అథ సప్తషష్టితమః సర్గః
ఏవముక్తస్తు హనుమాన్రాఘవేణ మహాత్మనా ।
సీతాయా భాషితం సర్వం న్యవేదయత రాఘవే ॥1॥
ఇదముక్తవతీ దేవీ జానకీ పురుషర్షభ ।
పూర్వవృత్తమభిజ్ఞానం చిత్రకూటే యథాతథమ్ ॥2॥
సుఖసుప్తా త్వయా సార్ధం జానకీ పూర్వముత్థితా ।
వాయసః సహసోత్పత్య విదదార స్తనాన్తరమ్ ॥3॥
పర్యాయేణ చ సుప్తస్త్వం దేవ్యఙ్కే భరతాగ్రజ ।
పునశ్చ కిల పక్షీ స దేవ్యా జనయతి వ్యథా ॥4॥
తతః పునరుపాగమ్య విదదార భృశం కిల ।
తతస్త్వం బోధితస్తస్యాః శోణితేన సముక్షితః॥5॥
వాయసేన చ తేనైవం సతతం బాధ్యమానయా ।
బోధితః కిల దేవ్యా త్వం సుఖసుప్తః పరన్తప ॥6॥
తాం చ దృష్ట్వా మహాబాహో దారితాం చ స్తనాన్తరే ।
ఆశీవిష ఇవ క్రుద్ధస్తతో వాక్యం త్వమూచివాన్ ॥7॥
నఖాగ్రైః కేన తే భీరు దారితం వై స్తనాన్తరమ్ ।
కః క్రీడతి సరోషేణ పఞ్చవక్త్రేణ భోగినా ॥8॥
నిరీక్షమాణః సహసా వాయసం సముదైక్షథాః।
నఖైః సరుధిరైస్తీక్ష్ణైస్తామేవాభిముఖం స్థితమ్ ॥9॥
సుతః కిల స శక్రస్య వాయసః పతతాం వరః।
ధరాన్తరగతః శీఘ్రం పవనస్య గతౌ సమః॥10॥
తతస్తస్మిన్మహాబాహో కోపసంవర్తితేక్షణః।
వాయసే త్వం వ్యధాః క్రూరాం మతిం మతిమతాం వర ॥11॥
స దర్భసంస్తరాద్గృహ్య బ్రహ్మాస్త్రేణన్యయోజయః।
స దీప్త ఇవ కాలాగ్నిర్జజ్వాలాభిముఖం ఖగమ్ ॥12॥
స త్వం ప్రదీప్తం చిక్షేప దర్భం తం వాయసం ప్రతి ।
తతస్తు వాయసం దీప్తః స దర్భోఽనుజగామ హ ॥13॥
భీతైశ్చ సమ్పరిత్యక్తః సురైః సర్వైశ్చ వాయసః।
త్రీఀల్లోకాన్సమ్పరిక్రమ్య త్రాతారం నాధిగచ్ఛతి ॥14॥
పునరప్యాగతస్తత్ర త్వత్సకాశమరిన్దమ ।
త్వం తం నిపతితం భూమౌ శరణ్యః శరణాగతమ్ ॥15॥
వధార్హమపి కాకుత్స్థ కృపయా పరిపాలయః।
మోఘమస్త్రం న శక్యం తు కర్తుమిత్యేవ రాఘవ ॥16॥
భవాంస్తస్యాక్షి కాకస్య హినస్తి స్మ స దక్షిణమ్ ।
రామ త్వాం స నమస్కృత్య రాజ్ఞో దశరథస్య చ ॥17॥
విసృష్టస్తు తదా కాకః ప్రతిపేదే స్వమాలయమ్ ।
ఏవమస్త్రవిదాం శ్రేష్ఠః సత్త్వవాఞ్ఛీలవానపి ॥18॥
కిమర్థమస్త్రం రక్షఃసు న యోజయసి రాఘవ ।
న దానవా న గన్ధర్వా నాసురా న మరుద్గణాః॥19॥
తవ రామ రణే శక్తాస్తథా  ప్రతిసమాసితుమ్ ।
తవ వీర్యవతః కచ్చిన్మయి యద్యస్తి సమ్భ్రమః॥20॥
క్షిప్రం సునిశితైర్బార్ణైహన్యతాం యుధి రావణః।
భ్రాతురాదేశమాజ్ఞాయ లక్ష్మణో వా పరన్తపః॥21॥
స కిమర్థం నరవరో న మాం రక్షతి రాఘవః।
శక్తౌ తౌ పురుషవ్యాఘ్రౌ వాయ్వగ్నిసమతేజసౌ ॥22॥
సురాణామపి దుర్ధర్షౌ కిమర్థం మాముపేక్షతః।
మమైవ దుష్కృతం కిఞ్చిన్మహదస్తి న సంశయః॥23॥
సమర్థౌ సహితౌ యన్మాం న రక్షేతే పరన్తపౌ ।
వైదేహ్యా వచనం శ్రుత్వా కరుణం సాధుభాషితమ్ ॥24॥
పునరప్యహమార్యాం తామిదం వచనమబ్రువమ్ ।
త్వచ్ఛోకవిముఖో రామో దేవి సత్యేన తే శపే ॥25॥
రామే దుఃఖాభిభూతే చ లక్ష్మణః పరితప్యతే ।
కథఞ్చిద్భవతీ దృష్టా న కాలః పరిశోచితుమ్ ॥26॥
అస్మిన్ ముహూర్తే దుఃఖానామన్తం ద్రక్ష్యసి భామిని ।
తావుభౌ నరశార్దూలౌ రాజపుత్రౌ పరన్తపౌ ॥27॥
త్వద్దర్శనకృతోత్సాహౌ లఙ్కాం భస్మీకరిష్యతః।
హత్వా చ సమరే రౌద్రం రావణం సహబాన్ధవమ్ ॥28॥
రాఘవస్త్వాం వరారోహే స్వపురీం నయితా ధ్రువమ్ ।
యత్తు రామో విజానీయాదభిజ్ఞానమనిన్దితే ॥29॥
ప్రీతిసఞ్జననం తస్య ప్రదాతుం తత్త్వమర్హసి ।
సాభివీక్ష్య దిశః సర్వా వేణ్యుద్గ్రథనముత్తమమ్ ॥30॥
ముక్త్వా వస్త్రాద్దదౌ మహ్యం మణిమేతం మహాబల ।
ప్రతిగృహ్య మణిం దోర్భ్యాం తవ హేతో రఘుప్రియ ॥31॥
శిరసా సమ్ప్రణమ్యైనామహమాగమనే త్వరే ।
గమనే చ కృతోత్సాహమవేక్ష్య వరవర్ణినీ ॥32॥
వివర్ధమానం చ హి మామువాచ జనకాత్మజా ।
అశ్రుపూర్ణముఖీ దీనా బాష్పగద్గదభాషిణీ ॥33॥
మమోత్పతనసమ్భ్రాన్తా శోకవేగసమాహతా ।
మామువాచ తతః సీతా సభాగ్యోఽసి మహాకపే ॥34॥
యద్ ద్రక్ష్యసి మహాబాహుం రామం కమలలోచనమ్ ।
లక్ష్మణం చ మహాబాహుం దేవరం మే యశస్వినమ్ ॥35॥
సీతయాప్యేవముక్తోఽహమబ్రువం మైథిలీం తథా ।
పృష్టమారోహ మే దేవి క్షిప్రం జనకనన్దిని ॥36॥
యావత్తే దర్శయామ్యద్య ససుగ్రీవం సలక్ష్మణమ్ ।
రాఘవం చ మహాభాగే భర్తారమసితేక్షణే ॥37॥
సాబ్రవీన్మాం తతో దేవీ నైష ధర్మో మహాకపే ।
యత్తే పృష్టం సిషేవేఽహం స్వవశా హరిపుఙ్గవ ॥38॥
పురా చ యదహం వీర స్పృష్టా గాత్రేషు రక్షసా ।
తత్రాహం కిం కరిష్యామి కాలేనోపనిపీడితా ॥39॥
గచ్ఛ త్వం కపిశార్దూల యత్ర తౌ నృపతేః సుతౌ ।
ఇత్యేవం సా సమాభాష్య భూయః సన్దేష్టుమాస్థితా ॥40॥
హనుమన్సింహసఙ్కాశౌ తావుభౌ రామలక్ష్మణౌ ।
సుగ్రీవం చ సహామాత్యం సర్వాన్బ్రూయా అనామయమ్ ॥41॥
యథా చ స మహాబాహుర్మాం తారయతి రాఘవః।
అస్మాద్దుఃఖామ్బుసంరోధాత్ తత్ త్వమాఖ్యాతుమర్హసి ॥42॥
ఇమం చ తీవ్రం మమ శోకవేగం
	రక్షోభిరేభిః పరిభర్త్సనం చ ।
బ్రూయాస్తు రామస్య గతః సమీపం
	శివశ్చ తేఽధ్వాస్తు హరిప్రవీర ॥43॥
ఏతత్తవార్యా నృప సంయతా సా
	సీతా వచః ప్రాహ విషాదపూర్వమ్ ।
ఏతచ్చ బుద్ధ్వా గదితం యథా త్వం
	శ్రద్ధత్స్వ సీతాం కుశలాం సమగ్రామ్ ॥44॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే సప్తషష్టితమః సర్గః