అథ వింశః సర్గః
స తాం పరివృతాం దీనాం నిరానన్దాం తపస్వినీమ్ ।
సాకారైర్మధురైర్వాక్యైర్న్యదర్శయత రావణః॥1॥
మాం దృష్ట్వా నాగనాసోరుగూహమానా స్తనోదరమ్ ।
అదర్శనమివాత్మానం భయాన్నేతుం త్వమిచ్ఛసి ॥2॥
కామయే త్వాం విశాలాక్షి బహుమన్యస్వ మాం ప్రియే ।
సర్వాఙ్గగుణసమ్పన్నే సర్వలోకమనోహరే ॥3॥
నేహ కేచిన్మనుష్యా వా రాక్షసాః కామరూపిణః।
వ్యపసర్పతు తే సీతే భయం మత్తః సముత్థితమ్ ॥4॥
స్వధర్మో రక్షసాం భీరు సర్వదైవ న సంశయః।
గమనం వా పరస్త్రీణాం హరణం సమ్ప్రమథ్య వా ॥5॥
ఏవం చైవమకామాం త్వాం న చ స్ప్రక్ష్యామి మైథిలి ।
కామం కామః శరీరే మే యథాకామం ప్రవర్తతామ్ ॥6॥
దేవి నేహ భయం కార్యం మయి విశ్వసిహి ప్రియే ।
ప్రణయస్వ చ తత్త్వేన మైవం భూః శోకలాలసా ॥7॥
ఏకవేణీ ధరాశయ్యా ధ్యానం మలినమమ్బరమ్ ।
అస్థానేఽప్యుపవాసశ్చ నైతాన్యౌపయికాని తే ॥8॥
విచిత్రాణి చ మాల్యాని చన్దనాన్యగరూణి చ ।
వివిధాని చ వాసాంసి దివ్యాన్యాభరణాని చ ॥9॥
మహార్హాణి చ పానాని శయనాన్యాసనాని చ ।
గీతం నృత్యం చ వాద్యం చ లభ మాం ప్రాప్య మైథిలి ॥10॥
స్త్రీరత్నమసి మైవం భూః కురు గాత్రేషు భూషణమ్ ।
మాం ప్రాప్య హి కథం వా స్యాస్త్వమనర్హా సువిగ్రహే ॥11॥
ఇదం తే చారు సఞ్జాతం యౌవనం హ్యతివర్తతే ।
యదతీతం పునర్నైతి స్రోతః స్రోతస్వినామివ ॥12॥
త్వాం కృత్వోపరతో మన్యే రూపకర్తా స విశ్వకృత్ ।
నహి రూపోపమా హ్యన్యా తవాస్తి శుభదర్శనే ॥13॥
త్వాం సమాసాద్య వైదేహి రూపయౌవనశాలినీమ్ ।
కః పునర్నాతివర్తేత సాక్షాదపి పితామహః॥14॥
యద్యత్పశ్యామి తే గాత్రం శీతాంశుసదృశాననే ।
తస్మింస్తస్మిన్పృథుశ్రోణి చక్షుర్మమ నిబధ్యతే ॥15॥
భవ మైథిలి భార్యా మే మోహమేతం విసర్జయ ।
బహ్వీనాముత్తమస్త్రీణాం మమాగ్రమహిషీ భవ ॥16॥
లోకేభ్యో యాని రత్నాని సమ్ప్రమథ్యాహృతాని మే ।
తాని తే భీరు సర్వాణి రాజ్యం చైవ దదామి తే ॥17॥
విజిత్య పృథివీం సర్వాం నానానగరమాలినీమ్
జనకాయ ప్రదాస్యామి తవ హేతోర్విలాసిని ॥18॥
నేహ పశ్యామి లోకేఽన్యం యో మే ప్రతిబలో భవేత్ ।
పశ్య మే సుమహద్వీర్యమప్రతిద్వన్ద్వమాహవే ॥19॥
అసకృత్సంయుగే భగ్నా మయా విమృదితధ్వజాః।
అశక్తాః ప్రత్యనీకేషు స్థాతుం మమ సురాసురాః॥20॥
ఇచ్ఛ మాం క్రియతామద్య ప్రతికర్మ తవోత్తమమ్ ।
సుప్రభాణ్యవసజ్జన్తాం తవాఙ్గే భూషణాని హి ॥21॥
సాధు పశ్యామి తే రూపం సుయుక్తం ప్రతికర్మణా ।
ప్రతికర్మాభిసంయుక్తా దాక్షిణ్యేన వరాననే ॥22॥
భుఙ్క్ష్వ భోగాన్యథాకామం పిబ భీరు రమస్వ చ ।
యథేష్టం చ ప్రయచ్ఛ త్వం పృథివీం వా ధనాని చ ॥23॥
లలస్వ మయి విస్రబ్ధా ధృష్టమాజ్ఞాపయస్వ చ ।
మత్ప్రసాదాల్లలన్త్యాశ్చ లలతాం బాన్ధవస్తవ ॥24॥
ఋద్ధిం మమానుపశ్య త్వం శ్రియం భద్రే యశస్విని ।
కిం కరిష్యసి రామేణ సుభగే చీరవాసినా ॥25॥
నిక్షిప్తవిజయో రామో గతశ్రీర్వనగోచరః।
వ్రతీ స్థణ్డిలశాయీ చ శఙ్కే జీవతి వా న వా ॥26॥
న హి వైదేహి రామస్త్వాం ద్రష్టుం వాప్యుపలభ్యతే ।
పురో బలాకైరసితైర్మేఘైర్జ్యోత్స్నామివావృతామ్ ॥27॥
న చాపి మమ హస్తాత్త్వాం ప్రాప్తుమర్హతి రాఘవః।
హిరణ్యకశిపుః కీర్తిమిన్ద్రహస్తగతామివ ॥28॥
చారుస్మితే చారుదతి చారునేత్రే విలాసిని ।
మనో హరసి మే భీరు సుపర్ణః పన్నగం యథా ॥29॥
క్లిష్టకౌశేయవసనాం తన్వీమప్యనలఙ్కృతామ్ ।
త్వాం దృష్ట్వా స్వేషు దారేషు రతిం నోపలభామ్యహమ్ ॥30॥
అన్తఃపురనివాసిన్యః స్త్రియః సర్వగుణాన్వితాః।
యావత్యో మమ సర్వాసామైశ్వర్యం కురు జానకి ॥31॥
మమ హ్యసితకేశాన్తే త్రైలోక్యప్రవరస్త్రియః।
తాస్త్వాం పరిచరిష్యన్తి శ్రియమప్సరసో యథా ॥32॥
యాని వైశ్రవణే సుభ్రు రత్నాని చ ధనాని చ ।
తాని లోకాంశ్చ సుశ్రోణి మయా భుఙ్క్ష్వ యథాసుఖమ్ ॥33॥
న రామస్తపసా దేవి న బలేన చ విక్రమైః।
న ధనేన మయా తుల్యస్తేజసా యశసాపి వా ॥34॥
పిబ విహర రమస్వ భుఙ్క్ష్వ భోగాన్
	ధననిచయం ప్రదిశామి మేదినీం చ ।
మయి లల లలనే యథాసుఖం త్వం
	త్వయి చ సమేత్య లలన్తు బాన్ధవాస్తే ॥35॥
కుసుమితతరుజాలసన్తతాని
	భ్రమరయుతాని సముద్రతీరజాని ।
కనకవిమలహారభూషితాఙ్గీ
	విహర మయా సహ భీరు కాననాని ॥36॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే వింశః సర్గః