అథ పఞ్చషష్టితమః సర్గః
తతః ప్రస్రవణం శైలం తే గత్వా చిత్రకాననమ్ ।
ప్రణమ్య శిరసా రామం లక్ష్మణం చ మహాబలమ్ ॥1॥
యువరాజం పురస్కృత్య సుగ్రీవమభివాద్య చ ।
ప్రవృత్తిమథ సీతాయాః ప్రవక్తుముపచక్రముః॥2॥
రావణాన్తఃపురే రోధం రాక్షసీభిశ్చ తర్జనమ్ ।
రామే సమనురాగం చ యథా చ నియమః కృతః॥3॥
ఏతదాఖ్యాయ తే సర్వం హరయో రామసంనిధౌ ।
వైదేహీమక్షతాం శ్రుత్వా రామస్తూత్తరమబ్రవీత్ ॥4॥
క్వ సీతా వర్తతే దేవీ కథం చ మయి వర్తతే ।
ఏతన్మే సర్వమాఖ్యాత వైదేహీం ప్రతి వానరాః॥5॥
రామస్య గదితం శ్రుత్వా హరయో రామసంనిధౌ ।
చోదయన్తి హనూమన్తం సీతావృత్తాన్తకోవిదమ్ ॥6॥
శ్రుత్వా తు వచనం తేషాం హనూమాన్మారుతాత్మజః।
ప్రణమ్య శిరసా దేవ్యై సీతాయై తాం దిశం ప్రతి ॥7॥
ఉవాచ వాక్యం వాక్యజ్ఞః సీతాయా దర్శనం యథా ।
తం మణిం కాఞ్చనం దివ్యం దీప్యమానం స్వతేజసా ॥8॥
దత్వా రామాయ హనుమాంస్తతః ప్రాఞ్జలిరబ్రవీత్ ।
సముద్రం లఙ్ఘయిత్వాహం శతయోజనమాయతమ్ ॥9॥
అగచ్ఛం జానకీం సీతాం మార్గమాణో దిదృక్షయా ।
తత్ర లఙ్కేతి నగరీ రావణస్య దురాత్మనః॥10॥
దక్షిణస్య సముద్రస్య తీరే వసతి దక్షిణే ।
తత్ర సీతా మయా దృష్టా రావణాన్తఃపురే సతీ ॥11॥
త్వయి సంన్యస్య జీవన్తీ రామా రామ మనోరథమ్ ।
దృష్ట్వా మే రాక్షసీమధ్యే తర్జ్యమానా ముహుర్ముహుః॥12॥
రాక్షసీభిర్విరూపాభీ రక్షితా ప్రమదావనే ।
దుఃఖమాపద్యతే దేవీ త్వయా వీర సుఖోచితా ॥13॥
రావణాన్తఃపురే రుద్ధా రాక్షసీభిః సురక్షితా ।
ఏకవేణీధరా దీనా త్వయి చిన్తాపరాయణా ॥14॥
అధఃశయ్యా వివర్ణాఙ్గీ పద్మినీవ హిమాగమే ।
రావణాద్వినివృత్తార్థా మర్తవ్యకృతనిశ్చయా ॥15॥
దేవీ కథఞ్చిత్కాకుత్స్థ త్వన్మనా మార్గితా మయా ।
ఇక్ష్వాకువంశవిఖ్యాతిం శనైః కీర్తయతానఘ ॥16॥
సా మయా నరశార్దూల శనైర్విశ్వాసితా తదా ।
తతః సమ్భాషితా దేవీ సర్వమర్థం చ దర్శితా ॥17॥
రామసుగ్రీవసఖ్యం చ శ్రుత్వా హర్షముపాగతా ।
నియతః సముదాచారో భక్తిశ్చాస్యాః సదా త్వయి ॥18॥
ఏవం మయా మహాభాగ దృష్టా జనకనన్దినీ ।
ఉగ్రేణ తపసా యుక్తా త్వద్భక్త్యా పురుషర్షభ ॥19॥
అభిజ్ఞానం చ మే దత్తం యథావృత్తం తవాన్తికే ।
చిత్రకూటే మహాప్రాజ్ఞ వాయసం ప్రతి రాఘవ ॥20॥
విజ్ఞాప్యః పునరప్యేష రామో వాయుసుత త్వయా ।
అఖిలేన యథా ద్దృష్టమితి మామాహ జానకీ ॥21॥
అయం చాస్మై ప్రదాతవ్యో యత్నాత్సుపరిరక్షితః।
బ్రువతా వచనాన్యేవం సుగ్రీవస్యోపశృణ్వతః॥22॥
ఏష చూడామణిః శ్రీమాన్మయా తే యత్నరక్షితః।
మనఃశిలాయాస్తిలకం తత్ స్మరస్వేతి చాబ్రవీత్ ॥23॥
ఏష నిర్యాతితః శ్రీమాన్మయా తే వారిసమ్భవః।
ఏనం దృష్ట్వా ప్రమోదిష్యే వ్యసనే త్వామివానఘ ॥24॥
జీవితం ధారయిష్యామి మాసం దశరథాత్మజ ।
ఊర్ధ్వం మాసాన్న జీవేయం రక్షసాం వశమాగతా ॥25॥
ఇతి మామబ్రవీత్సీతా కృశాఙ్గీ ధర్మచారిణీ ।
రావణాన్తఃపురే రుద్ధా మృగీవోత్ఫుల్లలోచనా ॥26॥
ఏతదేవ మయాఽఽఖ్యాతం సర్వం రాఘవ యద్యథా ।
సర్వథా సాగరజలే సన్తారః ప్రవిధీయతామ్ ॥27॥
తౌ జాతాశ్వాసౌ రాజపుత్రౌ విదిత్వా
	తచ్చాభిజ్ఞానం రాఘవాయ ప్రదాయ ।
దేవ్యా చాఖ్యాతం సర్వమేవానుపూర్వ్యాద్
	వాచా సమ్పూర్ణం వాయుపుత్రః శశంస ॥28॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే పఞ్చషష్టితమః సర్గః