாஜிஹ்ரேஷிதஸங்கு⁴ஷ்டம்
	நாதி³தம் பூ⁴ஷணைஸ்ததா² ।
ரதை²ர்யானைர்விமானைஶ்ச
	ததா² ஹயக³ஜை꞉ ஶுபை⁴꞉॥27॥
வாரணைஶ்ச சதுர்த³ந்தை꞉
	ஶ்வேதாப்⁴ரனிசயோபமை꞉।
பூ⁴ஷிதை ருசிரத்³வாரம்
	மத்தைஶ்ச ம்ருக³பக்ஷிபி⁴꞉॥28॥
ரக்ஷிதம் ஸுமஹாவீர்யை꞉
	யாதுதா⁴னை꞉ ஸஹஸ்ரஶ꞉।
ராக்ஷஸாதி⁴பதேர்கு³ப்தம்
	ஆவிவேஶ க்³ருஹம் கபி꞉॥29॥
ஸ ஹேமஜாம்பூ³னத³சக்ரவாலம்
	மஹார்ஹமுக்தாமணி பூ⁴ஷிதாந்தம் ।
பரார்த்⁴யகாலாகு³ருசந்த³னார்ஹம்
	ஸ ராவணாந்த꞉ புரமாவிவேஶ ॥30॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ சதுர்த²꞉ ஸர்க³꞉