అథ ఏకవింశః సర్గః
తస్య తద్వచనం శ్రుత్వా సీతా రౌద్రస్య రక్షసః।
ఆర్తా దీనస్వరా దీనం ప్రత్యువాచ తతః శనైః॥1॥
దుఃఖార్తా రుదతీ సీతా వేపమానా తపస్వినీ ।
చిన్తయన్తీ వరారోహా పతిమేవ పతివ్రతా ॥2॥
తృణమన్తరతః కృత్వా ప్రత్యువాచ శుచిస్మితా ।
నివర్తయ మనో మత్తః స్వజనే క్రియతాం మనః॥3॥
న మాం ప్రార్థయితుం యుక్తస్త్వం సిద్ధిమివ పాపకృత్ ।
అకార్యం న మయా కార్యమేకపత్న్యా విగర్హితమ్ ॥4॥
కులం సమ్ప్రాప్తయా పుణ్యం కులే మహతి జాతయా ।
ఏవముక్త్వా తు వైదేహీ రావణం తం యశస్వినీ ॥5॥
రావణం పృష్ఠతః కృత్వా భూయో వచనమబ్రవీత్ ।
నాహమౌపయికీ భార్యా పరభార్యా సతీ తవ ॥6॥
సాధు ధర్మమవేక్షస్వ సాధు సాధువ్రతం చర ।
యథా తవ తథాన్యేషాం రక్ష్యా దారా నిశాచర ॥7॥
ఆత్మానముపమాం కృత్వా స్వేషు దారేషు రమ్యతామ్ ।
అతుష్టం స్వేషు దారేషు చపలం చపలేన్ద్రియమ్ ।
నయన్తి నికృతిప్రజ్ఞం పరదారాః పరాభవమ్ ॥8॥
ఇహ సన్తో న వా సన్తి సతో వా నానువర్తసే ।
యథా హి విపరీతా తే బుద్ధిరాచారవర్జితా ॥9॥
వచో మిథ్యా ప్రణీతాత్మా పథ్యముక్తం విచక్షణైః।
రాక్షసానామభావాయ త్వం వా న ప్రతిపద్యసే ॥10॥
అకృతాత్మానమాసాద్య రాజానమనయే రతమ్ ।
సమృద్ధాని వినశ్యన్తి రాష్ట్రాణి నగరాణి చ ॥11॥
తథైవ త్వాం సమాసాద్య లఙ్కా రత్నౌఘ సఙ్కులా ।
అపరాధాత్తవైకస్య నచిరాద్వినశిష్యతి ॥12॥
స్వకృతైర్హన్యమానస్య రావణాదీర్ఘదర్శినః।
అభినన్దన్తి భూతాని వినాశే పాపకర్మణః॥13॥
ఏవం త్వాం పాపకర్మాణం వక్ష్యన్తి నికృతా జనాః।
దిష్ట్యైతద్వ్యసనం ప్రాప్తో రౌద్ర ఇత్యేవ హర్షితాః॥14॥
శక్యా లోభయితుం నాహమైశ్వర్యేణ ధనేన వా ।
అనన్యా రాఘవేణాహం భాస్కరేణ యథా ప్రభా ॥15॥
ఉపధాయ భుజం తస్య లోకనాథస్య సత్కృతమ్ ।
కథం నామోపధాస్యామి భుజమన్యస్య కస్యచిత్ ॥16॥
అహమౌపయికీ భార్యా తస్యైవ చ ధరాపతేః।
వ్రతస్నాతస్య విద్యేవ విప్రస్య విదితాత్మనః॥17॥
సాధు రావణ రామేణ మాం సమానయ దుఃఖితామ్ ।
వనే వాసితయా సార్ధం కరేణ్వేవ గజాధిపమ్ ॥18॥
మిత్రమౌపయికం కర్తుం రామః స్థానం పరీప్సతా ।
బన్ధం చానిచ్ఛతా ఘోరం త్వయాసౌ పురుషర్షభః॥19॥
విదితః స హి ధర్మజ్ఞః శరణాగతవత్సలః।
తేన మైత్రీ భవతు తే యది జీవితుమిచ్ఛసి ॥20॥
ప్రసాదయస్వ త్వం చైనం శరణాగతవత్సలమ్ ।
మాం చాస్మై ప్రయతో భూత్వా నిర్యాతయితుమర్హసి ॥21॥
ఏవం హి తే భవేత్ స్వస్తి సమ్ప్రదాయ రఘూత్తమే ।
అన్యథా త్వం హి కుర్వాణః పరాం ప్రాప్స్యసి చాపదమ్ ॥22॥
వర్జయేద్వజ్రముత్సృష్టం వర్జయేదన్తకశ్చిరమ్ ।
త్వద్విధం న తు సఙ్క్రుద్ధో లోకనాథః స రాఘవః॥23॥
రామస్య ధనుషః శబ్దం శ్రోష్యసి త్వం మహాస్వనమ్ ।
శతక్రతువిసృష్టస్య నిర్ఘోషమశనేరివ ॥24॥
ఇహ శీఘ్రం సుపర్వాణో జ్వలితాస్యా ఇవోరగాః।
ఇషవో నిపతిష్యన్తి రామలక్ష్మణలక్షితాః॥25॥
రక్షాంసి నిహనిష్యన్తః పుర్యామస్యాం న సంశయః।
అసమ్పాతం కరిష్యన్తి పతన్తః కఙ్కవాససః॥26॥
రాక్షసేన్ద్రమహాసర్పాన్స రామగరుడో మహాన్ ।
ఉద్ధరిష్యతి వేగేన వైనతేయ ఇవోరగాన్ ॥27॥
అపనేష్యతి మాం భర్తా త్వత్తః శీఘ్రమరిన్దమః।
అసురేభ్యః శ్రియం దీప్తాం విష్ణుస్త్రిభిరివ క్రమైః॥28॥
జనస్థానే హతస్థానే నిహతే రక్షసాం బలే ।
అశక్తేన త్వయా రక్షః కృతమేతదసాధు వై ॥29॥
ఆశ్రమం తత్తయోః శూన్యం ప్రవిశ్య నరసింహయోః।
గోచరం గతయోర్భ్రాత్రోరపనీతా త్వయాధమ ॥30॥
న హి గన్ధముపాఘ్రాయ రామలక్ష్మణయోస్త్వయా ।
శక్యం సన్దర్శనే స్థాతుం శునా శార్దూలయోరివ ॥31॥
తస్య తే విగ్రహే తాభ్యాం యుగగ్రహణమస్థిరమ్ ।
వృత్రస్యేవేన్ద్రబాహుభ్యాం బాహోరేకస్య విగ్రహే ॥32॥
క్షిప్రం తవ స నాథో మే రామః సౌమిత్రిణా సహ ।
తోయమల్పమివాదిత్యః ప్రాణానాదాస్యతే శరైః॥33॥
గిరిం కుబేరస్య గతోఽథవాలయం
	సభాం గతో వా వరుణస్య రాజ్ఞః।
అసంశయం దాశరథేర్విమోక్ష్యసే
	మహాద్రుమః కాలహతోఽశనేరివ ॥34॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే ఏకవింశః సర్గః