అథ షష్టితమః సర్గః
తస్య తద్వచనం శ్రుత్వా వాలిసూనురభాషత ।
అశ్విపుత్రౌ మహావేగౌ బలవన్తౌ ప్లవఙ్గమౌ ॥1॥
పితామహవరోత్సేకాత్ పరమం దర్పమాస్థితౌ ।
అశ్వినోర్మాననార్థం హి సర్వలోకపితామహః॥2॥
సర్వావధ్యత్వమతులమనయోర్దత్తవాన్పురా ।
వరోత్సేకేన మత్తౌ చ ప్రమథ్య మహతీం చమూమ్ ॥3॥
సురాణామమృతం వీరౌ పీతవన్తౌ మహాబలౌ ।
ఏతావేవ హి సఙ్క్రుద్ధౌ సవాజిరథకుఞ్జరామ్ ॥4॥
లఙ్కాం నాశయితుం శక్తౌ సర్వే తిష్ఠన్తు వానరాః।
అహమేకోఽపి పర్యాప్తః సరాక్షసగణాం పురీమ్ ॥5॥
తాం లఙ్కాం తరసా హన్తుం రావణం చ మహాబలమ్ ।
కిం పునః సహితో వీరైర్బలవద్భిః కృతాత్మభిః॥6॥
కృతాస్త్రైః ప్లవగైః శక్తైర్భవద్భిర్విజయైషిభిః।
వాయుసూనోర్బలేనైవ దగ్ధా లఙ్కేతి నః శ్రుతమ్ ॥7॥
దృష్ట్వా దేవీ న చానీతా ఇతి తత్ర నివేదితుమ్ ।
న యుక్తమివ పశ్యామి భవద్భిః ఖ్యాతపౌరుషైః॥8॥
నహి వః ప్లవనే కశ్చిన్నాపి కశ్చిత్ పరాక్రమే ।
తుల్యః సామరదైత్యేషు లోకేషు హరిసత్తమాః॥9॥
జిత్వా లఙ్కాం సరక్షౌఘాం హత్వా తం రావణం రణే ।
సీతామాదాయ గచ్ఛామః సిద్ధార్థా హృష్టమానసాః॥10॥
తేష్వేవం హతవీరేషు రాక్షసేషు హనూమతా ।
కిమన్యదత్ర కర్తవ్యం గృహీత్వా యామ జానకీమ్ ॥11॥
రామలక్ష్మణయోర్మధ్యే న్యస్యామ జనకాత్మజామ్ ।
కిం వ్యలీకైస్తు తాన్ సర్వాన్ వానరాన్ వానరర్షభాన్ ॥12॥
వయమేవ హి గత్వా తాన్ హత్వా రాక్షసపుఙ్గవాన్ ।
రాఘవం ద్రష్టుమర్హామః సుగ్రీవం సహలక్ష్మణమ్ ॥13॥
తమేవం కృతసఙ్కల్పం జామ్బవాన్హరిసత్తమః।
ఉవాచ పరమప్రీతో వాక్యమర్థవదర్థవిత్ ॥14॥
నైషా బుద్ధిర్మహాబుద్ధే యద్ బ్రవీషి మహాకపే ।
విచేతుం వయమాజ్ఞప్తా దక్షిణాం దిశముత్తమామ్ ॥15॥
నానేతుం కపిరాజేన నైవ రామేణ ధీమతా ।
కథఞ్చిన్నిర్జితాం సీతామస్మాభిర్నాభిరోచయేత్ ॥16॥
రాఘవో నృపశార్దూలః కులం వ్యపదిశన్ స్వకమ్ ।
ప్రతిజ్ఞాయ స్వయం రాజా సీతావిజయమగ్రతః॥17॥
సర్వేషాం కపిముఖ్యానాం కథం మిథ్యా కరిష్యతి ।
విఫలం కర్మ చ కృతం భవేత్ తుష్టిర్న తస్య చ ॥18॥
వృథా చ దర్శితం వీర్యం భవేద్ వానరపుఙ్గవాః।
తస్మాద్ గచ్ఛామ వై సర్వే యత్ర రామః సలక్ష్మణః।
సుగ్రీవశ్చ మహాతేజాః కార్యస్యాస్య నివేదనే ॥19॥
న తావదేషా మతిరక్షమా నో
	యథా భవాన్పశ్యతి రాజపుత్ర ।
యథా తు రామస్య మతిర్నివిష్టా
	తథా భవాన్పశ్యతు కార్యసిద్ధిమ్ ॥20॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే షష్టితమః సర్గః