అథ అష్టమః సర్గః
స తస్య మధ్యే భవనస్య సంస్థితో
	మహద్విమానం మణిరత్నచిత్రితమ్ ।
ప్రతప్తజామ్బూనదజాలకృత్రిమం
	దదర్శ ధీమాన్ పవనాత్మజః కపిః॥1॥
తదప్రమేయప్రతికారకృత్రిమం
	కృతం స్వయం సాధ్వితి విశ్వకర్మణా ।
దివం గతే వాయుపథే ప్రతిష్ఠితం
	వ్యరాజతాదిత్యపథస్య లక్ష్మ తత్ ॥2॥
న తత్ర కిఞ్చిన్న కృతం ప్రయత్నతో
	న తత్ర కిఞ్చిన్న మహార్హరత్నవత్ ।
న తే విశేషా నియతాః సురేష్వపి
	న తత్ర కిఞ్చిన్న మహావిశేషవత్ ॥3॥
తపః సమాధానపరాక్రమార్జితం
	మనః సమాధానవిచారచారిణమ్ ।
అనేకసంస్థానవిశేషనిర్మితం
	తతస్తతస్తుల్యవిశేషనిర్మితమ్ ॥4॥
మనః సమాధాయ తు శీఘ్రగామినం
	దురాసదం మారుతతుల్యగామినమ్ ।
మహాత్మనాం పుణ్యకృతాం మహర్ద్ధినాం
	యశస్వినామగ్ర్యముదామివాలయమ్ ॥5॥
విశేషమాలమ్బ్య విశేషసంస్థితం
	విచిత్రకూటం బహుకూటమణ్డితమ్ ।
మనోఽభిరామం శరదిన్దునిర్మలం
	విచిత్రకూటం శిఖరం గిరేర్యథా ॥6॥
వహన్తి యత్కుణ్డలశోభితాననా
	మహాశనా వ్యోమచరానిశాచరాః।
వివృత్తవిధ్వస్తవిశాలలోచనా
	మహాజవా భూతగణాః సహస్రశః॥7॥
వసన్తపుష్పోత్కరచారుదర్శనం
	వసన్తమాసాదపి చారుదర్శనమ్ ।
స పుష్పకం తత్ర విమానముత్తమం
	దదర్శ తద్వానరవీరసత్తమః॥8॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే అష్టమః సర్గః