అథ సప్తదశః సర్గః
తతః కుముదషణ్డాభో నిర్మలం నిర్మలోదయః।
ప్రజగామ నభశ్చన్ద్రో హంసో నీలమివోదకమ్ ॥1॥
సాచివ్యమివ కుర్వన్స ప్రభయా నిర్మలప్రభః।
చన్ద్రమా రశ్మిభిః శీతైః సిషేవే పవనాత్మజమ్ ॥2॥
స దదర్శ తతః సీతాం పూర్ణచన్ద్రనిభాననామ్ ।
శోకభారైరివ న్యస్తాం భారైర్నావమివామ్భసి ॥3॥
దిదృక్షమాణో వైదేహీం హనూమాన్మారుతాత్మజః।
స దదర్శావిదూరస్థా రాక్షసీర్ఘోరదర్శనాః॥4॥
ఏకాక్షీమేకకర్ణాం చ కర్ణప్రావరణాం తథా ।
అకర్ణాం శఙ్కుకర్ణాం చ మస్తకోచ్ఛ్వాసనాసికామ్ ॥5॥
అతికాయోత్తమాఙ్గీం చ తనుదీర్ఘశిరోధరామ్ ।
ధ్వస్తకేశీం తథాకేశీం కేశకమ్బలధారిణీమ్ ॥6॥
లమ్బకర్ణలలాటాం చ లమ్బోదరపయోధరామ్ ।
లమ్బోష్ఠీం చిబుకోష్ఠీం చ లమ్బాస్యాం లమ్బజానుకామ్ ॥7॥
హ్రస్వాం దీర్ఘాం చ కుబ్జాం చ వికటాం వామనాం తథా ।
కరాలాం భుగ్నవక్త్రాం చ పిఙ్గాక్షీం వికృతాననామ్ ॥8॥
వికృతాః పిఙ్గలాః కాలీః క్రోధనాః కలహప్రియాః।
కాలాయసమహాశూలకూటముద్గరధారిణీః॥9॥
వరాహమృగశార్దూలమహిషాజశివా ముఖాః।
గజోష్ట్రహయపాదాశ్చ నిఖాతశిరసోఽపరాః॥10॥
ఏకహస్తైకపాదాశ్చ ఖరకర్ణ్యశ్వకర్ణికాః।
గోకర్ణీర్హస్తికర్ణీశ్చ హరికర్ణీస్తథాపరాః॥11॥
అతినాసాశ్చ కాశ్చిచ్చ తిర్యఙ్్నాసా అనాసికాః।
గజసన్నిభనాసాశ్చ లలాటోచ్ఛ్వాసనాసికాః॥12॥
హస్తిపాదా మహాపాదా గోపాదాః పాదచూలికాః।
అతిమాత్రశిరోగ్రీవా అతిమాత్రకుచోదరీః॥13॥
అతిమాత్రాస్య నేత్రాశ్చ దీర్ఘజిహ్వాననాస్తథా ।
అజాముఖీర్హస్తిముఖీర్గోముఖీః సూకరీముఖీః॥14॥
హయోష్ట్రఖరవక్త్రాశ్చ రాక్షసీర్ఘోరదర్శనాః।
శూలముద్గరహస్తాశ్చ క్రోధనాః కలహప్రియాః॥15॥
కరాలా ధూమ్రకేశిన్యో రాక్షసీర్వికృతాననాః।
పిబన్తీ సతతం పానం సురామాంససదాప్రియాః॥16॥
మాంసశోణితదిగ్ధాఙ్గీర్మాంసశోణితభోజనాః।
తా దదర్శ కపిశ్రేష్ఠో రోమహర్షణదర్శనాః॥17॥
స్కన్ధవన్తముపాసీనాః పరివార్య వనస్పతిమ్ ।
తస్యాధస్తాచ్చ తాం దేవీం రాజపుత్రీమనిన్దితామ్ ॥18॥
లక్షయామాస లక్ష్మీవాన్హనూమాఞ్జనకాత్మజామ్ ।
నిష్ప్రభాం శోకసన్తప్తాం మలసఙ్కులమూర్ధజామ్ ॥19॥
క్షీణపుణ్యాం చ్యుతాం భూమౌ తారాం నిపతితామివ ।
చారిత్ర్య వ్యపదేశాఢ్యాం భర్తృదర్శనదుర్గతామ్ ॥20॥
భూషణైరుత్తమైర్హీనాం భర్తృవాత్సల్యభూషితామ్ ।
రాక్షసాధిపసంరుద్ధాం బన్ధుభిశ్చ వినాకృతామ్ ॥21॥
వియూథాం సింహసంరుద్ధాం బద్ధాం గజవధూమివ ।
చన్ద్రరేఖాం పయోదాన్తే శారదాభ్రైరివావృతామ్ ॥22॥
క్లిష్టరూపామసంస్పర్శాదయుక్తామివ వల్లకీమ్ ।
స తాం భర్తృహితే యుక్తామయుక్తాం రక్షసాం వశే ॥23॥
అశోకవనికామధ్యే శోకసాగరమాప్లుతామ్ ।
తాభిః పరివృతాం తత్ర సగ్రహామివ రోహిణీమ్ ॥24॥
దదర్శ హనుమాంస్తత్ర లతామకుసుమామివ ।
సా మలేన చ దిగ్ధాఙ్గీ వపుషా చాప్యలఙ్కృతా ।
మృణాలీ పఙ్కదిగ్ధేవ విభాతి చ న భాతి చ ॥25॥
మలినేన తు వస్త్రేణ పరిక్లిష్టేన భామినీమ్ ।
సంవృతాం మృగశావాక్షీం దదర్శ హనుమాన్కపిః॥26॥
తాం దేవీం దీనవదనామదీనాం భర్తృతేజసా ।
రక్షితాం స్వేన శీలేన సీతామసితలోచనామ్ ॥27॥
తాం దృష్ట్వా హనుమాన్సీతాం మృగశావనిభేక్షణామ్ ।
మృగకన్యామివ త్రస్తాం వీక్షమాణాం సమన్తతః॥28॥
దహన్తీమివ నిఃశ్వాసైర్వృక్షాన్పల్లవధారిణః।
సఙ్ఘాతమివ శోకానాం దుఃఖస్యోర్మిమివోత్థితామ్ ॥29॥
తాం క్షమాం సువిభక్తాఙ్గీం వినాభరణశోభినీమ్ ।
ప్రహర్షమతులం లేభే మారుతిః ప్రేక్ష్య మైథిలీమ్ ॥30॥
హర్షజాని చ సోఽశ్రూణి తాం దృష్ట్వా మదిరేక్షణామ్ ।
ముమోచ హనుమాంస్తత్ర నమశ్చక్రే చ రాఘవమ్ ॥31॥
నమస్కృత్వాథ రామాయ లక్ష్మణాయ చ వీర్యవాన్ ।
సీతాదర్శనసంహృష్టో హనుమాన్ సంవృతోఽభవత్ ॥32॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే సప్తదశః సర్గః