అథ ఏకోనత్రింశః సర్గః
తథాగతాం తాం వ్యథితామనిన్దితాం
	వ్యపేతహర్షాం పరిదీనమానసామ్ ।
శుభాం నిమిత్తాని శుభాని భేజిరే
	నరం శ్రియా జుష్టమివోపజీవినః॥1॥
తస్యాః శుభం వామమరాలపక్ష్మ
	రాజీవృతం కృష్ణవిశాలశుక్లమ్ ।
ప్రాస్పన్దతైకం నయనం సుకేశ్యా
	మీనాహతం పద్మమివాభితామ్రమ్ ॥2॥
భుజశ్చ చార్వఞ్చితపీనవృత్తః
	పరార్ధ్యకాలాగురుచన్దనార్హః।
అనుత్తమేనాధ్యుషితః ప్రియేణ
	చిరేణ వామః సమవేపతాశు ॥3॥
గజేన్ద్రహస్తప్రతిమశ్చ పీన-
	స్తయోర్ద్వయోః సంహతయోస్తు జాతః।
ప్రస్పన్దమానః పునరూరురస్యా
	రామం పురస్తాత్స్థితమాచచక్షే ॥4॥
శుభం పునర్హేమసమానవర్ణ-
	మీషద్రజోధ్వస్తమివామలాక్ష్యాః ।
వాసః స్థితాయాఃశిఖరాగ్రదన్త్యాః
	కిఞ్చిత్పరిస్రంసత చారుగాత్ర్యాః॥5॥
ఏతైర్నిమిత్తైరపరైశ్చ సుభ్రూః
	సఞ్చోదితా ప్రాగపి సాధుసిద్ధైః।
వాతాతపక్లాన్తమివ ప్రణష్టం
	వర్షేణ బీజం ప్రతిసఞ్జహర్ష ॥6॥
తస్యాః పునర్బిమ్బఫలాధరోష్ఠం
	స్వక్షిభ్రుకేశాన్తమరాలపక్ష్మ ।
వక్త్రం బభాసే స్మితశుక్లదంష్ట్రం
	రాహోర్ముఖాచ్చన్ద్ర ఇవ ప్రముక్తః॥7॥
సా వీతశోకా వ్యపనీతతన్ద్రీ
	శాన్తజ్వరా హర్షవివృద్ధసత్త్వా ।
అశోభతార్యా వదనేన శుక్లే
	శీతాంశునా రాత్రిరివోదితేన ॥8॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే ఏకోనత్రింశః సర్గః