அத² சதுஶ்சத்வாரிம்ஶ꞉ ஸர்க³꞉
ஸந்தி³ஷ்டோ ராக்ஷஸேந்த்³ரேண
	ப்ரஹஸ்தஸ்ய ஸுதோ ப³லீ ।
ஜம்பு³மாலீ மஹாத³ம்ஷ்ட்ரோ
	நிர்ஜகா³ம த⁴னுர்த⁴ர꞉॥1॥
ரக்தமால்யாம்ப³ரத⁴ர꞉
	ஸ்ரக்³வீ ருசிரகுண்ட³ல꞉।
மஹான்விவ்ருத்தநயன꞉
	சண்ட³꞉ ஸமரது³ர்ஜய꞉॥2॥
த⁴னு꞉ ஶக்ரத⁴னு꞉ ப்ரக்²யம்
	மஹத்³ ருசிரஸாயகம் ।
விஸ்பா²ரயாணோ வேகே³ன
	வஜ்ராஶநிஸமஸ்வனம் ॥3॥
தஸ்ய விஸ்பா²ரகோ⁴ஷேண
	த⁴னுஷோ மஹதா தி³ஶ꞉।
ப்ரதி³ஶஶ்ச நப⁴ஶ்சைவ
	ஸஹஸா ஸமபூர்யத ॥4॥
ரதே²ன க²ரயுக்தேன
	தமாக³தமுதீ³க்ஷ்ய ஸ꞉।
ஹனூமான்வேக³ஸம்பன்னோ
	ஜஹர்ஷ ச நநாத³ ச ॥5॥
தம் தோரணவிடங்கஸ்த²ம்
	ஹனூமந்தம் மஹாகபிம் ।
ஜம்பு³மாலீ மஹாதேஜா
	விவ்யாத⁴ நிஶிதை꞉ ஶரை꞉॥6॥
அர்த⁴சந்த்³ரேண வத³னே
	ஶிரஸ்யேகேன கர்ணினா ।
பா³ஹ்வோர்விவ்யாத⁴ நாராசை꞉
	த³ஶபி⁴ஸ்து கபீஶ்வரம் ॥7॥
தஸ்ய தச்சு²ஶுபே⁴ தாம்ரம்
	ஶரேணாபி⁴ஹதம் முக²ம் ।
ஶரதீ³வாம்பு³ஜம் பு²ல்லம்
	வித்³த⁴ம் பா⁴ஸ்கரரஶ்மினா ॥8॥
தத்தஸ்ய ரக்தம் ரக்தேன
	ரஞ்ஜிதம் ஶுஶுபே⁴ முக²ம் ।
யதா²ऽऽகாஶே மஹாபத்³மம்
	ஸிக்தம் காஞ்சனபி³ந்து³பி⁴꞉॥9॥
சுகோப பா³ணாபி⁴ஹதோ
	ராக்ஷஸஸ்ய மஹாகபி꞉।
தத꞉ பார்ஶ்வேऽதிவிபுலாம்
	த³த³ர்ஶ மஹதீம் ஶிலாம் ॥10॥
தரஸா தாம் ஸமுத்பாட்ய
	சிக்ஷேப ஜவவத்³ ப³லீ ।
தாம் ஶரைர்த³ஶபி⁴꞉ க்ருத்³த⁴꞉
	தாட³யாமாஸ ராக்ஷஸ꞉॥11॥
விபன்னம் கர்ம தத்³த்³ருஷ்ட்வா
	ஹனூமாம்ஶ்சண்ட³விக்ரம꞉।
ஸாலம் விபுலமுத்பாட்ய
	ப்⁴ராமயாமாஸ வீர்யவான் ॥12॥
ப்⁴ராமயந்தம் கபிம் த்³ருஷ்ட்வா
	ஸாலவ்ருக்ஷம் மஹாப³லம் ।
சிக்ஷேப ஸுப³ஹூன்பா³ணான்
	ஜம்பு³மாலீ மஹாப³ல꞉॥13॥
ஸாலம் சதுர்பி⁴ஶ்சிச்சே²த³
	வானரம் பஞ்சபி⁴ர்பு⁴ஜே ।
உரஸ்யேகேன பா³ணேன
	த³ஶபி⁴ஸ்து ஸ்தனாந்தரே ॥14॥
ஸ ஶரை꞉ பூரிததனு꞉
	க்ரோதே⁴ன மஹதா வ்ருத꞉।
தமேவ பரிக⁴ம் க்³ருஹ்ய
	ப்⁴ராமயாமாஸ வேகி³த꞉॥15॥
அதிவேகோ³ऽதிவேகே³ன
	ப்⁴ராமயித்வா ப³லோத்கட꞉।
பரிக⁴ம் பாதயாமாஸ
	ஜம்பு³மாலேர்மஹோரஸி ॥16॥
தஸ்ய சைவ ஶிரோ நாஸ்தி
	ந பா³ஹூ ஜானுனீ ந ச ।
ந த⁴னுர்ன ரதோ² நாஶ்வா꞉
	தத்ராத்³ருஶ்யந்த நேஷவ꞉॥17॥
ஸ ஹதஸ்தரஸா தேன
	ஜம்பு³மாலீ மஹாரத²꞉।
பபாத நிஹதோ பூ⁴மௌ
	சூர்ணிதாங்க³ இவ த்³ரும꞉॥18॥
ஜம்பு³மாலிம் ஸுனிஹதம்
	கிங்கராம்ஶ்ச மஹாப³லான் ।
சுக்ரோத⁴ ராவண꞉ ஶ்ருத்வா
	க்ரோத⁴ஸம்ரக்தலோசன꞉॥19॥
ஸ ரோஷஸம்வர்திததாம்ரலோசன꞉
	ப்ரஹஸ்தபுத்ரே நிஹதே மஹாப³லே ।
அமாத்யபுத்ரானதிவீர்யவிக்ரமான்
	ஸமாதி³தே³ஶாஶு நிஶாசரேஶ்வர꞉॥20॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ சதுஶ்சத்வாரிம்ஶ꞉ ஸர்க³꞉