அத² த்ரிபஞ்சாஶ꞉ ஸர்க³꞉
தஸ்ய தத்³வசனம் ஶ்ருத்வா
	த³ஶக்³ரீவோ மஹாத்மன꞉।
தே³ஶகாலஹிதம் வாக்யம்
	ப்⁴ராதுருத்தமமப்³ரவீத் ॥1॥
ஸம்யகு³க்தம் ஹி ப⁴வதா
	தூ³தவத்⁴யா விக³ர்ஹிதா ।
அவஶ்யம் து வதா⁴யான்ய꞉
	க்ரியதாமஸ்ய நிக்³ரஹ꞉॥2॥
கபீனாம் கில லாங்கூ³லம்
	இஷ்டம் ப⁴வதி பூ⁴ஷணம் ।
தத³ஸ்ய தீ³ப்யதாம் ஶீக்⁴ரம்
	தேன த³க்³தே⁴ன க³ச்ச²து ॥3॥
தத꞉ பஶ்யந்த்வமும் தீ³னம்
	அங்க³வைரூப்யகர்ஶிதம் ।
ஸுமித்ரஜ்ஞாதய꞉ ஸர்வே
	பா³ந்த⁴வா꞉ ஸஸுஹ்ருஜ்ஜனா꞉॥4॥
ஆஜ்ஞாபயத்³ராக்ஷஸேந்த்³ர꞉
	புரம் ஸர்வம் ஸசத்வரம் ।
லாங்கூ³லேன ப்ரதீ³ப்தேன
	ரக்ஷோபி⁴꞉ பரிணீயதாம் ॥5॥
தஸ்ய தத்³வசனம் ஶ்ருத்வா
	ராக்ஷஸா꞉ கோபகர்கஶா꞉।
வேஷ்டந்தே தஸ்ய லாங்கூ³லம்
	ஜீர்ணை꞉ கார்பாஸிகை꞉ படை꞉॥6॥
ஸம்வேஷ்ட்யமானே லாங்கூ³லே
	வ்யவர்த⁴த மஹாகபி꞉।
ஶுஷ்கமிந்த⁴னமாஸாத்³ய
	வனேஷ்விவ ஹுதாஶனம் ॥7॥
தைலேன பரிஷிச்யாத²
	தேऽக்³னிம் தத்ரோபபாத³யன் ।
லாங்கூ³லேன ப்ரதீ³ப்தேன
	ராக்ஷஸாம்ஸ்தானதாட³யத் ॥8॥
ரோஷாமர்ஷபரீதாத்மா
	பா³லஸூர்யஸமானன꞉।
ஸ பூ⁴ய꞉ ஸங்க³தை꞉ க்ரூரை꞉
	ராக்ஷஸைர்ஹரிபுங்க³வ꞉॥9॥
ஸஹஸ்ரீபா³லவ்ருத்³தா⁴ஶ்ச
	ஜக்³மு꞉ ப்ரீதிம் நிஶாசரா꞉।
நிப³த்³த⁴꞉ க்ருதவான்வீர꞉
	தத்காலஸத்³ருஶீம் மதிம் ॥10॥
காமம் க²லு ந மே ஶக்தா
	நிப³த்³த⁴ஸ்யாபி ராக்ஷஸா꞉।
சி²த்த்வா பாஶான்ஸமுத்பத்ய
	ஹன்யாமஹமிமான்புன꞉॥11॥
யதி³ ப⁴ர்த்ருஹிதார்தா²ய
	சரந்தம் ப⁴ர்த்ருஶாஸனாத் ।
நிப³த்⁴னந்தே து³ராத்மானோ
	ந து மே நிஷ்க்ருதி꞉ க்ருதா ॥12॥
ஸர்வேஷாமேவ பர்யாப்தோ
	ராக்ஷஸாநாமஹம் யுதி⁴ ।
கிம் து ராமஸ்ய ப்ரீத்யர்த²ம்
	விஷஹிஷ்யேऽஹமீத்³ருஶம் ॥13॥
லங்கா சாரயிதவ்யா மே
	புனரேவ ப⁴வேதி³தி ।
ராத்ரௌ நஹி ஸுத்³ருஷ்டா மே
	து³ர்க³கர்மவிதா⁴னத꞉॥14॥
அவஶ்யமேவ த்³ரஷ்டவ்யா
	மயா லங்கா நிஶாக்ஷயே ।
காமம் ப³த்⁴னந்து மே பூ⁴ய꞉
	புச்ச²ஸ்யோத்³தீ³பனேன ச ॥15॥
பீடா³ம் குர்வந்தி ரக்ஷாம்ஸி
	ந மேऽஸ்தி மனஸ꞉ ஶ்ரம꞉।
ததஸ்தே ஸம்வ்ருதாகாரம்
	ஸத்த்வவந்தம் மஹாகபிம் ॥16॥
பரிக்³ருஹ்ய யயுர்ஹ்ருஷ்டா
	ராக்ஷஸா꞉ கபிகுஞ்ஜரம் ।
ஶங்க²பே⁴ரீனிநாதை³ஶ்ச
	கோ⁴ஷயந்த꞉ ஸ்வகர்மபி⁴꞉॥17॥
ராக்ஷஸா꞉ க்ரூரகர்மாண꞉
	சாரயந்தி ஸ்ம தாம் புரீம் ।
அன்வீயமானோ ரக்ஷோபி⁴꞉
	யயௌ ஸுக²மரிந்த³ம꞉॥18॥
ஹனுமாம்ஶ்சாரயாமாஸ
	ராக்ஷஸானாம் மஹாபுரீம் ।
அதா²பஶ்யத்³விமானானி
	விசித்ராணி மஹாகபி꞉॥19॥
ஸம்வ்ருதான்பூ⁴மிபா⁴கா³ம்ஶ்ச
	ஸுவிப⁴க்தாம்ஶ்ச சத்வரான் ।
ரத்²யாஶ்ச க்³ருஹஸம்பா³தா⁴꞉
	கபி꞉ ஶ்ருங்கா³டகானி ச ॥20॥
ததா² ரத்²யோபரத்²யாஶ்ச
	ததை²வ ச க்³ருஹாந்தரான் ।
சத்வரேஷு சதுஷ்கேஷு
	ராஜமார்கே³ ததை²வ ச ॥21॥
கோ⁴ஷயந்தி கபிம் ஸர்வே
	சார இத்யேவ ராக்ஷஸா꞉।
ஸ்த்ரீபா³லவ்ருத்³தா⁴ நிர்ஜக்³மு꞉
	தத்ர தத்ர குதூஹலாத் ॥22॥
தம் ப்ரதீ³பிதலாங்கூ³லம்
	ஹனூமந்தம் தி³த்³ருக்ஷவ꞉।
தீ³ப்யமானே ததஸ்தஸ்ய
	லாங்கூ³லாக்³ரே ஹனூமத꞉॥23॥
ராக்ஷஸ்யஸ்தா விரூபாக்ஷ்ய꞉
	ஶம்ஸுர்தே³வ்யாஸ்தத³ப்ரியம் ।
யஸ்த்வயா க்ருதஸம்வாத³꞉
	ஸீதே தாம்ரமுக²꞉ கபி꞉॥24॥
லாங்கூ³லேன ப்ரதீ³ப்தேன
	ஸ ஏஷ பரிணீயதே ।
ஶ்ருத்வா தத்³வசனம் க்ரூரம்
	ஆத்மாபஹரணோபமம் ॥25॥
வைதே³ஹீ ஶோகஸந்தப்தா
	ஹுதாஶனமுபாக³மத் ।
மங்க³லாபி⁴முகீ² தஸ்ய
	ஸா ததா³ஸீன்மஹாகபே꞉॥23॥
உபதஸ்தே² விஶாலாக்ஷீ
	ப்ரயதா ஹவ்யவாஹனம் ।
யத்³யஸ்தி பதிஶுஶ்ரூஷா
	யத்³யஸ்தி சரிதம் தப꞉।
யதி³ வா த்வேகபத்னீத்வம்
	ஶீதோ ப⁴வ ஹனூமத꞉॥27॥
யதி³ கஶ்சித³னுக்ரோஶ꞉
	தஸ்ய மய்யஸ்தி தீ⁴மத꞉।
யதி³ வா பா⁴க்³யஶேஷோ மே
	ஶீதோ ப⁴வ ஹனூமத꞉॥28॥
யதி³ மாம் வ்ருத்தஸம்பன்னாம்
	தத்ஸமாக³மலாலஸாம் ।
ஸ விஜானாதி த⁴ர்மாத்மா
	ஶீதோ ப⁴வ ஹனூமத꞉॥29॥
யதி³ மாம் தாரயேதா³ர்ய꞉
	ஸுக்³ரீவ꞉ ஸத்யஸங்க³ர꞉।
அஸ்மாத்³து³꞉கா²ம்பு³ஸம்ரோதா⁴த்
	சீ²தோ ப⁴வ ஹனூமத꞉॥30॥
ததஸ்தீக்ஷ்ணார்சிரவ்யக்³ர꞉
	ப்ரத³க்ஷிணஶிகோ²ऽனல꞉।
ஜஜ்வால ம்ருக³ஶாவாக்ஷ்யா꞉
	ஶம்ஸன்னிவ ஶுப⁴ம் கபே꞉॥31॥
ஹனூமஜ்ஜனகஶ்சைவ
	புச்சா²னலயுதோऽனில꞉।
வவௌ ஸ்வாஸ்த்²யகரோ தே³வ்யா꞉
	ப்ராலேயானிலஶீதல꞉॥32॥
த³ஹ்யமானே ச லாங்கூ³லே
	சிந்தயாமாஸ வானர꞉।
ப்ரதீ³ப்தோऽக்³நிரயம் கஸ்மாத்
	ந மாம் த³ஹதி ஸர்வத꞉॥33॥
த்³ருஶ்யதே ச மஹாஜ்வால꞉
	கரோதி ச ந மே ருஜம் ।
ஶிஶிரஸ்யேவ ஸம்பாதோ
	லாங்கூ³லாக்³ரே ப்ரதிஷ்டி²த꞉॥34॥
அத² வா ததி³த³ம் வ்யக்தம்
	யத்³த்³ருஷ்டம் ப்லவதா மயா ।
ராமப்ரபா⁴வாதா³ஶ்சர்யம்
	பர்வத꞉ ஸரிதாம் பதௌ ॥35॥
யதி³ தாவத்ஸமுத்³ரஸ்ய
	மைனாகஸ்ய ச தீ⁴மத꞉।
ராமார்த²ம் ஸம்ப்⁴ரமஸ்தாத்³ருக்
	கிமக்³நிர்ன கரிஷ்யதி ॥36॥
ஸீதாயாஶ்சாந்ருஶம்ஸ்யேன
	தேஜஸா ராக⁴வஸ்ய ச ।
பிதுஶ்ச மம ஸக்²யேன
	ந மாம் த³ஹதி பாவக꞉॥37॥
பூ⁴ய꞉ ஸ சிந்தயாமாஸ
	முஹூர்தம் கபிகுஞ்ஜர꞉।
கத²மஸ்மத்³வித⁴ஸ்யேஹ
	ப³ந்த⁴னம் ராக்ஷஸாத⁴மை꞉॥38॥
ப்ரதிக்ரியாஸ்ய யுக்தா ஸ்யாத்
	ஸதி மஹ்யம் பராக்ரமே ।
ததஶ்சி²த்த்வா ச தான் பாஶான்
	வேக³வான் வை மஹாகபி꞉॥39॥
உத்பபாதாத² வேகே³ன
	நநாத³ ச மஹாகபி꞉।
புரத்³வாரம் தத꞉ ஸ்ரீமான்
	ஶைலஶ்ருங்க³மிவோன்னதம் ॥40॥
விப⁴க்தரக்ஷ꞉ஸம்பா³த⁴ம்
	ஆஸஸாதா³னிலாத்மஜ꞉।
ஸ பூ⁴த்வா ஶைலஸங்காஶ꞉
	க்ஷணேன புனராத்மவான் ॥41॥
ஹ்ரஸ்வதாம் பரமாம் ப்ராப்தோ
	ப³ந்த⁴னான்யவஶாதயத் ।
விமுக்தஶ்சாப⁴வச்ச்²ரீமான்
	புன꞉ பர்வதஸம்நிப⁴꞉॥42॥
வீக்ஷமாணஶ்ச த³த்³ருஶே
	பரிக⁴ம் தோரணாஶ்ரிதம் ।
ஸ தம் க்³ருஹ்ய மஹாபா³ஹு꞉
	காலாயஸபரிஷ்க்ருதம் ।
ரக்ஷிணஸ்தான்புன꞉ ஸர்வான்
	ஸூத³யாமாஸ மாருதி꞉॥43॥
ஸ தான்னிஹத்வா ரணசண்ட³விக்ரம꞉
	ஸமீக்ஷமாண꞉ புனரேவ லங்காம் ।
ப்ரதீ³ப்தலாங்கூ³லக்ருதார்சிமாலீ
	ப்ரகாஶதாதி³த்ய இவார்சிமாலீ ॥44॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ த்ரிபஞ்சாஶ꞉ ஸர்க³꞉