அத² பஞ்சம꞉ ஸர்க³꞉
தத꞉ ஸ மத்⁴யங்க³தமம்ஶுமந்தம்
	ஜ்யோத்ஸ்னாவிதானம் முஹுருத்³வமந்தம் ।
த³த³ர்ஶ தீ⁴மான் பு⁴வி பா⁴னுமந்தம்
	கோ³ஷ்டே² வ்ருஷம் மத்தமிவ ப்⁴ரமந்தம் ॥1॥
லோகஸ்ய பாபானி விநாஶயந்தம்
	மஹோத³தி⁴ம் சாபி ஸமேத⁴யந்தம் ।
பூ⁴தானி ஸர்வாணி விராஜயந்தம்
	த³த³ர்ஶ ஶீதாம்ஶுமதா²பி⁴யாந்தம் ॥2॥
யா பா⁴தி லக்ஷ்மீர்பு⁴வி மந்த³ரஸ்தா²
	யதா² ப்ரதோ³ஷேஷு ச ஸாக³ரஸ்தா² ।
ததை²வ தோயேஷு ச புஷ்கரஸ்தா²
	ரராஜ ஸா சாருநிஶாகரஸ்தா² ॥3॥
ஹம்ஸோ யதா² ராஜதபஞ்ஜரஸ்த²꞉
	ஸிம்ஹோ யதா² மந்த³ரகந்த³ரஸ்த²꞉।
வீரோ யதா² க³ர்விதகுஞ்ஜரஸ்த²-
	ஶ்சந்த்³ரோऽபி ப³ப்⁴ராஜ ததா²ம்ப³ரஸ்த²꞉॥4॥
ஸ்தி²த꞉ ககுத்³மானிவ தீக்ஷ்ணஶ்ருங்கோ³
	மஹாசல꞉ ஶ்வேத இவோர்த்⁴வஶ்ருங்க³꞉।
ஹஸ்தீவ ஜாம்பூ³னத³ப³த்³த⁴ஶ்ருங்கோ³
	விபா⁴தி சந்த்³ர꞉ பரிபூர்ணஶ்ருங்க³꞉॥5॥
விநஷ்டஶீதாம்பு³துஷாரபங்கோ
	மஹாக்³ரஹக்³ராஹவிநஷ்டபங்க꞉।
ப்ரகாஶலக்ஷ்ம்யாஶ்ரயநிர்மலாங்கோ
	ரராஜ சந்த்³ரோ ப⁴க³வான் ஶஶாங்க꞉॥6॥
ஶிலாதலம் ப்ராப்ய யதா² ம்ருகே³ந்த்³ரோ
	மஹாரணம் ப்ராப்ய யதா² க³ஜேந்த்³ர꞉।
ராஜ்யம் ஸமாஸாத்³ய யதா² நரேந்த்³ர-
	ஸ்ததா²ப்ரகாஶோ விரராஜ சந்த்³ர꞉॥7॥
ப்ரகாஶசந்த்³ரோத³யநஷ்டதோ³ஷ꞉
	ப்ரவ்ருத்³த⁴ரக்ஷ꞉ பிஶிதாஶதோ³ஷ꞉।
ராமாபி⁴ராமேரிதசித்ததோ³ஷ꞉
	ஸ்வர்க³ப்ரகாஶோ ப⁴க³வான்ப்ரதோ³ஷ꞉॥8॥
தந்த்ரீஸ்வரா꞉ கர்ணஸுகா²꞉ ப்ரவ்ருத்தா꞉
	ஸ்வபந்தி நார்ய꞉ பதிபி⁴꞉ ஸுவ்ருத்தா꞉।
நக்தஞ்சராஶ்சாபி ததா² ப்ரவ்ருத்தா
	விஹர்துமத்யத்³பு⁴தரௌத்³ரவ்ருத்தா꞉॥9॥
மத்தப்ரமத்தானி ஸமாகுலானி
	ரதா²ஶ்வப⁴த்³ராஸனஸங்குலானி ।
வீரஶ்ரியா சாபி ஸமாகுலானி
	த³த³ர்ஶ தீ⁴மான்ஸ கபி꞉ குலானி ॥10॥
பரஸ்பரம் சாதி⁴கமாக்ஷிபந்தி
	பு⁴ஜாம்ஶ்ச பீனானதி⁴விக்ஷிபந்தி ।
மத்தப்ரலாபானதி⁴விக்ஷிபந்தி
	மத்தானி சான்யோன்யமதி⁴க்ஷிபந்தி ॥11॥
ரக்ஷாம்ஸி வக்ஷாம்ஸி ச விக்ஷிபந்தி
	கா³த்ராணி காந்தாஸு ச விக்ஷிபந்தி ।
ரூபாணி சித்ராணி ச விக்ஷிபந்தி
	த்³ருடா⁴னி சாபானி ச விக்ஷிபந்தி ॥12॥
த³த³ர்ஶ காந்தாஶ்ச ஸமாலப⁴ந்த்ய-
	ஸ்ததா²பராஸ்தத்ர புன꞉ ஸ்வபந்த்ய꞉।
ஸுரூபவக்த்ராஶ்ச ததா² ஹஸந்த்ய꞉
	க்ருத்³தா⁴꞉ பராஶ்சாபி விநி꞉ஶ்வஸந்த்ய꞉॥13॥
மஹாக³ஜைஶ்சாபி ததா² நத³த்³பி⁴꞉
	ஸுபூஜிதைஶ்சாபி ததா² ஸுஸத்³பி⁴꞉।
ரராஜ வீரைஶ்ச விநி꞉ஶ்வஸத்³பி⁴-
	ர்ஹ்ரதா³ பு⁴ஜங்கை³ரிவ நி꞉ஶ்வஸத்³பி⁴꞉॥14॥
பு³த்³தி⁴ப்ரதா⁴னான்ருசிராபி⁴தா⁴னான்
	ஸம்ஶ்ரத்³த³தா⁴னாஞ்ஜக³த꞉ ப்ரதா⁴னான் ।
நாநாவிதா⁴னான்ருசிராபி⁴தா⁴னான்
	த³த³ர்ஶ தஸ்யாம் புரி யாதுதா⁴னான் ॥15॥
நனந்த³ த்³ருஷ்ட்வா ஸ ச தான்ஸுரூபான்
	நாநாகு³ணானாத்மகு³ணானுரூபான் ।
வித்³யோதமானான்ஸ ச தான்ஸுரூபான்
	த³த³ர்ஶ காம்ஶ்சிச்ச புனர்விரூபான் ॥13॥
ததோ வரார்ஹா꞉ ஸுவிஶுத்³த⁴பா⁴வா-
	ஸ்தேஷாம் ஸ்த்ரியஸ்தத்ர மஹானுபா⁴வா꞉।
ப்ரியேஷு பானேஷு ச ஸக்தபா⁴வா
	த³த³ர்ஶ தாரா இவ ஸுஸ்வபா⁴வா꞉॥17॥
ஸ்த்ரியோ ஜ்வலந்தீஸ்த்ரபயோபகூ³டா⁴
	நிஶீத²காலே ரமணோபகூ³டா⁴꞉।
த³த³ர்ஶ காஶ்சித்ப்ரமதோ³பகூ³டா⁴
	யதா² விஹங்கா³ விஹகோ³பகூ³டா⁴꞉॥18॥
அன்யா꞉ புனர்ஹர்ம்யதலோபவிஷ்டா-
	ஸ்தத்ர ப்ரியாங்கேஷு ஸுகோ²பவிஷ்டா꞉।
ப⁴ர்து꞉ பரா த⁴ர்மபரா நிவிஷ்டா
	த³த³ர்ஶ தீ⁴மான்மத³னோபவிஷ்டா꞉॥19॥
அப்ராவ்ருதா꞉ காஞ்சனராஜிவர்ணா꞉
	காஶ்சித்பரார்த்⁴யாஸ்தபனீயவர்ணா꞉।
புனஶ்ச காஶ்சிச்ச²ஶலக்ஷ்மவர்ணா꞉
	காந்தப்ரஹீணா ருசிராங்க³வர்ணா꞉॥20॥
தத꞉ ப்ரியான்ப்ராப்ய மனோऽபி⁴ராமான்
	ஸுப்ரீதியுக்தா꞉ ஸுமனோऽபி⁴ராமா꞉।
க்³ருஹேஷு ஹ்ருஷ்டா꞉ பரமாபி⁴ராமா
	ஹரிப்ரவீர꞉ ஸ த³த³ர்ஶ ராமா꞉॥21॥
சந்த்³ரப்ரகாஶாஶ்ச ஹி வக்த்ரமாலா
	வக்ரா꞉ ஸுபக்ஷ்மாஶ்ச ஸுநேத்ரமாலா꞉।
விபூ⁴ஷணானாம் ச த³த³ர்ஶ மாலா꞉
	ஶதஹ்ரதா³நாமிவ சாருமாலா꞉॥22॥
ந த்வேவ ஸீதாம் பரமாபி⁴ஜாதாம்
	பதி² ஸ்தி²தே ராஜகுலே ப்ரஜாதாம் ।
லதாம் ப்ரபு²ல்லாமிவ ஸாது⁴ஜாதாம்
	த³த³ர்ஶ தன்வீம் மனஸாபி⁴ஜாதாம் ॥23॥
ஸனாதனே வர்த்மனி ஸம்நிவிஷ்டாம்
	ராமேக்ஷணீம் தாம் மத³நாபி⁴விஷ்டாம் ।
ப⁴ர்துர்மன꞉ ஸ்ரீமத³னுப்ரவிஷ்டாம்
	ஸ்த்ரீப்⁴ய꞉ பராப்⁴யஶ்ச ஸதா³ விஶிஷ்டாம் ॥24॥
உஷ்ணார்தி³தாம் ஸானுஸ்ருதாஸ்ரகண்டீ²ம்
	புரா வரார்ஹோத்தமநிஷ்ககண்டீ²ம் ।
ஸுஜாதபக்ஷ்மாமபி⁴ரக்தகண்டீ²ம்
	வனே ப்ரந்ருத்தாமிவ நீலகண்டீ²ம் ॥25॥
அவ்யக்தரேகா²மிவ சந்த்³ரலேகா²ம்
	பாம்ஸுப்ரதி³க்³தா⁴மிவ ஹேமரேகா²ம் ।
க்ஷதப்ரரூடா⁴மிவ வர்ணரேகா²ம்
	வாயுப்ரபு⁴க்³நாமிவ மேக⁴ரேகா²ம் ॥26॥
ஸீதாமபஶ்யன்மனுஜேஶ்வரஸ்ய
	ராமஸ்ய பத்னீம் வத³தாம் வரஸ்ய ।
ப³பூ⁴வ து³꞉கோ²பஹதஶ்சிரஸ்ய
	ப்லவங்க³மோ மந்த³ இவாசிரஸ்ய ॥27॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ பஞ்சம꞉ ஸர்க³꞉