అథ త్రిచత్వారింశః సర్గః
తతః స కిఙ్కరాన్ హత్వా హనూమాన్ ధ్యానమాస్థితః।
వనం భగ్నం మయా చైత్యప్రాసాదో న వినాశితః॥1॥
తస్మాత్ప్రాసాదమద్యైవమిమం విధ్వంసయామ్యహమ్ ।
ఇతి సఞ్చిన్త్య హనుమాన్మనసాదర్శయన్ బలమ్ ॥2॥
చైత్యప్రాసాదముత్ప్లుత్య మేరుశృఙ్గమివోన్నతమ్ ।
ఆరురోహ హరిశ్రేష్ఠో హనూమాన్మారుతాత్మజః॥3॥
ఆరుహ్య గిరిసఙ్కాశం ప్రాసాదం హరియూథపః।
బభౌ స సుమహాతేజాః ప్రతిసూర్య ఇవోదితః॥4॥
సమ్ప్రధృష్య తు దుర్ధర్షశ్చైత్యప్రాసాదమున్నతమ్ ।
హనూమాన్ప్రజ్వలఀల్లక్ష్మ్యా పారియాత్రోపమోఽభవత్ ॥5॥
స భూత్వా సుమహాకాయః ప్రభావాన్ మారుతాత్మజః।
ధృష్టమాస్ఫోటయామాస లఙ్కాం శబ్దేన పూరయన్ ॥6॥
తస్యాస్ఫోటితశబ్దేన మహతా శ్రోత్రఘాతినా ।
పేతుర్విహఙ్గమాస్తత్ర చైత్యపాలాశ్చ మోహితాః॥7॥
అస్త్రవిజ్జయతాం రామో లక్ష్మణశ్చ మహాబలః।
రాజా జయతి సుగ్రీవో రాఘవేణాభిపాలితః॥8॥
దాసోఽహం కోసలేన్ద్రస్య రామస్యాక్లిష్టకర్మణః।
హనుమాఞ్శత్రుసైన్యానాం నిహన్తా మారుతాత్మజః॥9॥
న రావణసహస్రం మే యుద్ధే ప్రతిబలం భవేత్ ।
శిలాభిస్తు ప్రహరతః పాదపైశ్చ సహస్రశః॥10॥
అర్దయిత్వా పురీం లఙ్కామభివాద్య చ మైథిలీమ్ ।
సమృద్ధార్థో గమిష్యామి మిషతాం సర్వరక్షసామ్ ॥11॥
ఏవముక్త్వా మహాకాయశ్చైత్యస్థో హరియూథపః।
ననాద భీమనిర్హ్రాదో రక్షసాం జనయన్భయమ్ ॥12॥
తేన నాదేన మహతా చైత్యపాలాః శతం యయుః।
గృహీత్వా వివిధానస్త్రాన్ప్రాసాన్ఖడ్గాన్పరశ్వధాన్ ॥13॥
విసృజన్తో మహాకాయా మారుతిం పర్యవారయన్ ।
తే గదాభిర్విచిత్రాభిః పరిఘైః కాఞ్చనాఙ్గదైః॥14॥
ఆజగ్ముర్వానరశ్రేష్ఠం బాణైశ్చాదిత్యసన్నిభైః।
ఆవర్త ఇవ గఙ్గాయాస్తోయస్య విపులో మహాన్ ॥15॥
పరిక్షిప్య హరిశ్రేష్ఠం స బభౌ రక్షసాం గణః।
తతో వాతాత్మజః క్రుద్ధో భీమరూపం సమాస్థితః॥16॥
ప్రాసాదస్య మహాంస్తస్య స్తమ్భం హేమపరిష్కృతమ్ ।
ఉత్పాటయిత్వా వేగేన హనూమాన్మారుతాత్మజః॥17॥
తతస్తం భ్రామయామాస శతధారం మహాబలః।
తత్ర చాగ్నిస్సమభవత్ప్రాసాదశ్చాప్యదహ్యత ॥18॥
దహ్యమానం తతో దృష్ట్వా ప్రాసాదం హరియూథపః।
స రాక్షసశతం హత్వా వజ్రేణేన్ద్ర ఇవాసురాన్ ॥19॥
అన్తరిక్షస్థితః శ్రీమానిదం వచనమబ్రవీత్ ।
మాదృశానాం సహస్రాణి విసృష్టాని మహాత్మనామ్ ॥20॥
బలినాం వానరేన్ద్రాణాం సుగ్రీవవశవర్తినామ్ ।
అటన్తి వసుధాం కృత్స్నాం వయమన్యే చ వానరాః॥21॥
దశనాగబలాః కేచిత్కేచిద్దశగుణోత్తరాః।
కేచిన్నాగసహస్రస్య బభూవుస్తుల్యవిక్రమాః॥22॥
సన్తి చౌఘబలాః కేచిత్ సన్తి వాయుబలోపమాః।
అప్రమేయబలాః కేచిత్ తత్రాసన్హరియూథపాః॥23॥
ఈదృగ్విధైస్తు హరిభిర్వృతో దన్తనఖాయుధైః।
శతైః శతసహస్రైశ్చ కోటీభిశ్చాయుతైరపి ॥24॥
ఆగమిష్యతి సుగ్రీవః సర్వేషాం వో నిషూదనః।
నేయమస్తి పురీ లఙ్కా న యూయం న చ రావణః।
యస్య త్విక్ష్వాకువీరేణ బద్ధం వైరం మహాత్మనా ॥25॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే త్రిచత్వారింశః సర్గః