அத² ஏகவிம்ஶ꞉ ஸர்க³꞉
தஸ்ய தத்³வசனம் ஶ்ருத்வா
	ஸீதா ரௌத்³ரஸ்ய ரக்ஷஸ꞉।
ஆர்தா தீ³னஸ்வரா தீ³னம்
	ப்ரத்யுவாச தத꞉ ஶனை꞉॥1॥
து³꞉கா²ர்தா ருத³தீ ஸீதா
	வேபமானா தபஸ்வினீ ।
சிந்தயந்தீ வராரோஹா
	பதிமேவ பதிவ்ரதா ॥2॥
த்ருணமந்தரத꞉ க்ருத்வா
	ப்ரத்யுவாச ஶுசிஸ்மிதா ।
நிவர்தய மனோ மத்த꞉
	ஸ்வஜனே க்ரியதாம் மன꞉॥3॥
ந மாம் ப்ரார்த²யிதும் யுக்த꞉
	த்வம் ஸித்³தி⁴மிவ பாபக்ருத் ।
அகார்யம் ந மயா கார்யம்
	ஏகபத்ன்யா விக³ர்ஹிதம் ॥4॥
குலம் ஸம்ப்ராப்தயா புண்யம்
	குலே மஹதி ஜாதயா ।
ஏவமுக்த்வா து வைதே³ஹீ
	ராவணம் தம் யஶஸ்வினீ ॥5॥
ராவணம் ப்ருஷ்ட²த꞉ க்ருத்வா
	பூ⁴யோ வசனமப்³ரவீத் ।
நாஹமௌபயிகீ பா⁴ர்யா
	பரபா⁴ர்யா ஸதீ தவ ॥6॥
ஸாது⁴ த⁴ர்மமவேக்ஷஸ்வ
	ஸாது⁴ ஸாது⁴வ்ரதம் சர ।
யதா² தவ ததா²ன்யேஷாம்
	ரக்ஷ்யா தா³ரா நிஶாசர ॥7॥
ஆத்மானமுபமாம் க்ருத்வா
	ஸ்வேஷு தா³ரேஷு ரம்யதாம் ।
அதுஷ்டம் ஸ்வேஷு தா³ரேஷு
	சபலம் சபலேந்த்³ரியம் ।
நயந்தி நிக்ருதிப்ரஜ்ஞம் பரதா³ரா꞉ பராப⁴வம் ॥8॥
இஹ ஸந்தோ ந வா ஸந்தி
	ஸதோ வா நானுவர்தஸே ।
யதா² ஹி விபரீதா தே
	பு³த்³தி⁴ராசாரவர்ஜிதா ॥9॥
வசோ மித்²யா ப்ரணீதாத்மா
	பத்²யமுக்தம் விசக்ஷணை꞉।
ராக்ஷஸாநாமபா⁴வாய
	த்வம் வா ந ப்ரதிபத்³யஸே ॥10॥
அக்ருதாத்மானமாஸாத்³ய
	ராஜானமனயே ரதம் ।
ஸம்ருத்³தா⁴னி வினஶ்யந்தி
	ராஷ்ட்ராணி நக³ராணி ச ॥11॥
ததை²வ த்வாம் ஸமாஸாத்³ய
	லங்கா ரத்னௌக⁴ ஸங்குலா ।
அபராதா⁴த்தவைகஸ்ய
	நசிராத்³வினஶிஷ்யதி ॥12॥
ஸ்வக்ருதைர்ஹன்யமானஸ்ய
	ராவணாதீ³ர்க⁴த³ர்ஶின꞉।
அபி⁴னந்த³ந்தி பூ⁴தானி
	விநாஶே பாபகர்மண꞉॥13॥
ஏவம் த்வாம் பாபகர்மாணம்
	வக்ஷ்யந்தி நிக்ருதா ஜனா꞉।
தி³ஷ்ட்யைதத்³வ்யஸனம் ப்ராப்தோ
	ரௌத்³ர இத்யேவ ஹர்ஷிதா꞉॥14॥
ஶக்யா லோப⁴யிதும் நாஹம்
	ஐஶ்வர்யேண த⁴னேன வா ।
அனன்யா ராக⁴வேணாஹம்
	பா⁴ஸ்கரேண யதா² ப்ரபா⁴ ॥15॥
உபதா⁴ய பு⁴ஜம் தஸ்ய
	லோகநாத²ஸ்ய ஸத்க்ருதம் ।
கத²ம் நாமோபதா⁴ஸ்யாமி
	பு⁴ஜமன்யஸ்ய கஸ்யசித் ॥16॥
அஹமௌபயிகீ பா⁴ர்யா
	தஸ்யைவ ச த⁴ராபதே꞉।
வ்ரதஸ்னாதஸ்ய வித்³யேவ
	விப்ரஸ்ய விதி³தாத்மன꞉॥17॥
ஸாது⁴ ராவண ராமேண
	மாம் ஸமானய து³꞉கி²தாம் ।
வனே வாஸிதயா ஸார்த⁴ம்
	கரேண்வேவ க³ஜாதி⁴பம் ॥18॥
மித்ரமௌபயிகம் கர்தும்
	ராம꞉ ஸ்தா²னம் பரீப்ஸதா ।
ப³ந்த⁴ம் சானிச்ச²தா கோ⁴ரம்
	த்வயாஸௌ புருஷர்ஷப⁴꞉॥19॥
விதி³த꞉ ஸ ஹி த⁴ர்மஜ்ஞ꞉
	ஶரணாக³தவத்ஸல꞉।
தேன மைத்ரீ ப⁴வது தே
	யதி³ ஜீவிதுமிச்ச²ஸி ॥20॥
ப்ரஸாத³யஸ்வ த்வம் சைனம்
	ஶரணாக³தவத்ஸலம் ।
மாம் சாஸ்மை ப்ரயதோ பூ⁴த்வா
	நிர்யாதயிதுமர்ஹஸி ॥21॥
ஏவம் ஹி தே ப⁴வேத் ஸ்வஸ்தி
	ஸம்ப்ரதா³ய ரகூ⁴த்தமே ।
அன்யதா² த்வம் ஹி குர்வாண꞉
	பராம் ப்ராப்ஸ்யஸி சாபத³ம் ॥22॥
வர்ஜயேத்³வஜ்ரமுத்ஸ்ருஷ்டம்
	வர்ஜயேத³ந்தகஶ்சிரம் ।
த்வத்³வித⁴ம் ந து ஸங்க்ருத்³தோ⁴
	லோகநாத²꞉ ஸ ராக⁴வ꞉॥23॥
ராமஸ்ய த⁴னுஷ꞉ ஶப்³த³ம்
	ஶ்ரோஷ்யஸி த்வம் மஹாஸ்வனம் ।
ஶதக்ரதுவிஸ்ருஷ்டஸ்ய
	நிர்கோ⁴ஷமஶனேரிவ ॥24॥
இஹ ஶீக்⁴ரம் ஸுபர்வாணோ
	ஜ்வலிதாஸ்யா இவோரகா³꞉।
இஷவோ நிபதிஷ்யந்தி
	ராமலக்ஷ்மணலக்ஷிதா꞉॥25॥
ரக்ஷாம்ஸி நிஹநிஷ்யந்த꞉
	புர்யாமஸ்யாம் ந ஸம்ஶய꞉।
அஸம்பாதம் கரிஷ்யந்தி
	பதந்த꞉ கங்கவாஸஸ꞉॥26॥
ராக்ஷஸேந்த்³ரமஹாஸர்பான்
	ஸ ராமக³ருடோ³ மஹான் ।
உத்³த⁴ரிஷ்யதி வேகே³ன
	வைனதேய இவோரகா³ன் ॥27॥
அபனேஷ்யதி மாம் ப⁴ர்தா
	த்வத்த꞉ ஶீக்⁴ரமரிந்த³ம꞉।
அஸுரேப்⁴ய꞉ ஶ்ரியம் தீ³ப்தாம்
	விஷ்ணுஸ்த்ரிபி⁴ரிவ க்ரமை꞉॥28॥
ஜனஸ்தா²னே ஹதஸ்தா²னே
	நிஹதே ரக்ஷஸாம் ப³லே ।
அஶக்தேன த்வயா ரக்ஷ꞉
	க்ருதமேதத³ஸாது⁴ வை ॥29॥
ஆஶ்ரமம் தத்தயோ꞉ ஶூன்யம்
	ப்ரவிஶ்ய நரஸிம்ஹயோ꞉।
கோ³சரம் க³தயோர்ப்⁴ராத்ரோ꞉
	அபனீதா த்வயாத⁴ம ॥30॥
ந ஹி க³ந்த⁴முபாக்⁴ராய
	ராமலக்ஷ்மணயோஸ்த்வயா ।
ஶக்யம் ஸந்த³ர்ஶனே ஸ்தா²தும்
	ஶுனா ஶார்தூ³லயோரிவ ॥31॥
தஸ்ய தே விக்³ரஹே தாப்⁴யாம்
	யுக³க்³ரஹணமஸ்தி²ரம் ।
வ்ருத்ரஸ்யேவேந்த்³ரபா³ஹுப்⁴யாம்
	பா³ஹோரேகஸ்ய விக்³ரஹே ॥32॥
க்ஷிப்ரம் தவ ஸ நாதோ² மே
	ராம꞉ ஸௌமித்ரிணா ஸஹ ।
தோயமல்பமிவாதி³த்ய꞉
	ப்ராணாநாதா³ஸ்யதே ஶரை꞉॥33॥
கி³ரிம் குபே³ரஸ்ய க³தோऽத²வாலயம்
	ஸபா⁴ம் க³தோ வா வருணஸ்ய ராஜ்ஞ꞉।
அஸம்ஶயம் தா³ஶரதே²ர்விமோக்ஷ்யஸே
	மஹாத்³ரும꞉ காலஹதோऽஶனேரிவ ॥34॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஏகவிம்ஶ꞉ ஸர்க³꞉