அத² த்³விபஞ்சாஶ꞉ ஸர்க³꞉
ஸ தஸ்ய வசனம் ஶ்ருத்வா
	வானரஸ்ய மஹாத்மன꞉।
ஆஜ்ஞாபயத்³வத⁴ம் தஸ்ய
	ராவண꞉ க்ரோத⁴மூர்சி²த꞉॥1॥
வதே⁴ தஸ்ய ஸமாஜ்ஞப்தே
	ராவணேன து³ராத்மனா ।
நிவேதி³தவதோ தௌ³த்யம்
	நானுமேனே விபீ⁴ஷண꞉॥2॥
தம் ரக்ஷோऽதி⁴பதிம் க்ருத்³த⁴ம்
	தச்ச கார்யமுபஸ்தி²தம் ।
விதி³த்வா சிந்தயாமாஸ
	கார்யம் கார்யவிதௌ⁴ ஸ்தி²த꞉॥3॥
நிஶ்சிதார்த²ஸ்தத꞉ ஸாம்னா
	பூஜ்யம் ஶத்ருஜித³க்³ரஜம் ।
உவாச ஹிதமத்யர்த²ம்
	வாக்யம் வாக்யவிஶாரத³꞉॥4॥
க்ஷமஸ்வ ரோஷம் த்யஜ ராக்ஷஸேந்த்³ர
	ப்ரஸீத³ மே வாக்யமித³ம் ஶ்ருணுஷ்வ ।
வத⁴ம் ந குர்வந்தி பராவரஜ்ஞா
	தூ³தஸ்ய ஸந்தோ வஸுதா⁴தி⁴பேந்த்³ரா꞉॥5॥
ராஜந்த⁴ர்மவிருத்³த⁴ம் ச
	லோகவ்ருத்தேஶ்ச க³ர்ஹிதம் ।
தவ சாஸத்³ருஶம் வீர
	கபேரஸ்ய ப்ரமாபணம் ॥6॥
த⁴ர்மஜ்ஞஶ்ச க்ருதஜ்ஞஶ்ச
	ராஜத⁴ர்மவிஶாரத³꞉।
பராவரஜ்ஞோ பூ⁴தானாம்
	த்வமேவ பரமார்த²வித் ॥7॥
க்³ருஹ்யந்தே யதி³ ரோஷேண
	த்வாத்³ருஶோऽபி விசக்ஷணா꞉।
தத꞉ ஶாஸ்த்ரவிபஶ்சித்த்வம்
	ஶ்ரம ஏவ ஹி கேவலம் ॥8॥
தஸ்மாத்ப்ரஸீத³ ஶத்ருக்⁴ன
	ராக்ஷஸேந்த்³ர து³ராஸத³ ।
யுக்தாயுக்தம் விநிஶ்சித்ய
	தூ³தத³ண்டோ³ விதீ⁴யதாம் ॥9॥
விபீ⁴ஷணவச꞉ ஶ்ருத்வா
	ராவணோ ராக்ஷஸேஶ்வர꞉।
கோபேன  மஹதாऽऽவிஷ்டோ
	வாக்யமுத்தரமப்³ரவீத் ॥10॥
ந பாபானாம் வதே⁴ பாபம்
	வித்³யதே ஶத்ருஸூத³ன ।
தஸ்மாதி³மம் வதி⁴ஷ்யாமி
	வானரம் பாபகாரிணம் ॥11॥
அத⁴ர்மமூலம் ப³ஹுதோ³ஷயுக்த-
	மனார்யஜுஷ்டம் வசனம் நிஶம்ய ।
உவாச வாக்யம் பரமார்த²தத்த்வம்
	விபீ⁴ஷணோ பு³த்³தி⁴மதாம் வரிஷ்ட²꞉॥12॥
ப்ரஸீத³ லங்கேஶ்வர ராக்ஷஸேந்த்³ர
	த⁴ர்மார்த²தத்வம் வசனம் ஶ்ருணுஷ்வ ।
தூ³தா ந வத்⁴யா꞉ ஸமயேஷு ராஜன்
	ஸர்வேஷு ஸர்வத்ர வத³ந்தி ஸந்த꞉॥13॥
அஸம்ஶயம் ஶத்ருரயம் ப்ரவ்ருத்³த⁴꞉
	க்ருதம் ஹ்யனேனாப்ரியமப்ரமேயம் ।
ந தூ³தவத்⁴யாம் ப்ரவத³ந்தி ஸந்தோ
	தூ³தஸ்ய த்³ருஷ்டா ப³ஹவோ ஹி த³ண்டா³꞉॥14॥
வைரூப்யமங்கே³ஷு கஶாபி⁴கா⁴தோ
	மௌண்ட்³யம் ததா² லக்ஷணஸம்நிபாத꞉।
ஏதான்ஹி தூ³தே ப்ரவத³ந்தி த³ண்டா³ன்
	வத⁴ஸ்து தூ³தஸ்ய ந ந꞉ ஶ்ருதோऽஸ்தி ॥15॥
கத²ம் ச த⁴ர்மார்த²வினீதபு³த்³தி⁴꞉
	பராவரப்ரத்யயநிஶ்சிதார்த²꞉।
ப⁴வத்³வித⁴꞉ கோபவஶே ஹி திஷ்டே²த்
	கோபம் ந க³ச்ச²ந்தி ஹி ஸத்த்வவந்த꞉॥16॥
ந த⁴ர்மவாதே³ ந ச லோகவ்ருத்தே
	ந ஶாஸ்த்ரபு³த்³தி⁴க்³ரஹணேஷு வாபி ।
வித்³யேத கஶ்சித்தவ வீர துல்ய-
	ஸ்த்வம் ஹ்யுத்தம꞉ ஸர்வஸுராஸுராணாம் ॥17॥
பராக்ரமோத்ஸாஹமனஸ்வினாம் ச
	ஸுராஸுராணாமபி து³ர்ஜயேன ।
த்வயாப்ரமேயேண ஸுரேந்த்³ரஸங்கா⁴
	ஜிதாஶ்ச யுத்³தே⁴ஷ்வஸக்ருன்னரேந்த்³ரா꞉॥18॥
இத்த²ம்வித⁴ஸ்யாமரதை³த்யஶத்ரோ꞉
	ஶூரஸ்ய வீரஸ்ய தவாஜிதஸ்ய ।
குர்வந்தி வீரா மனஸாப்யலீகம்
	ப்ராணைர்விமுக்தா ந து போ⁴꞉ புரா தே ॥19॥
ந சாப்யஸ்ய கபேர்கா⁴தே
	கஞ்சித்பஶ்யாம்யஹம் கு³ணம் ।
தேஷ்வயம் பாத்யதாம் த³ண்டோ³
	யைரயம் ப்ரேஷித꞉ கபி꞉॥20॥
ஸாது⁴ர்வா யதி³ வாஸாது⁴꞉
	பரைரேஷ ஸமர்பித꞉।
ப்³ருவன்பரார்த²ம் பரவான்
	ந தூ³தோ வத⁴மர்ஹதி ॥21॥
அபி சாஸ்மின்ஹதே நான்யம்
	ராஜன் பஶ்யாமி கே²சரம் ।
இஹ ய꞉ புனராக³ச்சே²த்
	பரம் பாரம் மஹோத³தே⁴꞉॥22॥
தஸ்மான்னாஸ்ய வதே⁴ யத்ன꞉
	கார்ய꞉ பரபுரஞ்ஜய ।
ப⁴வான்ஸேந்த்³ரேஷு தே³வேஷு
	யத்னமாஸ்தா²துமர்ஹதி ॥23॥
அஸ்மின்விநஷ்டே ந ஹி பூ⁴தமன்யம்
	பஶ்யாமி யஸ்தௌ நரராஜபுத்ரௌ ।
யுத்³தா⁴ய யுத்³த⁴ப்ரியது³ர்வினீதா-
	வுத்³யோஜயேத்³ வை ப⁴வதா விருத்³தௌ⁴ ॥24॥
பராக்ரமோத்ஸாஹமனஸ்வினாம் ச
	ஸுராஸுராணாமபி து³ர்ஜயேன ।
த்வயா மனோநந்த³ன நைர்ருதானாம்
	யுத்³தா⁴ய நிர்நாஶயிதும் ந யுக்தம் ॥25॥
ஹிதாஶ்ச ஶூராஶ்ச ஸமாஹிதாஶ்ச
	குலேஷு ஜாதாஶ்ச மஹாகு³ணேஷு ।
மனஸ்வின꞉ ஶஸ்த்ரப்⁴ருதாம் வரிஷ்டா²꞉
	கோபப்ரஶஸ்தா꞉ ஸுப்⁴ருதாஶ்ச யோதா⁴꞉॥26॥
ததே³கதே³ஶே ந ப³லஸ்ய தாவத்
	கேசித்தவாதே³ஶக்ருதோऽத்³ய யாந்து ।
தௌ ராஜபுத்ராவுபக்³ருஹ்ய மூடௌ⁴
	பரேஷு தே பா⁴வயிதும் ப்ரபா⁴வம் ॥27॥
நிஶாசராணாமதி⁴போऽனுஜஸ்ய
	விபீ⁴ஷணஸ்யோத்தமவாக்யமிஷ்டம் ।
ஜக்³ராஹ பு³த்³த்⁴யா ஸுரலோகஶத்ரு-
	ர்மஹாப³லோ ராக்ஷஸராஜமுக்²ய꞉॥28॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ த்³விபஞ்சாஶ꞉ ஸர்க³꞉