அத² ஏகோனத்ரிம்ஶ꞉ ஸர்க³꞉
ததா²க³தாம் தாம் வ்யதி²தாமனிந்தி³தாம்
	வ்யபேதஹர்ஷாம் பரிதீ³னமானஸாம் ।
ஶுபா⁴ம் நிமித்தானி ஶுபா⁴னி பே⁴ஜிரே
	நரம் ஶ்ரியா ஜுஷ்டமிவோபஜீவின꞉॥1॥
தஸ்யா꞉ ஶுப⁴ம் வாமமராலபக்ஷ்ம
	ராஜீவ்ருதம் க்ருஷ்ணவிஶாலஶுக்லம் ।
ப்ராஸ்பந்த³தைகம் நயனம் ஸுகேஶ்யா
	மீனாஹதம் பத்³மமிவாபி⁴தாம்ரம் ॥2॥
பு⁴ஜஶ்ச சார்வஞ்சிதபீனவ்ருத்த꞉
	பரார்த்⁴யகாலாகு³ருசந்த³னார்ஹ꞉।
அனுத்தமேனாத்⁴யுஷித꞉ ப்ரியேண
	சிரேண வாம꞉ ஸமவேபதாஶு ॥3॥
க³ஜேந்த்³ரஹஸ்தப்ரதிமஶ்ச பீன-
	ஸ்தயோர்த்³வயோ꞉ ஸம்ஹதயோஸ்து ஜாத꞉।
ப்ரஸ்பந்த³மான꞉ புனரூருரஸ்யா
	ராமம் புரஸ்தாத்ஸ்தி²தமாசசக்ஷே ॥4॥
ஶுப⁴ம் புனர்ஹேமஸமானவர்ண-
	மீஷத்³ரஜோத்⁴வஸ்தமிவாமலாக்ஷ்யா꞉ ।
வாஸ꞉ ஸ்தி²தாயா꞉ஶிக²ராக்³ரத³ந்த்யா꞉
	கிஞ்சித்பரிஸ்ரம்ஸத சாருகா³த்ர்யா꞉॥5॥
ஏதைர்நிமித்தைரபரைஶ்ச ஸுப்⁴ரூ꞉
	ஸஞ்சோதி³தா ப்ராக³பி ஸாது⁴ஸித்³தை⁴꞉।
வாதாதபக்லாந்தமிவ ப்ரணஷ்டம்
	வர்ஷேண பீ³ஜம் ப்ரதிஸஞ்ஜஹர்ஷ ॥6॥
தஸ்யா꞉ புனர்பி³ம்ப³ப²லாத⁴ரோஷ்ட²ம்
	ஸ்வக்ஷிப்⁴ருகேஶாந்தமராலபக்ஷ்ம ।
வக்த்ரம் ப³பா⁴ஸே ஸ்மிதஶுக்லத³ம்ஷ்ட்ரம்
	ராஹோர்முகா²ச்சந்த்³ர இவ ப்ரமுக்த꞉॥7॥
ஸா வீதஶோகா வ்யபனீததந்த்³ரீ
	ஶாந்தஜ்வரா ஹர்ஷவிவ்ருத்³த⁴ஸத்த்வா ।
அஶோப⁴தார்யா வத³னேன ஶுக்லே
	ஶீதாம்ஶுனா ராத்ரிரிவோதி³தேன ॥8॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஏகோனத்ரிம்ஶ꞉ ஸர்க³꞉