అథ షట్పఞ్చాశః సర్గః
తతస్తు శింశపామూలే జానకీం పర్యవస్థితామ్ ।
అభివాద్యాబ్రవీద్దిష్ట్యా పశ్యామి త్వామిహాక్షతామ్ ॥1॥
తతస్తం ప్రస్థితం సీతా వీక్షమాణా పునః పునః।
భర్తృస్నేహాన్వితా వాక్యం హనూమన్తమభాషత ॥2॥
యది త్వం మన్యసే తాత వసైకాహమిహానఘ ।
క్వచిత్ సుసంవృతే దేశే విశ్రాన్తః శ్వో గమిష్యసి ॥3॥
మమ చైవాల్పభాగ్యాయాః సాంనిధ్యాత్ తవ వానర ।
శోకస్యాస్యాప్రమేయస్య ముహూర్తం స్యాదపి క్షయః॥4॥
గతే హి హరిశార్దూల పునః సమ్ప్రాప్తయే త్వయి ।
ప్రాణేష్వపి న విశ్వాసో మమ వానరపుగంవ ॥5॥
అదర్శనం చ తే వీర భూయో మాం దారయిష్యతి ।
దుఃఖాద్ దుఃఖతరం ప్రాప్తాం దుర్మనఃశోకకర్శితామ్ ॥6॥
అయం చ వీర సన్దేహస్తిష్ఠతీవ మమాగ్రతః।
సుమహత్సు సహాయేషు హర్యృక్షేషు మహాబలః॥7॥
కథం ను ఖలు దుష్పారం సన్తరిష్యతి సాగరమ్ ।
తాని హర్యుక్షసైన్యాని తౌ వా నరవరాత్మజౌ ॥8॥
త్రయాణామేవ భూతానాం సాగరస్యాపి లఙ్ఘనే ।
శక్తిః స్యాద్ వైనతేయస్య తవ వా మారుతస్య వా ॥9॥
తదత్ర కార్యనిర్బన్ధే సముత్పన్నే దురాసదే ।
కిం పశ్యసి సమాధానం త్వం హి కార్యవిశారదః॥10॥
కామమస్య త్వమేవైకః కార్యస్య పరిసాధనే ।
పర్యాప్తః పరవీరఘ్న యశస్యస్తే ఫలోదయః॥11॥
బలైస్తు సఙ్కులాం కృత్వా లఙ్కాం పరబలార్దనః।
మాం నయేద్యది కాకుత్స్థస్తత్ తస్య సదృశం భవేత్ ॥12॥
తద్యథా తస్య విక్రాన్తమనురూపం మహాత్మనః।
భవత్యాహవశూరస్య తథా త్వముపపాదయ ॥13॥
తదర్థోపహితం వాక్యం ప్రశ్రితం హేతుసంహితమ్ ।
నిశమ్య హనుమాన్ వీరో వాక్యముత్తరమబ్రవీత్ ॥14॥
దేవి హర్యృక్షసైన్యానామీశ్వరః ప్లవతాం వరః।
సుగ్రీవః సత్త్వసమ్పన్నస్తవార్థే కృతనిశ్చయః॥15॥
స వానరసహస్రాణాం కోటీభిరభిసంవృతః।
క్షిప్రమేష్యతి వైదేహి సుగ్రీవః ప్లవగాధిపః॥16॥
తౌ చ వీరౌ నరవరౌ సహితౌ రామలక్ష్మణౌ ।
ఆగమ్య నగరీం లఙ్కాం సాయకైర్విధమిష్యతః॥17॥
సగణం రాక్షసం హత్వా నచిరాద్ రఘునన్దనః।
త్వామాదాయ వరారోహే స్వాం పురీం ప్రతి యాస్యతి ॥18॥
సమాశ్వసిహి భద్రం తే భవ త్వం కాలకాఙ్క్షిణీ ।
క్షిప్రం ద్రక్ష్యసి రామేణ నిహతం రావణం రణే ॥19॥
నిహతే రాక్షసేన్ద్రే చ సపుత్రామాత్యబాన్ధవే ।
త్వం సమేష్యసి రామేణ శశాఙ్కేనేవ రోహిణీ ॥20॥
క్షిప్రమేష్యతి కాకుత్స్థో హర్యృక్షప్రవరైర్యుతః।
యస్తే యుధి విజిత్యారీఞ్ఛోకం వ్యపనయిష్యతి ॥21॥
ఏవమాశ్వాస్య వైదేహీం హనూమాన్మారుతాత్మజః।
గమనాయ మతిం కృత్వా వైదేహీమభ్యవాదయత్ ॥22॥
రాక్షసాన్ ప్రవరాన్ హత్వా నామ విశ్రావ్య చాత్మనః।
సమాశ్వాస్య చ వైదేహీం దర్శయిత్వా పరం బలమ్ ॥23॥
నగరీమాకులాం కృత్వా వఞ్చయిత్వా చ రావణమ్ ।
దర్శయిత్వా బలం ఘోరం వైదేహీమభివాద్య చ ॥24॥
ప్రతిగన్తుం మనశ్చక్రే పునర్మధ్యేన సాగరమ్ ।
తతః స కపిశార్దూలః స్వామిసన్దర్శనోత్సుకః॥25॥
ఆరురోహ గిరిశ్రేష్ఠమరిష్టమరిమర్దనః।
తుఙ్గపద్మకజుష్టాభిర్నీలాభిర్వనరాజిభిః॥26॥
సోత్తరీయమివామ్భోదైః శృఙ్గాన్తరవిలమ్బిభిః।
బోధ్యమానమివ ప్రీత్యా దివాకరకరైః శుభైః॥27॥
ఉన్మిషన్తమివోద్ధూతైర్లోచనైరివ ధాతుభిః।
తోయౌఘనిఃస్వనైర్మన్ద్రైః ప్రాధీతమివ పర్వతమ్ ॥28॥
ప్రగీతమివ విస్పష్టం నానాప్రస్రవణస్వనైః।
దేవదారుభిరుద్ధూతైరూర్ధ్వబాహుమివ స్థితమ్ ॥29॥
ప్రపాతజలనిర్ఘోషః ప్రాక్రుష్టమివ సర్వతః।
వేపమానమివ శ్యామైః కమ్పమానైః శరద్వనైః॥30॥
వేణుభిర్మారుతోద్ధూతైః కూజన్తమివ కీచకైః।
నిఃశ్వసన్తమివామర్షాద్ ఘోరైరాశీవిషోత్తమైః॥31॥
నీహారకృతగమ్భీరైర్ధ్యాయన్తమివ గహ్వరైః।
మేఘపాదనిభైః పాదైః ప్రక్రాన్తమివ సర్వతః॥32॥
జృమ్భమాణమివాకాశే శిఖరైరభ్రమాలిభిః।
కూటైశ్చ బహుధా కీర్ణం శోభితం బహుకన్దరైః॥33॥
సాలతాలైశ్చ కర్ణైశ్చ వంశైశ్చ బహుభిర్వృతమ్ ।
లతావితానైర్వితతైః పుష్పవద్భిరలఙ్కృతమ్ ॥34॥
నానామృగగణైః కీర్ణం ధాతునిష్యన్దభూషితమ్ ।
బహుప్రస్రవణోపేతం శిలాసఞ్చయసఙ్కటమ్ ॥35॥
మహర్షియక్షగన్ధర్వకింనరోరగసేవితమ్ ।
లతాపాదపసమ్బాధం సింహాధిష్ఠితకన్దరమ్ ॥36॥
వ్యాఘ్రాదిభిః సమాకీర్ణం స్వాదుమూలఫలద్రుమమ్ ।
ఆరురోహానిలసుతః పర్వతం ప్లవగోత్తమః॥37॥
రామదర్శనశీఘ్రేణ ప్రహర్షేణాభిచోదితః।
తేన పాదతలక్రాన్తా రమ్యేషు గిరిసానుషు ॥38॥
సఘోషాః సమశీర్యన్త శిలాశ్చూర్ణీకృతాస్తతః।
స తమారుహ్య శైలేన్ద్రం వ్యవర్ధత మహాకపిః॥39॥
దక్షిణాదుత్తరం పారం ప్రార్థయఀల్లవణామ్భసః।
అధిరుహ్య తతో వీరః పర్వతం పవనాత్మజః॥40॥
దదర్శ సాగరం భీమం మీనోరగనిషేవితమ్ ।
స మారుత ఇవాకాశం మారుతస్యాత్మసమ్భవః॥41॥
ప్రపేదే హరిశార్దూలో దక్షిణాదుత్తరాం దిశమ్ ।
స తదా పీడితస్తేన కపినా పర్వతోత్తమః॥42॥
రరాస వివిధైర్భూతైః ప్రావిశద్వసుధాతలమ్ ।
కమ్పమానైశ్చ శిఖరైః పతద్భిరపి చ ద్రుమైః॥43॥
తస్యోరువేగోన్మథితాః పాదపాః పుష్పశాలినః।
నిపేతుర్భూతలే భగ్నాః శక్రాయుధహతా ఇవ ॥44॥
కన్దరోదరసంస్థానాం పీడితానాం మహౌజసామ్ ।
సింహానాం నినదో భీమో నభో భిన్దన్ హి శుశ్రువే ॥45॥
త్రస్తవ్యావిద్ధవసనా వ్యాకులీకృతభూషణాః।
విద్యాధర్యః సముత్పేతుః సహసా ధరణీధరాత్ ॥46॥
అతిప్రమాణా బలినో దీప్తజిహ్వా మహావిషాః।
నిపీడితశిరోగ్రీవా వ్యవేష్టన్త మహాహయః॥47॥
కింనరోరగగన్ధర్వయక్షవిద్యాధరాస్తథా ।
పీడితం తం నగవరం త్యక్త్వా గగనమాస్థితాః॥48॥
స చ భూమిధరః శ్రీమాన్బలినా తేన పీడితః।
సవృక్షశిఖరోదగ్రః ప్రవివేశ రసాతలమ్ ॥49॥
దశయోజనవిస్తారస్త్రింశద్యోజనముచ్ఛ్రితః।
ధరణ్యాం సమతాం యాతః స బభూవ ధరాధరః॥50॥
స లిలఙ్ఘయిషుర్భీమం సలీలం లవణార్ణవమ్ ।
కల్లోలాస్ఫాలవేలాన్తముత్పపాత నభో హరిః॥51॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే షట్పఞ్చాశః సర్గః