அத² ஏகசத்வாரிம்ஶ꞉ ஸர்க³꞉
ஸ ச வாக்³பி⁴꞉ ப்ரஶஸ்தாபி⁴꞉
	க³மிஷ்யன் பூஜிதஸ்தயா ।
தஸ்மாத்³தே³ஶாத³பாக்ரம்ய
	சிந்தயாமாஸ வானர꞉॥1॥
அல்பஶேஷமித³ம் கார்யம்
	த்³ருஷ்டேயமஸிதேக்ஷணா ।
த்ரீனுபாயானதிக்ரம்ய
	சதுர்த² இஹ த்³ருஶ்யதே ॥2॥
ந ஸாம ரக்ஷ꞉ஸு கு³ணாய கல்பதே
	ந தா³னமர்தோ²பசிதேஷு யுஜ்யதே ।
ந பே⁴த³ஸாத்⁴யா ப³லத³ர்பிதா ஜனா꞉
	பராக்ரமஸ்த்வேஷ மமேஹ ரோசதே ॥3॥
ந சாஸ்ய கார்யஸ்ய பராக்ரமாத்³ருதே
	விநிஶ்சய꞉ கஶ்சிதி³ஹோபபத்³யதே ।
ஹதப்ரவீராஶ்ச ரணே து ராக்ஷஸா꞉
	கத²ஞ்சிதீ³யுர்யதி³ஹாத்³ய மார்த³வம் ॥4॥
கார்யே கர்மணி நிர்வ்ருத்தே
	யோ ப³ஹூன்யபி ஸாத⁴யேத் ।
பூர்வகார்யாவிரோதே⁴ன
	ஸ கார்யம் கர்துமர்ஹதி ॥5॥
ந ஹ்யேக꞉ ஸாத⁴கோ ஹேது꞉
	ஸ்வல்பஸ்யாபீஹ கர்மண꞉।
யோ ஹ்யர்த²ம் ப³ஹுதா⁴ வேத³
	ஸ ஸமர்தோ²ऽர்த²ஸாத⁴னே ॥6॥
இஹைவ தாவத்க்ருதநிஶ்சயோ ஹ்யஹம்
	வ்ரஜேயமத்³ய ப்லவகே³ஶ்வராலயம் ।
பராத்மஸம்மர்த³ விஶேஷதத்த்வவித்
	தத꞉க்ருதம் ஸ்யான்மம ப⁴ர்த்ருஶாஸனம் ॥7॥
கத²ம் நு க²ல்வத்³ய ப⁴வேத்ஸுகா²க³தம்
	ப்ரஸஹ்ய யுத்³த⁴ம் மம ராக்ஷஸை꞉ ஸஹ ।
ததை²வ க²ல்வாத்மப³லம் ச ஸாரவத்
	ஸமானயேன்மாம் ச ரணே த³ஶானன꞉॥8॥
தத꞉ ஸமாஸாத்³ய ரணே த³ஶானனம்
	ஸமந்த்ரிவர்க³ம் ஸப³லம் ஸயாயினம் ।
ஹ்ருதி³ ஸ்தி²தம் தஸ்ய மதம் ப³லம் ச
	ஸுகே²ன மத்வாஹமித꞉ புனர்வ்ரஜே ॥9॥
இத³மஸ்ய ந்ருஶம்ஸஸ்ய
	நந்த³னோபமமுத்தமம் ।
வனம் நேத்ரமன꞉காந்தம்
	நாநாத்³ருமலதாயுதம் ॥10॥
இத³ம் வித்⁴வம்ஸயிஷ்யாமி
	ஶுஷ்கம் வனமிவானல꞉।
அஸ்மின்ப⁴க்³னே தத꞉ கோபம்
	கரிஷ்யதி ஸ ராவண꞉॥11॥
ததோ மஹத்ஸாஶ்வமஹாரத²த்³விபம்
	ப³லம் ஸமானேஷ்யதி ராக்ஷஸாதி⁴ப꞉।
த்ரிஶூலகாலாயஸபட்டிஶாயுத⁴ம்
	ததோ மஹத்³யுத்³த⁴மித³ம் ப⁴விஷ்யதி ॥12॥
அஹம் ச தை꞉ ஸம்யதி சண்ட³விக்ரமை꞉
	ஸமேத்ய ரக்ஷோபி⁴ரப⁴ங்க³விக்ரம꞉।
நிஹத்ய தத்³ராவணசோதி³தம் ப³லம்
	ஸுக²ம் க³மிஷ்யாமி ஹரீஶ்வராலயம் ॥13॥
ததோ மாருதவத்க்ருத்³தோ⁴
	மாருதிர்பீ⁴மவிக்ரம꞉।
ஊருவேகே³ன மஹதா
	த்³ருமான்க்ஷேப்துமதா²ரப⁴த் ॥14॥
ததஸ்தத்³த⁴னுமான்வீரோ
	ப³ப⁴ஞ்ஜ ப்ரமதா³வனம் ।
மத்தத்³விஜஸமாகு⁴ஷ்டம்
	நாநாத்³ருமலதாயுதம் ॥15॥
தத்³வனம் மதி²தைர்வ்ருக்ஷை꞉
	பி⁴ன்னைஶ்ச ஸலிலாஶயை꞉।
சூர்ணிதை꞉ பர்வதாக்³ரைஶ்ச
	ப³பூ⁴வாப்ரியத³ர்ஶனம் ॥16॥
நாநாஶகுந்தவிருதை꞉
	ப்ரபி⁴ன்னஸலிலாஶயை꞉।
தாம்ரை꞉ கிஸலயை꞉ க்லாந்தை꞉
	க்லாந்தத்³ருமலதாயுதை꞉॥17॥
ந ப³பௌ⁴ தத்³வனம் தத்ர
	தா³வானலஹதம் யதா² ।
வ்யாகுலாவரணா ரேஜு꞉
	விஹ்வலா இவ தா லதா꞉॥18॥
லதாக்³ருஹைஶ்சித்ரக்³ருஹைஶ்ச ஸாதி³தை-
	ர்வ்யாலைர்ம்ருகை³ரார்தரவைஶ்ச பக்ஷிபி⁴꞉।
ஶிலாக்³ருஹைருன்மதி²தைஸ்ததா² க்³ருஹை꞉
	ப்ரணஷ்டரூபம் தத³பூ⁴ன்மஹத்³வனம் ॥19॥
ஸா விஹ்வலாஶோகலதாப்ரதானா
	வனஸ்த²லீ ஶோகலதாப்ரதானா ।
ஜாதா த³ஶாஸ்யப்ரமதா³வனஸ்ய
	கபேர்ப³லாத்³தி⁴ ப்ரமதா³வனஸ்ய ॥20॥
தத꞉ ஸ க்ருத்வா ஜக³தீபதேர்மஹான்
	மஹத்³வ்யலீகம் மனஸோ மஹாத்மன꞉।
யுயுத்ஸுரேகோ ப³ஹுபி⁴ர்மஹாப³லை꞉
	ஶ்ரியாஜ்வலம்ஸ்தோரணமாஶ்ரித꞉ கபி꞉॥21॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஏகசத்வாரிம்ஶ꞉ ஸர்க³꞉