అథ అష్టావింశః సర్గః
సా రాక్షసేన్ద్రస్య వచో నిశమ్య
	తద్ రావణస్య ప్రియమప్రియార్తా ।
సీతా వితత్రాస యథా వనాన్తే
	సింహాభిపన్నా గజరాజకన్యా ॥1॥
సా రాక్షసీమధ్యగతా చ భీరు-
	ర్వాగ్భిర్భృశం రావణతర్జితా చ ।
కాన్తారమధ్యే విజనే విసృష్టా
	బాలేవ కన్యా విలలాప సీతా ॥2॥
సత్యం బతేదం ప్రవదన్తి లోకే
	నాకాలమృత్యుర్భవతీతి సన్తః।
యత్రాహమేవం పరిభర్త్స్యమానా
	జీవామి యస్మాత్ క్షణమప్యపుణ్యా ॥3॥
సుఖాద్విహీనం బహుదుఃఖపూర్ణ-
	మిదం తు నూనం హృదయం స్థిరం మే ।
విదీర్యతే యన్న సహస్రధాద్య
	వజ్రాహతం శృఙ్గమివాచలస్య ॥4॥
నైవాస్తి నూనం మమ దోషమత్ర
	వధ్యాహమస్యాప్రియదర్శనస్య ।
భావం న చాస్యాహమనుప్రదాతు-
	మలం ద్విజో మన్త్రమివాద్విజాయ ॥5॥
తస్మిన్ననాగచ్ఛతి లోకనాథే
	గర్భస్థజన్తోరివ శల్యకృన్తః।
నూనం మమాఙ్గాన్యచిరాదనార్యః
	శస్త్రైః శితైశ్ఛేత్స్యతి రాక్షసేన్ద్రః॥6॥
దుఃఖం బతేదం నను దుఃఖితాయా
	మాసౌ చిరాయాభిగమిష్యతో ద్వౌ ।
బద్ధస్య వధ్యస్య యథా నిశాన్తే
	రాజోపరోధాదివ తస్కరస్య ॥7॥
హా రామ హా లక్ష్మణ హా సుమిత్రే
	హా రామమాతః సహ మే జనన్యః।
ఏషా విపద్యామ్యహమల్పభాగ్యా
	మహార్ణవే నౌరివ మూఢవాతా ॥8॥
తరస్వినౌ ధారయతా మృగస్య
	సత్త్వేన రూపం మనుజేన్ద్రపుత్రౌ ।
నూనం విశస్తౌ మమ కారణాత్తౌ
	సింహర్షభౌ ద్వావివ వైద్యుతేన ॥9॥
నూనం స కాలో మృగరూపధారీ
	మామల్పభాగ్యాం లులుభే తదానీమ్ ।
యత్రార్యపుత్రౌ విససర్జ మూఢా
	రామానుజం లక్ష్మణపూర్వజం చ ॥10॥
హా రామ సత్యవ్రత దీర్ఘబాహో
	హా పూర్ణచన్ద్రప్రతిమానవక్త్ర ।
హా జీవలోకస్య హితః ప్రియశ్చ
	వధ్యాం న మాం వేత్సి హి రాక్షసానామ్ ॥11॥
అనన్యదేవత్వమియం క్షమా చ
	భూమౌ చ శయ్యా నియమశ్చ ధర్మే ।
పతివ్రతాత్వం విఫలం మమేదం
	కృతం కృతఘ్నేష్వివ మానుషాణామ్ ॥12॥
మోఘో హి ధర్మశ్చరితో మమాయం
	తథైకపత్నీత్వమిదం నిరర్థకమ్ ।
యా త్వాం న పశ్యామి కృశా వివర్ణా
	హీనా త్వయా సఙ్గమనే నిరాశా ॥13॥
పితుర్నిదేశం నియమేన కృత్వా
	వనాన్నివృత్తశ్చరితవ్రతశ్చ ।
స్త్రీభిస్తు మన్యే విపులేక్షణాభిః
	సంరంస్యసే వీతభయః కృతార్థః॥14॥
అహం తు రామ త్వయి జాతకామా
	చిరం వినాశాయ నిబద్ధభావా ।
మోఘం చరిత్వాథ తపోవ్రతం చ
	త్యక్ష్యామి ధిగ్జీవితమల్పభాగ్యామ్ ॥15॥
సఞ్జీవితం క్షిప్రమహం త్యజేయం
	విషేణ శస్త్రేణ శితేన వాపి ।
విషస్య దాతా న తు మేఽస్తి కశ్చి-
	చ్ఛస్త్రస్య వా వేశ్మని రాక్షసస్య ॥16॥
శోకాభితప్తా బహుధా విచిన్త్య
	సీతాథ వేణీగ్రథనం గృహీత్వా ।
ఉద్బద్ధ్య వేణ్యుద్గ్రథనేన శీఘ్ర-
	మహం గమిష్యామి యమస్య మూలమ్ ॥17॥
ఉపస్థితా సా మృదుసర్వగాత్రీ
	శాఖాం గృహీత్వా చ నగస్య తస్య ।
తస్యాస్తు రామం పరిచిన్తయన్త్యా
	రామానుజం స్వం చ కులం శుభాఙ్గ్యాః॥18॥
తస్యా విశోకాని తదా బహూని
	ధైర్యార్జితాని ప్రవరాణి లోకే ।
ప్రాదుర్నిమిత్తాని తదా బభూవుః
	పురాపి సిద్ధాన్యుపలక్షితాని ॥19॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే అష్టావింశః సర్గః