అథ చతుశ్చత్వారింశః సర్గః
సన్దిష్టో రాక్షసేన్ద్రేణ ప్రహస్తస్య సుతో బలీ ।
జమ్బుమాలీ మహాదంష్ట్రో నిర్జగామ ధనుర్ధరః॥1॥
రక్తమాల్యామ్బరధరః స్రగ్వీ రుచిరకుణ్డలః।
మహాన్వివృత్తనయనశ్చణ్డః సమరదుర్జయః॥2॥
ధనుః శక్రధనుః ప్రఖ్యం మహద్ రుచిరసాయకమ్ ।
విస్ఫారయాణో వేగేన వజ్రాశనిసమస్వనమ్ ॥3॥
తస్య విస్ఫారఘోషేణ ధనుషో మహతా దిశః।
ప్రదిశశ్చ నభశ్చైవ సహసా సమపూర్యత ॥4॥
రథేన ఖరయుక్తేన తమాగతముదీక్ష్య సః।
హనూమాన్వేగసమ్పన్నో జహర్ష చ ననాద చ ॥5॥
తం తోరణవిటఙ్కస్థం హనూమన్తం మహాకపిమ్ ।
జమ్బుమాలీ మహాతేజా వివ్యాధ నిశితైః శరైః॥6॥
అర్ధచన్ద్రేణ వదనే శిరస్యేకేన కర్ణినా ।
బాహ్వోర్వివ్యాధ నారాచైర్దశభిస్తు కపీశ్వరమ్ ॥7॥
తస్య తచ్ఛుశుభే తామ్రం శరేణాభిహతం ముఖమ్ ।
శరదీవామ్బుజం ఫుల్లం విద్ధం భాస్కరరశ్మినా ॥8॥
తత్తస్య రక్తం రక్తేన రఞ్జితం శుశుభే ముఖమ్ ।
యథాఽఽకాశే మహాపద్మం సిక్తం కాఞ్చనబిన్దుభిః॥9॥
చుకోప బాణాభిహతో రాక్షసస్య మహాకపిః।
తతః పార్శ్వేఽతివిపులాం దదర్శ మహతీం శిలామ్ ॥10॥
తరసా తాం సముత్పాట్య చిక్షేప జవవద్ బలీ ।
తాం శరైర్దశభిః క్రుద్ధస్తాడయామాస రాక్షసః॥11॥
విపన్నం కర్మ తద్దృష్ట్వా హనూమాంశ్చణ్డవిక్రమః।
సాలం విపులముత్పాట్య భ్రామయామాస వీర్యవాన్ ॥12॥
భ్రామయన్తం కపిం దృష్ట్వా సాలవృక్షం మహాబలమ్ ।
చిక్షేప సుబహూన్బాణాఞ్జమ్బుమాలీ మహాబలః॥13॥
సాలం చతుర్భిశ్చిచ్ఛేద వానరం పఞ్చభిర్భుజే ।
ఉరస్యేకేన బాణేన దశభిస్తు స్తనాన్తరే ॥14॥
స శరైః పూరితతనుః క్రోధేన మహతా వృతః।
తమేవ పరిఘం గృహ్య భ్రామయామాస వేగితః॥15॥
అతివేగోఽతివేగేన భ్రామయిత్వా బలోత్కటః।
పరిఘం పాతయామాస జమ్బుమాలేర్మహోరసి ॥16॥
తస్య చైవ శిరో నాస్తి న బాహూ జానునీ న చ ।
న ధనుర్న రథో నాశ్వాస్తత్రాదృశ్యన్త నేషవః॥17॥
స హతస్తరసా తేన జమ్బుమాలీ మహారథః।
పపాత నిహతో భూమౌ చూర్ణితాఙ్గ ఇవ ద్రుమః॥18॥
జమ్బుమాలిం సునిహతం కిఙ్కరాంశ్చ మహాబలాన్ ।
చుక్రోధ రావణః శ్రుత్వా క్రోధసంరక్తలోచనః॥19॥
స రోషసంవర్తితతామ్రలోచనః
	ప్రహస్తపుత్రే నిహతే మహాబలే ।
అమాత్యపుత్రానతివీర్యవిక్రమాన్
	సమాదిదేశాశు నిశాచరేశ్వరః॥20॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే చతుశ్చత్వారింశః సర్గః