அத² பஞ்சவிம்ஶ꞉ ஸர்க³꞉
அத² தாஸாம் வத³ந்தீனாம்
	பருஷம் தா³ருணம் ப³ஹு ।
ராக்ஷஸீநாமஸௌம்யானாம்
	ருரோத³ ஜனகாத்மஜா ॥1॥
ஏவமுக்தா து வைதே³ஹீ
	ராக்ஷஸீபி⁴ர்மனஸ்வினீ ।
உவாச பரமத்ரஸ்தா
	பா³ஷ்பக³த்³க³த³யா கி³ரா ॥2॥
ந மானுஷீ ராக்ஷஸஸ்ய
	பா⁴ர்யா ப⁴விதுமர்ஹதி ।
காமம் கா²த³த மாம் ஸர்வா
	ந கரிஷ்யாமி வோ வச꞉॥3॥
ஸா ராக்ஷஸீமத்⁴யக³தா
	ஸீதா ஸுரஸுதோபமா ।
ந ஶர்ம லேபே⁴ ஶோகார்தா
	ராவணேனேவ ப⁴ர்த்ஸிதா ॥4॥
வேபதே ஸ்மாதி⁴கம் ஸீதா
	விஶந்தீவாங்க³மாத்மன꞉।
வனே யூத²பரிப்⁴ரஷ்டா
	ம்ருகீ³ கோகைரிவார்தி³தா ॥5॥
ஸா த்வஶோகஸ்ய விபுலாம்
	ஶாகா²மாலம்ப்³ய புஷ்பிதாம் ।
சிந்தயாமாஸ ஶோகேன
	ப⁴ர்தாரம் ப⁴க்³னமானஸா ॥6॥
ஸா ஸ்னாபயந்தீ விபுலௌ
	ஸ்தனௌ நேத்ரஜலஸ்ரவை꞉।
சிந்தயந்தீ ந ஶோகஸ்ய
	ததா³ந்தமதி⁴க³ச்ச²தி ॥7॥
ஸா வேபமானா பதிதா
	ப்ரவாதே கத³லீ யதா² ।
ராக்ஷஸீனாம் ப⁴யத்ரஸ்தா
	விவர்ணவத³நாப⁴வத் ॥8॥
தஸ்யா꞉ ஸா தீ³ர்க⁴ப³ஹுலா
	வேபந்த்யா꞉ ஸீதயா ததா³ ।
த³த்³ருஶே கம்பிதா வேணீ
	வ்யாலீவ பரிஸர்பதீ ॥9॥
ஸா நி꞉ஶ்வஸந்தீ ஶோகார்தா
	கோபோபஹதசேதனா ।
ஆர்தா வ்யஸ்ருஜத³ஶ்ரூணி
	மைதி²லீ விலலாப ச ॥10॥
ஹா ராமேதி ச து³꞉கா²ர்தா
	ஹா புனர்லக்ஷ்மணேதி ச ।
ஹா ஶ்வஶ்ரூர்மம கௌஸல்யே
	ஹா ஸுமித்ரேதி பா⁴மினீ ॥11॥
லோகப்ரவாத³꞉ ஸத்யோऽயம்
	பண்டி³தை꞉ ஸமுதா³ஹ்ருத꞉।
அகாலே து³ர்லபோ⁴ ம்ருத்யு꞉
	ஸ்த்ரியா வா புருஷஸ்ய வா ॥12॥
யத்ராஹமாபி⁴꞉ க்ரூராபீ⁴
	ராக்ஷஸீபி⁴ரிஹார்தி³தா ।
ஜீவாமி ஹீனா ராமேண
	முஹூர்தமபி து³꞉கி²தா ॥13॥
ஏஷால்பபுண்யா க்ருபணா
	வினஶிஷ்யாம்யநாத²வத் ।
ஸமுத்³ரமத்⁴யே நௌ꞉ பூர்ணா
	வாயுவேகை³ரிவாஹதா ॥14॥
ப⁴ர்தாரம் தமபஶ்யந்தீ
	ராக்ஷஸீவஶமாக³தா ।
ஸீதா³மி க²லு ஶோகேன
	கூலம் தோயஹதம் யதா² ॥15॥
தம் பத்³மத³லபத்ராக்ஷம்
	ஸிம்ஹவிக்ராந்தகா³மினம் ।
த⁴ன்யா꞉ பஶ்யந்தி மே நாத²ம்
	க்ருதஜ்ஞம் ப்ரியவாதி³னம் ॥16॥
ஸர்வதா² தேன ஹீனாயா
	ராமேண விதி³தாத்மனா ।
தீக்ஷ்ணம் விஷமிவாஸ்வாத்³ய
	து³ர்லப⁴ம் மம ஜீவனம் ॥17॥
கீத்³ருஶம் து மஹாபாபம்
	மயா தே³ஹாந்தரே க்ருதம் ।
தேனேத³ம் ப்ராப்யதே கோ⁴ரம்
	மஹாது³꞉க²ம் ஸுதா³ருணம் ॥18॥
ஜீவிதம் த்யக்துமிச்சா²மி
	ஶோகேன மஹதா வ்ருதா ।
ராக்ஷஸீபி⁴ஶ்ச ரக்ஷந்த்யா
	ராமோ நாஸாத்³யதே மயா ॥19॥
தி⁴க³ஸ்து க²லு மானுஷ்யம்
	தி⁴க³ஸ்து பரவஶ்யதாம் ।
ந ஶக்யம் யத்பரித்யக்தும்
	ஆத்மச்ச²ந்தே³ன ஜீவிதம் ॥20॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ பஞ்சவிம்ஶ꞉ ஸர்க³꞉