அத² ஷஷ்டிதம꞉ ஸர்க³꞉
தஸ்ய தத்³வசனம் ஶ்ருத்வா
	வாலிஸூனுரபா⁴ஷத ।
அஶ்விபுத்ரௌ மஹாவேகௌ³
	ப³லவந்தௌ ப்லவங்க³மௌ ॥1॥
பிதாமஹவரோத்ஸேகாத்
	பரமம் த³ர்பமாஸ்தி²தௌ ।
அஶ்வினோர்மானனார்த²ம் ஹி
	ஸர்வலோகபிதாமஹ꞉॥2॥
ஸர்வாவத்⁴யத்வமதுலம்
	அனயோர்த³த்தவான்புரா ।
வரோத்ஸேகேன மத்தௌ ச
	ப்ரமத்²ய மஹதீம் சமூம் ॥3॥
ஸுராணாமம்ருதம் வீரௌ
	பீதவந்தௌ மஹாப³லௌ ।
ஏதாவேவ ஹி ஸங்க்ருத்³தௌ⁴
	ஸவாஜிரத²குஞ்ஜராம் ॥4॥
லங்காம் நாஶயிதும் ஶக்தௌ
	ஸர்வே திஷ்ட²ந்து வானரா꞉।
அஹமேகோऽபி பர்யாப்த꞉
	ஸராக்ஷஸக³ணாம் புரீம் ॥5॥
தாம் லங்காம் தரஸா ஹந்தும்
	ராவணம் ச மஹாப³லம் ।
கிம் புன꞉ ஸஹிதோ வீரை꞉
	ப³லவத்³பி⁴꞉ க்ருதாத்மபி⁴꞉॥6॥
க்ருதாஸ்த்ரை꞉ ப்லவகை³꞉ ஶக்தை꞉
	ப⁴வத்³பி⁴ர்விஜயைஷிபி⁴꞉।
வாயுஸூனோர்ப³லேனைவ
	த³க்³தா⁴ லங்கேதி ந꞉ ஶ்ருதம் ॥7॥
த்³ருஷ்ட்வா தே³வீ ந சானீதா
	இதி தத்ர நிவேதி³தும் ।
ந யுக்தமிவ பஶ்யாமி
	ப⁴வத்³பி⁴꞉ க்²யாதபௌருஷை꞉॥8॥
நஹி வ꞉ ப்லவனே கஶ்சித்
	நாபி கஶ்சித் பராக்ரமே ।
துல்ய꞉ ஸாமரதை³த்யேஷு
	லோகேஷு ஹரிஸத்தமா꞉॥9॥
ஜித்வா லங்காம் ஸரக்ஷௌகா⁴ம்
	ஹத்வா தம் ராவணம் ரணே ।
ஸீதாமாதா³ய க³ச்சா²ம꞉
	ஸித்³தா⁴ர்தா² ஹ்ருஷ்டமானஸா꞉॥10॥
தேஷ்வேவம் ஹதவீரேஷு
	ராக்ஷஸேஷு ஹனூமதா ।
கிமன்யத³த்ர கர்தவ்யம்
	க்³ருஹீத்வா யாம ஜானகீம் ॥11॥
ராமலக்ஷ்மணயோர்மத்⁴யே
	ந்யஸ்யாம ஜனகாத்மஜாம் ।
கிம் வ்யலீகைஸ்து தான் ஸர்வான்
	வானரான் வானரர்ஷபா⁴ன் ॥12॥
வயமேவ ஹி க³த்வா தான்
	ஹத்வா ராக்ஷஸபுங்க³வான் ।
ராக⁴வம் த்³ரஷ்டுமர்ஹாம꞉
	ஸுக்³ரீவம் ஸஹலக்ஷ்மணம் ॥13॥
தமேவம் க்ருதஸங்கல்பம்
	ஜாம்ப³வான்ஹரிஸத்தம꞉।
உவாச பரமப்ரீதோ
	வாக்யமர்த²வத³ர்த²வித் ॥14॥
நைஷா பு³த்³தி⁴ர்மஹாபு³த்³தே⁴
	யத்³ ப்³ரவீஷி மஹாகபே ।
விசேதும் வயமாஜ்ஞப்தா
	த³க்ஷிணாம் தி³ஶமுத்தமாம் ॥15॥
நானேதும் கபிராஜேன
	நைவ ராமேண தீ⁴மதா ।
கத²ஞ்சிந்நிர்ஜிதாம் ஸீதாம்
	அஸ்மாபி⁴ர்நாபி⁴ரோசயேத் ॥16॥
ராக⁴வோ ந்ருபஶார்தூ³ல꞉
	குலம் வ்யபதி³ஶன் ஸ்வகம் ।
ப்ரதிஜ்ஞாய ஸ்வயம் ராஜா
	ஸீதாவிஜயமக்³ரத꞉॥17॥
ஸர்வேஷாம் கபிமுக்²யானாம்
	கத²ம் மித்²யா கரிஷ்யதி ।
விப²லம் கர்ம ச க்ருதம்
	ப⁴வேத் துஷ்டிர்ன தஸ்ய ச ॥18॥
வ்ருதா² ச த³ர்ஶிதம் வீர்யம்
	ப⁴வேத்³ வானரபுங்க³வா꞉।
தஸ்மாத்³ க³ச்சா²ம வை ஸர்வே
	யத்ர ராம꞉ ஸலக்ஷ்மண꞉।
ஸுக்³ரீவஶ்ச மஹாதேஜா꞉
	கார்யஸ்யாஸ்ய நிவேத³னே ॥19॥
ந தாவதே³ஷா மதிரக்ஷமா நோ
	யதா² ப⁴வான்பஶ்யதி ராஜபுத்ர ।
யதா² து ராமஸ்ய மதிர்நிவிஷ்டா
	ததா² ப⁴வான்பஶ்யது கார்யஸித்³தி⁴ம் ॥20॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஷஷ்டிதம꞉ ஸர்க³꞉