అథ త్రయోవింశః సర్గః
ఇత్యుక్త్వా మైథిలీం రాజా రావణః శత్రురావణః।
సన్దిశ్య చ తతః సర్వా రాక్షసీర్నిర్జగామ హ ॥1॥
నిష్క్రాన్తే రాక్షసేన్ద్రే తు పునరన్తఃపురం గతే ।
రాక్షస్యో భీమరూపాస్తాః సీతాం సమభిదుద్రువుః॥2॥
తతః సీతాముపాగమ్య రాక్షస్యః క్రోధమూర్ఛితాః।
పరం పరుషయా వాచా వైదేహీమిదమబ్రువన్ ॥3॥
పౌలస్త్యస్య వరిష్ఠస్య రావణస్య మహాత్మనః।
దశగ్రీవస్య భార్యాత్వం సీతే న బహు మన్యసే ॥4॥
తతస్త్వేకజటా నామ రాక్షసీ వాక్యమబ్రవీత్ ।
ఆమన్త్ర్య క్రోధతామ్రాక్షీ సీతాం కరతలోదరీమ్ ॥5॥
ప్రజాపతీనాం షణ్ణాం తు చతుర్థోఽయం ప్రజాపతిః।
మానసో బ్రహ్మణః పుత్రః పులస్త్య ఇతి విశ్రుతః॥6॥
పులస్త్యస్య తు తేజస్వీ మహర్షిర్మానసః సుతః।
నామ్నా స విశ్రవా నామ ప్రజాపతిసమప్రభః॥7॥
తస్య పుత్రో విశాలాక్షి రావణః శత్రురావణః।
తస్య త్వం రాక్షసేన్ద్రస్య భార్యా భవితుమర్హసి ॥8॥
మయోక్తం చారుసర్వాఙ్గి వాక్యం కిం నానుమన్యసే ।
తతో హరిజటా నామ రాక్షసీ వాక్యమబ్రవీత్ ॥9॥
వివృత్య నయనే కోపాన్మార్జారసదృశేక్షణా ।
యేన దేవాస్త్రయస్త్రింశద్దేవరాజశ్చ నిర్జితః॥10॥
తస్య త్వం రాక్షసేన్ద్రస్య భార్యా భవితుమర్హసి ।
వీర్యోత్సిక్తస్య శూరస్య సఙ్గ్రామేష్వనివర్తినః।
బలినో వీర్యయుక్తస్య భార్యా త్వం కిం న లిప్ససే ॥11॥
ప్రియాం బహుమతాం భార్యాం త్యక్త్వా రాజా మహాబలః।
సర్వాసాం చ మహాభాగాం త్వాముపైష్యతి రావణః॥12॥
సమృద్ధం స్త్రీసహస్రేణ నానారత్నోపశోభితమ్ ।
అన్తఃపురం తదుత్సృజ్య త్వాముపైష్యతి రావణః॥13॥
అన్యా తు వికటా నామ రాక్షసీ వాక్యమబ్రవీత్ ।
అసకృద్ భీమవీర్యేణ నాగా గన్ధర్వదానవాః।
నిర్జితాః సమరే యేన స తే పార్శ్వముపాగతః॥14॥
తస్య సర్వసమృద్ధస్య రావణస్య మహాత్మనః।
కిమర్థం రాక్షసేన్ద్రస్య భార్యాత్వం నేచ్ఛసేఽధమే ॥15॥
తతస్తాం దుర్ముఖీ నామ రాక్షసీ వాక్యమబ్రవీత్ ।
యస్య సూర్యో న తపతి భీతో యస్య స మారుతః।
న వాతి స్మాయతాపాఙ్గి కిం త్వం తస్య న తిష్ఠసే ॥16॥
పుష్పవృష్టిం చ తరవో ముముచుర్యస్య వై భయాత్ ।
శైలాః సుస్త్రువుః పానీయం జలదాశ్చ యదేచ్ఛతి ॥17॥
తస్య నైరృతరాజస్య రాజరాజస్య భామిని ।
కిం త్వం న కురుషే బుద్ధిం భార్యార్థే రావణస్య హి ॥18॥
సాధు తే తత్త్వతో దేవి కథితం సాధు భామిని ।
గృహాణ సుస్మితే వాక్యమన్యథా న భవిష్యసి ॥19॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే త్రయోవింశః సర్గః