అథ సప్తమః సర్గః
స వేశ్మజాలం బలవాన్దదర్శ
	వ్యాసక్తవైదూర్యసువర్ణజాలమ్ ।
యథా మహత్ప్రావృషి మేఘజాలం
	విద్యుత్పినద్ధం సవిహఙ్గజాలమ్ ॥1॥
నివేశనానాం వివిధాశ్చ శాలాః
	ప్రధానశఙ్ఖాయుధచాపశాలాః।
మనోహరాశ్చాపి పునర్విశాలా
	దదర్శ వేశ్మాద్రిషు చన్ద్రశాలాః॥2॥
గృహాణి నానావసురాజితాని
	దేవాసురైశ్చాపి సుపూజితాని ।
సర్వైశ్చ దోషైః పరివర్జితాని
	కపిర్దదర్శ స్వబలార్జితాని ॥3॥
తాని ప్రయత్నాభిసమాహితాని
	మయేన సాక్షాదివ నిర్మితాని ।
మహీతలే సర్వగుణోత్తరాణి
	దదర్శ లఙ్కాధిపతేర్గృహాణి ॥4॥
తతో దదర్శోచ్ఛ్రితమేఘరూపం
	మనోహరం కాఞ్చనచారురూపమ్ ।
రక్షోఽధిపస్యాత్మబలానురూపం
	గృహోత్తమం హ్యప్రతిరూపరూపమ్ ॥5॥
మహీతలే స్వర్గమివ ప్రకీర్ణం
	శ్రియా జ్వలన్తం బహురత్నకీర్ణమ్ ।
నానాతరూణాం కుసుమావకీర్ణం
	గిరేరివాగ్రం రజసావకీర్ణమ్ ॥6॥
నారీప్రవేకైరివ దీప్యమానం
	తడిద్భిరమ్భోధరమర్చ్యమానమ్ ।
హంసప్రవేకైరివ వాహ్యమానం
	శ్రియా యుతం ఖే సుకృతం విమానమ్ ॥7॥
యథా నగాగ్రం బహుధాతుచిత్రం
	యథా నభశ్చ గ్రహచన్ద్రచిత్రమ్ ।
దదర్శ యుక్తీకృతచారుమేఘ-
	చిత్రం విమానం బహురత్నచిత్రమ్ ॥8॥
మహీ కృతా పర్వతరాజిపూర్ణా
	శైలాః కృతా వృక్షవితానపూర్ణాః।
వృక్షాః కృతాః పుష్పవితానపూర్ణాః
	పుష్పం కృతం కేసరపత్రపూర్ణమ్ ॥9॥
కృతాని వేశ్మాని చ పాణ్డురాణి
	తథా సుపుష్పాణ్యపి పుష్కరాణి ।
పునశ్చ పద్మాని సకేసరాణి
	వనాని చిత్రాణి సరోవరాణి ॥10॥
పుష్పాహ్వయం నామ విరాజమానం
	రత్నప్రభాభిశ్చ విఘూర్ణమానమ్ ।
వేశ్మోత్తమానామపి చోచ్చమానం
	మహాకపిస్తత్ర మహావిమానమ్ ॥11॥
కృతాశ్చ వైదూర్యమయా విహఙ్గా
	రూప్యప్రవాలైశ్చ తథా విహఙ్గాః।
చిత్రాశ్చ నానావసుభిర్భుజఙ్గా
	జాత్యానురూపాస్తురగాః శుభాఙ్గాః॥12॥
ప్రవాలజామ్బూనదపుష్పపక్షాః
	సలీలమావర్జితజిహ్మపక్షాః।
కామస్య సాక్షాదివ భాన్తి పక్షాః
	కృతా విహఙ్గాః సుముఖాః సుపక్షాః॥13॥
నియుజ్యమానాశ్చ గజాః సుహస్తాః
	సకేసరాశ్చోత్పలపత్రహస్తాః।
బభూవ దేవీ చ కృతాసుహస్తా
	లక్ష్మీస్తథా పద్మిని పద్మహస్తా ॥14॥
ఇతీవ తద్గృహమభిగమ్య శోభనం
	సవిస్మయో నగమివ చారుకన్దరం ।
పునశ్చ తత్పరమసుగన్ధి సున్దరం
	హిమాత్యయే నగమివ చారుకన్దరం ॥15॥
తతః స తాం కపిరభిపత్య పూజితాం
	చరన్పురీం దశముఖబాహుపాలితామ్ ।
అదృశ్య తాం జనకసుతాం సుపూజితాం
	సుదుఃఖితాం పతిగుణవేగనిర్జితామ్ ॥16॥
తతస్తదా బహువిధభావితాత్మనః
	కృతాత్మనో జనకసుతాం సువర్త్మనః।
అపశ్యతోఽభవదతిదుఃఖితం మనః
	సచక్షుషః ప్రవిచరతో మహాత్మనః॥17॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే సప్తమః సర్గః