అథ ఏకోనపఞ్చాశః సర్గః
తతః స కర్మణా తస్య విస్మితో భీమవిక్రమః।
హనుమాన్ క్రోధతామ్రాక్షో రక్షోఽధిపమవైక్షత ॥1॥
భ్రాజమానం మహార్హేణ కాఞ్చనేన విరాజతా ।
ముక్తాజాలవృతేనాథ ముకుటేన మహాద్యుతిమ్ ॥2॥
వజ్రసంయోగసంయుక్తైర్మహార్హమణివిగ్రహైః।
హైమైరాభరణైశ్చిత్రైర్మనసేవ ప్రకల్పితైః॥3॥
మహార్హక్షౌమసంవీతం రక్తచన్దనరూషితమ్ ।
స్వనులిప్తం విచిత్రాభిర్వివిధాభిశ్చ భక్తిభిః॥4॥
విచిత్రం దర్శనీయైశ్చ రక్తాక్షైర్భీమదర్శనైః।
దీప్తతీక్ష్ణమహాదంష్ట్రం ప్రలమ్బం దశనచ్ఛదైః॥5॥
శిరోభిర్దశభిర్వీరో భ్రాజమానం మహౌజసం ।
నానావ్యాలసమాకీర్ణైః శిఖరైరివ మన్దరమ్ ॥6॥
నీలాఞ్జనచయప్రఖ్యం హారేణోరసి రాజతా ।
పూర్ణచన్ద్రాభవక్త్రేణ సబాలార్కమివామ్బుదమ్ ॥7॥
బాహుభిర్బద్ధకేయూరైశ్చన్దనోత్తమరూషితైః।
భ్రాజమానాఙ్గదైర్భీమైః పఞ్చశీర్షైరివోరగైః॥8॥
మహతి స్ఫాటికే చిత్రే రత్నసంయోగచిత్రితే ।
ఉత్తమాస్తరణాస్తీర్ణే సూపవిష్టం వరాసనే ॥9॥
అలఙ్కృతాభిరత్యర్థం ప్రమదాభిః సమన్తతః।
వాలవ్యజనహస్తాభిరారాత్సముపసేవితమ్ ॥10॥
దుర్ధరేణ ప్రహస్తేన మహాపార్శ్వేన రక్షసా ।
మన్త్రిభిర్మన్త్రతత్త్వజ్ఞైర్నికుమ్భేన చ మన్త్రిణా ॥11॥
ఉపోపవిష్టం రక్షోభిశ్చతుర్భిర్బలదర్పితమ్ ।
కృత్స్నం పరివృతం లోకం చతుర్భిరివ సాగరైః॥12॥
మన్త్రిభిర్మన్త్రతత్త్వజ్ఞైరన్యైశ్చ శుభదర్శిభిః।
ఆశ్వాస్యమానం సచివైః సురైరివ సురేశ్వరమ్ ॥13॥
అపశ్యద్రాక్షసపతిం హనూమానతితేజసం ।
వేష్ఠితం మేరుశిఖరే సతోయమివ తోయదమ్ ॥14॥
స తైః సమ్పీడ్యమానోఽపి రక్షోభిర్భీమవిక్రమైః।
విస్మయం పరమం గత్వా రక్షోఽధిపమవైక్షత ॥15॥
భ్రాజమానం తతో దృష్ట్వా హనుమాన్రాక్షసేశ్వరమ్ ।
మనసా చిన్తయామాస తేజసా తస్య మోహితః॥16॥
అహో రూపమహో ధైర్యమహో సత్త్వమహో ద్యుతిః।
అహో రాక్షసరాజస్య సర్వలక్షణయుక్తతా ॥17॥
యద్యధర్మో న బలవాన్స్యాదయం రాక్షసేశ్వరః।
స్యాదయం సురలోకస్య సశక్రస్యాపి రక్షితా ॥18॥
అస్య క్రూరైర్నృశంసైశ్చ కర్మభిర్లోకకుత్సితైః।
సర్వే బిభ్యతి ఖల్వస్మాల్లోకాః సామరదానవాః॥19॥
అయం హ్యుత్సహతే క్రుద్ధః కర్తుమేకార్ణవం జగత్ ।
ఇతి చిన్తాం బహువిధామకరోన్మతిమాన్కపిః।
దృష్ట్వా రాక్షసరాజస్య ప్రభావమమితౌజసః॥20॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే ఏకోనపఞ్చాశః సర్గః