అథ ద్వాత్రింశః సర్గః
తతః శాఖాన్తరే లీనం దృష్ట్వా చలితమానసా ।
వేష్టితార్జునవస్త్రం తం విద్యుత్సఙ్ఘాతపిఙ్గలమ్ ॥1॥
సా దదర్శ కపిం తత్ర ప్రశ్రితం ప్రియవాదినమ్ ।
ఫుల్లాశోకోత్కరాభాసం తప్తచామీకరేక్షణమ్ ॥2॥
సాథ దృష్ట్వా హరిశ్రేష్ఠం వినీతవదవస్థితమ్ ।
మైథిలీ చిన్తయామాస విస్మయం పరమం గతా ॥3॥
అహో భీమమిదం సత్త్వం వానరస్య దురాసదమ్ ।
దుర్నిరీక్ష్యమిదం మత్వా పునరేవ ముమోహ సా ॥4॥
విలలాప భృశం సీతా కరుణం భయమోహితా ।
రామ రామేతి దుఃఖార్తా లక్ష్మణేతి చ భామినీ ॥5॥
రురోద సహసా సీతా మన్దమన్దస్వరా సతీ ।
సాథ దృష్ట్వా హరివరం వినీతవదుపాగతమ్ ।
మైథిలీ చిన్తయామాస స్వప్నోఽయమితి భామినీ ॥6॥
సా వీక్షమాణా పృథుభుగ్నవక్త్రం
	శాఖామృగేన్ద్రస్య యథోక్తకారమ్ ।
దదర్శ పిఙ్గప్రవరం మహార్హం
	వాతాత్మజం బుద్ధిమతాం వరిష్ఠమ్ ॥7॥
సా తం సమీక్ష్యైవ భృశం విపన్నా
	గతాసుకల్పేవ బభూవ సీతా ।
చిరేణ సఞ్జ్ఞాం ప్రతిలభ్య చైవం
	విచిన్తయామాస విశాలనేత్రా ॥8॥
స్వప్నో మయాయం వికృతోఽద్య దృష్టః
	శాఖామృగః శాస్త్రగణైర్నిషిద్ధః।
స్వస్త్యస్తు రామాయ స లక్ష్మణాయ
	తథా పితుర్మే జనకస్య రాజ్ఞః॥9॥
స్వప్నో హి నాయం నహి మేఽస్తి నిద్రా
	శోకేన దుఃఖేన చ పీడితాయాః।
సుఖం హి మే నాస్తి యతో విహీనా
	తేనేన్దుపూర్ణప్రతిమాననేన ॥10॥
రామేతి రామేతి సదైవ బుద్ధ్యా
	విచిన్త్య వాచా బ్రువతీ తమేవ ।
తస్యానురూపం చ కథాం తదర్థ-
	మేవం ప్రపశ్యామి తథా శృణోమి ॥11॥
అహం హి తస్యాద్య మనోభవేన
	సమ్పీడితా తద్గతసర్వభావా ।
విచిన్తయన్తీ సతతం తమేవ
	తథైవ పశ్యామి తథా శృణోమి ॥12॥
మనోరథః స్యాదితి చిన్తయామి
	తథాపి బుద్ధ్యాపి వితర్కయామి ।
కిం కారణం తస్య హి నాస్తి
	రూపం సువ్యక్తరూపశ్చ వదత్యయం మామ్ ॥13॥
నమోఽస్తు వాచస్పతయే సవజ్రిణే
	స్వయమ్భువే చైవ హుతాశనాయ ।
అనేన చోక్తం యదిదం మమాగ్రతో
	వనౌకసా తచ్చ తథాస్తు నాన్యథా ॥14॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే ద్వాత్రింశః సర్గః