అథ పఞ్చచత్వారింశః సర్గః
తతస్తే రాక్షసేన్ద్రేణ చోదితా మన్త్రిణః సుతాః।
నిర్యయుర్భవనాత్తస్మాత్సప్త సప్తార్చివర్చసః॥1॥
మహద్బలపరీవారా ధనుష్మన్తో మహాబలాః।
కృతాస్త్రాస్త్రవిదాం శ్రేష్ఠాః పరస్పరజయైషిణః॥2॥
హేమజాలపరిక్షిప్తైర్ధ్వజవద్భిః పతాకిభిః।
తోయదస్వననిర్ఘోషైర్వాజియుక్తైర్మహారథైః॥3॥
తప్తకాఞ్చనచిత్రాణి చాపాన్యమితవిక్రమాః।
విస్ఫారయన్తః సంహృష్టాస్తడిద్వన్త ఇవామ్బుదాః॥4॥
జనన్యస్తాస్తతస్తేషాం విదిత్వా కిఙ్కరాన్హతాన్ ।
బభూవుః శోకసమ్భ్రాన్తాః సబాన్ధవసుహృజ్జనాః॥5॥
తే పరస్పరసఙ్ఘర్షాత్ తప్తకాఞ్చనభూషణాః।
అభిపేతుర్హనూమన్తం తోరణస్థమవస్థితమ్ ॥6॥
సృజన్తో బాణవృష్టిం తే రథగర్జితనిఃస్వనాః।
ప్రావృట్కాల ఇవామ్భోదా విచేరుర్నైరృతామ్బుదాః॥7॥
అవకీర్ణస్తతస్తాభిర్హనూమాఞ్శరవృష్టిభిః।
అభవత్సంవృతాకారః శైలరాడివ వృష్టిభిః॥8॥
స శరాన్వఞ్చయామాస తేషామాశుచరః కపిః।
రథవేగాంశ్చ వీరాణాం విచరన్విమలేఽమ్బరే ॥9॥
స తైః క్రీడన్ధనుష్మద్భిర్వ్యోమ్ని వీరః ప్రకాశతే ।
ధనుష్మద్భిర్యథా మేఘైర్మారుతః ప్రభురమ్బరే ॥10॥
స కృత్వా నినదం ఘోరం త్రాసయంస్తాం మహాచమూమ్ ।
చకార హనుమాన్వేగం తేషు రక్షఃసు వీర్యవాన్ ॥11॥
తలేనాభిహనత్కాంశ్చిత్పాదైః కాంశ్చిత్పరన్తపః।
ముష్టిభిశ్చాహనత్కాంశ్చిన్నఖైః కాంశ్చిద్వ్యదారయత్ ॥12॥
ప్రమమాథోరసా కాంశ్చిదూరుభ్యామపరానపి।
కేచిత్ తస్యైవ నాదేన తత్రైవ పతితా భువి ॥13॥
తతస్తేష్వవపన్నేషు భూమౌ నిపతితేషు చ ।
తత్సైన్యమగమత్సర్వం దిశో దశ భయార్దితమ్ ॥14॥
వినేదుర్విస్వరం నాగా నిపేతుర్భువి వాజినః।
భగ్ననీడధ్వజచ్ఛత్రైర్భూశ్చ కీర్ణాభవద్రథైః॥15॥
స్రవతా రుధిరేణాథ స్రవన్త్యో దర్శితాః పథి ।
వివిధైశ్చ స్వనైర్లఙ్కా ననాద వికృతం తదా ॥16॥
స తాన్ప్రవృద్ధాన్వినిహత్య రాక్షసాన్
	మహాబలశ్చణ్డపరాక్రమః కపిః।
యుయుత్సురన్యైః పునరేవ రాక్షసై-
	స్తదేవ వీరోఽభిజగామ తోరణమ్ ॥17॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే పఞ్చచత్వారింశః సర్గః