அத² பஞ்சத³ஶ꞉ ஸர்க³꞉
ஸ வீக்ஷமாணஸ்தத்ரஸ்தோ²
	மார்க³மாணஶ்ச மைதி²லீம் ।
அவேக்ஷமாணஶ்ச மஹீம்
	ஸர்வாம் தாமன்வவைக்ஷத ॥1॥
ஸந்தானகலதாபி⁴ஶ்ச
	பாத³பைருபஶோபி⁴தாம் ।
தி³வ்யக³ந்த⁴ரஸோபேதாம்
	ஸர்வத꞉ ஸமலங்க்ருதாம் ॥2॥
தாம் ஸ நந்த³னஸங்காஶாம்
	ம்ருக³பக்ஷிபி⁴ராவ்ருதாம் ।
ஹர்ம்யப்ராஸாத³ஸம்பா³தா⁴ம்
	கோகிலாகுலநி꞉ஸ்வனாம் ॥3॥
காஞ்சனோத்பலபத்³மாபி⁴꞉
	வாபீபி⁴ருபஶோபி⁴தாம் ।
ப³ஹ்வாஸனகுதோ²பேதாம்
	ப³ஹுபூ⁴மிக்³ருஹாயுதாம் ॥4॥
ஸர்வர்துகுஸுமை ரம்யை꞉
	ப²லவத்³பி⁴ஶ்ச பாத³பை꞉।
புஷ்பிதாநாமஶோகானாம்
	ஶ்ரியா ஸூர்யோத³யப்ரபா⁴ம் ॥5॥
ப்ரதீ³ப்தாமிவ தத்ரஸ்தோ²
	மாருதி꞉ ஸமுதை³க்ஷத ।
நிஷ்பத்ரஶாகா²ம் விஹகை³꞉
	க்ரியமாணாமிவாஸக்ருத் ॥6॥
விநிஷ்பதத்³பி⁴꞉ ஶதஶ꞉
	சித்ரை꞉ புஷ்பாவதம்ஸகை꞉।
ஸமூலபுஷ்பரசிதை꞉
	அஶோகை꞉ ஶோகநாஶனை꞉॥7॥
புஷ்பபா⁴ராதிபா⁴ரைஶ்ச
	ஸ்ப்ருஶத்³பி⁴ரிவ மேதி³னீம் ।
கர்ணிகாரை꞉ குஸுமிதை꞉
	கிம்ஶுகைஶ்ச ஸுபுஷ்பிதை꞉॥8॥
ஸ தே³ஶ꞉ ப்ரப⁴யா தேஷாம்
	ப்ரதீ³ப்த இவ ஸர்வத꞉।
பும்நாகா³꞉ ஸப்தபர்ணாஶ்ச
	சம்பகோத்³தா³லகாஸ்ததா² ॥9॥
விவ்ருத்³த⁴மூலா ப³ஹவ꞉
	ஶோப⁴ந்தே ஸ்ம ஸுபுஷ்பிதா꞉।
ஶாதகும்ப⁴னிபா⁴꞉ கேசித்
	கேசித³க்³நிஶிக²ப்ரபா⁴꞉॥10॥
நீலாஞ்ஜனனிபா⁴꞉ கேசித்
	தத்ராஶோகா꞉ ஸஹஸ்ரஶ꞉।
நந்த³னம் விபு³தோ⁴த்³யானம்
	சித்ரம் சைத்ரரத²ம் யதா² ॥11॥
அதிவ்ருத்தமிவாசிந்த்யம்
	தி³வ்யம் ரம்யஶ்ரியாயுதம் ।
த்³விதீயமிவ சாகாஶம்
	புஷ்பஜ்யோதிர்க³ணாயுதம் ॥12॥
புஷ்பரத்னஶதைஶ்சித்ரம்
	பஞ்சமம் ஸாக³ரம் யதா² ।
ஸர்வர்துபுஷ்பைர்னிசிதம்
	பாத³பைர்மது⁴க³ந்தி⁴பி⁴꞉॥13॥
நாநானிநாதை³ருத்³யானம்
	ரம்யம் ம்ருக³க³ணத்³விஜை꞉।
அனேகக³ந்த⁴ப்ரவஹம்
	புண்யக³ந்த⁴ம் மனோஹரம் ॥14॥
ஶைலேந்த்³ரமிவ க³ந்தா⁴ட்⁴யம்
	த்³விதீயம் க³ந்த⁴மாத³னம் ।
அஶோகவநிகாயாம் து
	தஸ்யாம் வானரபுங்க³வ꞉॥15॥
ஸ த³த³ர்ஶாவிதூ³ரஸ்த²ம்
	சைத்யப்ராஸாத³மூர்ஜிதம் ।
மத்⁴யே ஸ்தம்ப⁴ஸஹஸ்ரேண
	ஸ்தி²தம் கைலாஸபாண்டு³ரம் ॥16॥
ப்ரவாலக்ருதஸோபானம்
	தப்தகாஞ்சனவேதி³கம் ।
முஷ்ணந்தமிவ சக்ஷூம்ஷி
	த்³யோதமானமிவ ஶ்ரியா ॥17॥
நிர்மலம் ப்ராம்ஶுபா⁴வத்வாத்
	உல்லிக²ந்தமிவாம்ப³ரம் ।
ததோ மலினஸம்வீதாம்
	ராக்ஷஸீபி⁴꞉ ஸமாவ்ருதாம் ॥18॥
உபவாஸக்ருஶாம் தீ³னாம்
	நி꞉ஶ்வஸந்தீம் புன꞉ புன꞉।
த³த³ர்ஶ ஶுக்லபக்ஷாதௌ³
	சந்த்³ரரேகா²மிவாமலாம் ॥19॥
மந்த³ப்ரக்²யாயமானேன
	ரூபேண ருசிரப்ரபா⁴ம் ।
பினத்³தா⁴ம் தூ⁴மஜாலேன
	ஶிகா²மிவ விபா⁴வஸோ꞉॥20॥
பீதேனைகேன ஸம்வீதாம்
	க்லிஷ்டேனோத்தமவாஸஸா ।
ஸபங்காமனலங்காராம்
	விபத்³மாமிவ பத்³மினீம் ॥21॥
பீடி³தாம் து³꞉க²ஸந்தப்தாம்
	பரிக்ஷீணாம் தபஸ்வினீம் ।
க்³ரஹேணாங்கா³ரகேணேவ
	பீடி³தாமிவ ரோஹிணீம் ॥22॥
அஶ்ருபூர்ணமுகீ²ம் தீ³னாம்
	க்ருஶாமனஶனேன ச ।
ஶோகத்⁴யானபராம் தீ³னாம்
	நித்யம் து³꞉க²பராயணாம் ॥23॥
ப்ரியம் ஜனமபஶ்யந்தீம்
	பஶ்யந்தீம் ராக்ஷஸீக³ணம் ।
ஸ்வக³ணேன ம்ருகீ³ம் ஹீனாம்
	ஶ்வக³ணேனாவ்ருதாமிவ ॥24॥
நீலநாகா³ப⁴யா வேண்யா
	ஜக⁴னம் க³தயைகயா ।
நீலயா நீரதா³பாயே
	வனராஜ்யா மஹீமிவ ॥25॥
ஸுகா²ர்ஹாம் து³꞉க²ஸந்தப்தாம்
	வ்யஸனாநாமகோவிதா³ம் ।
தாம் விலோக்ய விஶாலாக்ஷீம்
	அதி⁴கம் மலினாம் க்ருஶாம் ॥26॥
தர்கயாமாஸ ஸீதேதி
	காரணைருபபாதி³பி⁴꞉।
ஹ்ரியமாணா ததா³ தேன
	ரக்ஷஸா காமரூபிணா ॥27॥
யதா²ரூபா ஹி த்³ருஷ்டா ஸா
	ததா²ரூபேயமங்க³னா ।
பூர்ணசந்த்³ரானனாம் ஸுப்⁴ரூம்
	சாருவ்ருத்தபயோத⁴ராம் ॥28॥
குர்வதீம் ப்ரப⁴யா தே³வீம்
	ஸர்வா விதிமிரா தி³ஶ꞉।
தாம் நீலகண்டீ²ம் பி³ம்போ³ஷ்டீ²ம்
	ஸுமத்⁴யாம் ஸுப்ரதிஷ்டி²தாம் ॥29॥
ஸீதாம் பத்³மபலாஶாக்ஷீம்
	மன்மத²ஸ்ய ரதிம் யதா² ।
இஷ்டாம் ஸர்வஸ்ய ஜக³த꞉
	பூர்ணசந்த்³ரப்ரபா⁴மிவ ॥30॥
பூ⁴மௌ ஸுதனுமாஸீனாம்
	நியதாமிவ தாபஸீம் ।
நி꞉ஶ்வாஸப³ஹுலாம் பீ⁴ரும்
	பு⁴ஜகே³ந்த்³ரவதூ⁴மிவ ॥31॥
ஶோகஜாலேன மஹதா
	விததேன ந ராஜதீம் ।
ஸம்ஸக்தாம் தூ⁴மஜாலேன
	ஶிகா²மிவ விபா⁴வஸோ꞉॥32॥
தாம் ஸ்ம்ருதீமிவ ஸந்தி³க்³தா⁴ம்
	ருத்³தி⁴ம் நிபதிதாமிவ ।
விஹதாமிவ ச ஶ்ரத்³தா⁴ம்
	ஆஶாம் ப்ரதிஹதாமிவ ॥33॥
ஸோபஸர்கா³ம் யதா² ஸித்³தி⁴ம்
	பு³த்³தி⁴ம் ஸகலுஷாமிவ ।
அபூ⁴தேனாபவாதே³ன
	கீர்திம் நிபதிதாமிவ ॥34॥
ராமோபரோத⁴வ்யதி²தாம்
	ரக்ஷோக³ணனிபீடி³தாம் ।
அப³லாம் ம்ருக³ஶாவாக்ஷீம்
	வீக்ஷமாணாம் ததஸ்தத꞉॥35॥
பா³ஷ்பாம்பு³பரிபூர்ணேன
	க்ருஷ்ணவக்ராக்ஷிபக்ஷ்மணா ।
வத³னேனாப்ரஸன்னேன
	நி꞉ஶ்வஸந்தீம் புன꞉ புன꞉॥36॥
மலபங்கத⁴ராம் தீ³னாம்
	மண்ட³னார்ஹாமமண்டி³தாம் ।
ப்ரபா⁴ம் நக்ஷத்ரராஜஸ்ய
	காலமேகை⁴ரிவாவ்ருதாம் ॥37॥
தஸ்ய ஸந்தி³தி³ஹே பு³த்³தி⁴꞉
	ததா² ஸீதாம் நிரீக்ஷ்ய ச ।
ஆம்னாயாநாமயோகே³ன
	வித்³யாம் ப்ரஶிதி²லாமிவ ॥38॥
து³꞉கே²ன பு³பு³தே⁴ ஸீதாம்
	ஹனுமானனலங்க்ருதாம் ।
ஸம்ஸ்காரேண யதா² ஹீனாம்
	வாசமர்தா²ந்தரம் க³தாம் ॥39॥
தாம் ஸமீக்ஷ்ய விஶாலாக்ஷீம்
	ராஜபுத்ரீமனிந்தி³தாம் ।
தர்கயாமாஸ ஸீதேதி
	காரணைருபபாத³யன் ॥40॥
வைதே³ஹ்யா யானி சாங்கே³ஷு
	ததா³ ராமோऽன்வகீர்தயத் ।
தான்யாப⁴ரணஜாலானி
	கா³த்ரஶோபீ⁴ன்யலக்ஷயத் ॥41॥
ஸுக்ருதௌ கர்ணவேஷ்டௌ ச
	ஶ்வத³ம்ஷ்ட்ரௌ ச ஸுஸம்ஸ்தி²தௌ ।
மணிவித்³ருமசித்ராணி
	ஹஸ்தேஷ்வாப⁴ரணானி ச ॥42॥
ஶ்யாமானி சிரயுக்தத்வாத்
	ததா² ஸம்ஸ்தா²னவந்தி ச ।
தான்யேவைதானி மன்யேऽஹம்
	யானி ராமோऽவ்னகீர்தயத் ॥43॥
தத்ர யான்யவஹீனானி
	தான்யஹம் நோபலக்ஷயே ।
யான்யஸ்யா நாவஹீனானி
	தானீமானி ந ஸம்ஶய꞉॥44॥
பீதம் கனகபட்டாப⁴ம்
	ஸ்ரஸ்தம் தத்³வஸனம் ஶுப⁴ம் ।
உத்தரீயம் நகா³ஸக்தம்
	ததா³ த்³ருஷ்டம் ப்லவங்க³மை꞉॥45॥
பூ⁴ஷணானி ச முக்²யானி
	த்³ருஷ்டானி த⁴ரணீதலே ।
அனயைவாபவித்³தா⁴னி
	ஸ்வனவந்தி மஹாந்தி ச ॥46॥
இத³ம் சிரக்³ருஹீதத்வாத்
	வஸனம் க்லிஷ்டவத்தரம் ।
ததா²ப்யனூனம் தத்³வர்ணம்
	ததா² ஸ்ரீமத்³யதே²தரத் ॥47॥
இயம் கனகவர்ணாங்கீ³
	ராமஸ்ய மஹிஷீ ப்ரியா ।
ப்ரணஷ்டாபி ஸதீ யஸ்ய
	மனஸோ ந ப்ரணஶ்யதி ॥48॥
இயம் ஸா யத்க்ருதே ராம꞉
	சதுர்பி⁴ரிஹ தப்யதே ।
காருண்யேனாந்ருஶம்ஸ்யேன
	ஶோகேன மத³னேன ச ॥49॥
ஸ்த்ரீ ப்ரணஷ்டேதி காருண்யாத்
	ஆஶ்ரிதேத்யாந்ருஶம்ஸ்யத꞉।
பத்னீ நஷ்டேதி ஶோகேன
	ப்ரியேதி மத³னேன ச ॥50॥
அஸ்யா தே³வ்யா யதா²ரூபம்
	அங்க³ப்ரத்யங்க³ஸௌஷ்ட²வம் ।
ராமஸ்ய ச யதா²ரூபம்
	தஸ்யேயமஸிதேக்ஷணா ॥51॥
அஸ்யா தே³வ்யா மனஸ்தஸ்மின்
	தஸ்ய சாஸ்யாம் ப்ரதிஷ்டி²தம் ।
தேனேயம் ஸ ச த⁴ர்மாத்மா
	முஹூர்தமபி ஜீவதி ॥52॥
து³ஷ்கரம் க்ருதவான் ராமோ
	ஹீனோ யத³னயா ப்ரபு⁴꞉।
தா⁴ரயத்யாத்மனோ தே³ஹம்
	ந ஶோகேனாவஸீத³தி ॥53॥
ஏவம் ஸீதாம் ததா³ த்³ருஷ்ட்வா
	ஹ்ருஷ்ட꞉ பவனஸம்ப⁴வ꞉।
ஜகா³ம மனஸா ராமம்
	ப்ரஶஶம்ஸ ச தம் ப்ரபு⁴ம் ॥54॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ பஞ்சத³ஶ꞉ ஸர்க³꞉