అథ అష్టషష్టితమః సర్గః
అథాహముత్తరం దేవ్యా పునరుక్తః ససమ్భ్రమమ్ ।
తవ స్నేహాన్నరవ్యాఘ్ర సౌహార్దాదనుమాన్య చ ॥1॥
ఏవం బహువిధం వాచ్యో రామో దాశరథిస్త్వయా ।
యథా మామాప్నుయాచ్ఛీఘ్రం హత్వా రావణమాహవే ॥2॥
యది వా మన్యసే వీర వసైకాహమరిన్దమ ।
కస్మింశ్చిత్సంవృతే దేశే విశ్రాన్తః శ్వో గమిష్యసి ॥3॥
మమ చాప్యల్పభాగ్యాయాః సాంనిధ్యాత్తవ వానర ।
అస్య శోకవిపాకస్య ముహూర్తం స్యాద్విమోక్షణమ్ ॥4॥
గతే హి త్వయి విక్రాన్తే పునరాగమనాయ వై ।
ప్రాణానామపి సన్దేహో మమ స్యాన్నాత్ర సంశయః॥5॥
తవాదర్శనజః శోకో భూయో మాం పరితాపయేత్ ।
దుఃఖాద్దుఃఖపరాభూతాం దుర్గతాం దుఃఖభాగినీమ్ ॥6॥
అయం చ వీర సన్దేహస్తిష్ఠతీవ మమాగ్రతః।
సుమహాంస్త్వత్సహాయేషు హర్యృక్షేషు హరీశ్వర ॥7॥
కథం ను ఖలు దుష్పారం తరిష్యన్తి మహోదధిమ్ ।
తాని హర్యృక్షసైన్యాని తౌ వా నరవరాత్మజౌ ॥8॥
త్రయాణామేవ భూతానాం సాగరస్యాస్య లఙ్ఘనే ।
శక్తిః స్యాద్వైనతేయస్య వాయోర్వా తవ చానఘ ॥9॥
తదస్మిన్కార్యనిర్యోగే వీరైవం దురతిక్రమే ।
కిం పశ్యసి సమాధానం బ్రూహి కార్యవిదాం వర ॥10॥
కామమస్య త్వమేవైకః కార్యస్య పరిసాధనే ।
పర్యాప్తః పరవీరఘ్న యశస్యస్తే బలోదయః॥11॥
బలైః సమగ్రైర్యది మాం హత్వా రావణమాహవే ।
విజయీ స్వపురీం రామో నయేత్తత్స్యాద్యశస్కరమ్ ॥12॥
యథాహం తస్య వీరస్య వనాదుపధినా హృతా ।
రక్షసా తద్భయాదేవ తథా నార్హతి రాఘవః॥13॥
బలైస్తు సఙ్కులాం కృత్వా లఙ్కాం పరబలార్దనః।
మాం నయేద్యది కాకుత్స్థస్తత్తస్య సదృశం భవేత్ ॥14॥
తద్యథా తస్య విక్రాన్తమనురూపం మహాత్మనః।
భవత్యాహవశూరస్య తథా త్వముపపాదయ ॥15॥
తదర్థోపహితం వాక్యం ప్రశ్రితం హేతుసంహితమ్ ।
నిశమ్యాహం తతః శేషం వాక్యముత్తరమబ్రువమ్ ॥16॥
దేవి హర్యృక్షసైన్యానామీశ్వరః ప్లవతాం వరః।
సుగ్రీవః సత్త్వసమ్పన్నస్త్వదర్థే కృతనిశ్చయః॥17॥
తస్య విక్రమసమ్పన్నాః సత్త్వవన్తో మహాబలాః।
మనఃసఙ్కల్పసదృశా నిదేశే హరయః స్థితాః॥18॥
యేషాం నోపరి నాధస్తాన్న తిర్యక్సజ్జతే గతిః।
న చ కర్మసు సీదన్తి మహత్స్వమితతేజసః॥19॥
అసకృత్తైర్మహాభాగైర్వానరైర్బలసంయుతైః।
ప్రదక్షిణీకృతా భూమిర్వాయుమార్గానుసారిభిః॥20॥
మద్విశిష్టాశ్చ తుల్యాశ్చ సన్తి తత్ర వనౌకసః।
మత్తః ప్రత్యవరః కశ్చిన్నాస్తి సుగ్రీవసంనిధౌ ॥21॥
అహం తావదిహ ప్రాప్తః కిం పునస్తే మహాబలాః।
నహి ప్రకృష్టాః ప్రేష్యన్తే ప్రేష్యన్తే హీతరే జనాః॥22॥
తదలం పరితాపేన దేవి మన్యురపైతు తే ।
ఏకోత్పాతేన తే లఙ్కామేష్యన్తి హరియూథపాః॥23॥
మమ పృష్ఠగతౌ తౌ చ చన్ద్రసూర్యావివోదితౌ ।
త్వత్సకాశం మహాభాగే నృసింహావాగమిష్యతః॥24॥
అరిఘ్నం సింహసఙ్కాశం క్షిప్రం ద్రక్ష్యసి రాఘవమ్ ।
లక్ష్మణం చ ధనుష్మన్తం లఙ్కాద్వారముపాగతమ్ ॥25॥
నఖదంష్ట్రాయుధాన్వీరాన్ సింహశార్దూలవిక్రమాన్ ।
వానరాన్ వారణేన్ద్రాభాన్ క్షిప్రం ద్రక్ష్యసి సఙ్గతాన్ ॥26॥
శైలామ్బుదనికాశానాం లఙ్కామలయసానుషు ।
నర్దతాం కపిముఖ్యానాం నచిరాచ్ఛ్రోష్యసే స్వనమ్ ॥27॥
నివృత్తవనవాసం చ త్వయా సార్ధమరిన్దమమ్ ।
అభిషిక్తమయోధ్యాయాం క్షిప్రం ద్రక్ష్యసి రాఘవమ్ ॥28॥
తతో మయా వాగ్భిరదీనభాషిణా
	శివాభిరిష్టాభిరభిప్రసాదితా ।
ఉవాహ శాన్తిం మమ మైథిలాత్మజా
	తవాతిశోకేన తథాతిపీడితా ॥29॥
ఇత్యార్షే శ్రీమద్్రామాయణే వాల్మీకీయే ఆదికావ్యే సున్దరకాణ్డే అష్టషష్టితమః సర్గః