அத² ஏகாத³ஶ꞉ ஸர்க³꞉
அவதூ⁴ய ச தாம் பு³த்³தி⁴ம்
	ப³பூ⁴வாவஸ்தி²தஸ்ததா³ ।
ஜகா³ம சாபராம் சிந்தாம்
	ஸீதாம் ப்ரதி மஹாகபி꞉॥1॥
ந ராமேண வியுக்தா ஸா
	ஸ்வப்துமர்ஹதி பா⁴மினீ ।
ந போ⁴க்தும் நாப்யலங்கர்தும்
	ந பானமுபஸேவிதும் ॥2॥
நான்யம் நரமுபஸ்தா²தும்
	ஸுராணாமபி சேஶ்வரம் ।
ந ஹி ராமஸம꞉ கஶ்சித்
	வித்³யதே த்ரித³ஶேஷ்வபி ॥3॥
அன்யேயமிதி நிஶ்சித்ய
	பூ⁴யஸ்தத்ர சசார ஸ꞉।
பானபூ⁴மௌ ஹரிஶ்ரேஷ்ட²꞉
	ஸீதாஸந்த³ர்ஶர்னோத்ஸுக꞉॥4॥
க்ரீடி³தேனாபரா꞉ க்லாந்தா
	கீ³தேன ச ததா²பரா꞉।
ந்ருத்யேன சாபரா꞉ க்லாந்தா꞉
	பானவிப்ரஹதாஸ்ததா² ॥5॥
முரஜேஷு ம்ருத³ங்கே³ஷு
	சேலிகாஸு ச ஸம்ஸ்தி²தா꞉।
ததா²ऽऽஸ்தரணமுக்²யேஷு
	ஸம்விஷ்டாஶ்சாபரா꞉ ஸ்த்ரிய꞉॥6॥
அங்க³னானாம் ஸஹஸ்ரேண
	பூ⁴ஷிதேன விபூ⁴ஷணை꞉।
ரூபஸம்லாபஶீலேன
	யுக்தகீ³தார்த²பா⁴ஷிணா ॥7॥
தே³ஶகாலாபி⁴யுக்தேன
	யுக்தவாக்யாபி⁴தா⁴யினா ।
ரதாதி⁴கேன ஸம்யுக்தாம்
	த³த³ர்ஶ ஹரியூத²ப꞉॥8॥
அன்யத்ராபி வரஸ்த்ரீணாம்
	ருபஸம்லாபஶாயினாம் ।
ஸஹஸ்ரம் யுவதீனாம் து
	ப்ரஸுப்தம் ஸ த³த³ர்ஶ ஹ ॥9॥
தே³ஶகாலாபி⁴யுக்தம் து
	யுக்தவாக்யாபி⁴தா⁴யி தத் ।
ரதாவிரதஸம்ஸுப்தம்
	த³த³ர்ஶ ஹரியுத²ப꞉॥10॥
தாஸாம் மத்⁴யே மஹாபா³ஹு꞉
	ஶுஶுபே⁴ ராக்ஷஸேஶ்வர꞉।
கோ³ஷ்டே² மஹதி முக்²யானாம்
	க³வாம் மத்⁴யே யதா² வ்ருஷ꞉॥11॥
ஸ ராக்ஷஸேந்த்³ர꞉ ஶுஶுபே⁴
	தாபி⁴꞉ பரிவ்ருத꞉ ஸ்வயம் ।
கரேணுபி⁴ர்யதா²ரண்யே
	பரிகீர்ணோ மஹாத்³விப꞉॥12॥
ஸர்வகாமைருபேதாம் ச
	பானபூ⁴மிம் மஹாத்மன꞉।
த³த³ர்ஶ கபிஶார்தூ³ல꞉
	தஸ்ய ரக்ஷ꞉பதேர்க்³ருஹே ॥13॥
ம்ருகா³ணாம் மஹிஷாணாம் ச
	வராஹாணாம் ச பா⁴க³ஶ꞉।
தத்ர ந்யஸ்தானி மாம்ஸானி
	பானபூ⁴மௌ த³த³ர்ஶ ஸ꞉॥14॥
ரௌக்மேஷு ச விஶலேஷு
	பா⁴ஜனேஷ்வப்யப⁴க்ஷிதான் ।
த³த³ர்ஶ கபிஶார்தூ³லோ
	மயூரான்குக்குடாம்ஸ்ததா² ॥15॥
வராஹவாத்⁴ரீணஸகான்
	த³தி⁴ஸௌவர்சலாயுதான் ।
ஶல்யான்ம்ருக³மயூராம்ஶ்ச
	ஹனூமானன்வவைக்ஷத ॥16॥
க்ருகலான் விவிதா⁴ம்ஶ்சா²கா³ன்
	ச²ஶகானர்த⁴ப⁴க்ஷிதான் ।
மஹிஷானேகஶல்யாம்ஶ்ச
	மேஷாம்ஶ்ச க்ருதநிஷ்டி²தான் ॥17॥
லேஹ்யானுச்சாவசான் பேயான்
	போ⁴ஜ்யான்யுஞ்சாவசானி ச ।
ததா²ம்லலவணோத்தம்ஸை꞉
	விவிதை⁴ ராக³கா²ண்ட³வை꞉॥18॥
மஹாநூபுரகேயூரை꞉
	அபவித்³தை⁴ர்மஹாத⁴னை꞉।
பானபா⁴ஜனவிக்ஷிப்தை꞉
	ப²லைஶ்ச விவிதை⁴ரபி ॥19॥
க்ருதபுஷ்போபஹாரா பூ⁴꞉
	அதி⁴காம் புஷ்யதி ஶ்ரியம் ।
தத்ர தத்ர ச வின்யஸ்தை꞉
	ஸுஶ்லிஷ்டஶயனாஸனை꞉॥20॥
பானபூ⁴மிர்வினா வஹ்னிம்
	ப்ரதீ³ப்தேவோபலக்ஷ்யதே ।
ப³ஹுப்ரகாரைர்விவிதை⁴꞉
	வரஸம்ஸ்காரஸம்ஸ்க்ருதை꞉॥21॥
மாம்ஸை꞉ குஶலஸம்யுக்தை꞉
	பானபூ⁴மிக³தை꞉ ப்ருத²க் ।
தி³வ்யா꞉ ப்ரஸன்னாவிவிதா⁴꞉
	ஸுரா꞉ க்ருதஸுரா அபி ॥22॥
ஶர்கராஸவமாத்⁴வீகா꞉
	புஷ்பாஸவப²லாஸவா꞉।
வாஸசூர்ணைஶ்ச விவிதை⁴꞉
	ம்ருஷ்டாஸ்தைஸ்தை꞉ ப்ருத²க்ப்ருத²க் ॥23॥
ஸந்ததா ஶுஶுபே⁴ பூ⁴மி꞉
	மால்யைஶ்ச ப³ஹுஸம்ஸ்தி²தை꞉।
ஹிரண்மயைஶ்ச கலஶை꞉
	பா⁴ஜனை꞉ ஸ்பா²டிகைரபி ॥24॥
ஜாம்பூ³னத³மயைஶ்சான்யை꞉
	கரகைரபி⁴ஸம்வ்ருதா ।
ராஜதேஷு ச கும்பே⁴ஷு
	ஜாம்பூ³னத³மயேஷு ச ॥25॥
பானஶ்ரேஷ்டா²ம் ததா² பூ⁴மிம்
	கபிஸ்தத்ர த³த³ர்ஶ ஸ꞉।
ஸோऽபஶ்யச்சா²தகும்பா⁴னி
	ஸீதோ⁴ர்மணிமயானி ச ॥26॥
தானி தானி ச பூர்ணானி
	பா⁴ஜனானி மஹாகபி꞉।
க்வசித³ர்தா⁴வஶேஷாணி
	க்வசித்பீதான்யஶேஷத꞉॥27॥
க்வசின்னைவ ப்ரபீதானி
	பானானி ஸ த³த³ர்ஶ ஹ ।
க்வசித்³ப⁴க்ஷ்யாம்ஶ்ச விவிதா⁴ன்
	க்வசித்பானானி பா⁴க³ஶ꞉॥28॥
க்வசித³ர்தா⁴வஶேஷாணி
	பஶ்யன்வை விசசார ஹ ।
ஶயனான்யத்ர நாரீணாம்
	ஶூன்யானி ப³ஹுதா⁴ புன꞉।
பரஸ்பரம் ஸமாஶ்லிஷ்ய
	காஶ்சித்ஸுப்தாவராங்க³னா꞉॥29॥
காசிச்ச வஸ்த்ரமன்யஸ்யா
	அபஹ்ருத்யோபகு³ஹ்ய ச ।
உபக³ம்யாப³லா ஸுப்தா
	நித்³ராப³லபராஜிதா ॥30॥
தாஸாமுச்ச்²வாஸவாதேன
	வஸ்த்ரம் மால்யம் ச கா³த்ரஜம் ।
நாத்யர்த²ம் ஸ்பந்த³தே சித்ரம்
	ப்ராப்ய மந்த³மிவானிலம் ॥31॥
சந்த³னஸ்ய ச ஶீதஸ்ய
	 ஶீதோ⁴ர்மது⁴ரஸஸ்ய ச ।
விவித⁴ஸ்ய ச மால்யஸ்ய
	புஷ்பஸ்ய விவித⁴ஸ்ய ச ॥32॥
ப³ஹுதா⁴ மாருதஸ்தஸ்ய
	க³ந்த⁴ம் விவித⁴முத்³வஹன் ।
ஸ்னானானாம் சந்த³னானாம் ச
	தூ⁴பானாம் சைவ மூர்சி²த꞉॥33॥
ப்ரவவௌ ஸுரபி⁴ர்க³ந்தோ⁴
	விமானே புஷ்பகே ததா³ ।
ஶ்யாமாவதா³தாஸ்தத்ரான்யா꞉
	காஶ்சித்க்ருஷ்ணா வராங்க³னா꞉॥34॥
காஶ்சித்காஞ்சனவர்ணாங்க்³ய꞉
	ப்ரமதா³ ராக்ஷஸாலயே ।
தாஸாம் நித்³ராவஶத்வாச்ச
	மத³னேன விமூர்சி²தம் ॥35॥
பத்³மினீனாம் ப்ரஸுப்தானாம்
	ரூபமாஸீத்³யதை²வ ஹி ।
ஏவம் ஸர்வமஶேஷேண
	ராவணாந்த꞉புரம் கபி꞉।
த³த³ர்ஶ ஸ மஹாதேஜா
	ந த³த³ர்ஶ ச ஜானகீம் ॥36॥
நிரீக்ஷமாணஶ்ச தத꞉
	தா꞉ ஸ்த்ரிய꞉ ஸ மஹாகபி꞉।
ஜகா³ம மஹதீம் ஶங்காம்
	த⁴ர்மஸாத்⁴வஸஶங்கித꞉॥37॥
பரதா³ராவரோத⁴ஸ்ய
	ப்ரஸுப்தஸ்ய நிரீக்ஷணம் ।
இத³ம் க²லு மமாத்யர்த²ம்
	த⁴ர்மலோபம் கரிஷ்யதி ॥38॥
ந ஹி மே பரதா³ராணாம்
	த்³ருஷ்டிர்விஷயவர்தினீ ।
அயம் சாத்ர மயா த்³ருஷ்ட꞉
	பரதா³ரபரிக்³ரஹ꞉॥39॥
தஸ்ய ப்ராது³ரபூ⁴ச்சிந்தா-
	புனரன்யா மனஸ்வின꞉।
நிஶ்சிதைகாந்தசித்தஸ்ய
	கார்யநிஶ்சயத³ர்ஶினீ ॥40॥
காமம் த்³ருஷ்டா மயா ஸர்வா
	விஶ்வஸ்தா ராவணஸ்த்ரிய꞉।
ந து மே மனஸா கிஞ்சித்
	வைக்ருத்யமுபபத்³யதே ॥41॥
மனோ ஹி ஹேது꞉ ஸர்வேஷாம்
	இந்த்³ரியாணாம் ப்ரவர்தனே ।
ஶுபா⁴ஶுபா⁴ஸ்வவஸ்தா²ஸு
	தச்ச மே ஸுவ்யவஸ்தி²தம் ॥42॥
நான்யத்ர ஹி மயா ஶக்யா
	வைதே³ஹீ பரிமார்கி³தும் ।
ஸ்த்ரியோ ஹி ஸ்த்ரீஷு த்³ருஶ்யந்தே
	ஸதா³ ஸம்பரிமார்க³ணே ॥43॥
யஸ்ய ஸத்த்வஸ்ய யா யோனி꞉
	தஸ்யாம் தத்பரிமார்க³தே ।
ந ஶக்யம் ப்ரமதா³ நஷ்டா
	ம்ருகீ³ஷு பரிமார்கி³தும் ॥44॥
ததி³த³ம் மார்கி³தம் தாவத்
	சு²த்³தே⁴ன மனஸா மயா ।
ராவணாந்த꞉புரம் ஸர்வம்
	த்³ருஶ்யதே ந ச ஜானகீ ॥45॥
தே³வக³ந்த⁴ர்வகன்யாஶ்ச
	நாக³கன்யாஶ்ச வீர்யவான் ।
அவேக்ஷமாணோ ஹனுமான்
	நைவாபஶ்யத ஜானகீம் ॥46॥
தாமபஶ்யன்கபிஸ்தத்ர
	பஶ்யம்ஶ்சான்யா வரஸ்த்ரிய꞉।
அபக்ரம்ய ததா³ வீர꞉
	ப்ரஸ்தா²துமுபசக்ரமே ॥47॥
ஸ பூ⁴ய꞉ ஸர்வத꞉ ஸ்ரீமான்
	மாருதிர்யத்னமாஶ்ரித꞉।
ஆபானபூ⁴மிமுத்ஸ்ருஜ்ய
	தாம் விசேதும் ப்ரசக்ரமே ॥48॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஏகாத³ஶ꞉ ஸர்க³꞉