அத² ஷட்ஷஷ்டிதம꞉ ஸர்க³꞉
ஏவமுக்தோ ஹனுமதா
	ராமோ த³ஶரதா²த்மஜ꞉।
தம் மணிம் ஹ்ருத³யே க்ருத்வா
	ருரோத³ ஸஹலக்ஷ்மண꞉॥1॥
தம் து த்³ருஷ்ட்வா மணிஶ்ரேஷ்ட²ம்
	ராக⁴வ꞉ ஶோககர்ஶித꞉।
நேத்ராப்⁴யாமஶ்ருபூர்ணாப்⁴யாம்
	ஸுக்³ரீவமித³மப்³ரவீத் ॥2॥
யதை²வ தே⁴னு꞉ ஸ்ரவதி
	ஸ்னேஹாத்³ வத்ஸஸ்ய வத்ஸலா ।
ததா² மமாபி ஹ்ருத³யம்
	மணிஶ்ரேஷ்ட²ஸ்ய த³ர்ஶனாத் ॥3॥
மணிரத்னமித³ம் த³த்தம்
	வைதே³ஹ்யா꞉ ஶ்வஶுரேண மே ।
வதூ⁴காலே யதா² ப³த்³த⁴ம்
	அதி⁴கம் மூர்த்⁴னி ஶோப⁴தே ॥4॥
அயம் ஹி ஜலஸம்பூ⁴தோ
	மணி꞉ ப்ரவரபூஜித꞉।
யஜ்ஞே பரமதுஷ்டேன
	த³த்த꞉ ஶக்ரேண தீ⁴மதா ॥5॥
இமம் த்³ருஷ்ட்வா மணிஶ்ரேஷ்ட²ம்
	ததா² தாதஸ்ய த³ர்ஶனம் ।
அத்³யாஸ்ம்யவக³த꞉ ஸௌம்ய
	வைதே³ஹஸ்ய ததா² விபோ⁴꞉॥6॥
அயம் ஹி ஶோப⁴தே தஸ்யா꞉
	ப்ரியாயா மூர்த்⁴னி மே மணி꞉।
அத்³யாஸ்ய த³ர்ஶனேனாஹம்
	ப்ராப்தாம் தாமிவ சிந்தயே ॥7॥
கிமாஹ ஸீதா வைதே³ஹீ
	ப்³ரூஹி ஸௌம்ய புன꞉ புன꞉।
பராஸுமிவ தோயேன
	ஸிஞ்சந்தீ வாக்யவாரிணா ॥8॥
இதஸ்து கிம் து³꞉க²தரம்
	யதி³மம் வாரிஸம்ப⁴வம் ।
மணிம் பஶ்யாமி ஸௌமித்ரே
	வைதே³ஹீமாக³தாம் வினா ॥9॥
சிரம் ஜீவதி வைதே³ஹீ
	யதி³ மாஸம் த⁴ரிஷ்யதி ।
க்ஷணம் வீர ந ஜீவேயம்
	வினா தாமஸிதேக்ஷணாம் ॥10॥
நய மாமபி தம் தே³ஶம்
	யத்ர த்³ருஷ்டா மம ப்ரியா ।
ந திஷ்டே²யம் க்ஷணமபி
	ப்ரவ்ருத்திமுபலப்⁴ய ச ॥11॥
கத²ம் ஸா மம ஸுஶ்ரோணி
	பீ⁴ரு பீ⁴ரு꞉ ஸதீ ததா³ ।
ப⁴யாவஹானாம் கோ⁴ராணாம்
	மத்⁴யே திஷ்ட²தி ரக்ஷஸாம் ॥12॥
ஶாரத³ஸ்திமிரோன்முக்தோ
	நூனம் சந்த்³ர இவாம்பு³தை³꞉।
ஆவ்ருதோ வத³னம் தஸ்யா
	ந விராஜதி ஸாம்ப்ரதம் ॥13॥
கிமாஹ ஸீதா ஹனுமம்ஸ்-
	தத்த்வத꞉ கத²யஸ்வ மே ।
ஏதேன க²லு ஜீவிஷ்யே
	பே⁴ஷஜேனாதுரோ யதா² ॥14॥
மது⁴ரா மது⁴ராலாபா கிமாஹ மம பா⁴மினீ ।
மத்³விஹீனா வராரோஹா
	ஹனுமன்கத²யஸ்வ மே ।
து³꞉கா²த்³து³꞉க²தரம் ப்ராப்ய
	கத²ம் ஜீவதி ஜானகீ ॥15॥
இத்யார்ஷே ஸ்ரீமத்³ராமாயணே வால்மீகீயே ஆதி³காவ்யே ஸுந்த³ரகாண்டே³ ஷட்ஷஷ்டிதம꞉ ஸர்க³꞉