அத² அஷ்டபஞ்சாஶ꞉ ஸர்க³꞉
ததஸ்தஸ்ய கி³ரே꞉ ஶ்ருங்கே³
	மஹேந்த்³ரஸ்ய மஹாப³லா꞉।
ஹனுமத்ப்ரமுகா²꞉ ப்ரீதிம்
	ஹரயோ ஜக்³முருத்தமாம் ॥1॥
ப்ரீதிமத்ஸூபவிஷ்டேஷு
	வானரேஷு மஹாத்மஸு ।
தம் தத꞉ ப்ரதிஸம்ஹ்ருஷ்ட꞉
	ப்ரீதியுக்தம் மஹாகபிம் ॥2॥
ஜாம்ப³வான்கார்யவ்ருத்தாந்தம்
	அப்ருச்ச²த³னிலாத்மஜம் ।
கத²ம் த்³ருஷ்டா த்வயா தே³வீ
	கத²ம் வா தத்ர வர்ததே ॥3॥
தஸ்யாம் சாபி கத²ம் வ்ருத்த꞉
	க்ரூரகர்மா த³ஶானன꞉।
தத்த்வத꞉ ஸர்வமேதன்ன꞉
	ப்ரப்³ரூஹி த்வம் மஹாகபே ॥4॥
ஸம்மார்கி³தா கத²ம் தே³வீ
	கிம் ச ஸா ப்ரத்யபா⁴ஷத ।
ஶ்ருதார்தா²ஶ்சிந்தயிஷ்யாமோ
	பூ⁴ய꞉ கார்யவிநிஶ்சயம் ॥5॥
யஶ்சார்த²ஸ்தத்ர வக்தவ்யோ
	க³தைரஸ்மாபி⁴ராத்மவான் ।
ரக்ஷிதவ்யம் ச யத்தத்ர
	தத்³ப⁴வான்வ்யாகரோது ந꞉॥6॥
ஸ நியுக்தஸ்ததஸ்தேன
	ஸம்ப்ரஹ்ருஷ்டதனூருஹ꞉।
நமஸ்யஞ்ஶிரஸா தே³வ்யை
	ஸீதாயை ப்ரத்யபா⁴ஷத ॥7॥
ப்ரத்யக்ஷமேவ ப⁴வதாம்
	மஹேந்த்³ராக்³ராத்க²மாப்லுத꞉।
உத³தே⁴ர்த³க்ஷிணம் பாரம்
	காங்க்ஷமாண꞉ ஸமாஹித꞉॥8॥
க³ச்ச²தஶ்ச ஹி மே கோ⁴ரம்
	விக்⁴னரூபமிவாப⁴வத் ।
காஞ்சனம் ஶிக²ரம் தி³வ்யம்
	பஶ்யாமி ஸுமனோஹரம் ॥9॥
ஸ்தி²தம் பந்தா²னமாவ்ருத்ய
	மேனே விக்⁴னம் ச தம் நக³ம் ।
உபஸங்க³ம்ய தம் தி³வ்யம்
	காஞ்சனம் நக³முத்தமம் ॥10॥
க்ருதா மே மனஸா பு³த்³தி⁴꞉
	பே⁴த்தவ்யோऽயம் மயேதி ச ।
ப்ரஹதஸ்ய மயா தஸ்ய
	லாங்கூ³லேன மஹாகி³ரே꞉॥11॥
ஶிக²ரம் ஸூர்யஸங்காஶம்
	வ்யஶீர்யத ஸஹஸ்ரதா⁴ ।
வ்யவஸாயம் ச தம் பு³த்³த்⁴வா
	ஸ ஹோவாச மஹாகி³ரி꞉॥12॥
புத்ரேதி மது⁴ராம் வாணீம்
	மன꞉ ப்ரஹ்லாத³யன்னிவ ।
பித்ருவ்யம் சாபி மாம் வித்³தி⁴
	ஸகா²யம் மாதரிஶ்வன꞉॥13॥
மைனாகமிதி விக்²யாதம்
	நிவஸந்தம் மஹோத³தௌ⁴ ।
பக்ஷ்வவந்த꞉ புரா புத்ர
	ப³பூ⁴வு꞉ பர்வதோத்தமா꞉॥14॥
ச²ந்த³த꞉ ப்ருதி²வீம் சேரு꞉
	பா³த⁴மானா꞉ ஸமந்தத꞉।
ஶ்ருத்வா நகா³னாம் சரிதம்
	மஹேந்த்³ர꞉ பாகஶாஸன꞉॥15॥
வஜ்ரேண ப⁴க³வான் பக்ஷௌ
	சிச்சே²தை³ஷாம் ஸஹஸ்ரஶ꞉।
அஹம் து மோசிதஸ்தஸ்மாத்
	தவ பித்ரா மஹாத்மனா ॥16॥
மாருதேன ததா³ வத்ஸ
	ப்ரக்ஷிப்தோ வருணாலயே ।
ராக⁴வஸ்ய மயா ஸாஹ்யே
	வர்திதவ்யமரிந்த³ம ॥17॥
ராமோ த⁴ர்மப்⁴ருதாம் ஶ்ரேஷ்டோ²
	மஹேந்த்³ரஸமவிக்ரம꞉।
ஏதச்ச்²ருத்வா மயா தஸ்ய
	மைனாகஸ்ய மஹாத்மன꞉॥18॥
கார்யமாவேத்³ய ச கி³ரே꞉
	உத்³த⁴தம் வை மனோ மம ।
தேன சாஹமனுஜ்ஞாதோ
	மைனாகேன மஹாத்மனா ॥19॥
ஸ சாப்யந்தர்ஹித꞉ ஶைலோ
	மானுஷேண வபுஷ்மதா ।
ஶரீரேண மஹாஶைல꞉
	ஶைலேன ச மஹோத³தௌ⁴ ॥20॥
உத்தமம் ஜவமாஸ்தா²ய
	ஶேஷமத்⁴வானமாஸ்தி²த꞉।
ததோऽஹம் ஸுசிரம் காலம்
	ஜவேநாப்⁴யக³மம் பதி² ॥21॥
தத꞉ பஶ்யாம்யஹம் தே³வீம்
	ஸுரஸாம் நாக³மாதரம் ।
ஸமுத்³ரமத்⁴யே ஸா தே³வீ
	வசனம் சேத³மப்³ரவீத் ॥22॥
மம ப⁴க்ஷ்ய꞉ ப்ரதி³ஷ்டஸ்த்வம்
	அமரைர்ஹரிஸத்தம ।
ததஸ்த்வாம் ப⁴க்ஷயிஷ்யாமி
	விஹிதஸ்த்வம் ஹி மே ஸுரை꞉॥23॥
ஏவமுக்த꞉ ஸுரஸயா
	ப்ராஞ்ஜலி꞉ ப்ரணத꞉ ஸ்தி²த꞉।
விவர்ணவத³னோ பூ⁴த்வா
	வாக்யம் சேத³முதீ³ரயம் ॥24॥
ராமோ தா³ஶரதி²꞉ ஸ்ரீமான்
	ப்ரவிஷ்டோ த³ண்ட³காவனம் ।
லக்ஷ்மணேன ஸஹ ப்⁴ராத்ரா
	ஸீதயா ச பரந்தப꞉॥25॥
தஸ்ய ஸீதா ஹ்ருதா பா⁴ர்யா
	ராவணேன து³ராத்மனா ।
தஸ்யா꞉ ஸகாஶம் தூ³தோऽஹம்
	க³மிஷ்யே ராமஶாஸனாத் ॥26॥
கர்துமர்ஹஸி ராமஸ்ய
	ஸாஹாய்யம் விஷயே ஸதீ ।
அத²வா மைதி²லீம் த்³ருஷ்ட்வா
	ராமம் சாக்லிஷ்டகாரிணம் ॥27॥
ஆக³மிஷ்யாமி தே வக்த்ரம்
	ஸத்யம் ப்ரதிஶ்ருணோமி தே ।
ஏவமுக்தா மயா ஸா து
	ஸுரஸா காமரூபிணீ ॥28॥
அப்³ரவீன்னாதிவர்தேத
	கஶ்சிதே³ஷ வரோ மம ।
ஏவமுக்த꞉ ஸுரஸயா
	த³ஶயோஜனமாயத꞉॥29॥
ததோऽர்த⁴கு³ணவிஸ்தாரோ
	ப³பூ⁴வாஹம் க்ஷணேன து ।
மத்ப்ரமாணாதி⁴கம் சைவ
	வ்யாதி³தம் து முக²ம் தயா ॥30॥
தத்³த்³ருஷ்ட்வா வ்யாதி³தம் த்வாஸ்யம்
	ஹ்ரஸ்வம் ஹ்யகரவம் புன꞉।
தஸ்மின்முஹூர்தே ச புன꞉
	ப³பூ⁴வாங்கு³ஷ்ட²ஸம்மித꞉॥31॥
அபி⁴பத்யாஶு தத்³வக்த்ரம்
	நிர்க³தோऽஹம் தத꞉ க்ஷணாத் ।
அப்³ரவீத்ஸுரஸா தே³வீ
	ஸ்வேன ரூபேண மாம் புன꞉॥32॥
அர்த²ஸித்³த்⁴யை ஹரிஶ்ரேஷ்ட²
	க³ச்ச² ஸௌம்ய யதா²ஸுக²ம் ।
ஸமானய ச வைதே³ஹீம்
	ராக⁴வேண மஹாத்மனா ॥33॥
ஸுகீ² ப⁴வ மஹாபா³ஹோ
	ப்ரீதாஸ்மி தவ வானர ।
ததோऽஹம் ஸாது⁴ ஸாத்⁴வீதி
	ஸர்வபூ⁴தை꞉ ப்ரஶம்ஸித꞉॥34॥
ததோऽந்தரிக்ஷம் விபுலம்
	ப்லுதோऽஹம் க³ருடோ³ யதா² ।
சா²யா மே நிக்³ருஹீதா ச
	ந ச பஶ்யாமி கிஞ்சன ॥35॥
ஸோऽஹம் விக³தவேக³ஸ்து
	தி³ஶோ த³ஶ விலோகயன் ।
ந கிஞ்சித்தத்ர பஶ்யாமி
	யேன மே விஹதா க³தி꞉॥36॥
அத² மே பு³த்³தி⁴ருத்பன்னா
	கிம் நாம க³மனே மம ।
ஈத்³ருஶோ விக்⁴ன உத்பன்னோ
	ரூபமத்ர ந த்³ருஶ்யதே ॥37॥
அதோ⁴பா⁴கே³ து மே த்³ருஷ்டி꞉
	ஶோசத꞉ பதிதா ததா³ ।
தத்ராத்³ராக்ஷமஹம் பீ⁴மாம்
	ராக்ஷஸீம் ஸலிலே ஶயாம் ॥38॥
ப்ரஹஸ்ய ச மஹாநாத³ம்
	உக்தோऽஹம் பீ⁴மயா தயா ।
அவஸ்தி²தமஸம்ப்⁴ராந்தம்
	இத³ம் வாக்யமஶோப⁴னம் ॥39॥
க்வாஸி க³ந்தா மஹாகாய
	க்ஷுதி⁴தாயா மமேப்ஸித꞉।
ப⁴க்ஷ꞉ ப்ரீணய மே தே³ஹம்
	சிரமாஹாரவர்ஜிதம் ॥40॥
பா³ட⁴மித்யேவ தாம் வாணீம்
	ப்ரத்யக்³ருஹ்ணாமஹம் தத꞉।
ஆஸ்ய ப்ரமாணாத³தி⁴கம்
	தஸ்யா꞉ காயமபூரயம் ॥41॥
தஸ்யாஶ்சாஸ்யம் மஹத்³பீ⁴மம்
	வர்த⁴தே மம ப⁴க்ஷணே ।
ந து மாம் ஸா நு பு³பு³தே⁴
	மம வா விக்ருதம் க்ருதம் ॥42॥
ததோऽஹம் விபுலம் ரூபம்
	ஸங்க்ஷிப்ய நிமிஷாந்தராத் ।
தஸ்யா ஹ்ருத³யமாதா³ய
	ப்ரபதாமி நப⁴꞉ஸ்த²லம் ॥43॥
ஸா விஸ்ருஷ்டபு⁴ஜா பீ⁴மா
	பபாத லவணாம்ப⁴ஸி ।
மயா பர்வதஸங்காஶா
	நிக்ருத்தஹ்ருத³யா ஸதீ ॥44॥
ஶ்ருணோமி க²க³தானாம் ச
	வாச꞉ ஸௌம்யா மஹாத்மனாம் ।
ராக்ஷஸீ ஸிம்ஹிகா பீ⁴மா
	க்ஷிப்ரம் ஹனுமதா ஹதா ॥45॥
தாம் ஹத்வா புனரேவாஹம்
	க்ருத்யமாத்யயிகம் ஸ்மரன் ।
க³த்வா ச மஹத³த்⁴வானம்
	பஶ்யாமி நக³மண்டி³தம் ॥46॥
த³க்ஷிணம் தீரமுத³தே⁴꞉
	லங்கா யத்ர க³தா புரீ ।
அஸ்தம் தி³னகரே யாதே
	ரக்ஷஸாம் நிலயம் புரீம் ॥47॥
ப்ரவிஷ்டோऽஹமவிஜ்ஞாதோ
	ரக்ஷோபி⁴ர்பீ⁴மவிக்ரமை꞉।
தத்ர ப்ரவிஶதஶ்சாபி
	கல்பாந்தக⁴னஸப்ரபா⁴ ॥48॥
அட்டஹாஸம் விமுஞ்சந்தீ
	நாரீ காப்யுத்தி²தா புர꞉।
ஜிகா⁴ம்ஸந்தீம் ததஸ்தாம் து
	ஜ்வலத³க்³நிஶிரோருஹாம் ॥49॥
ஸவ்யமுஷ்டிப்ரஹாரேண
	பராஜித்ய ஸுபை⁴ரவாம் ।
ப்ரதோ³ஷகாலே ப்ரவிஶம்
	பீ⁴தயாஹம் தயோதி³த꞉॥50॥
அஹம் லங்காபுரீ வீர
	நிர்ஜிதா விக்ரமேண தே ।
யஸ்மாத்தஸ்மாத்³விஜேதாஸி
	ஸர்வரக்ஷாம்ஸ்யஶேஷத꞉॥51॥
தத்ராஹம் ஸர்வராத்ரம் து
	விசரஞ்ஜனகாத்மஜாம் ।
ராவணாந்த꞉புரக³தோ
	ந சாபஶ்யம் ஸுமத்⁴யமாம் ॥52॥
தத꞉ ஸீதாமபஶ்யம்ஸ்து
	ராவணஸ்ய நிவேஶனே ।
ஶோகஸாக³ரமாஸாத்³ய
	ந பாரமுபலக்ஷயே ॥53॥
ஶோசதா ச மயா த்³ருஷ்டம்
	ப்ராகாரேணாபி⁴ஸம்வ்ருதம் ।
காஞ்சனேன விக்ருஷ்டேன
	க்³ருஹோபவனமுத்தமம் ॥54॥
ஸப்ராகாரமவப்லுத்ய
	பஶ்யாமி ப³ஹுபாத³பம் ।
அஶோகவநிகாமத்⁴யே
	ஶிம்ஶபாபாத³போ மஹான் ॥55॥
தமாருஹ்ய ச பஶ்யாமி
	காஞ்சனம் கத³லீ வனம் ।
அதூ³ராச்சி²ம்ஶபாவ்ருக்ஷாத்
	பஶ்யாமி வனவர்ணினீம் ॥56॥
ஶ்யாமாம் கமலபத்ராக்ஷீம்
	உபவாஸக்ருஶானனாம் ।
ததே³கவாஸ꞉ஸம்வீதாம்
	ரஜோத்⁴வஸ்தஶிரோருஹாம் ॥57॥
ஶோகஸந்தாபதீ³னாங்கீ³ம்
	ஸீதாம் ப⁴ர்த்ருஹிதே ஸ்தி²தாம் ।
ராக்ஷஸீபி⁴ர்விரூபாபி⁴꞉
	க்ரூராபி⁴ரபி⁴ஸம்வ்ருதாம் ॥58॥
மாம்ஸஶோணிதப⁴க்ஷ்யாபி⁴꞉
	வ்யாக்⁴ரீபி⁴ர்ஹரிணீம் யதா² ।
ஸா மயா ராக்ஷஸீமத்⁴யே
	தர்ஜ்யமானா முஹுர்முஹு꞉॥59॥
ஏகவேணீத⁴ரா தீ³னா
	ப⁴ர்த்ருசிந்தாபராயணா ।
பூ⁴மிஶய்யா விவர்ணாங்கீ³
	பத்³மினீவ ஹிமாக³மே ॥60॥
ராவணாத்³விநிவ்ருத்தார்தா²
	மர்தவ்யே க்ருதநிஶ்சயா ।
கத²ஞ்சின்ம்ருக³ஶாவாக்ஷீ
	தூர்ணமாஸாதி³தா மயா ॥61॥
தாம் த்³ருஷ்ட்வா தாத்³ருஶீம் நாரீம்
	ராமபத்னீம் யஶஸ்வினீம் ।
தத்ரைவ ஶிம்ஶபாவ்ருக்ஷே
	பஶ்யன்னஹமவஸ்தி²த꞉॥62॥
ததோ ஹலஹலாஶப்³த³ம்
	காஞ்சீநூபுரமிஶ்ரிதம் ।
ஶ்ருணோம்யதி⁴கக³ம்பீ⁴ரம்
	ராவணஸ்ய நிவேஶனே ॥63॥
ததோऽஹம் பரமோத்³விக்³ன꞉
	ஸ்வரூபம் ப்ரத்யஸம்ஹரம் ।
அஹம் ச ஶிம்ஶபாவ்ருக்ஷே
	பக்ஷீவ க³ஹனே ஸ்தி²த꞉॥64॥
ததோ ராவணதா³ராஶ்ச
	ராவணஶ்ச மஹாப³ல꞉।
தம் தே³ஶமனுஸம்ப்ராப்தோ
	யத்ர ஸீதாப⁴வத்ஸ்தி²தா ॥65॥
தம் த்³ருஷ்ட்வாத² வராரோஹா
	ஸீதா ரக்ஷோக³ணேஶ்வரம் ।
ஸங்குச்யோரூ ஸ்தனௌ பீனௌ
	பா³ஹுப்⁴யாம் பரிரப்⁴ய ச ॥66॥
வித்ரஸ்தாம் பரமோத்³விக்³னாம்
	வீக்ஷ்யமாணாமிதஸ்தத꞉।
த்ராணம் கம்ஞ்சித³பஶ்யந்தீம்
	வேபமானாம் தபஸ்வினீம் ॥67॥
தாமுவாச த³ஶக்³ரீவ꞉
	ஸீதாம் பரமது³꞉கி²தாம் ।
அவாக்ஶிரா꞉ ப்ரபதிதோ
	ப³ஹுமன்யஸ்வ மாமிதி ॥68॥
யதி³ சேத்த்வம் து மாம் த³ர்பான்
	நாபி⁴னந்த³ஸி க³ர்விதே ।
த்³விமாஸானந்தரம் ஸீதே
	பாஸ்யாமி ருதி⁴ரம் தவ ॥69॥
ஏதச்ச்²ருத்வா வசஸ்தஸ்ய
	ராவணஸ்ய து³ராத்மன꞉।
உவாச பரமக்ருத்³தா⁴
	ஸீதா வசனமுத்தமம் ॥70॥
ராக்ஷஸாத⁴ம ராமஸ்ய
	பா⁴ர்யாமமிததேஜஸ꞉।
இக்ஷ்வாகுவம்ஶநாத²ஸ்ய
	ஸ்னுஷாம் த³ஶரத²ஸ்ய ச ॥71॥
அவாச்யம் வத³தோ ஜிஹ்வா
	கத²ம் ந பதிதா தவ ।
கிம்ஸ்வித்³வீர்ய தவானார்ய
	யோ மாம் ப⁴ர்துரஸம்நிதௌ⁴ ॥72॥
அபஹ்ருத்யாக³த꞉ பாப
	தேநாத்³ருஷ்டோ மஹாத்மனா ।
ந த்வம் ராமஸ்ய ஸத்³ருஶோ
	தா³ஸ்யேऽப்யஸ்யா ந யுஜ்யஸே ॥73॥
அஜேய꞉ ஸத்யவாக் ஶூரோ
	ரணஶ்லாகீ⁴ ச ராக⁴வ꞉।
ஜானக்யா பருஷம் வாக்யம்
	ஏவமுக்தோ த³ஶானன꞉॥74॥
ஜஜ்வால ஸஹஸா கோபாத்
	சிதாஸ்த² இவ பாவக꞉।
விவ்ருத்ய நயனே க்ரூரே
	முஷ்டிமுத்³யம்ய த³க்ஷிணம் ॥75॥
மைதி²லீம் ஹந்துமாரப்³த⁴꞉
	ஸ்த்ரீபி⁴ர்ஹாஹாக்ருதம் ததா³ ।
ஸ்த்ரீணாம் மத்⁴யாத்ஸமுத்பத்ய
	தஸ்ய பா⁴ர்யா து³ராத்மன꞉॥76॥
வரா மந்தோ³த³ரீ நாம
	தயா ஸ ப்ரதிஷேதி⁴த꞉।
உக்தஶ்ச மது⁴ராம் வாணீம்
	தயா ஸ மத³னார்தி³த꞉॥77॥
ஸீதயா தவ கிம் கார்யம்
	மஹேந்த்³ரஸமவிக்ரம ।
மயா ஸஹ ரமஸ்வாத்³ய
	மத்³விஶிஷ்டா ந ஜானகீ ॥78॥
தே³வக³ந்த⁴ர்வகன்யாபி⁴꞉
	யக்ஷகன்யாபி⁴ரேவ ச ।
ஸார்த⁴ம் ப்ரபோ⁴ ரமஸ்வேதி
	ஸீதயா கிம் கரிஷ்யஸி ॥79॥
ததஸ்தாபி⁴꞉ ஸமேதாபி⁴꞉
	நாரீபி⁴꞉ ஸ மஹாப³ல꞉।
உத்தா²ப்ய ஸஹஸா நீதோ
	ப⁴வனம் ஸ்வம் நிஶாசர꞉॥80॥
யாதே தஸ்மிந்த³ஶக்³ரீவே
	ராக்ஷஸ்யோ விக்ருதானனா꞉।
ஸீதாம் நிர்ப⁴ர்த்ஸயாமாஸு꞉
	வாக்யை꞉ க்ரூரை꞉ ஸுதா³ருணை꞉॥81॥
த்ருணவத்³பா⁴ஷிதம் தாஸாம்
	க³ணயாமாஸ ஜானகீ ।
க³ர்ஜிதம் ச ததா² தாஸாம்
	ஸீதாம் ப்ராப்ய நிரர்த²கம் ॥82॥
வ்ருதா²க³ர்ஜிதநிஶ்சேஷ்டா
	ராக்ஷஸ்ய꞉ பிஶிதாஶனா꞉।
ராவணாய ஶஶம்ஸுஸ்தா꞉
	ஸீதாவ்யவஸிதம் மஹத் ॥83॥
ததஸ்தா꞉ ஸஹிதா꞉ ஸர்வா
	விஹதாஶா நிருத்³யமா꞉।
பரிக்லிஶ்ய ஸமஸ்தாஸ்தா
	நித்³ராவஶமுபாக³தா꞉॥84॥
தாஸு சைவ ப்ரஸுப்தாஸு
	ஸீதா ப⁴ர்த்ருஹிதே ரதா ।
விலப்ய கருணம் தீ³னா
	ப்ரஶுஶோச ஸுது³꞉கி²தா ॥85॥
தாஸாம் மத்⁴யாத்ஸமுத்தா²ய
	த்ரிஜடா வாக்யமப்³ரவீத் ।
ஆத்மானம் கா²த³த க்ஷிப்ரம்
	ந ஸீதாமஸிதேக்ஷணாம் ॥86॥
ஜனகஸ்யாத்மஜாம் ஸாத்⁴வீம்
	ஸ்னுஷாம் த³ஶரத²ஸ்ய ச ।
ஸ்வப்னோ ஹ்யத்³ய மயா த்³ருஷ்டோ
	தா³ருணோ ரோமஹர்ஷண꞉॥87॥
ரக்ஷஸாம் ச விநாஶாய
	ப⁴ர்துரஸ்யா ஜயாய ச ।
அலமஸ்மான் பரித்ராதும்
	ராக⁴வாத்³ராக்ஷஸீக³ணம் ॥88॥
அபி⁴யாசாம வைதே³ஹீம்
	ஏதத்³தி⁴ மம ரோசதே ।
யதி³ ஹ்யேவம்வித⁴꞉ ஸ்வப்னோ
	து³꞉கி²தாயா꞉ ப்ரத்³ருஶ்யதே ॥89॥
ஸா து³꞉கை²ர்விவிதை⁴ர்முக்தா
	ஸுக²மாப்னோத்யனுத்தமம் ।
ப்ரணிபாதப்ரஸன்னா ஹி
	மைதி²லீ ஜனகாத்மஜா ॥90॥
அலமேஷா பரித்ராதும்
	ராக்ஷஸிர்மஹதோ ப⁴யாத் ।
தத꞉ ஸா ஹ்ரீமதீ பா³லா
	ப⁴ர்துர்விஜயஹர்ஷிதா ॥91॥
அவோசத்³யதி³ தத்தத்²யம்
	ப⁴வேயம் ஶரணம் ஹி வ꞉।
தாம் சாஹம் தாத்³ருஶீம் த்³ருஷ்ட்வா
	ஸீதாயா தா³ருணாம் த³ஶாம் ॥92॥
சிந்தயாமாஸ விஶ்ராந்தோ
	ந ச மே நிர்வ்ருதம் மன꞉।
ஸம்பா⁴ஷணார்தே² ச மயா
	ஜானக்யாஶ்சிந்திதோ விதி⁴꞉॥93॥
இக்ஷ்வாகுகுலவம்ஶஸ்து
	ஸ்துதோ மம புரஸ்க்ருத꞉।
ஶ்ருத்வா து க³தி³தாம் வாசம்
	ராஜர்ஷிக³ணபூ⁴ஷிதாம் ॥94॥
ப்ரத்யபா⁴ஷத மாம் தே³வீ
	பா³ஷ்பை꞉ பிஹிதலோசனா ।
கஸ்த்வம் கேன கத²ம் சேஹ
	ப்ராப்தோ வானரபுங்க³வ ॥95॥
கா ச ராமேண தே ப்ரீதி꞉
	தன்மே ஶம்ஸிதுமர்ஹஸி ।
தஸ்யாஸ்தத்³வசனம் ஶ்ருத்வா
	அஹமப்யப்³ருவம் வச꞉॥96॥
தே³வி ராமஸ்ய ப⁴ர்துஸ்தே
	ஸஹாயோ பீ⁴மவிக்ரம꞉।
ஸுக்³ரீவோ நாம விக்ராந்தோ
	வானரேந்த்³ரோ மஹாப³ல꞉॥97॥
தஸ்ய மாம் வித்³தி⁴ ப்⁴ருத்யம் த்வம்
	ஹனூமந்தமிஹாக³தம் ।
ப⁴ர்த்ரா ஸம்ப்ரஹிதஸ்துப்⁴யம்
	ராமேணாக்லிஷ்டகர்மணா ॥98॥
இத³ம் து புருஷவ்யாக்⁴ர꞉
	ஸ்ரீமான் தா³ஶரதி²꞉ ஸ்வயம் ।
அங்கு³லீயமபி⁴ஜ்ஞானம்
	அதா³த்துப்⁴யம் யஶஸ்வினி ॥99॥
ததி³ச்சா²மி த்வயாஜ்ஞப்தம்
	தே³வி கிம் கரவாண்யஹம் ।
ராமலக்ஷ்மணயோ꞉ பார்ஶ்வம்
	நயாமி த்வாம் கிமுத்தரம் ॥100॥
ஏதச்ச்²ருத்வா விதி³த்வா ச
	ஸீதா ஜனகனந்தி³னீ ।
ஆஹ ராவணமுத்பாட்ய
	ராக⁴வோ மாம் நயத்விதி ॥101॥
ப்ரணம்ய ஶிரஸா தே³வீம்
	அஹமார்யாமனிந்தி³தாம் ।
ராக⁴வஸ்ய மனோஹ்லாத³ம்
	அபி⁴ஜ்ஞானமயாசிஷம் ॥102॥
அத² மாமப்³ரவீத்ஸீதா
	க்³ருஹ்யதாமயமுத்தம꞉।
மணிர்யேன மஹாபா³ஹூ
	ராமஸ்த்வாம் ப³ஹுமன்யதே ॥103॥
இத்யுக்த்வா து வராரோஹா
	மணிப்ரவரமுத்தமம் ।
ப்ராயச்ச²த்பரமோத்³விக்³னா
	வாசா மாம் ஸந்தி³தே³ஶ ஹ ॥104॥
ததஸ்தஸ்யை ப்ரணம்யாஹம்
	ராஜபுத்ர்யை ஸமாஹித꞉।
ப்ரத³க்ஷிணம் பரிக்ராமம்
	இஹாப்⁴யுத்³க³தமானஸ꞉॥105॥
உத்தரம் புனரேவாஹ
	நிஶ்சித்ய மனஸா ததா³ ।
ஹனூமன்மம வ்ருத்தாந்தம்
	வக்துமர்ஹஸி ராக⁴வே ॥106॥
யதா² ஶ்ருத்வைவ நசிராத்
	தாவுபௌ⁴ ராமலக்ஷ்மணௌ ।
ஸுக்³ரீவஸஹிதௌ வீரௌ
	உபேயாதாம் ததா² குரு ॥107॥
யத்³யன்யதா² ப⁴வேதே³தத்
	த்³வௌ மாஸௌ ஜீவிதம் மம ।
ந மாம் த்³ரக்ஷ்யதி காகுத்ஸ்தோ²
	ம்ரியே ஸாஹமநாத²வத் ॥108॥
தச்ச்²ருத்வா கருணம் வாக்யம்
	க்ரோதோ⁴ மாமப்⁴யவர்தத ।
உத்தரம் ச மயா த்³ருஷ்டம்
	கார்யஶேஷமனந்தரம் ॥109॥
ததோऽவர்த⁴த மே காய꞉
	ததா³ பர்வதஸம்நிப⁴꞉।
யுத்³தா⁴காங்க்ஷீ வனம் தஸ்ய
	விநாஶயிதுமாரபே⁴ ॥110॥
தத்³ப⁴க்³னம் வநக²ண்ட³ம் து
	ப்⁴ராந்தத்ரஸ்தம்ருக³த்³விஜம் ।
ப்ரதிபு³த்³த்⁴ய நிரீக்ஷந்தே
	ராக்ஷஸ்யோ விக்ருதானனா꞉॥111॥
மாம் ச த்³ருஷ்ட்வா வனே தஸ்மின்
	ஸமாக³ம்ய ததஸ்தத꞉।
தா꞉ ஸமப்⁴யாக³தா꞉ க்ஷிப்ரம்
	ராவணாயாசசக்ஷிரே ॥112॥
ராஜன்வனமித³ம் து³ர்க³ம்
	தவ ப⁴க்³னம் து³ராத்மனா ।
வானரேண ஹ்யவிஜ்ஞாய
	தவ வீர்யம் மஹாப³ல ॥113॥
தஸ்ய து³ர்பு³த்³தி⁴தா ராஜன்
	தவ விப்ரியகாரிண꞉।
வத⁴மாஜ்ஞாபய க்ஷிப்ரம்
	யதா²ஸௌ ந ர்புனவ்ரஜேத் ॥114॥
தச்ச்²ருத்வா ராக்ஷஸேந்த்³ரேண
	விஸ்ருஷ்டா ப³ஹுது³ர்ஜயா꞉।
ராக்ஷஸா꞉ கிங்கரா நாம
	ராவணஸ்ய மனோऽனுகா³꞉॥115॥
தேஷாமஶீதிஸாஹஸ்ரம்
	ஶூலமுத்³க³ரபாணினாம் ।
மயா தஸ்மின்வனோத்³தே³ஶே
	பரிகே⁴ண நிஷூதி³தம் ॥116॥
தேஷாம் து ஹதஶிஷ்டா யே
	தே க³தா லகு⁴விக்ரமா꞉।
நிஹதம் ச மயா ஸைன்யம்
	ராவணாயாசசக்ஷிரே ॥117॥
ததோ மே பு³த்³தி⁴ருத்பன்னா
	சைத்யப்ராஸாத³முத்தமம் ।
தத்ரஸ்தா²ன்ராக்ஷஸான்ஹத்வா
	ஶதம் ஸ்தம்பே⁴ன வை புன꞉॥118॥
லலாமபூ⁴தோ லங்காயா
	மயா வித்⁴வம்ஸிதோ ருஷா ।
தத꞉ ப்ரஹஸ்தஸ்ய ஸுதம்
	ஜம்பு³மாலினமாதி³ஶத் ॥119॥
ராக்ஷஸைர்ப³ஹுபி⁴꞉ ஸார்த⁴ம்
	கோ⁴ரரூபைர்ப⁴யானகை꞉।
தமஹம் ப³லஸம்பன்னம்
	ராக்ஷஸம் ரணகோவித³ம் ॥120॥
பரிகே⁴ணாதிகோ⁴ரேண
	ஸூத³யாமி ஸஹானுக³ம் ।
தச்ச்²ருத்வா ராக்ஷஸேந்த்³ரஸ்து
	மந்த்ரிபுத்ரான்மஹாப³லான் ॥121॥
பதா³திப³லஸம்பன்னான்
	ப்ரேஷயாமாஸ ராவண꞉।
பரிகே⁴ணைவ தான்ஸர்வான்
	நயாமி யமஸாத³னம் ॥122॥
மந்த்ரிபுத்ரான்ஹதாஞ்ஶ்ருத்வா
	ஸமரே லகு⁴விக்ரமான் ।
பஞ்சஸேநாக்³ரகா³ஞ்ஶூரான்
	ப்ரேஷயாமாஸ ராவண꞉॥123॥
தானஹம் ஸஹஸைன்யான்வை
	ஸர்வானேவாப்⁴யஸூத³யம் ।
தத꞉ புனர்த³ஶக்³ரீவ꞉
	புத்ரமக்ஷம் மஹாப³லம் ॥124॥
ப³ஹுபீ⁴ ராக்ஷஸை꞉ ஸார்த⁴ம்
	ப்ரேஷயாமாஸ ஸம்யுகே³ ।
தம் து மந்தோ³த³ரீ புத்ரம்
	குமாரம் ரணபண்டி³தம் ॥125॥
ஸஹஸா க²ம் ஸமுத்³யந்தம்
	பாத³யோஶ்ச க்³ருஹீதவான் ।
தமாஸீனம் ஶதகு³ணம்
	ப்⁴ராமயித்வா வ்யபேஷயம் ॥126॥
தமக்ஷமாக³தம் ப⁴க்³னம்
	நிஶம்ய ஸ த³ஶானன꞉।
ததஶ்சேந்த்³ரஜிதம் நாம
	த்³விதீயம் ராவண꞉ ஸுதம் ॥127॥
வ்யாதி³தே³ஶ ஸுஸங்க்ருத்³தோ⁴
	ப³லினம் யுத்³த⁴து³ர்மத³ம் ।
தச்சாப்யஹம் ப³லம் ஸர்வம்
	தம் ச ராக்ஷஸபுங்க³வம் ॥128॥
நஷ்டௌஜஸம் ரணே க்ருத்வா
	பரம் ஹர்ஷமுபாக³த꞉।
மஹதாபி மஹாபா³ஹு꞉
	ப்ரத்யயேன மஹாப³ல꞉॥129॥
ப்ரேஹிதோ ராவணேனைஷ
	ஸஹ வீரைர்மதோ³த்³த⁴தை꞉।
ஸோऽவிஷஹ்யம் ஹி மாம் பு³த்³த்⁴வா
	ஸ்வஸைன்யம் சாவமர்தி³தம் ॥130॥
ப்³ரஹ்மணோऽஸ்த்ரேண ஸ து மாம்
	ப்ரப³த்³த்⁴வா சாதிவேகி³ன꞉।
ரஜ்ஜுபி⁴ஶ்சாபி ப³த்⁴னந்தி
	ததோ மாம் தத்ர ராக்ஷஸா꞉॥131॥
ராவணஸ்ய ஸமீபம் ச
	க்³ருஹீத்வா மாமுபாக³மன் ।
த்³ருஷ்ட்வா ஸம்பா⁴ஷிதஶ்சாஹம்
	ராவணேன து³ராத்மனா ॥132॥
ப்ருஷ்டஶ்ச லங்காக³மனம்
	ராக்ஷஸானாம் ச தம் வத⁴ம் ।
தத்ஸர்வம் ச ரணே தத்ர
	ஸீதார்த²முபஜல்பிதம் ॥133॥
தஸ்யாஸ்து த³ர்ஶனாகாங்க்ஷீ
	ப்ராப்தஸ்த்வத்³ப⁴வனம் விபோ⁴ ।
மாருதஸ்யௌரஸ꞉ புத்ரோ
	வானரோ ஹனுமானஹம் ॥134॥
ராமதூ³தம் ச மாம் வித்³தி⁴
	ஸுக்³ரீவஸசிவம் கபிம் ।
ஸோऽஹம் தௌ³த்யேன ராமஸ்ய
	த்வத்ஸகாஶமிஹாக³த꞉॥135॥
ஶ்ருணு சாபி ஸமாதே³ஶம்
	யத³ஹம் ப்ரப்³ரவீமி தே ।
ராக்ஷஸேஶ ஹரீஶஸ்த்வாம்
	வாக்யமாஹ ஸமாஹிதம் ॥136॥
ஸுக்³ரீவஶ்ச மஹாபா⁴க³꞉
	ஸ த்வாம் கௌஶலமப்³ரவீத் ।
த⁴ர்மார்த²காமஸஹிதம்
	ஹிதம் பத்²யமுவாச ஹ ॥137॥
வஸதோ ருஷ்யமூகே மே
	பர்வதே விபுலத்³ருமே ।
ராக⁴வோ ரணவிக்ராந்தோ
	மித்ரத்வம் ஸமுபாக³த꞉॥138॥
தேன மே கதி²தம் ராஜன்
	பா⁴ர்யா மே ரக்ஷஸா ஹ்ருதா ।
தத்ர ஸாஹாய்யஹேதோர்மே
	ஸமயம் கர்துமர்ஹஸி ॥139॥
வாலினா ஹ்ருதராஜ்யேன
	ஸுக்³ரீவேண ஸஹ ப்ரபு⁴꞉।
சக்ரேऽக்³நிஸாக்ஷிகம் ஸக்²யம்
	ராக⁴வ꞉ ஸஹலக்ஷ்மண꞉॥140॥
தேன வாலினமாஹத்ய
	ஶரேணைகேன ஸம்யுகே³ ।
வானராணாம் மஹாராஜ꞉
	க்ருத꞉ ஸம்ப்லவதாம் ப்ரபு⁴꞉॥141॥
தஸ்ய ஸாஹாய்யமஸ்மாபி⁴꞉
	கார்யம் ஸர்வாத்மனா த்விஹ ।
தேன ப்ரஸ்தா²பிதஸ்துப்⁴யம்
	ஸமீபமிஹ த⁴ர்மத꞉॥142॥
க்ஷிப்ரமானீயதாம் ஸீதா
	தீ³யதாம் ராக⁴வஸ்ய ச ।
யாவன்ன ஹரயோ வீரா
	வித⁴மந்தி ப³லம் தவ ॥143॥
வானராணாம் ப்ரபா⁴வோऽயம்
	ந கேன விதி³த꞉ புரா ।
தே³வதானாம் ஸகாஶம் ச
	யே க³ச்ச²ந்தி நிமந்த்ரிதா꞉॥144॥
இதி வானரராஜஸ்த்வாம்
	ஆஹேத்யபி⁴ஹிதோ மயா ।
மாமைக்ஷத ததோ ருஷ்ட꞉
	சக்ஷுஷா ப்ரத³ஹன்னிவ ॥145॥
தேன வத்⁴யோऽஹமாஜ்ஞப்தோ
	ரக்ஷஸா ரௌத்³ரகர்மணா ।
மத்ப்ரபா⁴வமவிஜ்ஞாய
	ராவணேன து³ராத்மனா ॥146॥
ததோ விபீ⁴ஷணோ நாம
	தஸ்ய ப்⁴ராதா மஹாமதி꞉।
தேன ராக்ஷஸராஜஶ்ச
	யாசிதோ மம காரணாத் ॥147॥
நைவம் ராக்ஷஸஶார்தூ³ல
	த்யஜ்யதாமேஷ நிஶ்சய꞉।
ராஜஶாஸ்த்ரவ்யபேதோ ஹி
	மார்க³꞉ ஸம்லக்ஷ்யதே த்வயா ॥148॥
தூ³தவத்⁴யா ந த்³ருஷ்டா ஹி
	ராஜஶாஸ்த்ரேஷு ராக்ஷஸ ।
தூ³தேன வேதி³தவ்யம் ச
	யதா²பி⁴ஹிதவாதி³னா ॥149॥
ஸுமஹத்யபராதே⁴ऽபி
	தூ³தஸ்யாதுலவிக்ரம ।
விரூபகரணம் த்³ருஷ்டம்
	ந வதோ⁴ऽஸ்தீஹ ஶாஸ்த்ரத꞉॥150॥
விபீ⁴ஷணேனைவமுக்தோ
	ராவண꞉ ஸந்தி³தே³ஶ தான் ।
ராக்ஷஸானேததே³வாத்³ய
	லாங்கூ³லம் த³ஹ்யதாமிதி ॥151॥
ததஸ்தஸ்ய வச꞉ ஶ்ருத்வா
	மம புச்ச²ம் ஸமந்தத꞉।
வேஷ்டிதம் ஶணவல்கைஶ்ச
	பட்டை꞉ கார்பாஸகைஸ்ததா² ॥152॥
ராக்ஷஸா꞉ ஸித்³த⁴ஸம்நாஹா꞉
	ததஸ்தே சண்ட³விக்ரமா꞉।
ததா³தீ³ப்யந்த மே புச்ச²ம்
	ஹனந்த꞉ காஷ்ட²முஷ்டிபி⁴꞉॥153॥
ப³த்³த⁴ஸ்ய ப³ஹுபி⁴꞉ பாஶை꞉
	யந்த்ரிதஸ்ய ச ராக்ஷஸை꞉।
ந மே பீடா³ப⁴வத்காசித்
	தி³த்³ருக்ஷோர்நக³ரீம் தி³வா ॥154॥
ததஸ்தே ராக்ஷஸா꞉ ஶூரா
	ப³த்³த⁴ம் மாமக்³நிஸம்வ்ருதம் ।
அகோ⁴ஷயன்ராஜமார்கே³
	நக³ரத்³வாரமாக³தா꞉॥155॥
ததோऽஹம் ஸுமஹத்³ரூபம்
	ஸங்க்ஷிப்ய புனராத்மன꞉।
விமோசயித்வா தம் ப³ந்த⁴ம்
	ப்ரக்ருதிஸ்த²꞉ ஸ்தி²த꞉ புன꞉॥156॥
ஆயஸம் பரிக⁴ம் க்³ருஹ்ய
	தானி ரக்ஷாம்ஸ்யஸூத³யம் ।
ததஸ்தந்நக³ரத்³வாரம்
	வேகே³னாப்லுதவானஹம் ॥157॥
புச்சே²ன ச ப்ரதீ³ப்தேன
	தாம் புரீம் ஸாட்டகோ³புராம் ।
த³ஹாம்யஹமஸம்ப்⁴ராந்தோ
	யுகா³ந்தாக்³நிரிவ ப்ரஜா꞉॥158॥
விநஷ்டா ஜானகீ வ்யக்தம்
	ந ஹ்யத³க்³த⁴꞉ ப்ரத்³ருஶ்யதே ।
லங்காயா꞉ கஶ்சிது³த்³தே⁴ஶ꞉
	ஸர்வா ப⁴ஸ்மீக்ருதா புரீ ॥159॥
த³ஹதா ச மயா லங்காம்
	த³க்³தா⁴ ஸீதா ந ஸம்ஶய꞉।
ராமஸ்ய ச மஹத்கார்யம்
	மயேத³ம் விப²லீக்ருதம் ॥160॥
இதி ஶோகஸமாவிஷ்ட꞉
	சிந்தாமஹமுபாக³த꞉।
ததோऽஹம் வாசமஶ்ரௌஷம்
	சாரணானாம் ஶுபா⁴க்ஷராம் ॥161॥
ஜானகீ ந ச த³க்³தே⁴தி
	விஸ்மயோத³ந்தபா⁴ஷிணாம் ।
ததோ மே பு³த்³தி⁴ருத்பன்னா
	ஶ்ருத்வா தாமத்³பு⁴தாம் கி³ரம் ॥162॥
அத³க்³தா⁴ ஜானகீத்யேவ
	நிமித்தைஶ்சோபலக்ஷிதம் ।
தீ³ப்யமானே து லாங்கூ³லே
	ந மாம் த³ஹதி பாவக꞉॥163॥
ஹ்ருத³யம் ச ப்ரஹ்ருஷ்டம் மே
	வாதாஸ்ஸுரபி⁴க³ந்தி⁴ன꞉।
தைர்நிமித்தைஶ்ச த்³ருஷ்டார்தை²꞉
	காரணைஶ்ச மஹாகு³ணை꞉॥164॥
ருஷிவாக்யைஶ்ச த்³ருஷ்டார்தை²꞉
	அப⁴வம் ஹ்ருஷ்டமானஸ꞉।
புனர்த்³ருஷ்டா ச வைதே³ஹீ
	விஸ்ருஷ்டஶ்ச தயா புன꞉॥165॥
தத꞉ பர்வதமாஸாத்³ய
	தத்ராரிஷ்டமஹம் புன꞉।
ப்ரதிப்லவனமாரேபே⁴
	யுஷ்மத்³த⁴ர்ஶனகாங்க்ஷயா ॥166॥
தத꞉ ஶ்வஸனசந்த்³ரார்க-
	ஸித்³த⁴க³ந்த⁴ர்வஸேவிதம் ।
பந்தா²னமஹமாக்ரம்ய
	ப⁴வதோ த்³ருஷ்டவானிஹ ॥167॥
ராக⁴வஸ்ய ப்ரஸாதே³ன
	ப⁴வதாம் சைவ தேஜஸா ।
ஸுக்³ரீவஸ்ய ச கார்யார்த²ம்
	மயா ஸர்வமனுஷ்டி²தம் ॥168॥
ஏதத்ஸர்வம் மயா தத்ர
	யதா²வது³பபாதி³தம் ।
தத்ர யன்ன க்ருதம் ஶேஷம்
	தத்ஸர்வம் க்ரியதாமிதி ॥169॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ அஷ்டபஞ்சாஶ꞉ ஸர்க³꞉