அத² சது꞉ஷஷ்டிதம꞉ ஸர்க³꞉
ஸுக்³ரீவேணைவமுக்தஸ்து
	ஹ்ருஷ்டோ த³தி⁴முக²꞉ கபி꞉।
ராக⁴வம் லக்ஷ்மணம் சைவ
	ஸுக்³ரீவம் சாப்⁴யவாத³யத் ॥1॥
ஸ ப்ரணம்ய ச ஸுக்³ரீவம்
	ராக⁴வௌ ச மஹாப³லௌ ।
வானரை꞉ ஸஹித꞉ ஶூரை꞉
	தி³வமேவோத்பபாத ஹ ॥2॥
ஸ யதை²வாக³த꞉ பூர்வம்
	ததை²வ த்வரிதம் க³த꞉।
நிபத்ய க³க³நாத்³பூ⁴மௌ
	தத்³வனம் ப்ரவிவேஶ ஹ ॥3॥
ஸ ப்ரவிஷ்டோ மது⁴வனம்
	த³த³ர்ஶ ஹரியூத²பான் ।
விமதா³னுத்³த⁴தான்ஸர்வான்
	மேஹமானான்மதூ⁴த³கம் ॥4॥
ஸ தானுபாக³மத்³வீரோ
	ப³த்³த்⁴வா கரபுடாஞ்ஜலிம் ।
உவாச வசனம் ஶ்லக்ஷ்ணம்
	இத³ம் ஹ்ருஷ்டவத³ங்க³த³ம் ॥5॥
ஸௌம்ய ரோஷோ ந கர்தவ்யோ
	யதே³பி⁴꞉ பரிவாரணம் ।
அஜ்ஞாநாத்³ரக்ஷிபி⁴꞉ க்ரோதா⁴த்
	ப⁴வந்த꞉ ப்ரதிஷேதி⁴தா꞉॥6॥
ஶ்ராந்தோ தூ³ராத³னுப்ராப்தோ
	ப⁴க்ஷயஸ்வ ஸ்வகம் மது⁴ ।
யுவராஜஸ்த்வமீஶஶ்ச
	வனஸ்யாஸ்ய மஹாப³லா ॥7॥
மௌர்க்²யாத்பூர்வம் க்ருதோ ரோஷ꞉
	தத்³ப⁴வான்க்ஷந்துமர்ஹதி ।
யதை²வ ஹி பிதா தேऽபூ⁴த்
	பூர்வம் ஹரிக³ணேஶ்வர꞉॥8॥
ததா² த்வமபி ஸுக்³ரீவோ
	நான்யஸ்து ஹரிஸத்தம ।
ஆக்²யாதம் ஹி மயா க³த்வா
	பித்ருவ்யஸ்ய தவானக⁴ ॥9॥
இஹோபயானம் ஸர்வேஷாம்
	ஏதேஷாம் வனசாரிணாம் ।
ப⁴வதா³க³மனம் ஶ்ருத்வா
	ஸஹைபி⁴ர்வனசாரிபி⁴꞉॥10॥
ப்ரஹ்ருஷ்டோ ந து ருஷ்டோऽஸௌ
	வனம் ஶ்ருத்வா ப்ரத⁴ர்ஷிதம் ।
ப்ரஹ்ருஷ்டோ மாம் பித்ருவ்யஸ்தே
	ஸுக்³ரீவோ வானரேஶ்வர꞉॥11॥
ஶீக்⁴ரம் ப்ரேஷய ஸர்வாம்ஸ்தான்
	இதி ஹோவாச பார்தி²வ꞉।
ஶ்ருத்வா த³தி⁴முக²ஸ்யைதத்
	வசனம் ஶ்லக்ஷ்ணமங்க³த³꞉॥12॥
அப்³ரவீத்தான்ஹரிஶ்ரேஷ்டோ²
	வாக்யம் வாக்யவிஶாரத³꞉।
ஶங்கே ஶ்ருதோऽயம் வ்ருத்தாந்தோ
	ராமேண ஹரியூத²பா꞉॥13॥
அயம் ச ஹர்ஷாதா³க்²யாதி
	தேன ஜாநாமி ஹேதுனா ।
தத்க்ஷமம் நேஹ ந꞉ ஸ்தா²தும்
	க்ருதே கார்யே பரந்தபா꞉॥14॥
பீத்வா மது⁴ யதா²காமம்
	விக்ராந்தா வனசாரிண꞉।
கிம் ஶேஷம் க³மனம் தத்ர
	ஸுக்³ரீவோ யத்ர வானர꞉॥15॥
ஸர்வே யதா² மாம் வக்ஷ்யந்தி
	ஸமேத்ய ஹரிபுங்க³வா꞉।
ததா²ஸ்மி கர்தா கர்தவ்யே
	ப⁴வத்³பி⁴꞉ பரவானஹம் ॥16॥
நாஜ்ஞாபயிதுமீஶோऽஹம்
	யுவராஜோऽஸ்மி யத்³யபி ।
அயுக்தம் க்ருதகர்மாணோ
	யூயம் த⁴ர்ஷயிதும் ப³லாத் ॥17॥
ப்³ருவதஶ்சாங்க³த³ஸ்யைவம்
	ஶ்ருத்வா வசனமுத்தமம் ।
ப்ரஹ்ருஷ்டமனஸோ வாக்யம்
	இத³மூசுர்வனௌகஸ꞉॥18॥
ஏவம் வக்ஷ்யதி கோ ராஜன்
	ப்ரபு⁴꞉ ஸன்வானரர்ஷப⁴ ।
ஐஶ்வர்யமத³மத்தோ ஹி
	ஸர்வோऽஹமிதி மன்யதே ॥19॥
தவ சேத³ம் ஸுஸத்³ருஶம்
	வாக்யம் நான்யஸ்ய கஸ்யசித் ।
ஸன்னதிர்ஹி தவாக்²யாதி
	ப⁴விஷ்யச்சு²ப⁴யோக்³யதாம் ॥20॥
ஸர்வே வயமபி ப்ராப்தா꞉
	தத்ர க³ந்தும் க்ருதக்ஷணா꞉।
ஸ யத்ர ஹரிவீராணாம்
	ஸுக்³ரீவ꞉ பதிரவ்யய꞉॥21॥
த்வயா ஹ்யனுக்தைர்ஹரிபி⁴꞉
	நைவ ஶக்யம் பதா³த்பத³ம் ।
க்வசித்³க³ந்தும் ஹரிஶ்ரேஷ்ட²
	ப்³ரூம꞉ ஸத்யமித³ம் து தே ॥22॥
ஏவம் து வத³தாம் தேஷாம்
	அங்க³த³꞉ ப்ரத்யபா⁴ஷத ।
ஸாது⁴ க³ச்சா²ம இத்யுக்த்வா
	க²முத்பேதுர்மஹாப³லா꞉॥23॥
உத்பதந்தமனூத்பேது꞉
	ஸர்வே தே ஹரியூத²பா꞉।
க்ருத்வாऽऽகாஶம் நிராகாஶம்
	யந்த்ரோத்க்ஷிப்தா இவோபலா꞉॥24॥
அங்க³த³ம் புரத꞉ க்ருத்வா
	ஹனூமந்தம் ச வானரம் ।
தேऽம்ப³ரம் ஸஹஸோத்பத்ய
	வேக³வந்த꞉ ப்லவங்க³மா꞉॥25॥
வினத³ந்தோ மஹாநாத³ம்
	க⁴னா வாதேரிதா யதா² ।
அங்க³தே³ ஸமனுப்ராப்தே
	ஸுக்³ரீவோ வானரேஶ்வர꞉॥26॥
உவாச ஶோகஸந்தப்தம்
	ராமம் கமலலோசனம் ।
ஸமாஶ்வஸிஹி ப⁴த்³ரம் தே
	த்³ருஷ்டா தே³வீ ந ஸம்ஶய꞉॥27॥
நாக³ந்துமிஹ ஶக்யம் தை꞉
	அதீதஸமயைரிஹ ।
அங்க³த³ஸ்ய ப்ரஹர்ஷாச்ச
	ஜாநாமி ஶுப⁴த³ர்ஶன ॥28॥
ந மத்ஸகாஶமாக³ச்சே²த்
	க்ருத்யே ஹி விநிபாதிதே ।
யுவராஜோ மஹாபா³ஹு꞉
	ப்லவதாமங்க³தோ³ வர꞉॥29॥
யத்³யப்யக்ருதக்ருத்யானாம்
	ஈத்³ருஶ꞉ ஸ்யாது³பக்ரம꞉।
ப⁴வேத்து தீ³னவத³னோ
	ப்⁴ராந்தவிப்லுதமானஸ꞉॥30॥
பித்ருபைதாமஹம் சைதத்
	பூர்வகைரபி⁴ரக்ஷிதம் ।
ந மே மது⁴வனம் ஹன்யாத்
	அத்³ருஷ்ட்வா ஜனகாத்மஜாம் ॥31॥
கௌஸல்யா ஸுப்ரஜா ராம
	ஸமாஶ்வஸிஹி ஸுவ்ரத ।
த்³ருஷ்டா தே³வீ ந ஸந்தே³ஹோ
	ந சான்யேன ஹனூமதா ॥32॥
நஹ்யன்ய꞉ கர்மணோ ஹேது꞉
	ஸாத⁴னேऽஸ்ய ஹனூமத꞉।
ஹனூமதீஹ ஸித்³தி⁴ஶ்ச
	மதிஶ்ச மதிஸத்தம ॥33॥
வ்யவஸாயஶ்ச ஶௌர்யம் ச
	ஶ்ருதம் சாபி ப்ரதிஷ்டி²தம் ।
ஜாம்ப³வான்யத்ர நேதா ஸ்யாத்
	அங்க³த³ஶ்ச ஹரீஶ்வர꞉॥34॥
ஹனூமாம்ஶ்சாப்யதி⁴ஷ்டா²தா
	ந தத்ர க³திரன்யதா² ।
மா பூ⁴ஶ்சிந்தாஸமாயுக்த꞉
	ஸம்ப்ரத்யமிதவிக்ரம ॥35॥
யதா³ ஹி த³ர்பிதோத³க்³னா꞉
	ஸங்க³தா꞉ கானனௌகஸ꞉।
நைஷாமக்ருதகர்யாணாம்
	ஈத்³ருஶ꞉ ஸ்யாது³பக்ரம꞉॥36॥
வனப⁴ங்கே³ன ஜாநாமி
	மதூ⁴னாம் ப⁴க்ஷணேன ச ।
தத꞉ கிலகிலாஶப்³த³ம்
	ஶுஶ்ராவாஸன்னமம்ப³ரே ॥37॥
ஹனூமத்கர்மத்³ருப்தானாம்
	நத³தாம் கானனௌகஸாம் ।
கிஷ்கிந்தா⁴முபயாதானாம்
	ஸித்³தி⁴ம் கத²யதாமிவ ॥38॥
தத꞉ ஶ்ருத்வா நிநாத³ம் தம்
	கபீனாம் கபிஸத்தம꞉।
ஆயதாஞ்சிதலாங்கூ³ல꞉
	ஸோऽப⁴வத்³த்⁴ருஷ்டமானஸ꞉॥39॥
ஆஜக்³முஸ்தேऽபி ஹரயோ
	ராமத³ர்ஶனகாங்க்ஷிண꞉।
அங்க³த³ம் புரத꞉ க்ருத்வா
	ஹனூமந்தம் ச வானரம் ॥40॥
தேऽங்க³த³ப்ரமுகா² வீரா꞉
	ப்ரஹ்ருஷ்டாஶ்ச முதா³ன்விதா꞉।
நிபேதுர்ஹரிராஜஸ்ய
	ஸமீபே ராக⁴வஸ்ய ச ॥41॥
ஹனூமாம்ஶ்ச மஹாபா³ஹு꞉
	ப்ரணம்ய ஶிரஸா தத꞉।
நியதாமக்ஷதாம் தே³வீம்
	ராக⁴வாய ந்யவேத³யத் ॥42॥
த்³ருஷ்டா தே³வீதி ஹனுமத்
	வத³நாத³ம்ருதோபமம் ।
ஆகர்ண்ய வசனம் ராமோ
	ஹர்ஷமாப ஸலக்ஷ்மண꞉॥43॥
நிஶ்சிதார்த²ம் ததஸ்தஸ்மின்
	ஸுக்³ரீவம் பவனாத்மஜே ।
லக்ஷ்மண꞉ ப்ரீதிமான்ப்ரீதம்
	ப³ஹுமாநாத³வைக்ஷத ॥44॥
ப்ரீத்யா ச பரயோபேதோ
	ராக⁴வ꞉ பரவீரஹா ।
ப³ஹுமானேன மஹதா
	ஹனூமந்தமவைக்ஷத ॥45॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ சது꞉ஷஷ்டிதம꞉ ஸர்க³꞉