அத² சத்வாரிம்ஶ꞉ ஸர்க³꞉
ஶ்ருத்வா து வசனம் தஸ்ய
	வாயுஸூனோர்மஹாத்மன꞉।
உவாசாத்மஹிதம் வாக்யம்
	ஸீதா ஸுரஸுதோபமா ॥1॥
த்வாம் த்³ருஷ்ட்வா ப்ரியவக்தாரம்
	ஸம்ப்ரஹ்ருஷ்யாமி வானர ।
அர்த⁴ஸஞ்ஜாதஸஸ்யேவ
	வ்ருஷ்டிம் ப்ராப்ய வஸுந்த⁴ரா ॥2॥
யதா² தம் புருஷவ்யாக்⁴ரம்
	கா³த்ரை꞉ ஶோகாபி⁴கர்ஶிதை꞉।
ஸம்ஸ்ப்ருஶேயம் ஸகாமாஹம்
	ததா² குரு த³யாம் மயி ॥3॥
அபி⁴ஜ்ஞானம் ச ராமஸ்ய
	த³த்³யா ஹரிக³ணோத்தம ।
க்ஷிப்தாமிஷிகாம் காகஸ்ய
	கோபாதே³காக்ஷிஶாதனீம் ॥4॥
மன꞉ஶிலாயாஸ்திலகோ
	க³ண்ட³பார்ஶ்வே நிவேஶித꞉।
த்வயா ப்ரணஷ்டே திலகே
	தம் கில ஸ்மர்துமர்ஹஸி ॥5॥
ஸ வீர்யவான் கத²ம் ஸீதாம்
	ஹ்ருதாம் ஸமனுமன்யஸே ।
வஸந்தீம் ரக்ஷஸாம் மத்⁴யே
	மஹேந்த்³ரவருணோபம ॥6॥
ஏஷ சூடா³மணிர்தி³வ்யோ
	மயா ஸுபரிரக்ஷித꞉।
ஏதம் த்³ருஷ்ட்வா ப்ரஹ்ருஷ்யாமி
	வ்யஸனே த்வாமிவானக⁴ ॥7॥
ஏஷ நிர்யாதித꞉ ஸ்ரீமான்
	மயா தே வாரிஸம்ப⁴வ꞉।
அத꞉ பரம் ந ஶக்ஷ்யாமி
	ஜீவிதும் ஶோகலாலஸா ॥8॥
அஸஹ்யானி ச து³꞉கா²னி
	வாசஶ்ச ஹ்ருத³யச்சி²த³꞉।
ராக்ஷஸை꞉ ஸஹ ஸம்வாஸம்
	த்வத்க்ருதே மர்ஷயாம்யஹம் ॥9॥
தா⁴ரயிஷ்யாமி மாஸம் து
	ஜீவிதம் ஶத்ருஸூத³ன ।
மாஸாதூ³ர்த்⁴வம் ந ஜீவிஷ்யே
	த்வயா ஹீனா ந்ருபாத்மஜ ॥10॥
கோ⁴ரோ ராக்ஷஸராஜோऽயம்
	த்³ருஷ்டிஶ்ச ந ஸுகா² மயி ।
த்வாம் ச ஶ்ருத்வா விஷஜ்ஜந்தம்
	ந ஜீவேயமபி க்ஷணம் ॥11॥
வைதே³ஹ்யா வசனம் ஶ்ருத்வா
	கருணம் ஸாஶ்ருபா⁴ஷிதம் ।
அதா²ப்³ரவீன்மஹாதேஜா
	ஹனுமான்மாருதாத்மஜ꞉॥12॥
த்வச்சோ²கவிமுகோ² ராமோ
	தே³வி ஸத்யேன தே ஶபே ।
ராமே ஶோகாபி⁴பூ⁴தே து
	லக்ஷ்மண꞉ பரிதப்யதே ॥13॥
த்³ருஷ்டா கத²ஞ்சித்³ப⁴வதீ
	ந கால꞉ பரிதே³விதும் ।
இமம் முஹூர்தம் து³꞉கா²னாம்
	அந்தம் த்³ரக்ஷ்யஸி பா⁴மினி ॥14॥
தாவுபௌ⁴ புருஷவ்யாக்⁴ரௌ
	ராஜபுத்ராவனிந்தி³தௌ ।
த்வத்³த³ர்ஶனக்ருதோத்ஸாஹௌ
	லங்காம் ப⁴ஸ்மீகரிஷ்யத꞉॥15॥
ஹத்வா து ஸமரே ரக்ஷோ
	ராவணம் ஸஹபா³ந்த⁴வை꞉।
ராக⁴வௌ த்வாம் விஶாலாக்ஷி
	ஸ்வாம் புரீம் ப்ரதி நேஷ்யத꞉॥16॥
யத்து ராமோ விஜானீயாத்
	அபி⁴ஜ்ஞானமனிந்தி³தே ।
ப்ரீதிஸஞ்ஜனனம் பூ⁴ய꞉
	தஸ்ய த்வம் தா³துமர்ஹஸி ॥17॥
ஸாப்³ரவீத்³த³த்தமேவாஹோ
	மயாபி⁴ஜ்ஞானமுத்தமம் ।
ஏததே³வ ஹி ராமஸ்ய
	த்³ருஷ்ட்வா யத்னேன பூ⁴ஷணம் ॥18॥
ஶ்ரத்³தே⁴யம் ஹனுமன்வாக்யம்
	தவ வீர ப⁴விஷ்யதி ।
ஸ தம் மணிவரம் க்³ருஹ்ய
	ஸ்ரீமான்ப்லவக³ஸத்தம꞉॥19॥
ப்ரணம்ய ஶிரஸா தே³வீம்
	க³மனாயோபசக்ரமே ।
தமுத்பாதக்ருதோத்ஸாஹம்
	அவேக்ஷ்ய ஹரியூத²பம் ॥20॥
வர்த⁴மானம் மஹாவேக³ம்
	உவாச ஜனகாத்மஜா ।
அஶ்ருபூர்ணமுகீ² தீ³னா
	பா³ஷ்பக³த்³க³த³யா கி³ரா ॥21॥
ஹனூமன்ஸிம்ஹஸங்காஶௌ
	ப்⁴ராதரௌ ராமலக்ஷ்மணௌ ।
ஸுக்³ரீவம் ச ஸஹாமாத்யம்
	ஸர்வான்ப்³ரூயா அநாமயம் ॥22॥
யதா² ச ஸ மஹாபா³ஹு꞉
	மாம் தாரயதி ராக⁴வ꞉।
அஸ்மாத்³து³꞉கா²ம்பு³ஸம்ரோதா⁴த்
	த்வம் ஸமாதா⁴துமர்ஹஸி ॥23॥
இத³ம் ச தீவ்ரம் மம ஶோகவேக³ம்
	ரக்ஷோபி⁴ரேபி⁴꞉ பரிப⁴ர்த்ஸனம் ச ।
ப்³ரூயாஸ்து ராமஸ்ய க³த꞉ ஸமீபம்
	ஶிவஶ்ச தேऽத்⁴வாऽஸ்து ஹரிப்ரவீர ॥24॥
ஸ ராஜபுத்ர்யா ப்ரதிவேதி³தார்த²꞉
	கபி꞉ க்ருதார்த²꞉ பரிஹ்ருஷ்டசேதா꞉।
தத³ல்பஶேஷம் ப்ரஸமீக்ஷ்ய கார்யம்
	தி³ஶம் ஹ்யுதீ³சீம் மனஸா ஜகா³ம ॥25॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ சத்வாரிம்ஶ꞉ ஸர்க³꞉