అథ సప్తపఞ్చాశః సర్గః
ఆప్లుత్య చ మహావేగః పక్షవానివ పర్వతః।
భుజఙ్గయక్షగన్ధర్వప్రబుద్ధకమలోత్పలమ్ ॥1॥
స చన్ద్రకుముదం రమ్యం సార్కకారణ్డవం శుభమ్ ।
తిష్యశ్రవణకాదమ్బమభ్రశైవలశాద్వలమ్ ॥2॥
పునర్వసుమహామీనం లోహితాఙ్గమహాగ్రహమ్ ।
ఐరావతమహాద్వీపం స్వాతీహంసవిలాసితమ్ ॥3॥
వాతసఙ్ఘాతజాలోర్మిచన్ద్రాంశుశిశిరామ్బుమత్ ।
హనూమానపరిశ్రాన్తః పుప్లువే గగనార్ణవమ్ ॥4॥
గ్రసమాన ఇవాకాశం తారాధిపమివోల్లిఖన్ ।
హరన్నివ సనక్షత్రం గగనం సార్కమణ్డలమ్ ॥5॥
అపారమపరిశ్రాన్తశ్చామ్బుధిం సమగాహత ।
హనూమాన్మేఘజాలాని వికర్షన్నివ గచ్ఛతి ॥6॥
పాణ్డురారుణవర్ణాని నీలమాఞ్జిష్ఠకాని చ ।
హరితారుణవర్ణాని మహాభ్రాణి చకాశిరే ॥7॥
ప్రవిశన్నభ్రజాలాని నిష్క్రమంశ్చ పునః పునః।
ప్రచన్నశ్చ ప్రకాశశ్చ చన్ద్రమా ఇవ దృశ్యతే ॥8॥
వివిధాభ్రఘనాపన్నగోచరో ధవలామ్బరః।
దృశ్యాదృశ్యతనుర్వీరస్తథా చన్ద్రాయతేఽమ్బరే ॥9॥
తార్క్ష్యాయమాణో గగనే స బభౌ వాయునన్దనః।
దారయన్మేఘబృన్దాని నిష్పతంశ్చ పునః పునః॥10॥
నదన్నాదేన మహతా మేఘస్వనమహాస్వనః।
ప్రవరాన్రాక్షసాన్ హత్వా నామ విశ్రావ్య చాత్మనః॥11॥
ఆకులాం నగరీం కృత్వా వ్యథయిత్వా చ రావణమ్ ।
అర్దయిత్వా మహావీరాన్ వైదేహీమభివాద్య చ ॥12॥
ఆజగామ మహాతేజాః పునర్మధ్యేన సాగరమ్ ।
పర్వతేన్ద్రం సునాభం చ సముపస్పృశ్య వీర్యవాన్ ॥13॥
జ్యాముక్త ఇవ నారాచో మహావేగోఽభ్యుపాగమత్ ।
స కిఞ్చిదారాత్ సమ్ప్రాప్తః సమాలోక్య మహాగిరిమ్ ॥14॥
మహేన్ద్రం మేఘసఙ్కాశం ననాద స మహాకపిః।
స పూరయామాస కపిర్దిశో దశ సమన్తతః॥15॥
నదన్నాదేన మహతా మేఘస్వనమహాస్వనః।
స తం దేశమనుప్రాప్తః సుహృద్ధర్శనలాలసః॥16॥
ననాద సుమహానాదం లాఙ్గూలం చాప్యకమ్పయత్ ।
తస్య నానద్యమానస్య సుపర్ణాచరితే పథి ॥17॥
ఫలతీవాస్య ఘోషేణ గగనం సార్కమణ్డలమ్ ।
యే తు తత్రోత్తరే కూలే సముద్రస్య మహాబలాః॥18॥
పూర్వం సంవిష్ఠితాశ్శూరా వాయుపుత్రదిదృక్షవః।
మహతో వాయునున్నస్య తోయదస్యేవ నిఃస్వనమ్ ।
శుశ్రువుస్తే తదా ఘోషమూరువేగం హనూమతః॥19॥
తే దీనమనసః సర్వే శుశ్రువుః కాననౌకసః।
వానరేన్ద్రస్య నిర్ఘోషం పర్జన్యనినదోపమమ్ ॥20॥
నిశమ్య నదతో నాదం వానరాస్తే సమన్తతః।
బభూవురుత్సుకాః సర్వే సుహృద్దర్శనకాఙ్క్షిణః॥21॥
జామ్బవాన్ స హరిశ్రేష్ఠః ప్రీతిసంహృష్టమానసః।
ఉపామన్త్ర్య హరీన్సర్వానిదం వచనమబ్రవీత్ ॥22॥
సర్వథా కృతకార్యోఽసౌ హనూమాన్నాత్ర సంశయః।
న హ్యస్యాకృతకార్యస్య నాద ఏవంవిధో భవేత్ ॥23॥
తస్య బాహూరువేగం చ నినాదం చ మహాత్మనః।
నిశమ్య హరయో హృష్టాః సముత్పేతుర్యతస్తతః॥24॥
తే నగాగ్రాన్నగాగ్రాణి శిఖరాచ్ఛిఖరాణి చ ।
ప్రహృష్టాః సమపద్యన్త హనూమన్తం దిదృక్షవః॥25॥
తే ప్రీతాః పాదపాగ్రేషు గృహ్య శాఖామవస్థితాః।
వాసాంసి చ ప్రకాశాని సమావిధ్యన్త వానరాః॥26॥
గిరిగహ్వరసంలీనో యథా గర్జతి మారుతః।
ఏవం జగర్జ బలవాన్ హనుమాన్మారుతాత్మజః॥27॥
తమభ్రఘనసఙ్కాశమాపతన్తం మహాకపిమ్ ।
దృష్ట్వా తే వానరాః సర్వే తస్థుః ప్రాఞ్జలయస్తదా ॥28॥
తతస్తు వేగవాన్ వీరో గిరేర్గిరినిభః కపిః।
నిపపాత గిరేస్తస్య శిఖరే పాదపాకులే ॥29॥
హర్షేణాపూర్యమాణోఽసౌ రమ్యే పర్వతనిర్ఝరే ।
ఛిన్నపక్ష ఇవాఽకాశాత్పపాత ధరణీధరః॥30॥
తతస్తే ప్రీతమనసః సర్వే వానరపుఙ్గవాః।
హనూమన్తం మహాత్మానం పరివార్యోపతస్థిరే ॥31॥
పరివార్య చ తే సర్వే పరాం ప్రీతిముపాగతాః।
ప్రహృష్టవదనాః సర్వే తమాగతముపాగమన్ ॥32॥
ఉపాయనాని చాదాయ మూలాని చ ఫలాని చ ।
ప్రత్యర్చయన్హరిశ్రేష్ఠం హరయో మారుతాత్మజమ్ ॥33॥
వినేదుర్ముదితాః కేచిత్ కేచిత్ కిలకిలాం తథా ।
హృష్టాః పాదపశాఖాశ్చ ఆనిన్యుర్వానరర్షభాః॥34॥
హనూమాంస్తు గురూన్వృద్ధాఞ్జామ్బవత్ప్రముఖాంస్తదా ।
కుమారమఙ్గదం చైవ సోఽవన్దత మహాకపిః॥35॥
స తాభ్యాం పూజితః పూజ్యః కపిభిశ్చ ప్రసాదితః।
దృష్టా దేవీతి విక్రాన్తః సఙ్క్షేపేణ న్యవేదయత్ ॥36॥
నిషసాద చ హస్తేన గృహీత్వా వాలినః సుతమ్ ।
రమణీయే వనోద్దేశే మహేన్ద్రస్య గిరేస్తదా ॥37॥
హనూమానబ్రవీత్ పృష్టస్తదా తాన్వానరర్షభాన్ ।
అశోకవనికాసంస్థా దృష్టా సా జనకాత్మజా ॥38॥
రక్ష్యమాణా సుఘోరాభీ రాక్షసీభిరనిన్దితా ।
ఏకవేణీధరా బాలా రామదర్శనలాలసా ॥39॥
ఉపవాసపరిశ్రాన్తా మలినా జటిలా కృశా ।
తతో దృష్టేతి వచనం మహార్థమమృతోపమమ్ ॥40॥
నిశమ్య మారుతేః సర్వే ముదితా వానరా భవన్ ।
క్ష్వేడన్త్యన్యే నదన్త్యన్యే గర్జన్త్యన్యే మహాబలాః॥41॥
చక్రుః కిలకిలామన్యే ప్రతిగర్జన్తి చాపరే ।
కేచిదుచ్ఛ్రితలాఙ్గూలాః ప్రహృష్టాః కపికుఞ్జరాః॥42॥
ఆయతాఞ్చితదీర్ఘాణి లాఙ్గూలాని ప్రవివ్యధుః।
అపరే తు హనూమన్తం శ్రీమన్తం వానరోత్తమమ్ ॥43॥
ఆప్లుత్య గిరిశృఙ్గేషు సంస్పృశన్తి స్మ హర్షితాః।
ఉక్తవాక్యం హనూమన్తమఙ్గదస్తు తదాబ్రవీత్ ॥44॥
సర్వేషాం హరివీరాణాం మధ్యే వాచమనుత్తమామ్ ।
సత్త్వే వీర్యే న తే కశ్చిత్సమో వానర విద్యతే ॥45॥
యదవప్లుత్య విస్తీర్ణం సాగరం పునరాగతః।
జీవితస్య ప్రదాతా నస్త్వమేకో వానరోత్తమ ॥46॥
త్వత్ప్రసాదాత్ సమేష్యామః సిద్ధార్థా రాఘవేణ హ ।
అహో స్వామిని తే భక్తిరహో వీర్యమహో ధృతిః॥47॥
దిష్ట్యా దృష్టా త్వయా దేవీ రామపత్నీ యశస్వినీ ।
దిష్ట్యా త్యక్ష్యతి కాకుత్స్థః శోకం సీతా వియోగజమ్ ॥48॥
తతోఽఙ్గదం హనూమన్తం జామ్బవన్తం చ వానరాః।
పరివార్య ప్రముదితా భేజిరే విపులాః శిలాః॥49॥
ఉపవిష్టా గిరేస్తస్య శిలాసు విపులాసు తే ।
శ్రోతుకామాః సముద్రస్య లఙ్ఘనం వానరోత్తమాః॥50॥
దర్శనం చాపి లఙ్కాయాః సీతాయా రావణస్య చ ।
తస్థుః ప్రాఞ్జలయః సర్వే హనూమద్వదనోన్ముఖాః॥51॥
తస్థౌ తత్రాఙ్గదః శ్రీమాన్వానరైర్బహుభిర్వృతః।
ఉపాస్యమానో విబుధైర్దివి దేవపతిర్యథా ॥52॥
హనూమతా కీర్తిమతా యశస్వినా
	తథాఙ్గదేనాఙ్గదనద్ధబాహునా ।
ముదా తదాధ్యాసితమున్నతం మహన్
	మహీధరాగ్రం జ్వలితం శ్రియాభవత్ ॥53॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే సప్తపఞ్చాశః సర్గః