அத² ஸப்தவிம்ஶ꞉ ஸர்க³꞉
இத்யுக்தா꞉ ஸீதயா கோ⁴ரம்
	ராக்ஷஸ்ய꞉ க்ரோத⁴மூர்சி²தா꞉।
காஶ்சிஜ்ஜக்³முஸ்ததா³க்²யாதும்
	ராவணஸ்ய து³ராத்மன꞉॥1॥
தத꞉ ஸீதாமுபாக³ம்ய
	ராக்ஷஸ்யோ பீ⁴மத³ர்ஶனா꞉।
புன꞉ பருஷமேகார்த²ம்
	அனர்தா²ர்த²மதா²ப்³ருவன் ॥2॥
அத்³யேதா³னீம் தவானார்யே
	ஸீதே பாபவிநிஶ்சயே ।
ராக்ஷஸ்யோ ப⁴க்ஷயிஷ்யந்தி
	மாம்ஸமேதத்³யதா²ஸுக²ம் ॥3॥
ஸீதாம் தாபி⁴ரனார்யாபி⁴꞉
	த்³ருஷ்ட்வா ஸந்தர்ஜிதாம் ததா³ ।
ராக்ஷஸீ த்ரிஜடாவ்ருத்³தா⁴
	ப்ரபு³த்³தா⁴ வாக்யமப்³ரவீத் ॥4॥
ஆத்மானம் கா²த³தானார்யா
	ந ஸீதாம் ப⁴க்ஷயிஷ்யத² ।
ஜனகஸ்ய ஸுதாமிஷ்டாம்
	ஸ்னுஷாம் த³ஶரத²ஸ்ய ச ॥5॥
ஸ்வப்னோ ஹ்யத்³ய மயா த்³ருஷ்டோ
	தா³ருணோ ரோமஹர்ஷண꞉।
ராக்ஷஸாநாமபா⁴வாய
	ப⁴ர்துரஸ்யா ப⁴வாய ச ॥6॥
ஏவமுக்தாஸ்த்ரிஜடயா
	ராக்ஷஸ்ய꞉ க்ரோத⁴மூர்சி²தா꞉।
ஸர்வா ஏவாப்³ருவன்பீ⁴தா꞉
	த்ரிஜடாம் தாமித³ம் வச꞉॥7॥
கத²யஸ்வ த்வயா த்³ருஷ்ட꞉
	ஸ்வப்னோऽயம் கீத்³ருஶோ நிஶி ।
தாஸாம் ஶ்ருத்வா து வசனம்
	ராக்ஷஸீனாம் முகோ²த்³க³தம் ॥8॥
உவாச வசனம் காலே
	த்ரிஜடா ஸ்வப்னஸம்ஶ்ரிதம் ।
க³ஜத³ந்தமயீம் தி³வ்யாம்
	ஶிபி³காமந்தரிக்ஷகா³ம் ॥9॥
யுக்தாம் வாஜிஸஹஸ்ரேண
	ஸ்வயமாஸ்தா²ய ராக⁴வ꞉।
ஶுக்லமால்யாம்ப³ரத⁴ரோ
	லக்ஷ்மணேன ஸமாக³த꞉॥10॥
ஸ்வப்னே சாத்³ய மயா த்³ருஷ்டா
	ஸீதா ஶுக்லாம்ப³ராவ்ருதா ।
ஸாக³ரேண பரிக்ஷிப்தம்
	ஶ்வேதபர்வதமாஸ்தி²தா ॥11॥
ராமேண ஸங்க³தா ஸீதா
	பா⁴ஸ்கரேண ப்ரபா⁴ யதா² ।
ராக⁴வஶ்ச புனர்த்³ருஷ்ட꞉
	சதுர்த³ந்தம் மஹாக³ஜம் ॥12॥
ஆரூட⁴꞉ ஶைலஸங்காஶம்
	சகாஸ ஸஹலக்ஷ்மண꞉।
ததஸ்து ஸுர்யஸங்காஶௌ
	தீ³ப்யமானௌ ஸ்வதேஜஸா ॥13॥
ஶுக்லமால்யாம்ப³ரத⁴ரௌ
	ஜானகீம் பர்யுபஸ்தி²தௌ ।
ததஸ்தஸ்ய நக³ஸ்யாக்³ரே
	ஹ்யாகாஶஸ்த²ஸ்ய த³ந்தின꞉॥14॥
ப⁴ர்த்ரா பரிக்³ருஹீதஸ்ய
	ஜானகீ ஸ்கந்த⁴மாஶ்ரிதா ।
ப⁴ர்துரங்காத்ஸமுத்பத்ய
	தத꞉ கமலலோசனா ॥15॥
சந்த்³ரஸூர்யௌ மயா த்³ருஷ்டா
	பாணிப்⁴யாம் பரிமார்ஜதீ ।
ததஸ்தாப்⁴யாம் குமாராப்⁴யாம்
	ஆஸ்தி²த꞉ ஸ க³ஜோத்தம꞉।
ஸீதயா ச விஶாலாக்ஷ்யா
	லங்காயா உபரி ஸ்தி²த꞉॥16॥
பாண்டு³ரர்ஷப⁴யுக்தேன
	ரதே²னாஷ்டயுஜா ஸ்வயம் ।
இஹோபயாத꞉ காகுத்ஸ்த²꞉
	ஸீதயா ஸஹ பா⁴ர்யயா ॥17॥
ஶுக்லமால்யாம்ப³ரத⁴ரோ
	லக்ஷ்மணேன ஸஹாக³த꞉।
ததோऽன்யத்ர மயா த்³ருஷ்டோ
	ராம꞉ ஸத்யபராக்ரம꞉॥18॥
லக்ஷ்மணேன ஸஹ ப்⁴ராத்ரா
	ஸீதயா ஸஹ வீர்யவான் ।
ஆருஹ்ய புஷ்பகம் தி³வ்யம்
	விமானம் ஸூர்யஸம்நிப⁴ம் ॥19॥
உத்தராம் தி³ஶமாலோச்ய
	ப்ரஸ்தி²த꞉ புருஷோத்தம꞉।
ஏவம் ஸ்வப்னே மயா த்³ருஷ்டோ
	ராமோ விஷ்ணுபராக்ரம꞉॥20॥
லக்ஷ்மணேன ஸஹ ப்⁴ராத்ரா
	ஸீதயா ஸஹ பா⁴ர்யயா ।
ந ஹி ராமோ மஹாதேஜா꞉
	ஶக்யோ ஜேதும் ஸுராஸுரை꞉॥21॥
ராக்ஷஸைர்வாபி சான்யைர்வா
	ஸ்வர்க³꞉ பாபஜனைரிவ ।
ராவணஶ்ச மயா த்³ருஷ்டோ
	முண்ட³ஸ்தைலஸமுக்ஷித꞉॥22॥
ரக்தவாஸா꞉ பிப³ன்மத்த꞉
	கரவீரக்ருதஸ்ரஜ꞉।
விமானாத் புஷ்பகாத³த்³ய
	ராவண꞉ பதித꞉ க்ஷிதௌ ॥23॥
க்ருஷ்யமாண꞉ ஸ்த்ரியா முண்டோ³
	த்³ருஷ்ட꞉ க்ருஷ்ணாம்ப³ர꞉ புன꞉।
ரதே²ன க²ரயுக்தேன
	ரக்தமால்யானுலேபன꞉॥14॥
பிப³ம்ஸ்தைலம் ஹஸந்ந்ருத்யன்
	ப்⁴ராந்தசித்தாகுலேந்த்³ரிய꞉।
க³ர்த³பே⁴ன யயௌ ஶீக்⁴ரம்
	த³க்ஷிணாம் தி³ஶமாஸ்தி²த꞉॥25॥
புனரேவ மயா த்³ருஷ்டோ
	ராவணோ ராக்ஷஸேஶ்வர꞉।
பதிதோऽவாக்ஶிரா பூ⁴மௌ
	க³ர்த³பா⁴த்³ப⁴யமோஹித꞉॥26॥
ஸஹஸோத்தா²ய ஸம்ப்⁴ராந்தோ
	ப⁴யார்தோ மத³விஹ்வல꞉।
உன்மத்தரூபோ தி³க்³வாஸா
	து³ர்வாக்யம் ப்ரலபன்ப³ஹு ॥27॥
து³ர்க³ந்த⁴ம் து³꞉ஸஹம் கோ⁴ரம்
	திமிரம் நரகோபமம் ।
மலபங்கம் ப்ரவிஶ்யாஶு
	மக்³னஸ்தத்ர ஸ ராவண꞉॥28॥
ப்ரஸ்தி²தோ த³க்ஷிணாமாஶாம்
	ப்ரவிஷ்டோऽகர்த³மம் ஹ்ரத³ம் ।
கண்டே² ப³த்³த்⁴வா த³ஶக்³ரீவம்
	ப்ரமதா³ ரக்தவாஸினீ ॥29॥
காலீ கர்த³மலிப்தாங்கீ³
	தி³ஶம் யாம்யாம் ப்ரகர்ஷதி ।
ஏவம் தத்ர மயா த்³ருஷ்ட꞉
	கும்ப⁴கர்ணோ மஹாப³ல꞉॥30॥
ராவணஸ்ய ஸுதா꞉ ஸர்வே
	முண்டா³ஸ்தைலஸமுக்ஷிதா꞉।
வராஹேண த³ஶக்³ரீவ꞉
	ஶிஶுமாரேண சேந்த்³ரஜித் ॥31॥
உஷ்ட்ரேண கும்ப⁴கர்ணஶ்ச
	ப்ரயாதோ த³க்ஷிணாம் தி³ஶம் ।
ஏகஸ்தத்ர மயா த்³ருஷ்ட꞉
	ஶ்வேதச்ச²த்ரோ விபீ⁴ஷண꞉॥32॥
ஶுக்லமால்யாம்ப³ரத⁴ர꞉
	ஶுக்லக³ந்தா⁴னுலேபன꞉।
ஶங்க²து³ந்து³பி⁴நிர்கோ⁴ஷை꞉
	ந்ருத்தகீ³தைரலங்க்ருத꞉॥33॥
ஆருஹ்ய ஶைலஸங்காஶம்
	மேக⁴ஸ்தனிதநி꞉ஸ்வனம் ।
சதுர்த³ந்தம் க³ஜம் தி³வ்யம்
	ஆஸ்தே தத்ர விபீ⁴ஷண꞉॥34॥
சதுர்பி⁴ஸ்ஸசிவை꞉ ஸார்த⁴ம்
	வைஹாயஸமுபஸ்தி²த꞉॥35॥
ஸமாஜஶ்ச மஹான்வ்ருத்தோ
	கீ³தவாதி³த்ரநி꞉ஸ்வன꞉।
பிப³தாம் ரக்தமால்யானாம்
	ரக்ஷஸாம் ரக்தவாஸஸாம் ॥36॥
லங்கா சேயம் புரீ ரம்யா
	ஸவாஜிரத²குஞ்ஜரா ।
ஸாக³ரே பதிதா த்³ருஷ்டா
	ப⁴க்³னகோ³புரதோரணா ॥37॥
லங்கா த்³ருஷ்டா மயா ஸ்வப்னே
	ராவணேநாபி⁴ரக்ஷிதா ।
த³க்³தா⁴ ராமஸ்ய தூ³தேன
	வானரேண தரஸ்வினா ॥38॥
பீத்வா தைலம் ப்ரமத்தாஶ்ச
	ப்ரஹஸந்த்யோ மஹாஸ்வனா꞉।
லங்காயாம் ப⁴ஸ்மரூக்ஷாயாம்
	ஸர்வா ராக்ஷஸயோஷித꞉॥39॥
கும்ப⁴கர்ணாத³யஶ்சேமே
	ஸர்வே ராக்ஷஸபுங்க³வா꞉।
ரக்தம் நிவஸனம் க்³ருஹ்ய
	ப்ரவிஷ்டா கோ³மயஹ்ரத³ம் ॥40॥
அபக³ச்ச²த பஶ்யத்⁴வம்
	ஸீதாமாப்னோதி ராக⁴வ꞉।
கா⁴தயேத்பரமாமர்ஷீ
	யுஷ்மான் ஸார்த⁴ம் ஹி ராக்ஷஸை꞉॥41॥
ப்ரியாம் ப³ஹுமதாம் பா⁴ர்யாம்
	வனவாஸமனுவ்ரதாம் ।
ப⁴ர்த்ஸிதாம் தர்ஜிதாம் வாபி
	நானுமம்ஸ்யதி ராக⁴வ꞉॥42॥
தத³லம் க்ரூரவாக்யைஶ்ச
	ஸாந்த்வமேவாபி⁴தீ⁴யதாம் ।
அபி⁴யாசாம வைதே³ஹீம்
	ஏதத்³தி⁴ மம ரோசதே ॥43॥
யஸ்யா ஹ்யேவம் வித⁴꞉ ஸ்வப்னோ
	து³꞉கி²தாயா꞉ ப்ரத்³ருஶ்யதே ।
ஸா து³꞉கை²ர்ப³ஹுபி⁴ர்முக்தா
	ப்ரியம் ப்ராப்னோத்யனுத்தமம் ॥44॥
ப⁴ர்த்ஸிதாமபி யாசத்⁴வம்
	ராக்ஷஸ்ய꞉ கிம் விவக்ஷயா ।
ராக⁴வாத்³தி⁴ ப⁴யம் கோ⁴ரம்
	ராக்ஷஸாநாமுபஸ்தி²தம் ॥45॥
ப்ரணிபாதப்ரஸன்னா ஹி
	மைதி²லீ ஜனகாத்மஜா ।
அலமேஷா பரித்ராதும்
	ராக்ஷஸிர்மஹதோ ப⁴யாத் ॥46॥
அபி சாஸ்யா விஶாலாக்ஷ்யா
	ந கிஞ்சிது³பலக்ஷயே ।
விரூபமபி சாங்கே³ஷு
	ஸுஸூக்ஷ்மமபி லக்ஷணம் ॥47॥
சா²யாவைகு³ண்யமாத்ரம் து
	ஶங்கே து³꞉க²முபஸ்தி²தம் ।
அது³꞉கா²ர்ஹாமிமாம் தே³வீம்
	வைஹாயஸமுபஸ்தி²தாம் ॥48॥
அர்த²ஸித்³தி⁴ம் து வைதே³ஹ்யா꞉
	பஶ்யாம்யஹமுபஸ்தி²தாம் ।
ராக்ஷஸேந்த்³ரவிநாஶம் ச
	விஜயம் ராக⁴வஸ்ய ச ॥49॥
நிமித்தபூ⁴தமேதத் து
	ஶ்ரோதுமஸ்யா மஹத் ப்ரியம் ।
த்³ருஶ்யதே ச ஸ்பு²ரச்சக்ஷு꞉
	பத்³மபத்ரமிவாயதம் ॥50॥
ஈஷத்³தி⁴ ஹ்ருஷிதோ வாஸ்யா
	த³க்ஷிணாயா ஹ்யத³க்ஷிண꞉।
அகஸ்மாதே³வ வைதே³ஹ்யா
	பா³ஹுரேக꞉ ப்ரகம்பதே ॥51॥
கரேணுஹஸ்தப்ரதிம꞉
	ஸவ்யஶ்சோருரனுத்தம꞉।
வேபன் கத²யதீவாஸ்யா
	ராக⁴வம் புரத꞉ ஸ்தி²தம் ॥52॥
பக்ஷீ ச ஶாகா²நிலய ப்ரவிஷ்ட꞉
	புன꞉ புனஶ்சோத்தமஸாந்த்வவாதீ³ ।
ஸுஸ்வாக³தாம் வாசமுதீ³ரயாண꞉
	புன꞉ புனஶ்சோத³யதீவ ஹ்ருஷ்ட꞉॥53॥
தத꞉ ஸா ஹ்ரீமதீ பா³லா
	ப⁴ர்துர்விஜயஹர்ஷிதா ।
அவோசத்³ யதி³ தத் தத்²யம்
	ப⁴வேயம் ஶரணம் ஹி வ꞉॥54॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஸப்தவிம்ஶ꞉ ஸர்க³꞉